WEN, SIKA, WEN

sika, wen:
datdatlag a burtia ti bursi dagiti sirmata
darikmat nga agnanayon iti pitik dagiti parmata
talek ti tagiruot ti linnaaw dagiti namnama
isem a di maakas iti karayo dagiti agsapa
talugading ti kullayaw ti linabag dagiti rikna
sarming a kasin-awan iti dungngo dagiti sapata

sika a librok lubongko kararuak ispirituk
danonennak yallatiwnak alimpatok
talinaay-kinapudno-pia a santak talibagok
dayta ayat, daytoy ayat, ayatta a naipanurok
ta kadi sumken latta, patinayon, di maungpot
misterio-senarion' patempateg, sikansiak, pulos
a di aglumen, daniw-samiweng a di mautob
nobela a di aggibus, awanan ungpot

wen, sika:
sirmata dagiti bursi ti burtia a datdatlag
parmata dagiti pitik iti agnanayon a darikmat
namnama dagiti linnaaw iti tagiruot ti talek
agsapa dagiti karayo iti di maakas nga isem
rikna dagiti linabag iti kullayaw ti talugading
sapata dagiti dungngo iti kasin-awan a sarming