BAKASIONISTA

Nakamisuot a sumipnget ti nangabrasa iti isasangbay
Ti agdudungsa a baddekko. Kuskusilapak ti desdes
a payatek. Kasna man la yunget a danonek ti away
a birbiroken ti alintataok iti linged dagiti kasla
umad-adayo, agpaspasugnod a muyong ken turod. Idi taliawek
ti likudak, guyguyabannak ti pinanawak a kalsada. Kasna
man la kunkuna: Ita man pay a nakalagip a nagawid... Intarengtengko
ti nagna, kinugtarak dagiti masagang a bingkol ken bato; inwalin
ken tinukkol dagiti umaplit a pan-aw, tanglar, ledda, garem, remmeng. Linabsak
dagiti nakarupanget a bunton, bittaog, bayog, pakak, puriket. Kasda man
la ibagbaga: Siasinoka a ganggannaet, addaakon, dimo pay kuna? Naalunapet,
adda budo ti pul-oy nga umapras. Rumabiin a rumabii. Ket makasungeg
ti ariwawa dagiti kuriat, puek, karag, ken mangrabrabii a riari. Makaulaw
ti angseg ken baniit ti isbo ken takki ti nuang a masalapon. (Kaariekko
pay ngatan ti aros-aros, tateg, sibbaweng, ararawan, alukap?) Insimpak
ti nagirig a napsak a kumalkali iti abagak. (Nadagsen
met ti sumagmamano a mansanas, biskit, sigarilio, ken arak
nga iliw ti siudad kadagiti madatngak a nalabit nakalipaten a mangsegga
kaniak.) Inamlid ti tammudok ti ubbog ti ling-et iti muging ken pispis. Intuloy
dagiti arrap a sapatos ti naginnuna iti nakangisngisiten a dalan. Sinarik
dagiti kasla mangalun-on a lipit ken pagsikkuan. Agingga a matuparkon
ti kasla kamposanto nga arubayan a nagkul-oban dagiti duog a mangga, santol,
salamagi, ken tsiko. Ngem nakakidemen dagiti tawa, nagkitemen
dagiti ridaw. Nailibayen ti algarruba, ti ipil-ipil, ken ti marunggay. Naulimek
dagiti saba, niog, bogimbilia, santan, mansanita. Natayen
dagiti pagsaingan ken dalikan. Nagsarimadeng dagiti umanal-al
a mukod. Kasda man la yan-anangsab: Addaakon, addaakon.... Simmabet
ti taul, ngernger, paskad, dap-as dagiti aso a makaunget. Nariknak
ti paksuy dagiti nabannog a dapanko, ti napakil a barukongko. Ket
diak ammo no laktawek ti layawan ti kasla pabaor
itan a serkan ti ruangan iti inaladan, wenno agbueltaak
laengen ket kamakamek ti lugan nga agsubli iti nakayaw-awanak
a siudad.