AMBISION

Kunan' Intoy: inton dumakkelak, diakto kayat
Ti agbalin a doktor kas sigudko nga arapaap
Kunak man no naasi, nalaing a mangagas
Ngem `diay doktor a napananmi idi ni Amang mahayblad
Kunana ketdin a dina ammo ti mangagas
Agingga nga awan ipaunami a bayad!

Ni met Onnang innan isarsarita:
Diak metten kayat ti agbalin nga abogada
Kunak man no kalintegan ken kasiriban a talaga
Ngem `diay atorni a kanayon man a nakakurbata
Dagmel met gayam! Awan kano ketdin pulos basolna
`Diay Don Baknang a nangagaw kukuami a dagdaga
Ket da ketdin Amangko a nagreklamo ti impaipupokna!

Diak met kayaten ti agbalin a soldado, kunan' Butog:
Kunak lan' namayat ken nadayaw ti agiggem paltog
Ngem dagiti soldado nga immay iti purok
Nakaung-ungetda man ken permi a naglalastog
Inda ketdin inkugtakugtar ken kinulakulata ken dinanogdanog
Da manongko, rebeldeda kano ket saan met
Inda pay innalat' dadduma ket dimin napaspasangpet!

Ni met Simang kunkunana: ti agmaestra, diak kayaten
Kunak lan nalaka ken nakaragragsak ken daydayawen
Ngem ni Mistrami bakbaketanen a balasang awan pay agarem
Lalo manen idi inikkatda ta nakiralirali ketdin
Sada nagpabpabisin tapno kano dawatendat' agas ti bisin!