MASMASDAAW NI AMBONG

1. Masmasdaaw man ni Ambong kada Sheryll ken Clifford
   A manang, nanang ken tatangda adda iti abroad:
   Ni Sheryll kanayonna man nga ibida
   French fries, pizza ken hamburger a paboritona
   Shakeys kas kada Mcdo kanayon pay a sangkabagana.
   Kasta met ni Clifford inna latta sarsaritaen
   Mansanas, Dunkin' Donuts ken Wendy's fried chicken
   A pabpaboritona met, `gitoy kanot' kaiimasanen!
   Inda pay kankanayon nga isusuot
   Imported kano a badbadoda ken sapsapatos
   Uy-uyawendat' badbadomi a daan ken takuptakup!

2. Masmasdaaw latta ni Ambong uray idi innan maramanan
   Paborito la unay da Sheryll ken Clifford a makmakan:
   (Ta nagbertdey ni Ambong ket insagutan
   Ni ninongna a Sammy a nakabakbaknang
   Iti mansanas a nagadu, kinarton a Shakeys,
                             Wendy's, Dunkin' ken Mcdo!)
   Ay, french fries gayam patatas la a nagergerret ken naprito
   Naim-imas pay met lat' camote-q nga adayo!
   Naay, mansanas gayam awan ramramanna
   Bayyabas naim-imas pay ken nabitbitamina!
   Sus, fried chicken gayam white leghorn a manok la a naprito
   Nanannanam pay lat' native a manok wenno abuyo
                             a naituno!
   Pizza a tila adda, naim-imas pay lat' bibingka!
   Dunkin Donuts, ay, naim-imas pay lat' bitsobitso ken baduya!
   Uray hamburger, tinapay la gayam ken tapa a baboy-baka!

3. Masmasdaaw ni Ambong kada Sheryll ken Clifford
   A manang, nanang ken tatangda adda iti abroad:
   Singer ni Manang Rita! inda kuna; japayuki! kunat' tattao
   Nars ni Mommy! inda ibida;
                             tagabo-babai `giti Arabo! kunat' adu
   Manager ni Daddy! inda ibaga;
                             janitor `giti Kano! kunat' saosao...
   Imported a bado ken sapatosda inda man paglaslastog
   Shakeys, Wendy's, Dunkin. Mcdo inda man agburburarog
   A, masmasdaaw ni Ambong kada Sheryll ken Clifford!