MAYSA NGA APOLOHIA MANIPUD ITI MAYSA NGA AGBALIN NGA AMA
(para ken Sadiri: anakko, inton mannaniwka metten)

PAKAWANENNAK, ANAKKO, ngem saanak a nagilem, nasiudotak laeng kadagiti lawwalawwa a dutdotan ken ramayramayan nga agar-aramid kadagiti napipigket a balay, iti kada sumipnget, iti hardin ti rosas ken santan ni inam. Isuda pay a makibingay iti karuay dagiti legleg sepsep lamok ngilaw simotsimot a kaduak a manglamay kadagiti imassayagko a bangkay: bangabanga ken rurog ti ublag ken durog nga itanemko, iti kada bigat, iti sakaanan dagiti rosas ken santan ni inam. Pagungarek ida a busel ken sabong nga agtagidara ken agtagilasag a daniw: sika

PAKAWANENNAK, ANAKKO, ngem ginandatko idi a ray-aben dagiti napipigket a balay a pagur-urayan dagiti dutdot ken ramay iti hardin ti rosas ken santan ni inam. Ngem inatipanak idi ti sardam. Linapdannak ti kasaor. Binagbagaannak ti bulan, inlawlawagna ti naggidiatan ti alimbubuyog ken ti kulibangbang, ken ti nagpadaan ti libro ken ti sabong.
        
        Ket nagsiudotak kadagiti legleg sepsep lamok ngilaw simotsimot a no kua ket mangsinga kadagiti pagung-ungarek a bangkay, ken no kua ket mangidde-iddep iti kandila a manglamlamay.
        
        Ket kinatolko ida. Sinipatko ida. Pinis-itko ida.

PAKAWANENNAK, ANAKKO, ta ti agpayso: nagilemak kadagiti lawwalawwa a dutdotan ken ramayramayan a nangseppeg, ken nangkalpot, ken nangsisip iti tubbog, ti naruay a legleg sepsep ngilaw simotsimot a simrek kadagiti napipigket a balay iti hardin ni inam. Ta isu pay koma nga inulaw ti katolko. Isu pay koma a pinettak ti dakulapko. Isu pay koma nga impinas ti tangan ken tammudok.

        Manmano ngamin ti nakatolko. Manmano ngamin ti nasipatko. Manmano ngamin ti napis-itko. Naatapda. Nasikapda. Natusoda. Awananak ngamin iti napigket a balay. Wenno agur-uray a dutdot ken ramay,

PAKAWANENNAK, ANAKKO, ala, uray ta adu met a busel ken sabong ti nagungar kadagiti naitanem a bangkay iti sakaanan dagiti rosas ken santan iti hardin ni inam. Bangabanga ken rurog ti ublag ken durog a nagtagidara ken nagtagilasag; sika a daniw.

21 mayo 1996