VILLANELLE PARA KEN SIRMATA
(Basangko, inton maammuam a sika ti daniw)

Tiliwento dagita matam dagiti anniniwan iti sardam,
Ket birokemto ti bituenmo iti mangwaknit a law-ang
Kalpasan dagiti tudo iti malem a mangdiram-os iti bulan.

Agur-urnongak kadagiti papel a nakumel ken nasuratan,
Maawatamto, uray dagiti pundido a bombilia ken pagsaingan,
Tiliwento dagita matam dagiti anniniwan iti sardam.

Maduktalamto pay dagiti lapis a daradara ken napuoran
Ket agparangto kenka ti adu a layap iti tangatang
Kalpasan dagiti tudo iti malem a mangdiram-os iti bulan.

Seggaamto met ti rabii a mangikari iti musa ti kaltaang,
Tarigagayamto met a bukodan ti agpatnag a kaay-ayam,
Tiliwento dagita matam dagiti anniniwan iti sardam.

Ipudnonto dagiti kulalanti ken legleg ti pakasaritaan
Dagiti indulinko a nagango a sabong a narsaak iti langalang
Kalpasan dagiti tudo iti malem a mangdiram-os iti bulan.

Ukagemto dagiti ipatawidko a libro ngem dimo masarakan
Ti bituenmo a di mabirokan mangwaknit man ti law-ang,
Tiliwento dagita matam dagiti anniniwan iti sardam
Kalpasan dagiti tudo iti malem a mangdiram-os iti bulan.