HUNIO 12 NI NAWAYA

ay, ta natalgedka man `ita isem-tangig
`ta pannakkel-nakem `ta isipmo a tingig
ta kalangen-singedmo man arapaap ni saplit
ni wayawayam a pait ni nawaya nga agsangsangit
a naidalan ken ni siit
ti tarumamis ni kur-it
iti historia a bir-it
apagkanito a sam-it
agnanayon a sakit

maysa nga aldaw ni langit
dinekdekada ni ulpit
siniglo ni balangkantis
(dimo kadin malagip, carajo a sonofabitch
ti maysa nga aldaw ni ivan denisovich
wenno ti panagalla-alla ni ulysses
iti maysa la nga aldaw, lukdit
da leopold bloom ken stephen dedalus?)
aysus, aysus, aniaka metten, yos!
namnamaem lattan ni libnos
ti labus a kabus
ni bastos a pisos a limos nga agkaraibus
nga arkos ken taraon ni sinan-dios
pogi nga incubus, bakla a zeus
pordios, pordios! lattan ta ipuska nga ipus
dalapus a dalapus, apros nga apros
pisok a pisok, uksot nga uksot
bigsobigsot, baltobaltog
baningrot a baningrot, urok nga urok
siasinoka metten ngay, yos!

agnanayon a sakit
apagkanito a sam-it
iti historia a bir-it
ti tarumamis ni kur-it
a naidalan ken ni siit
ni wayawayam a pait ni nawaya nga agsangsangit
ta kalangen-singedmo man arapaap ni saplit
`ta pannakkel-nakem `ta isipmo a tingig
ay, ta natalgedka man `ita isem-tangig