awag

Aw-awaganka, musak, sapsapulenka
iti tanduyong a tanggaya
dagiti berbo iti let-ang
ti managbasol a bangketa. Yanmo, aya,
musak, ta awanka kadagiti lua a dara
dagiti inosente a bayabas ken baog
a katedral? Pagano `toy rikna, agdadagsen
ti konsensia a sinalsal ti agmaya
a sirib. Yanmo, musak, ta koma yutem
`toy birhen pay laeng a nakem? Napanamon,
sursurotenka iti mantra dagiti nakadalupisak
a pungdol, dagiti mangmangan iti plastik
a mansanas ken dagiti addaan tallo
nga alintatao a manglabaslabas kadagiti
namasaker a tugot iti aspalto. Yanmo, aya, musak,
itabonmo kadi, ala, dagiti rurog iti pusok.
Aw-awaganka, musa ti aginaw a dapanko, lamayenta
kadi, ala, dagiti bangkay iti utekko ket ulsam
dagiti nagbuto ken naguki iti barukongko, sindiam
ti kandila iti tammudok, ilungonmo ti sennaay
iti abagak. Agpakitaka kadi, ala, musak, yanmo?
Um-umkis dagiti gemgem nga aglulumba iti piskelko.
Umanangsab dagiti ganat ti kaunggan iti kikitko.
Musak, yanmo, aya, ta koma ikukuannak? Yanmo, ta koma
pellesam iti isem dagiti ngirsiit iti matak? Umayka,
musak, ur-urayennaka `toy aguttog a daniw.