diak masirip ti sapsapinan maganatan a bigat

yar-arasaas dagiti buridek dagiti umno a sungbat
kadagiti agdardara a saludsod ti kikitko a masakit
ngem diak masirip ti sapsapinan maganatan a bigat.

agkamuras ti gatilio, ania a gatel ti mayagas?
agpakaponak kadi kadagiti mangibagbagi iti langit?
yar-arasaas dagiti buridek dagiti umno a sungbat.

nakitakon ti pigad ken kampit iti murdong ti rigat,
nabirokak payen dagiti rurog a nakadulin iti pispis
ngem diak masirip ti sapsapinan maganatan a bigat.

naidalit ngamin ti obispo ti garumiad iti arak
isu ngata nga agkaiwara dagiti sutana a nangisit.
yar-arasaas dagiti buridek dagiti umno a sungbat.

dinardaraan ti merienda ti inauna a sugat
ket ammokon no nagtaudan ti nalabaga a lapis
ngem diak masirip ti sapsapinan maganatan a bigat.

ania kadi ti ilimlimed ti ledda, ti bantay, ti takiag?
kaano kadi ti nepnep, kaano a maarado dagiti tangkig?
yar-arasaas dagiti buridek dagiti umno a sungbat
ngem diak masirip ti sapsapinan maganatan a bigat.