ZINGSOL 2002 HOME

ZINGSOL WEBSITE 2002

HIH LAI AH KEI OM ING, KEI HONG SAWL IN ( ISAIAH 6:8 ) Malaysia gam pan Zomite "ZINGSOL".

ia Zingsol khol ( 1 ), Hawm 1, 2, 3, 4, 5, 6, 7, 8, 9, 10, 11, 112,

" Editorial

Pasian’ hong itna leh hong hehpihna mihingte’n ih muh,ih theih siam nadingin Pasian in nute hong zangin hong kilang khia sak hi ci-in laibu khat sungah ka sim ngei hi.

Pasian in nute’gil suangah naubu hong koihsak ahih manin Late aphuakpa kumpi Davuid in“Ka nu in hong paai lai-a kipan keima Pasian nahi hi” a cih mah bangin eite in zong hong piangsak Pasian tungah lungdam ih kohsiam ding kisam masa hi.Nute in kha(9) sung tawntung anaubu sungah hong paii-in,cidam tak a hong suah khia hiAnawizu tawh hong vak in,hong keem toto a,thuman lampi-ah ding in innkuan kipumkhat theih nading thu ngetna tawh ma a pang den a it huai leh a zahtak huaite ahi uh hi.Nuntak haksatnate ih thuaksiam theih nading hong makaihsiamte zong ahi uh hi.Nute’ hong itna leh hong pattahsiamnate phawk siam in lungdam ko a, ih lungkim sak ding zong thupi hi.Pate pen mihing khempeuh tawh a kimematte ahi uh hi.Pa om lo in apiang mi khat zong om lo ding hi.Innkuan khat sungah zi leh tate’nuntak nopsak theih nading thumanna tawh a hanciamte ahi uh hi.A etteh huai Tapidaw innkuan a suah theih nading lamlakpa zong hi uh a,a thupi pen din mun-ah om uh hi.

Thuciamlui sungah Izet in apa Abiahang’ thu mangin a nasempa zon sak Rebekah tenpih ahih manin Topa’n thupha pia hi.Ahi zongin Pasian mizat khat ahi Samson ahih leh apa awi loh dawibia nungaak khat tenpih ahih manin khangno laipi-in a mitte kikhel sak a,sihsia tawh si hi.Hih thute etteh huai lo hiam?

Khangluite’n “Nu leh pa thu mangte anahlawh pek”acih mah bangin nu leh pate lungkim sak leng thupha hong luang thei pan ding hi.Nu leh pate ii thupha om lopi-in leitung ih khualzinna khuamial lampi-ah meivak omlo pi-in lampaite ih batkhak ding lauhuai hi.Nu leh pate in zong ko na tate thuman lampi-ah makaih siamin hauhna,pilna,siamnate ah mite ka phakzawh nading thupha nong piaksiam ding uh kisam hi.

Tua ahih manin ei a tate in zong ih pianna nu leh pa itna tawh zahtak bawlin thupha dawh siam ciat ni.Nu leh pate ii muh theih gamhte sangin muh theih loh thuphate lunggulh zaw ni.Nu leh pate’ii hong thuhilhnate mangin, a maute’ tungah kam tawh ahi a,gamtatna tawh ahi zongin ih mawh ih khialhnate pulakin mawhmaina ngenin thuum kik ni.Nu leh pate pen Leitungah khansauin lawhcin nopsakna leh cidamna ih ngah theih nading ih thupha naak hi a,mitmuh theih leitung Pasian ahi uh hi.

TOPA MUHTELNA LEH THEIHTELNA

“Hehpihna thu leh ih Topa leh Honpa Zeisu Khazih theihna thu-ah na khangto semsem zaw un.”( 2 Piter 3:18)

Topa Zeisu thei khalo a nisim naisim in Hell lam azuan leitung mi tulza tampite ading ih ngaihsut sak ciangin bang zah takin lunggim huai leh patauh huai ahi hiam?Tua ahih manin gupna ih ngah theihna dingin eite mawhna tang ding a si Zeisu ih theih ding leh ih muh ding pen aki tangsam masa pen ahi hi.Topa Zeisu honpa leh gumpa inna san khit ciangin Topa Zeisu theihtel ding bang kisam nawn ding hiam? na ci kha ding hi.Gupna ngah nading in Topa muhna leh theihna in Pasian’inn sung lut theih nading kongkhak hi pan a, asung a om vanmanphate,innsung omzia,sep le bawl ding bangmah na thei nai kei hi.

Zeisu in akipatcil a om Thu hi-in ,amasapen(Alpha) leh anungpen(Omega) Pasian ahih manin leitung mihingte in ih thei khin zo ngei kei ding hi(Johan 1:1,Mang 22:3, Johan 21:25).Zeisu in vantung leitung,muhtheih muhtheihloh nate,kumpi tokhom vangletna khempeuh piang sakin na khempeuh ama sung ah om hi(Kalote1:15).Tua ahih manin na khempeuh kicinna ahi Zeisu theihtelna ah eite ih khantoh semsem ding pen Pasian’deihna leh hong sapna ahi hi.Topa ih theihtel nading leh ih muhtel nading Pasian mahmah eitung ah hong kilangh masak kul hi.Pasian pen mikhat tungah aki laak nop ciangin hopihna,maangmuhna (vision),kamsan-na,hanthotna,nisim sep le bawlna leh mang sung te ah kilangh thei hi.Tua ahih leh Topa kuate tungah kilangh a,koici bang mite tungah kilangh nuam ahi hiam?Cih thu anuai ah ih en suk ding hi.

Ama tungah a citakte kiangah Topa kilangh

Mosi in Kush numei khat tenpih ahih manin ama tenpih Kush numei hangin Miriam leh Aron in amah gensia uh a,amaute in, “Topa in Mosi’tung bek tawnin thu gen ahi hiam?Eite’tung zong tawnin hong gen hi lo ahiam?”aci uh hi.Topa in tua thu za hi.Pasal pa Mosi lungnem mahmah a,leitung a om mi khempeuh sangin lungnem zaw hi.Topa in thakhat thu- in Mosi leh Aron leh Miriam kiangah, “Kikhopna bukah no mihing thumte hong pai un,”aci hi.Amau thumte pai uh hi.Meiikhuam sungah Topa hong kumsuk in,kikhopna buk kongah ding a,Aron leh Miriam sam hi.Amautegel mailam nehin hong pai uh hi.Amah in, “Ka thu za un:Note lakah kamsang aom leh Topa kei mah in ama tungah mangmuhna tawh ka kilangh a,amah tawh mang sungah ka kiho hi.Ka nasem Mosi tawh tua bang hilo hi;kei inn sung thu khempeuh amah ki ap hi.Amah tawh kam leh kam kiho in akitel lo kampaute tawh hi loin,akiteltakin(maitang kituah) thu ka gen uh a,amah in Topa’ mel mu hi.Tua bang ahih ciangin bang hangin ka nasem Mosi gensiat ding laulo nahi uh hiam?”aci hi.Amaute’tungah Topa heh mahmah a,ahehsa pi-in a pai khia hi.Puanbuk tung san panin meiipi aki lak khiat ciangin Miriam phak a,vuk bangin a pak hi.Miriam lamah Aron kihei a,tua numei na phak hi.( Gamlak vakna 12:1-10)

.Pasian hong piak kivakna,siamna,talen khat peuhpeuh hangin ei le ei kimuang in tungsiah maikaite’kicin lohna khatpeuh kawk in neumuh pahpah loh ding zong thupi hi.Tu hun ciangin mun khempeuh ah Kha khanlawhna hong tung ahih manin Kha Siangtho letsongte zong mimal kim in ki ngah ta hi.Gentehna in kamsan theihna,lasak siamna,thu nget theihna leh piak khiat zawhna khatpeuh neih na hang tawh siate khawng hawmthawh in ki langpang kha thei hi.Ahi hangin Pasian in ama’nasem dingin pilna siamnate sangin kuate citak a,kua in singlamteh pua a,kua in veina tawh nasem cihte na ciamteh zaw hi.Mosi in Topa tawh maitang kituah in kiho den uh ahih manin Miriam leh Aronte sangin Topa theitel zaw hi.Mosi in Pasian’min thei hi(Late 91:14).Pasian in zong Mosi pen amin in thei hi(Paikhiatna 33:17).Eite zong ih nuntakna,ih kalsuanna,ih sepna peuh ah Topa’tung citak lehang Pasian’maipha ih ngah ding a, Topa eitungah hong kilangh nuam ding hi.Topa hong kilamgh leh amah ih theitel ding a,Topa theihtelna in haksatna,ze-etnate hong thuak zo sakin hong lungkia sak ngeilo ding a,gualzawhna leh lawhcin-na hong pia ding hi. “Thu manna leh cihtakna khahsuah ngeikei in la,na ngawng ah tuate ok-in,na lungtang tungah geilh in.Tua hi leh,Pasian leh mite’ mai-ah maipha ngah in na ma vang ding hi”(Paunak 3:3).Na khatpeuh na sepna thu theitel in;tua hi leh na sep peuhpeuh ma vang ding hi” ( Paunak 4:26).

Amah a it te kiangah Topa kilangh

Tua ciangin nungzuite a inn uah ciah kik uh a,ahi hangin Mari han pua-ah dingin a kap hi.A kah kawmkawm in kunsukin han sung a et leh,puanpak silh vantung mi nih,Jesu luang kisialna mun,a lukhungah khat,a khekhuantaw-ah khat a tu a mu hi.Amaute in, “Numei aw,bang ding a kap nahi hiam?”ci-in a dong uh hi.Tua nu in, “Ka Topa lakhia mang uh a,koi-ah koih uh hiam,ka thei kei hi,”a ci hi.Tua lai takin a nunghei leh a nung ah Jesu a ding a mu hi;ahi zongin Jesu ahih lam a thei kei hi.Amah in, “Numei aw,bang ding a kap nahi hiam?Kua zong na hiam?”a ci hi.Tua nu in huan neipa sa a, “Sia aw,amah na puakkhiat mang ahih leh koi-ah koih nahi hiam,hong gen in,ken ka la kik nuam hi,”a ci hi.Jesu in, “ Mari” ci-in a sam hi.Ama lam nga-in amah kihei a Aram pau in, “Raboni!”ci-in a awng khia hi…………..Tua thu tawh Mari Magdalene,nungzuite kiangah pai in, “Topa ka mu khin hi!”a ci hi.Jesu in ama tunga a gen khempeuh amaute a ko hi(ZIVJohan20:10-18)

Pitazuh,Johante a kipan nungzui tampi tak om napi bang hangin Mari Magdalene kiangah Topa kilangh masa se ahi hiam?Zeisu a nuntak lai-in tuanu sung a om dawi sagihte hawlkhia in dam sak a,a mawhnate zong mai sak ahih manin Zeisu tungah a itna leh a lungdamna lian mahmah hi.Galile gam panin Zeisu hong zui in,kum thum sung tawntung Zeisu ki tangsapnate a huh numei khat ahi hi.Bawlsiatnate hong thuak lai takin zong Mari in nusia tuan loin a gal khat pan en ngiu ngeu hi(Mate 27:55).Zeisu a kivui khit ciangin zong nusia tuan loin hankhuk maingat in tu ngeu ngeu hi(Mate 27:61).Thokik ding cih upna neilo napi zingsang in Zeisu’han hong zuat leh Topa ama kiangah kilangh hi(Johan 20:1).Lametna tuamtuam tawh Zeisu nung a zui mitampite in Zeisu nuntak lai-in taisan mang mah ta leh,Zeisu asih khit ciangin a luang hawm nangawn nusia lo a, a it ngiat Mari Magdalene ahi hi.Tua mah bangin amah a it te ciamteh in,lungdamna leh lungnopna tawh a kidim theihna dingun amaute tungah a kilangh nuam ih Topa ahi hi. “Theihna in mi kisathei sak a,itna in a khansuah hi.Ka thei hi ci-a a ki ngaihsun mi in ama theih ding zah a thei nai kei hi.Ahi hangin Pasian a it mi Pasian in athei hi.”(ZIV 1Korin8:1-3)

Ama’thu a gengente kiang ah Topa kilangh

Tua ni mah in amaute lakah nih,Jerusalem panin tai sagih bang a gamlatna Emau kici khua neu ah a pai uh hi.Amaute gel in tua thupiangsa khempeuh a kikum uh hi.Hih thute kikumin a paupau laitakun Jesu mahmah hong paito in amaute tawh a ton khawm

hi.Ahi hangin amaute lakah amah a kitheisak kei hi.Amah in amaute kiangah, “Na pai kawmkawmun bang kikum na hi vua?”ci-in a dong hi.Amaute mai mialin a din khawl uh hi……Amaute in, “Nazareth mi Jesu thu ahi hi.Amah kamsang khat hi a,Pasian’mai leh mi khempeuh mai-a,apauna le a tatnate ah vang anei hi.I siampi makaite leh vaihawmte in amah a si dingin thu khen uh a,a kilhlum uh hi;ahi hangin kote in Israel-te tankhia ding pa amah ahi ding a ka na lamet uh ahi hi,”……ci-in a dawng kik uh hi………Amaute a pai na ding uh tua khuaneu a zuat laitakun Jesu a paisuak lai ding bangin a kineih hi.Ahi hangin amaute in, “Ni kai lua ta a,ni tum phial ta ahi ciangin ko kiangah hong tam in,”ci-in amah a kun uh hi.Tua ahih ciangin amah pai-in amaute kiangah a tam hi.Amah in amaute tawh ankuang a um khawm ciangin,anlum la a,lungdam ko in,balkham a,amaute a pia hi.Tua ciangin amaute a mit uh kihong a,ama meel athei cian uh hi(ZIV Luka 24:13-31)

Jerusalem khua sungah Zeisu thokik zo cih thu ki gen zelzul in zuauthu leh thutak ki khentel theilo hi.Jerusalem panin Emau khua a zuan nungzui nihte in zong Zeisu sung a alametna uh bei tuanlo ahih manun Topa Zeisu thu mah lunglut tak leh lung himawh takin hong kikum tanghtangh uh hi.Tua lai-takin Zeisu nungzui ahih lam mite in thei leh lauhuai napi-in hih nungzui nihte in a upna leh a lametna uh imcip loin,amau tawh atonkhawm mipa (Zeisu)kiangah hangsan takin hong hawmsawn lai uh hi.Tua bangin amaute in Zeisu thu a omna,a paina peuh uah kikup bel in nei uh ahih manun Topa pen amaute kiangah a kilangh nuam ahi hi.Eite in zong ih omna,ih khawlna,ih vahna leh ih ciahna munte ah Bang thu gen bel leh kikup bel in ih nei hiam?Ciamnuihthaanghuai thute,nu le pa zahmawh thute,mi gensiat leh zuauthute gen bel in ih nei kha hiam?Tua bang thute gen in nuam ih sak lai teng Topa ei tungah hong kilangh nailo ding a,Pasian’vangletna leh a hoihnate zong ih mu kha kei ding hi.Topa ei tungah hong kilaak theih nading in ih nuntakna sungah hong piak sa thupha hehpihna thuphate sim in,lungdam kohna ama tungah gen gen ding hi hangh.Tua hi leh Topa ei tungah lungkim in,a hehpihna hong sung thuah lai ding a,ei kiang pan in midangte tungah hong let khia ding hi. “Hotkhiatna hangin lungdamna thu thak mi honpi lakah ka gen khin hi.Topa aw,na theihsa bangin a gen ka khawl ngei kei ding hi.Nangma hotkhiatna thu ka im ngei kei a,na thumanna =leh na hotkhiatna thu ka gen khin hi.Na itna kip leh na thumanna mi honpi tungah ka im kei hi.”(Late 40:9-10)

Ih Topa Zeisu Khrist’Pasian ahi a minthang Pa Pasian in note tungah Kha Siangtho hong pia in,tua Kha Siangtho in note tungah pilna hong pia-in,note in Pasian na theihna dingun note tungah Pasian hong ki latsakna dingin thu ka na ngetsak niloh hi.Note bang dingin hong sam a, a mite tungah a hong ciam thupha lamdangte bangzah takin lian a,thu um ahi eite sungah na a hong sem vangliatna bangzah takin lian hiam,cih na muh theihna dingun note’lungsim mit hong vak sakna dingin thu ka ngen hi.Eite sungah na a hong sem vangliatna pen sihna panin Khrist hing sakin,vantung gamah zong ama taklamah a tutsakna dingin a zat vangliatna mah ahi hi(Ephet 1:17-20).

Khazih sungah sanggam,tuni in nang zong Topa theihtel ding na lunggulh nai hiam?Pasian’min thanna ding leh ei mahmah a gualzo, a lawhcing nuntakna ah ih kah toh zel theihna dingin Topa ei tungah hong kilangh nuam lai hi.Tua ahih manin Topa theihtelna leh muhtelna ah ih khantoh theihna dingin lungsim,pumpi,kam le muk kiging sa leh kiphal sa in om in Huhpa Kha Siangtho sam ni!

Zeisu itna sungah,

Jacob

LUNGNGAI PHOT IN

“Na thu pen kei lam hong lak ding meiavak hi a,ka paina lampi-ah khuavak ahi hi.”(Late 119:105)

Ei Christian thu um mite’nisim ih kalsuanna lampi-ah Pasian’kammalte in thuman lampi hong lak meivak bek hi lo in, nuamtaka ih kalsuan theih nadingin khua hong vaksak lai hi.Topa’kamaml lungngai kawm in a kalsuan leh anungta mi peuhmah asep abawlna-ah sepkhelh bawlkhelh om ngei lo in a mavang daupai a, minphatna leh pahtawina tawh kidim in Topa min leh avangliatna zong a kilangkhia sakte ahi uh hi.Ahi zongin Topa’ kammal lungngai masa lo in kampau,kalsuan mite ahih leh thusia lasia tawh kikaiawk in buaina leh minsiatna tuamtuamte a thuak ban ah Pasian’ min zong adaisak theite ahi uh hi.

Tua hi a,Laisiangtho lui sungah Pasiantate ahi Moses,Sawl leh David te’nuntakna pawlkhat ih et kik ciangin abeisa hun ah Pasian thu lungai kawm in thu hoih thupha tampi bawl a, minphatna leh pahtawina ngah uh hi mah ta se leh hun khat sung bekbek Topa’ kammal a lungngai khak lohna leh Topa zia bangin a kalsuan khak lohna hangun minphatna pan minsiatna ,daupaina pan kamsiatna ngah in thupha pawl khat zong tanlawh lai uh hi.

Moses’nuntakna

Pasian’silapa Moses pen Pasian’ thupiakna mangin Israel mite Izipt gam pan in luah ding a,aciamsa Kanaan gam nuam-ah lutpih ding hong makaih lai-in hun saupi mah lungduaitak leh kiniamkhiatna tawh hong paipih a,sehnel gam-ah thuak zawh ding leh maisak zawh ding ahi lo amipihte’phunsannate Topa’ kammal mah lungngai a,maisakin hong makaih toto hi.Sehnel gam lamkal-ah nek ding tui om lo ahih manin amite tuiduh dangtakin a om uh ciangin Moses hong phunsan ta uh hi.Marah a kicihna mun hong tung uh a, tui om napi a tui kha ahih manin a dawn thei kei uh hi.Tua ciangin Moses in Topa tungah kiko a,Topa’ kammal tawh kizui-in tui sungah singkung khat a khiatsuk leh tuikha pan tuilim suakin nuam takin a dawn thei uh hi. (Paikhiatna 15:22-25)Topa’ kammal tawh hong kalsuan uh ciangin An om lohna mun-ah Topa’n Mannamohte khiat a,limci takin ne thei uh hi. Tui om lohna mun hong tun kik uh ciangin Moses zong Topa tung mah hong kiko kik leuleu a,Topa’ sawlna bangin a thu mang a, a Ciangkhut tawh suangpi a sat ciangin tui hong luang khia hi.Kanaan gam nuam manawh in nitampi hong paikhiatna lamkal mun khat-ah tui om lo leuleu ahih manin Israel mite tuiduh dangtak in hong phun leuleu uh hi.Moses in zong Topa mah dong a,Topa’n Moses kiangah “Na mipihte suangpi mai-ah kaikhawm in la,tui hong luan nadingin suangpi hopih in”a ci hi.Ahi zongin hih santak ah Moses in Topa’ kammal lungngai masa in hong kalsuan lo a,ama heh lungpi tawh Pasian’dinmun ah hong om khapak hi.Tua tui pen ama piak theih kek bangin Topa’thu piak ahi lo kammal hoih lo paukhia in a ciangkhut tawh suangpi (2)vei hong sat hi.(Paikhiatna 20:1-11)Hih bangin a heh lungpi masuan in Topa thu lungngaih ding donkha nawn lo a,ama thu in hong gamtatna hangin Topa heh a,aciamsa gamnuam alut thei nawn lo dingin thu khen hi.(Gtamlakvakna 20:12)

Sawl’ nuntakna

Lasiangtho lui sungah thukhen nunung pen a akiciamteh ahi Samuel hunsungin Israel mite’n muh theih loh Pasian ii makaihna leh thukhenpipa ii makaihna ciang tawh lungkim zo nawn lo in Namdangte mah bangin amaute a maikaih dingin kumpi kician khat nei nuam uh hi.Israel mite’kumpi deihna tawh kizui-in Pasian in kumpi asem dingin Sawl sathau nilh hi.Sawl in kumpi hong sep a kipan Pasian’ thupiakna mangin galte tampi hong zo uh hi.(Samuel 13:9)ah a om mah bangin Sawl kumpipa in Pasian’zia ngah zo lo a,ama deihna bangin hong gamtang kha hi.Israelte gal a do ding uh ciangin siampipa in meihal biakna nei masa a,tua khit ciang galdo ki pan pan uh hi.Ahi zongin hih mun ah a galte ahi Filistiate tawh akido sawmna galphual-ah a kiciamna a om sa bangin khua pan galphual-ah Siampipa Samuel hong pai-in Topa tungah meihal biakna a piak masak ding ahi hi. Siampipa Samuel ahun lap in hong tun zawh loh ciangin Sawl kumpipa in ngaklah a,ama thu tawh meihal biakna na pia hi.Hicih ngaisut leng Samuel a hunlap in hong tung zo lo ahih manin Sawl’meihal biakpiakna a piak pen khiallua kei leh kilawm hi.Ahih hangin Pasian thupiak leh Pasian’ thukhamte ih thupi ngaihsut lohna leh ih neubawlna pen Pasian mai-ah a kiliah thei lo gamtat khelhna lianpi na hi gige a,koih khong lo in,Ama thu khenna bangin ih thuak ding na hi hi..Tua bang mah in Sawl in lungduai takin Samuel ngak zo lo in,ama thu in meihal biakna apiak mani Topa heh a,ama kumpi zaneihna tanlawh hi.Kumpi zaneihna a kipan gualzawhna leh minthannate penTopa hong ompihna hanga,a kinei thei bek hi a,Topa’n hong taisan in hong ompih nawn kei leh tua thuphate a kingah zo ding hi lo hi cih thu Sawl’ nuntakna ih et ciangin kimu thei hi.

David’ nuntakna

Pasian in Israelte kumpi lak ah kumpi David pen a pahtak pen leh a phat pen pa ahi hi.Sun tawh Zan tawh Pasian thu lungngai mi ahih ban ah a lungduai mi khat zong ahi hi.Ahi zongin hun khat ciang Pasian’kammal lungngai nawn lo kha in ci leh sa deihna hong zui kha hi.(2 Samuel 11:1-27)sung ih muh mah bangin Israel galkapte galdo in gam sungah nitampi a om lai takun kumpi David pen kumpi inn-ah nuamtakin om hithiat hi.Ni khat nitak lam in a lupna pan tho in, a kumpi inn khum zang pan a khuadak leh a kisil numei khat a mu hi.Tua nu hoihsa a,lunglut ahih manin misawl in a samsak hi.Tua nu midang hi lo a, galkap nautang Uriah’zi na hi hi. Kumpipa David in mi zi ahih lam thei napi thu khinkhai masa lo in ci leh sa deihna tawh tua nu samsak a,a luppih ban ah apasal nangawn a thah sakna tawh Pasian mai-ah mawhna lianpi hong bawl hi. Hih teng hangin Pasian heh a,Nathan tung tawn in a thuak ding thukhenna a gen khia hi.Topa kammal mah hong tangtung in kumpi innkuan sungah kithah kimatna leh galtainate hong piang hi.Ahun lap in kisik man kei lai leh azite nangawn aveng apaamte’n tuah in sun nitang lak ah luppih,mawhpih ding uh a,ama’nuntakna mahmah zong beilawh lai ding hi.

A tunga mi thumte ii nuntakna leh kalsuannate ih etkak ciangin Pasian’ kammal lungngai nawn lo in lungso in kampau khiatna tawh ahi zongin,Pasian’zia ngak zo lo in eima hoih sak thu tawh kalsuan khiatna tawh ahi zongin,Pasian’ thukhamte thusim nawn lo a,pumpi ci leh sa deihna zui-in kalsuan khiatna tawh ahi zongin Pasian’kamciam thupha tampi ki tanlawh ban ah buaina ,haksatna leh mindaina tampi kiphulkha ding cih thu kimu thei hi.

Tua hi a, khazih sungah a nungta a kua mapeuh in Pasian min ih daisak khak loh nading ,ih ngah ding thuphate ih tanlawh loh nading Pasian’kammalte lungngai kawm in ih kalsuan ding kisam hi.Sep leh bawlna-ah gualzawhna leh matut zawhna thupha ngah in,nisim ih kalsuanna lampi-ah Topa’ kammalte meivak banga ihzat siam ding ahi hi.Tua hi leh ih paina lampi zang ding a,nuamtakin ki kalsuan thei ding hi.Pasian thu pen eite lam hong lak ding meivak hi a,ih paina lampi-ah khuavak taktak ahi hi.

Khazih sungah,

Joshua Khai(Singzung)

A NAMTUI BIAKPIAKNA

Zomi Christian mimal khatciat in Pasian a lungdamsak santham biakpiakna namtui ih neikim ciat hiam?.

Zomi Christian mikhempeuh in tu hun laitakin ih biakna pen kizangkhai ngaihsut mahmah in,ngeina bangin biakpiakna ih nei thei hi.Tuhun ciangin Pasianthu atheilo kuamah om nawnlo in,mimalkim phial in kithei hi.Ahih hangin nuntakpihna neilo in atheihnate uh tawh ahih kei leh ( )dan khat in ngaihsutna nei lel uh a,Gupna thu pen zangkhai ngaihsut mahmah uh hi.A tamzaw in a theihna uh tawh anungta kisakha uh hi.A nuntak loh lam uh kitel loin,Pasian kammalte tungah kinga loin mihingte tungah kinga uh hi.Mikhat in a dang mikhat ama lungsim tawh a kituah kei leh Gupna ngahlo ci-in mihingte ci leh sa nuntakziate en uh a,amah leh amah ki en masa lo uh hi.Gupna ngah mikhat in mihing tungah kinga loin Pasian kammal Laisiangtho tungah kinga a,ama nuntakzia khuavak bangin ataan theih ding Laisiangtho tungah kinga hi.

Tua ahih manin Pasian ih upna pen ih theihna leh ih neihnate ih ki sittel ding kisam mahmah hi.Tuhun ciangin Christian mi tampi te ii upna pen atom in ih et ciangin,ngawng tungsiah upna ahi kam tawh upna bek pen a tamzaw kimu thei hi.Kam tawh upna pen Pasian in hong theihpih hetlo ahih lam Laisiangtho in hong lak hi.Pasian tapa a um mi peuhmah in alungtang sungah teci panna anei hi. 1Zawhang. 5:10(ZIV)

Tua ahih ciangin sanggam aw,na upna in Pasian a lungdamsak upna ahi hiam? Cih ki sittel in,leitung na nuntakna bei kha leh Vangam maw..Hell. “Vangam ahih kei leh Hell” a tungding na hipah lian hi.Koizaw ut na hiam?Mihing ading in khatvei si ding laitansa hi a,tua khit ciangin thukhenna na thuak ding hi. Hebia 9:27 (ZIV).Laisiangtho in hong ci ahih manin Gupna,nangah nai kei leh tokhom kaang mai-ah thukhenna na thuak ding pen lauhuai bek thamlo in, uthuai hetlo hi. Kilaakna.20:11-12 (ZIV) Tua ahih manin Gupna ih ngah theih nadingin nang leh kei-in mawhnei mi ka hi hi ci-in ih lungsim sungah ih neih masak( )kul a, tua mawhna na theihna bek tawh Gupna thu zong athei bek mah na hi a,anei na hi kei hi.Nisim nuntakna sungah na mawhnate in,na thupha lampi kong kikalh ahih lam kiphawk in.

Tuin Eden huan-ah ih mawhna hangin sihna ih thuakna pan in Pasian in amakiang ih tun theih na dingin Gupkhiatna lampi hong bawlsak a, tua Gupkhiatna ih ngah theih nadingin Laisiangtho tawh atom kim in ih kikum ding hi.A masa pen in mawhneimi hi-ing ci-in na lungtang tawh na kitheih ding leh na neih phot ding kisam a, tua zawh teh tua mawhna hangin na lungtang tawh na kisik ding kisam hi.Na mawhna uh aki maisak theih na dingin note na vekpi un kisik un la Zeisu khris min in na ki baptis un. Sawltak 2:38 (ZIV) Tua ahih manin kisikkikna in namnih om a, ahoih lama kisikkikna leh ahoihlo lam kisikkikna ci-in ki khen hi.A hoihlo lam a kisikkikna ih cih pen, a tapa in kuan kei ning ci hi,ahih hangin aden ciangin a lungsim kheel a, a kuan hi. Mate 21:29 (ZIV) Tua ahih ciangin kisik in Pasian lam nga kik un.Sawltak 3:19(ZIV) Laisiangtho kammal bangin ih kisikkik zawh ciangin lungtang tawh up ding pen thu patna ah ih kikum zo hi.

Tua ahih leh na upna in bang um a ,a bang santak um na hiam?Tu hun ciangin a thupha bek a deih manun mi tampite’n a thupha mah nget cih takin ngen uh hi.Pasian a lungdam nading bang hiam?cih thu kan in neilo uh hi.A thupha sang in thupha neipa thupi zaw lo hiam?Thupha neipa a lung na damsak leh thupha kongkhak hong hon pan ding cih Laisiangtho in hong hilh hi.1Zawhang 5:13-15(ZIV) ah hong lak hi. Tua ahih leh tu ni –in Pasian’ lungdamna ahi gupkhiatna thu Laisiangtho tawh atom kim in kihilhcian ni.

(a) Zeisu Khazih in nang leh kei adingin munsiangtho pen ah Ama sisan mahmah tawh khat vei a cin dingin tawntung tatkhiatna ngahsain munsiangtho pen ah nang leh kei adingin Ama pumpi mahmah kithoihna in hong ki pia hi.Hebia 9:12(ZIV)

(b) Tua ahih leh Khasiangtho tung tawnin Amahmah kawk baang lo a, Pasian tung’ a kipia Khazih sisan in sihna hong tun nasepna panin Hebia 9:14(ZIV) mawh maisakna ngah bek tham loin Pasian’ lungkimna ih ngah hi.

Tua ahih manin na lungtang tawh na up leh Pasian a lungkimsak upna ahi gupkhiatna na ngah zo hi.Tua ahih leh Tapa a um mi peuhmah in nuntak tawntungna a nei hi, ahih hangin Tapa anial peuhmah in nuntakna a mu kei ding hi. A hangin Pasian thangpaihna ama tungah a om hi.Zawhang 3:36(ZIV) Laisiangtho in hong hilhcian ahih manin Pasian’ thangpaihna nang tungah hong tun ding lauhuai mahmah hi.

Tu ni-in Topa hong sapna awging nazak leh na lungtang khauhsak kei-in, Pasian in sapdan nam tampi tawh hong sam thei ahih manin limtakin gupkhiatna thudon mengmeng in . Tua zah tak a thupi gupkhiatna thudon kei leng bang ih cisuahtak zawh ding hiam? Hebia 2:3(ZIV) Christian mi taktak na hiam? A minpua bek na hiam? Na dinmun hoih takin kientel in, nang a dingin lauhuai mahmah hi. A tung a Pasian’ kammalte simin, za in, na khuak tawh thei a, na lungsim taktak tawh na up leh Pasian a lungdamsak a santham biakpiakna namtui a neipa/ nu na hi zo hi. Tua ahih manin Laisiangtho in na suah kik pelmawh ding ahi hi. Zawhang 3:7(ZIV) cih thu hong hilh zo hi.

Tua ahih manin Gup khiatna ngah na dingin mihing gamtatnate en in, mihing tung a kingakna in Gupna kingah lo hi.Tua bang a mihingte’ gamtatnate a enente in,amah leh amah a gamtatna te ki et masak kul hi.Gamtatna in vantunggam hong tun zo lo hi.A ki gelhsa bangin midik khat beek a om kei hi,khat na ngawn a om kei hi.Zawma 3:10(ZIV)Tua ahih leh mihing gamtatna et masak kullo a, ei leh ei ih kiet kul masa zaw hi.Gamtatna in Christian nuntakna sungah ih kalsuan nadingte Laisiangtho in hong lak hi.

Sanggam aw, hih Pasian’ kammal Gupkhiatna thu nasim zawh ciangin na up ding bek in kisam lai hi.Na up kei leh nang tungah Zeisu sisan in,laiatpa tungah hong kisik nawn lo ding hi.Zomi Christian mimal khatciat in Gupna man taktak ih ngah kim nadingin Pa Pasian in a kammalte tungah vangliatna thupha hong piak sak ta hen!Amen. Vantung thupha leh leitung thupha khempeuh ih ngah theih nadingin Gupkhiatna kongkhakpi ih hon leh ih nget peuhpeuh ih ngah hi.1 Zawhang 5:13-15 (ZIV)

Zomi Christian mimal khatciat KhaSiang theihtel theih na thupha ih Topa Pasian in hong pia kimciat ta hen!Amen.

Lungdamna thu tangko,

Pa. Dai Cin Pau(Laibung )

NANG BANG NACI NGAIHSUT Tg. Hau Cin (Tedim) Leh

THUMAN THUTAK LEH THUMAAN NA(( Pa. Lian Cin Hau) Ton Zang.