ZingSol Website
rav;&Sm;

                     HIH LAI AH KEI OM ING, KEI HONG SAWL IN.( Isaiah6:8 ) Malaysia gam pan Zomite "ZINGSOL".

Malaysia Zingsol khol ( 2 ),  Hawm 13,  14,  15,  16,  17, 18,  19, 20,   21, 22, 23, 24,

HAWM (12) NA

Editor’Laikung Muk Pan

Pasian ii leenggah huan-ah hih Malaysia Zingsol min tawh mano khat pang thei dingin hun manpha hong ngah sak bek tham lo in,kum khat cin dong gualzawhna tawh hong kalsuanpih ih biak Pasian tungah lungdam ka ko masa hi.Haleluizah!

      Hih Malaysia gamah sum leh paai zong dingin ki pai ahih  mah bangin mi khut nuai-ah sila bangin hunbit na ki sem ciat hi. Hun ki cin lohna a ki pan haksatna leh buaina tuamtuam kawmkal pan in Malaysia Zingsol (pmapmif) lai hawm khiat zawh pen tu in kum khat hong cing hi ta hi. Hih Malaysia Zingsol in  Minam tung leh biakna pawlpi tungah ki nga lo in Pasian hong itna leh hong hehpihna tung bek ah ki nga hi.Hi laihawm in lungdamna thu tangko ding mah mungtup pi-in nei a,Malaysia gam a om Zomi akua maciat in leitung thupha leh kha thupha tawh inn lam ih zuat kim theih nang ngimna hoih leh deihsakna, itna takpi tawh Pasian kammal hong hawm khia ka hi uh hi.Hih lai kong hawm khiat uh ciangin  Mihingte ii pilna tungah ki nga in,siamna tawh dingto a,theihna tawh ki kalsuan lo ahih manin laigualhdante ahi a,kammal zatdante ahi  zongin khialhna leh ki cinlohna tampitak om ding hi. Lai sim akua mapeuh in nong theih siam nang uh leh nong maisak nangun  Zeisu min tawh kong thuum uh hi.     

       Topa in Ama Sisan Siangtho tawh ka mawhnate hong sawp siangin,tawntung gawtna mun a tungsa ka kha pamaih hongsa ahih manin Sanggampa Jacob tungtawn in hong phongto kik hi.Ka nuntakna –ah Topa gumpa leh honpa in April 2,2001 ni-in ka sang a,Good Shepherd Assembly(P.J)biakinn-ah Pastor Jonnatahan in tuiphumna hong nei hi.Ka lung sungah lungdamna leh khamuanna lianpi hong om a ,hih ka lungdamna thu Zomipihte theih saknopna leh  lungdamna thu pulaaknopna hangin  kum 2001, May  kha    pan  ki pan Malaysia Zingsol minvawh in lungdamna thu ahi khuavak kong puak uh hi. Hih  lai hawm nading taangsum cih bang ki nei lo in,a khawnkhong a hong hawm khia ka hi uh hi.Ih gam ih lei leh ih it innkuanpihte tawh ki gamla in,lungzuan khuangaihna leh haksatna tuamtuamte thuaka ih om lai takin hih Zingsol laihawm in lai sim akua maciat tungah tha ngahna leh ki lamthakna hong pia in hong dim zo ahih leh ko asem abawlte in lungdamna leh lungkimna  ka nei ding uh hi.                 

      Hih Malaysia Zingsol hawm khiat zawh nading Computer lam tawh ki sai-in atheihnate uh leh asiamnate uh iksik lo in ngaihsutna hoih hong pia in hong huhte ahi Tg.Ngin Sian Pau(Pauno)B.Eco, Tahan,Tg.Ngo Thian Pau(Paukhek)A.B.E  Dip.in Business Admin.(Phoenix International University,New Zealand)Suangdaw, Pa.Pau Lamh Cin(Lamhpui)Thuklai,Tg. Sian Khat Mung (Mungno)Buante tungah Zeisu min tawh lungdam kong ko uh hi.Tua banah thu leh la kikuppih den ahi Pa.Thang Gin Mang (B.Sc), Tuithang tungah lungdamna thu kong pulaak uh  a,sum leh paai,tha leh ngal,thului(Article) leh thu ngetna tawh ma hong panpih Khazih sungah anungta  sanggam akua maciat tungah zong  Zeisu min tawh lungdam kong ko uh hi.Ih pilna, ih siamna,ih ngaihsutnate  leh ih  sansa  thuphate eima aituam ading bek zang lo in Topa a ding ih hih theihna ciangciang tawh ngimna hoih nei-in mapang khawm ihih manin Topa in zong hong lungkimpih bek tham lo in gualzawhna  tawh matutzawhna thupha hong pia hi ci-in upna ka nei uh hi.

      Hun nunung leh hunsia kawmkal pan in ih ngah hun tomno khat sungah Pasian na tampi- ih sep theih nadingin Topa sung bek ah lametna nei a,  upna tawh thoto in   kalsuan ciat ni.Ama hong makaihna thu man lampi pan pialkhia kei ni.Hehpihna hun nuam sungah om in khangno   thahat ih hih lai  takin Topa hong geelsakna thei  siam in,Ama thu mangin  na hoih sep ding cimtak kei ni.Lungkia lo in ih sep nak leh a hun ciangin tha man ih ngah ding hi. Leitung in siatna lam manawh lua ta ahih manin na hoih sep theih loh hun,Topa hong piak thuphate ih zat theih loh hun hong tung ding hi. Haksatna ,buaina leh hunsia sungah ih lut ma in ih pilna,ih thahatna,ih hun leh ih sum ih paaite zang siam ciat ni.

       Pasian in teeltuam Israelte thupha pia in Izipt gam sung leitangh hoih pen ahi Goshen  leitangh ii thau ne sak hi. Israel mite in Goshen leitanghah  khawhsa kham in,thupha apia pa hong mangngilh uh ciangin gentheih  haksatna leh thahna ciang dong hong thuak uh hi.Tua bang mah in   hih Malaysia a om ei Zomite’n zong athupha bek lunggulh in hong pia pa ih manggilh loh ding thupi hi.  Ih sansa thuphate  samsiatna tawh ih san  khop loh nang ih pumpi kem siam in ih  sum ih paaite Topa mah  kemsak kik ni.

       Eite adingin  Goshen leitangh  ahi Malaysia gam pan in leitung thupha kha thupha tawh luah ding a  Pasian ii hong piak Cannan leitangh ahi ih Zogamah aciah kik thei dingin Topa’n mimal kim tungah thupha hong pia ta hen!

                                                   Daniel Tam Khui Sing (Mindat) 

KEI HONG ZUI IN

       Topa Zeisu in Pitazuh kiangah, “Kei hong zui in”, acih bangin tuni in nang le kei kiangah zong, “Kei hong zui in hong ci leh amah ih zui ngam takpi diam?Pitazuh dinmunah nang le kei ih om ngei kei ding a ahi zongin ih nintakna-ah Pasian’ geelna leh hong sapna khatciat om gige hi.Amah na zui zo hiam?

Singlamteh

   “Mi khatpeuh in ka nung hong zuih ding leh amah le amah ki nial in,ama singlamteh kisuan in hong zuih pelmawh kul hi.”(ZIVMathai)

         Singlamteh in bang ahi hiam?Hun khat lai-in singlamteh pen mite in lipkhap in kih uh hi.Tu hun ciangin Dawimangpa in anasep dan hong kheel ahih manin singlamteh thu atheilote nangawn in deih in kizepna in hong zangh ta uh hi.Leitung minthan-na,gualnopnate sungah ki zangh toto in atawpna-ah lamgei migilo(vrf;o7J)te lak,zumun samun leh thangtatna munte ah singlamteh pen mulkimhuai takin hong ki zangh khial ta hi.Eima’ singlamteh icih ciangin Topa Zeisu sihna singlamteh hi nawnlo in Topa’min a dingin ih thuak ding gentheih haksatna,gensiat muhdahna leh simmawh bawlsiatnate ahi hi.Tua ih vangikpi teng tawh Topa’nung koici zuih zawh lailai ding ihi hiam,sanggam? Vangletna,pilna,siamnate tawh singlamteh ki pua zolo a itna leh lainatna bek tawh ki pua zo ding hi.Tua itna leh lainatna koi lai pan ngah ding ihi hiam?

Noami leh Ruth

    “ ‘Hilo hi,ka tanute aw,Topa in kei hong bawlsia ahih manin note sangin nakpi takin kei ka lunggim zaw hi’,a ci hi.Tua ciangin amaute kap kik uh hi.Orpah in ateeknu nam in ciah a,ahih hangin Ruth in ateeknu beel hi.”(Ruth 1:13-14)       

         Ruth in amai lam nuntakna dingin bangmah lametna omlo napi asih dongin ateeknu Noami zui dingin hong khensat mawk hi.Apasal ii nusiatna hangin Ruth pen dahin kapkap ding himah taleh pasal leh tapa nih ii nusiat ateeknu Noami a et ciangin hehpihhuai sa hi.Ruth in amah sangin azah nih a genthei zaw samkang thithel,amai huai phinphen,amitte azaam zilzial leh khat tangkia agam zuan kik ding Noami pen lainat mahmah ahi manin zui nuam ahi hi.Noami pen Topa Zeisu etsakna hi a,Ruth pen Topa azui mite etsakna ahi hi.Eite mawhna amaitheihna dingin Pasian in Zeisu pen singlamteh tungah mawhneimi suak sakin nakpi takin anuntakna genthei sak hi(2Korin.5:21).Tua Topa’nuntakna ih lainat theih ciang bekin amah ih zui zo ding hi.

  A kha Zeisu nuntakna                           

   “Amah(Noami) in amaute kiangah, ‘Noami(nuamsa) hong ci nawn kei un,Mara(kha) hong ci un,bang hang hiam cih leh Vanglianpa in nakpi takin kei hong gim sak hi.’”(Ruth 1:20)

              Zeisu mi bangin hong pian lai-in alutang ngak nading nangawn om loin bawng ankuang sungah hehpihhuai takin hong suak hi.An duh gilkialna leh simmawh langpan-nate hong thuakin Galile gam panin nasep kipan a,lunggimna leh thaneemna tawh utlo pipi in aki thah nading mun ahi Jerusalem hong zuan toto hi.Eite hauh theihna dingin amah hau napi mizawng bangin geithei takin leitungah hong nungta hi(2Korin 8:9). Tu lai tak a na neih lei hauhna van hauhnate hangin Zeisu’zawn-na na phawk kha ngei hiam?Getasimani huanah nang le kei mawhna hangin khukdin zo loin lei lakah bok suk a thum vei dong thu ngen hi.Bang zah ta in ih Topa thaneem ahi hiam? “Lunggim mahmah ahih manin nakpi takin thu ngen semsem a, lei lak- a si mal gol taak bangin a khua-ul a taak hi.”(Luka 22:44)

               Siampi makaite in Zeisu hong mat uh ciangin thusit uh a,amaitang cilphih in akhuttum uh tawh tum uh a, pawlkhat in apang beng uh hi(ZIVMathai 26:67). Galkapte in zong kumpi puan dupsan khat silh sakin zahko uh a, alutang tungah ling lukhu khu sak uh hi.Zeisu in ling lukhu khu kei leh tuni a LaiSiangtho sangte leh pahtawina lukhu nelkaite om lo ding hi.Pahtawina lukhu leh LaiSiangtho degree(bJGY)te na khuk ni in Topa’khuk ling lukhu na mu/ngaihsun kha hiam?Ahih keileh tuate in Topa’ling lukhu hong mangngilh sak zaw hiam?Galkapte in ciangkhut tawh a lu satsat uh hi.Khatvei bek hi kei sanggam(ZIVMathai 27:27).Gitlohna hangin singlamteh tungah khaina athuak migilote nangawn in asih ma hun tomno sung nangawn in Zeisu engko man lai uh hi(Mate 17:44).Topa Zeisu si dingin a laitat ciangin aci le sa in tui bek lunggulh in ngen a,tua nangawn ngah loin tuikha ki pia zawsop hi(Johan 19:28). Ih Topa’nuntakna bang zah ta in kha ahi hiam?

 Zeisu khat tangkia  

      “Adim in ka pai khia a,Topa in a hawmin hong ciahpih kik hi.”(Ruth 1:21)

               Topa Zeisu Betlen khua-ah suak dingin leitungah hong kum suk lai in vantungmi tampite in van kimlai ciang hong kha suk uh hi. (Luka 2:13).Cinate dam sakin Pasian nasep hong kipat tak ciangin khua khat pan khua khat mihonpite ki kaikhawm in Zeisu nung hong zui ngeingai uh hi(Luka 8:4).Ahi hangin Topa Zeisu in nuntakna khomun thu ahilh ciangin mihon tampite in taisan uh a,a nungzuite bek in amah zui lai uh hi(Johan 6:66-67).Zeisu hong ki mat ciangin nungzuite nangawn in nusia in hong taisan mang ta uh hi(Maku 14:50).Gamlakah agilkial lai tak leh Getasimani huanah alunggim lai takin  vantungmi khat in huhin tha pia thei zel napi singlamteh tungah hong kikhai ciangin vantungmi khat beek zong hong kilang nawnlo hiLeitung mite leh vantung mite in amah anusiat hangin amah aompih, hehneem den khat om lai a,tua in Pa ahi hi.Pa aw, Pa aw ci a, amuan mahmah PaPasian nangawn in mawhna hangin singlamteh tungah a kikhai a tapa kih in nusia ta hi(Mate 27:46,Maku 15:34).Nuntakna aneilo ni nangawn in Zeisu hangin leitung khuavak tan nuam loin nusia hi(Luka 23:44).Kalani mual singlamteh tungah khat tangkia aki nusia Zeisu !

Pitazuh in Zeisu zuan

            Hun khat lai-in Pitazuh in Zeisu nuntakna tel loin ci le sa lametna tuamtuam tawh Zeisu nung zui hi.Zan khat Zeisu tui tung a pai amuh ciangin Pitazuh zong tui tungah hong pai nuam pong mawk hi.Pitazuh in upna tawh Zeisu hong zuat leh tui tungah hong pai thei takpi hi(Mate 14:28-29).Zeisu sihna pan hong thawhkik khit ciangin a it nungzuite omna Galile gunpiau hong zuan hi.Pitazuh in Zeisu hong muh phet in tui sungah leng khia a, ama’tha tawh pi (300) bang tui hong van phei hi(Johan 21:1-14).Bang hang hiam cih leh Pitazuh in akha/agenthei Zeisu nuntakna telin alainat hang ahi hi.Upna tawh azuat lai-in olno takin tuitungah pai nuam a, lainatna tawh Zeisu azuat ciangin anuai lam ah tuaksukin ama’hanciamna tawh tui hong van/kantan hi.Pitazuh mah bangin upna tawh Zeisu zuan in leitung hauhna leh lawhcinna tuamtuamte ngen le hang ih lunggulh bangin hong pia ding hi.Lainatna tawh Zeisu na zuat/zuih leh na tha,na hun,na sum na paaite hong kiam zawk hun zong om ding a, ahi hangin Topa ii hong itna leh hong kamciam thamante in abei theilo lungnopna tawh nang hong lungkim sak ding hi.

Zeisu in Pitazuh sittel

           Zeisu in Pitazuh kiangah, “Johan’tapa Simon aw,Kei nong it hiam?” ci-in thum vei sittel hi.Anung zui ding Pitazuh in amah a it loh khak ding pen Zeisu lung himawh mahmah hi.Tua mah bangin Topa’min tawh na khat peuhpeuh ih sep ma in Topa hong kalh itna kei tungah abang kha mah hiam cih ei le ei tamvei pi ki sittel ding hi hangh.Pitazuh min pen Zeisu piak hi napi-in bang hangin Johan’tapa Simon ci-in lo sese ahi hiam?Pitazuh in ama nuntakna bang malo ahih lam akitel masak ding Zeisu in deih hi.Zeisu’piak Pitazuh min pen ki phatsakna leh gual tung tuan nading hilo hi.Pitazuh in zong Johan’tapa ahih lam leh pilna siamna bang mah neilo, ngen khuh a nga bengbeng pa khat ahih lam hong ki phawk kik hi.Tua mah bangin eite zong hauhna leh lawhcinna min tuamtuam tawh Pasian in thupha hong pia kha ding a,ahi hangin tua minte iplah lo ding hi hangh.Pasian hong sapna leh hong hehpihna ih mangngilh lohna dingin ih pianzia leh ih nuntakna luite phawk kik zel ding hi hangh.

Kei hong zui in (Johan 21:19)

              Zeisu in, “Kei nong it hiam?”cih thum vei adot ciangin Pitazuh in nidang a akamciamte leh Topa a it zawh lohnate ki phawkin alungsim ki tamzan hi.Topa aw,nangman na thei hi ci-in adawn ciangin Zeisu in, “Kei hong zui in” ci hi.Eite in zong abeisa hun a ih kamciamte,ih cihtak lohnate leh Topa ih itzawh lohnate ki phawk kikin, “Topa aw,nangman ka hih bangin nong thei hi,”ci-in pulaak ding hi hangh.Topa a dingin semzo,piazo leh amah itzo iki sak lai takin Topa’n hong muang nailo a, amah ih it zawh loh lam kitel semsem leeng’ aman hong muang semsem zaw hi.Pitazuh in agei a tu Johan bang ci ding hiam cih adot leuleu cingin Zeisu in, “Nang bang lung hihmawh pih na hiam?Nang kanung hong zui peuh in,”ci-in dawng ziau hi.Eite zong Topa’nung ih zuih ciangin hong nawngkai/lungkia sak thei lawm le gual,kim le paam,thu le la tuamtuam om kha thei ding hi.Tuate hangin lung himawh kei inla Topa’n nang hong sapna telin ama’nung zui suak zel in.

              Tunin sanggam,Topa’nuntakna leh singlamteh thu in ataktak ahih lam telin na up leh nuntak tawntungna na ngah theihna dingin Satan’nung na zuihna pan kihei-in Topa Zeisu’nung zui ta in.Guihtheih khamtheih leh ci le sa nopsakna ii sila in naom lai le zong tuate nusiatna tawh Topa’nung zui ta in.Singlamteh pua in Topa’nung azuisa Khazih sungah sanggam akua maciat in zong lungkia loin lungsim pumpi,thungetna leh sum le paaite tawh Topa’nung zui to zel ni.Topa in laisim mimal khatciat singlamteh itna leh vangliatna tawh hong kidim sak ta hen!

                                                                          Zeisu itna sungah,

                                                                                     Jacob

KHANGNOTE  LEH SUM ZONNA

“Na lungkham hun ding hong tun’ ma, “Nuntakna nuamsa kei ing,”na cihma hun,na khangno laitak in nang a hong Piangsakpa phawk in.”(Thuhilhna 12:1)

        Ih gamah  khuahun paidan hoihlohna pan nuntakna haksa a hih manin mun tuamtuam ah sum leh paai zong dingin mi tampi ki kuankhia hi.Ei Zomite zong tampi ki zin khia a,tuate sungah mi sawm ah kua bang khangno hi kha dingin ka um hi.

          Sum zong ding azin mite sungah a tamzaw pilna, siamnate tawh ciangtan omlo nasepna mun ki tung hi.Ei hih bang ciat tawh ih  tuahkhak bangbang ki semin ,khual gamla zin ngeilo leh pau leh ham a thei lo ,mi namdangte tawh ki mu ngei nailo leh kithuah kha ngei nailo zong ki tam hi.Pau theih leh theihloh ,lai theih leh theihloh te tawh vai kihawm lo ahih mah bangin ei dinmun tawh ki zui-in sepna mun peuhah hamsatna atawm atam ki thuak kha ciat hi.Hun leh nite hong beibei –in nasep zong siam semsem,pau zong siam semsem,nidang in ih zak ngei loh mikang pau leh a dang kampau tuamtuamte eipau sangin zat nuam a sa zaw zong ki om ta hi.Ahun sawt zui-in hamphatna thupha tampi aneu alian a kibangin ki ngah ciat hi..Inn pan ih kipat khiat lai-in pumguak hi bek tham loin a dawhna (-)nung ah nambat mal(6)bang leiba tawh om hi mah leng tu in a gawmna (+) nung ah mal 6,7 bang kizom dendan thupha tawh mi tampi ki om ta hi.

          Ahi zongin tu laitak khangno  .tampi te-in i ngah hamphatna thuphate tung bekah ki nga in ,tuate koi pan hong luang hiam? cih te leh hong pia khat a om lam ki phawk kha nawn lo hi. Ei hih zawhna bek muang kha ih hih manin kua mah kihtat, zahtat ki neilo thei hi. “Hih bang sep zawhna dingin kote in siamna nei ung a ci hi loin,sep zawhna ding siamna pen Pasian’hong piak ahi hi”(2 Kawlentu 3:5 ) Khangno ihih mah bangin ngaihsutna,lungsim leh sep leh bawl lamah ki manlang in ,thuak zawhna nei nailo ihih manin khat leh khat ki hawmthawhna om thei hi. Tua manin mi kim khat in nasepna pute sangin seppihte a thuaklah zaw zong ki om thei hi .Mi gam mi lei –ah ih om laitakin hamsatna khat tuak kha leng ih unau sanggam te’n hong don man lo ding a, ih seppih lawm leh gualte mah in hong buaipih masa pen ding ahi hi. “Na lawmte daang koih ke’n la, na pa lawmte dong nangawn lawmbawl in .Na lungkham ciangin na sanggampa va ko kei-in .A gamla a om ih sanggampa sangin ,ih nai-a aom ih vengpa ki mang zaw hi.” (Paunak 27:10)Ih simmawh pen khat zong ih muanpen asuah hun om thei veve hi.Zawtah zong a sanggam te’n  Izypt gamah mi sila dingin a zuak uh hang,hun khat ciangin a muan pen uh suakkik cih Laisiangtho sungah ki mu hi..Mi khempeuh in ih omna munmunah maipha ki mu nuam ciat hi.Sep leh bawl lohin hamphatna leh maipha ki mu thei lo ahih manin sepna peuhah hanciamna leh cihtakna kisam hi.Bang hang hiam cih leh (2 Timawte 3:10)sungah nasem lo ten’an ngawl hen ,na ci hi. Ahi zongin mitampi tawh nasep khopna munah kiim leh pam ii gamtatdan tawh kizui a ,gamtat theih ding hong kisam zel hi.Ei hanciam luatna hang tawh mi khat nawngkaisak loh ding thupi hi.Sepna peuhah ih khinkhai siam leh ih ngah ding thuphate ki pelh tuan loin midangte tawh kilem in sawtvei ih mapai thei ding hi.A tam zaw in ih dinmun ei leh ei ki thei kha lo ih hih manin mite hawmthawh a,ei hong ki hawmthawh lam ki phawkkha lo hi.Hong maigum khat aom teh maitaina tawh thukzaw loin a uangzaw in ki demzaw thei hi.Ki-it hun leh ki mudah hun ,kigalneih hun leh kilem hun ( Thuhilhna 3:8 )cih pen mihing ih hih manin aom thei ding mah ahi hi..Koreate paunak khat ah, mikhat maitangah buanna zut nop leh nang khut a buan masak kul ,ci hi.Tua ahih manin ei tung hong kibawl ding ih deih leh ei mah in pat masak ding ahi hi.Ei mahmah ki- en masa in gamtat kampau ding thupi hi.Ih vawh leh ih vawh bang ki-at thei bek ding hi.( Gal 6:7 )

          Khangno hun ih cih pen leitung ih nuntak sungah  anop pen hun ahih manin anuam thei pen mah in zat ding thupi hi.Tomno ih nuntak sungah khangno hun zong tomno sung bek mah hi ding a,ei leh ei ki lunggimsak ,kigentheih bawl loin ih zatsiam ding ki sam hi.Ahi zongin ih gamtatna tawh ki zui-in Pasian in thu hong khen ding(Thuhilhna 11:9 )ci ahih manin pilvang tak a gamtat theih ding ahi hi.Khangno ih hih laitak mahin ih ngah thuphate hong piapa phawk ding ki sam masa a,tuaciangin hehpihna ih phat thei pan ding hi.  Tua hehpihna in Zeisu Khazih tungtawn in hong pai hi .( Zawhang 1:17 ) Zeisu Khazih in mawhnei nang leh kei sihna pan nuntak tawntung ngah nading Pasian hong piak ahi hi. (Zawhang 3:16 ) Tua Zeisu Khazih hong tatkhiatna thu upna tawh ih san khit ciang akip tawntung vantung thupha a ngah thei ihi hi.Leitung thupha in mikhempeuh tungah aki bang a ,Pasian hong piak hi a ,ei

thu-ummi te’n leitung thupha banah vantung thupha zong a ngah mi hamphate ih hi hi.Pasian’khut sungah na khempeuh kicing ahih manin,na khempeuh leh ih vai khempeuh a ma khut sungah aap ding kisam hi.Leitung mawhna sungah nuamtak a om na in tomno sung bek hi a,kikheel ziau thei hi.(Habia 11:25 )Zeisu itna sung bekah a kicing tawntung lungnopna om hi.

         Ih lawhcin lai takin hong haza Satan in ih ngah thuphate tawh na hong seem hi. Kiphatsakna lungsim hong lut sak ahih manin hong piapa Pasian nangawn hong mangngilh sak hi .A hangin Satan in ih thuphate mah hong zangh in ama ukna sungah khamtheih guihtheih zatnate leh athaanghuai gamtatnate tawh kidiah ngitngeet ding hong deih ahi hi.Ahi zongin Pasian in siatna sungah tualbial ding hong phal lo in ih nuntakna pammaih sa hi.A ma hong itna phawk kik thei ding ,amah tawh ki zopna akip zaw ding deih in ih lungsim hong en na hi zaw hi..Tua ahih manin nopsakna bek hi loin hamsatna khat ih thuak ciangin zong lungdam ih koh theih ding ki sam hi . “Sanggamte aw,thuhaksa a tuamtuam na thuak uh ciangin lungdamna dingin na ngaihsun zaw un”(Zakoh 1:2-3 ) Hamsatna leh ze-etnate tungtawnin ei leh ei kipummuanna lungsimte bei thei pan in ,Pasian tawh ki nai na om thei pan ding hi..Nuntakzia leh ih dinmun bang mah ihih loh lam ki telna ahi zong ,a beisa hun a ngaihsutna leh gamtatna hoih lote pan kisik kik theihna om thei pan ding hi cih pen Pasian ii hong deihsakna leh hong theihsaknop thu ahi hi.Hamsatna khat peuh ih thuak ciangin ahun ziakai ta ding ahih manin, ih thuak ma hun, aki muh theih lai, hong nai om lai-in ahunlap a, Topa tungah thungen a, amah ih belh ding thupi hi.

        A diakdiak in sum zong ding a kuankhia khangnote in ih cidamna mahmah a kipan ih ngah hamphatna thuphate, hehpihna pan hong luang ahih lam telsiam ni. Hong piapa tungah ihih theih zah ciat tawh lungdam ko kik in hehpihna phat ciat ni.(1 Kawlentu 15:57). Pasian tung bek hilo in, ih kisapna khat hong huh hong panpihte tungah zong a kilawm hunin lungdam ih koh kik theih ding phawk ciat ni.Tua loin ih sepna ih maban khat peuhpeuhah mapaina leh lawhcinna taktak om thei lo ding hi. Lungdam ko in hehpihna ih phat theih ciangin Pasian in ama kiang pa’n a bei theilo vantung thupha leh leitung thuphate guah bangin hong zu sak den ding a, a kilawm hunin lungdam maitai tak tawh inn lam ih zuan thei kik ding hi.Mimal kim tungah Topa’n a telsiam dingin thupha hong pia ta hen!

                                               Khazih sungah, Thang Gin Mang

KHANGNO LEH PASIAN’KAMMAL

  “Pasian in hih bangin gen hi:Ni tawp ni ciangin,mi khempeuh tungah Ka KhaSiangtho ka pia ding a,na tanute uh leh na tapate un Keima thu gen ding uh hi;na tangvalte un maang mu ding uh a,na puteekte un mang man ding uh hi.Tua ni ciangin ka nasem numeite leh ka nasem pasalte tung nangawnah Ka KhaSiangtho ka pia ding a,amaute in keima thu gen ding uh hi.”(Sawltak 2:17-18)

            Hun khat lai-in ih gam ah Pasian thu pen khanghamte bek ii zuih zawh ding bangin ki ngaihsun hi.Khangnote pen sum le paai zong ding leh pilna sin ding dan bekin kiseh hi.Ahi hangin Pasian in ih gam ah khanlawhnate ahun zui-in hong tung sak ahih manin guihtheih khamtheih zangh leh lamdung a vakthaap khangnote nangawn kikheelin Pasian nasem mi tampi tak ih mu zo hi.Tun hun ciangin ih tuntunna biakinnte ah zong khangham sangin khangnote ki tam zaw ta hi.Tua ahih manin ih minam tungah hi bangin a hehpihna KhaSiangtho hong sung khia Pa Pasian’ min ih phat hi.Khangno atam zawte in khanlawhna hun sungin nuamsa in ki lawp mahmah napi-in tuate hong bei ciangin ki puuk zel ahih manin Kha sungah ki picing thei lo hi.Hih in ih gamah aki tangsam mahmah thu khat hi a,Pasian’kammal tawh ih leitung/nisim nuntakna ih kalsuan lohna hang ahi hi.Nung kha in khangno leh kampau,ze-etna,mawhnate ih kikum zo a,tu kha in anuai a thute ih kikum kik ding hi.

Khangno leh Siangthona

    “Tangval khat in ama gamtatna a siangtho in bangci kep theih ding ahi hiam?Nangma thu zuihna tawh a gamtatna siangtho sak thei ding hi…..Nang tungah kong khialh lohna dingin ka lungsim sungah nangma thu ka khol hi.”(Late 119:9-11)

            Sawltak Pawlu in Ephet pawlpi kem ding a anusiat tangvalno Timote tungah hi bangin lam na lak hi. “Mi tungah khut ngak ding  manlang lua kei inla,midang mawhna ah va kikum kei in.Nang le nang a siangtho in kikem in”(ZIVTimothi 5:22). “Khangno gitloh lunggulhnate taisan inla,lungsim siangtho a Topa asam mite tawh tonkhawmin thumanna,upna,itna le lemna na delh un”(ZIV2Timothi2:22).Ih khangno lai mahin khangno gitloh lunggulhnate pan ih kikep zawh ding thupi hi.Khangno khat ih hih nak leh lawm leh gual ki nei hamtang a,kholhpih lawm leh gual tungtawnin nuntakna ki lamdang thei hi.Hi bang ih cih ciangin lawm leh gual tawh kikhenin khat tangkia tuam om   velvalna tawh siangtho sawm ding cihna hilo a,thu umlo lawm leh gual tawh kizopna ah pilvang ding cihna hi zaw hi.Lungsim,kampau,gamtat manlo khat ahih leh nang zong na mawh khak lohna dingin kikem in.Thu umsa nungtolh khat ahih le zong lainatin thu ngetsak inla lamlak in.

    “Amaute tawh kibang a uangtat luatna sunga na va kihel nawn loh uh ciangin lamdang sa in hong siat gen uh hi.”(ZIV 1Peter4:4)

              Pasian thu sung a hong nungta khangno khat in lawm leh gual ii tuambawlna leh gensiatnate thuak thei hi.Hibang dinmun ah na om leh mawhna sung a na kidiahpih lawm leh gualte’mai kihta kei inla Pasian’min zong zumpih loin nuntakpih ngam zaw in. “Hih nate thupiakna nei in hilh in.Na khangnona hangin kuamah ki simmawhsak kei in;ahi hangin thugenna,nuntakna,itna,upna leh sianthona ah a um mite etteh dingin na om in”(ZIV1Timothi4:11). “Ahi hangin nang na hi leh na sinsa leh na kipsansa ahkip den in.Bang hang hiam cih leh nang in tuate na sinna pa na thei a,Khrist Jesu sung a upna tungtawnin hotkhiatna ngah nadingin hong pilsak thei asiangtho LaiSiangtho na neu tunga kipan na theihsa ahi lam zong na thei hi”(ZIV2Timothi3:14-15).Hi bangin siangthona tawh ze-etna leh mawhnate zo in Dawimangpa do nading Kha galhiam ahi Pasian’kammal tawh nong kidim tak ciangin Pasian zat theih khangno muanhuai khat nong suak ta ding hi. “Khangnote aw,note sungah Pasian thu teng a,thakhuahin,agilopa zo khin nahih manun,note lai kong khak hi.”(ZIV1Johan2:14)

Pilna leh Thuakzawhna

                Khanghamte in amau’nuntak sung a atuah khakuh thute(experience) khinkhai in thu gen ding uh hi.Siate (scholar) in asin uh laipilnate(education) tungtawnin thu gen ding uh a,kimkhatte in thuthuk muhtheihna(philosophy) leh leitung thu tuamtuam kanzawhna (knowledge)tungtawnin thu gen in nungta ding uh hi.Ahi zongin nang nahih leh Pasian’kammal tungtawnin thu gen in nungta lecin,na lamkhial ngei kei ding a,khialhlohna in pilna hi pah hi.Pilna pen Pasian zahtakna panin ki ngah hi(Late 111:10,Paunak1:7,9:10). “Ka siate khempeuh sangin thu ka tel zaw hi;bang hang hiam cih leh na teci pan’nate ka ngaihsunsun hi.Khanghamte sangin thu ka tel zaw hi;bang hang hiam cih leh na thu hilhte ka zui hi.”(Late119:99-100)

           “Na khangno’ lai-in thuak zawh hat ding kisin leteh hoih pen hi.Gimna ih thuak ciangin dam takin tu hithiat-in ih thuak zo ding hi.Lametna om thei lai  ahih manin phunphun huai pah deklo hi.”(Kahla 3:27-29)          Ei khangnote’ pumpi in haksatna,gimnate thuak zo napi-in ih lungsim in thangpaihna,thukkiknopna,muhdahna leh gensiatnate thuak zolo thei hi.Khangno atamzaw in kiniamkhiat ding zong haksa ki sa hi.Thu haksa khat peuh ihtuah ciangin Pasian’hehpihna ngaihsun in Pasian phatna tawh ih lungsim kidim sak lehang thuakzawhna ih nei ding hi.Galkap tul tampi tak anei kumpi Sawl in belh ding neilo naupangno Davuih lel mudahin thah sawm mah ta leh Davuih in Pasian phatna tawh alungsim kidim sakin Sawlu ii muhdah langbawlnate thuak zo hi. “Amaute lungtomin hi phangphang nawnlo ding uh a,deihsakna lungsim tawh tel takin thu gen hiathiat ding uh hi.”(Isaiah32:4)

Khangnote hong zang nuam Pasian

     “Tua ahih ciangin Pasian ahi nangma Pasian in na khan’gualte tungah a kikhaito-in lungdamna sathau tawh nang hong nilh zo a,na puantualpite mirrah paknamtui,aloes paknamtui leh thalsing namtuite a nam hi.”(Late45:7-8)

            Kamsangpa Hesiazah pen Pasian in kamsang dingin asap lai-in kum(20) pawl hi dingin LaiSiangtho siamte in gen uh a,LaiSiangtho in naupang ci lo hi(Isaiah 6).Ahi hangin Jeremiah pen kamsang(Pasian nasem) dinginPasian in asap lai takin LaiSiangtho in naupang ci ahih manin kum(20) sangin tawm zaw kha ding hi(Jeremiah1:4-10).Siampi Eli in tapasal muanhuai nih nei napi-in Topa ait naupangno Siamuilah in ama’za laih hi.Siampi Eli om napi-in Pasian in naupangno Siamuilah hopihin Eli’innkuan sung a piang ding thu pulaak hi(Siamuilah masa 3).Israelte kumpi dingin apicing tangval unau (7) om napi Pasian in anautumpen Davuih teelin sathau nilh hi.

           Pasian zat theih dingin kei ka kum,sinna,pilna,theihna leh muhnate tawm lai lua ci-in ki daithah kei in.Pasian nasem dingin nuntakna picing masa ding cih pen mihingte utna hi a,picinna tawh Pasian’na akisem hilo zel hi.Tu laitak a ih hih bangbang tawh Topa’tungah ki ap lehang hong zangh nuam Pasian in damdamin hong picing sak ding hi.Bang hang hiam cih leh akisin nailo laano tungah atuang nuam Topa Zeisu ahi hi(Maku11:1-10).Khai leh! Khazih ading ei Zomonote zong…….                                       

                                                                   Malaysia Zingsol 

THEIHNA LEH UPNA     

 “ Upna nei-ih cih ciangin ih muh theih nai loh ih lamette ngah takpi ding, ci- in muan’na lungsim neihna ahi hi .”(Hebia 11:1)

            Mi pawl khat in theihna leh upna pen a ki bangin ngaihsun kha in gawmkhawm ziau thei uh hi. Ki bang vet lo a, van leh lei bang in ki lamdang hi.

Theihna pen (a) Apiang khinsate leh a kithei khinsa thute .

                     (b) Mit tawh a kimu theite.

Upna pen      (a) Apiang nailote leh a kithei nailo thute .

                     (b) Mit tawh a kimu theilo nate .

                     (c) Theihna ii bat zawh loh thute ahi hi.

           Abeisa hun lai-in leitungbup tukpeng (World Cup ) pen France gamah ki sui –in innteekte mah in a khatna ngah uh hi .Ahi hangin tu ni-in na lawmte khat kiangah France gam tukpeng ki demna-ah akhatna kua’n ngah dingin na um hiam? Kikham ni  va ci le cin hong nuihsan lel ding a ,haihuai lua mahmah ding hi .Bang hang hiam cih leh a ki theikhinsa thu a hih manin kikhap kul nawn loin upna tawh zong ki sai nawn lo hi .Nang na theih leh na theih loh thu hi lel a ,apiang khinsa thu ahi hi. Ahi zongin hong tung ding May kha ciang Korea leh Japan-ah kisui leuleu ding a,akhatna kua’n ngah ding a, France te’n ngah kik ding maw? Ahih kei leh Argentina maw?Brazil maw? cih bangin na upmawh penpen upna tawh na gen thei a,mi tawh zong na ki kham thei hi. Bang hang hiam cih leh theihna ii bat zawh loh aki theih nai lo thu ahi hi .Pasian sim loh a thei khol kuamah omlo ding hi.

            Tuamah bangin tu ma kum tulnih lai-in Topa Zeisu Singlamteh tungah si khin zo hi cih na upna  tawh  vantung gam na tung kei ding hi. Bang hang hiam cih leh apiang khinsa thu ahih manin up ding hi loin, theih ding thu ahi hi .Nang up leh up loh tawh ki sai loin sihna hong thuak khin zo hi.(Zawmah 5:8) Hih thu a thei nai lo mi ki tam nawn lo ding hi .Atom in gen ni ci le hang kei sih tang dingin Singlamteh tungah sihna hong thuak sak khin zo ahih manin kei ka si nawn kei ding a, nuntak tawntungna (Vangam nuam) ka tung ding ci a,na up ngam leh na tung bek ding hi.(Zawhang 3:13) Ahi zongin hi bang ziau tawh Vantunggam ki tung zo ken teh,ol lua liang, gamtat pha tawm bang aom zek kei leh  um zo keng na cih leh na tung kei takpi pah ding hi .Na upna bangin piangta hen.(Mate 15:28 ) Ol notak a,hong ki pia khong letsong hi. (Ephet 2:8) Tukpeng kisuih ciang a,a zo a lel ding upmawh gen mawkmawk bang hi loin  a zuau ngei lo Pasian kam mal Laisiangtho ii gen teekteek ahi hi.

              Mi pawlkhat in gupna thu leh vantung gam tun ding leh tunloh ding vai pen ki gengen ki dotdot kul kei.Ih sih khit ciang ki thei lel in teh ci-in hansuak thei uh hi.Hi lua hi!Ih sih khit ciang ki thei takpi mah ding a, aumte vantung gam lam zuanin, aumlote Hell khuk sung tung ding cih pen na mit tawh mu-in na theih ni ciang  na ziakai ta ding hi.Bang mah vaihawm thei nawnlo ding hi teh.Bang hang hiam cih leh atheite vantung gam tung ding ci loin aumte bek vantung gam tung ding ci hi.Upna bek tawh gupna ki ngah hi.Topa Zeisu in Kei hong mulo pi a hong um mite in thupha ngah ding ci hi.A umlo mite leh atheilo mite thu ih gen nawn kei ding a, a um mite leh athei mite pen amau’nuntak zia tungtawn in hong kilang khia ding hi.A um taktak mite pen anuntakna uh hong ki lamdang pah ding a,nunlui khenglah nawn loin asiangtho nunthakah hong kibual nuam ta ding uh hi.Gentehna in nungak khat pasal nei in hong mothak tak ciangin nungak omdan leh anungsangte hong nusia in apasal lam ahi ateekte kiangah hong ki pumpiak pah ding hi.Khat veivei anungsang lamah hong hawh hun om ding a, ahi zongin zan tamtam nuam nawnlo ding hi.Topa muanna nei ngam nailo in athei mite bek ahih leh nunlui leh nunthak kisuanna mel neilo,maizumlo takin meh khawm kawikawi lai ding uh hi.

                Upna icih pen apiang nailote ah lungkimna hi(Hebia 11:1) ci ahih manin tu mahmah in kei vantung gam aluah ding mi khat ka hi zo hi ci a,kha muanna na neih khit leh a um takpi na hi pah hi.Ahi zongin kitelcian nai keng ci nemnum a,lunghiang lai-in kha muanna na neih theih nai kei leh a um nailo,athu athei bek na hi lai hi.Tuni in ih dinmun ciat ki en kik ni.Sanggam aw,nang a um na hi hiam?Athei na hi zaw hiam?  

                                      Khazih sungah ,               

                                                              En Lam Mang (Singzung)

PASIAN TENNA BIAKINNPI

“Tua ciangin zuau thu a gen dingin mi pawl khat hong paipih uh a , ‘Hih mipa in a siangtho i biakinnpi leh Moses thukham gensia tawntung hi .Hih Nazareth khua mi Jesuh in biakinnpi phel gawp in,Moses tung pek panin a hong kipan ngeina khempeuh kheel mang ding hi,ci-in a thuhilhna ka za uh hi,’a ci sak uh hi.” (Sawltak 6:13-14 ) 

      Pasian in thukham nam (10) Israel minamte a piakding lai-in Amah siangtho lua ahih manin Pasian meel a mu dingin a kilawm mihing khat zong omlo hi.Pasian in maitang kituahin leitung

mihingte  hopih hi leh a thuakzo kuamah om lo ding ahih manin thukham nam (10) tawh Moses tungtawn in Israelte thu pia ahi hi.Israel mite in tua Pasian ii thupiak thukham nam sawmte pen singkuang sungah koih uh hi.Tua singkuang pen Singkha tawh kibawl a ,a sauna (1125mm),a zaina (675mm)leh a sanna (675mm)pha hi.Tua singkuang pen mihing(4) ii  puak theih ding bawl uh a,a pai na khempeuh vuah pua kawikawi dingin Pasian in sawl hi. Tua singkuang alang leh alang ah Cherubin a kici lim nih khamh tawh bawl uh hi.Akha nihte bawlin a pang tuak pan a kha tuak tawh khuh sak un ci-in Topa vaikhak bangin bawl uh hi.Israel mite in tua thukham nam (10) singkuang pen a paina khempeuh vuah pua in galsimna te ah zong pua in paipih uh hi.Tua laitakin Israel mite upna ah tua singkuang a puak uh ciangin Pasian in hong om pih hi ci-in a  up banvuah  Pasian omna a siangtho mun hi ci-in ngaihsun uh hi.. Khuathak a satna munmun-ah biakpiakna buklamin a sungah koih uh hi.Tua thu kham nam (10)koihna mun-ah kua mah lut thei lo hi.Siampi a lianpente kum khat in khat vei bek Pasian in lut theihna thu  pia hi.Siampite tua sungah a lut ding uh ciang hoih takin ki siansuak masa uh hi..Gansi tawh amau leh amau ki theh,,ki nuh in a mawhnate uh ki sut masa uh hi.Tua bek tham lo a,a lut ding taktak ciangin a khe pen khau ki khih uh a, long awk sak lai uh hi. A deihna pen  Long ging(bell) a zak kei uh leh  a si hi ding  a,a khe a akikhih khau tawh nungtolh kai khia kik ding a cihna uh hi.

      Moses in Senai mualtung pan thu kham nam (10) a laak pan ki pan kum(600) hong tun ciangin David kumpi hong khang a,Baalah khua pan in tua thu kham nam (10) la uh hi. Thu kham nam (10) a laak lai un Uzaah a ki ci pa si hi. Thu kham nam (10) pen Pasian omna mun,asiangtho mahmah hi a, Pasian in bawngleng tawh puak phal lo hi.Tua thu kham nam (10) pen tang lai-in mi(4)in liang tawh zawng uh hi. A zawnna uh sing pen Singkha sing ci-in Laisiangtho sungah ki at hi.Mihing (4) in zawn ding kim lai bawngleng tawh hong puak uh ciangin lam hoih lohna te mun pan leng hong sawi suk hong sawi to ahih manin Uzaah a ki ci pa in puk ding lau a,va dom to leh Pasian hong heh mahmah a, tha khat thu in Uzaah hong si hi. Lai Singtho lui hun lai-in hih thu kham nam (10) pen thupi mahmah a,Pasian om na mun,mawhneite mawh sutna mun leh a siangtho mahmah mun ahi hi.Thu kham nam (10) pen Jerusalem biakinnpi sungah hong koih uh hi.Israel mite in mawhna hong bawl uh ciangin Pasian heh ahih manin tua Jerusalem khuapi pan Babylonia kumpipa khut sungah hong ap ta hi. Tua hun pan ki pan thu kham nam (10) leh biakinn sunga om van manpha khempeuh ki la a,a om lai teng mei tawh halcip uh hi.Tua pan ki pan thu kham nam (10) a om na mun zong ki thei nawn lo hi. Ahih hangin Israel minamte in tua biakpiakna dan pen hong neito suak uh hi.

         Nidang lai-in thu kham nam (10) om na mun pen Pasian om na mun hi a, tu ni-in Pasian om na mun koi tak hiam? Cih kan dih ni.Topa Zeisu Calvary mual Singlamteh tungah hong sih suk ciangin biakinnpi sung dalna puan  pen khen nih hong suak lian hi.(Luka 23:44-45)sung en le hang adeihna in bang hiam? Cih leh biakinnpi-ah pai a,gan sisan tawh mawhsutnate khempeuh ki sam nawn lo cih na hi. Lai Siangtho lui hun in biakinnpi sung thu kham nam (10) om na bek Pasian om na  hi a, tu ni-in nih leh thum Ama min tawh ki kai khawm leng Topa ei tawh hong om khawm ding ci-in ki mu hi.(Mate 18:20)Nungzuipa Stefen pen bang hangin ki that hiam?Nungzuite lak-ah a ki that masa pen Stefen hi.(Act 6:13-14)Stefen in  Moses thukhamte ki sam nawn lo a,Nazareth  khua Topa Zeisu in tuate khempeuh hong laih sak ta ci-in thu gen ahih manin Zudah makaite in suang tawh deng lum uh hi.

         Tua hi leh tu ni-in Pasian biakinnpi koi tak hiam? 1 Cor 6: 19-20 sungah ih pumpi-in Pasian biakinnpi hi a,ei ma a hi nawn lo hi. Ih pumpi pen Zeisu in asisan manpha tawh  hong lei sa hi.Tu ni-in ei Tapidaw a tam zaw in  ih pumpi  Pasian biakinnpi ahih lam phawk nawn lo in ,Zu,Za  a ki pan asianghto lo nate tawh ih pumpi ih ninsak ta hi. Sanggam aw,Pasian biakinnpi ahi na pumpi bang ci zat sawm na hi hiam?

                                  Khazih sungah, Tg.Sian Khat Mung(Buan)

 KI-ITNA LUNGTANG

                 Tua ki-itna lungtang in tang tawntung hi

                 Tua ki-itna lungtang ih neih ni sung teng 

                 Sunni bangin ki taang hi

                 Tua ki-itna pan ih pialloh nangin

                 Hong huh thei ding  lai khat om hi (1Cor. 13:1-13)

                 Tua ki-itna in leitung na khempeuh a nuisak zo hi

               ‘O’ tua ki-itna anei leitung mikhempeuh thupha pia ciat ni 

   Amaute in Zeisu itna tawh kalsuan uh ahih manin  …..    

LUNGNOPNA

                           Lungnopna cih pen munkhat ah om 

                           Ih sepna ih pauna ih genna tawh kigamla lualo

                           Ih neihsa  teng tawh lungkim leeng

                           Leitung nakhempeuh lungnopna hi

                           Tua ahih ciang ……nuihmai tawh leitung lungnoppih in,

                           Lungnopna mun suaksak ciat ni.

                                                         Mary Huai (Singapore)

CIAM UN

“Topa hoihna na sin un la,hoih hi ci-in thei un.Amah abel mite mi lungdam ahi hi”.(Late 34:8)

         Khat vei khua sung  vaak in, ka om na lam zuan kik dingin Bus ngak in ka ding hi.A sawt lo in ka Bus zuih ding hong tung ahih manin Bus tungah kahto in ka tu khol hi.Buste pai khiat hun ding ki ciang tan a,ka tuanna Bus pai khiat hun ding hong tung nai lo ahih manin ngak a, ka om lai takun lawhkhai tawh van pawl khat tawi kawm in naupangno khat Bus tungah hong kahto hi.

        Tua naupangno in neek theih van pawl khat hong zuak a,Bus tung tuangte  kiangah (erlem)van khat ta pia in, ciam sak hi.Mite’n zong sum bei kul lo amawkna ki ngah ahih manin la in ciam uh hi.Tua ciangin naupangno in mite kiangah “Lim na sa uh a, na lung uh a kim leh hong lei pan un”a ci hi.Mite’n zong ciam in a nek khit uh ciangin lim sa uh a, amau deih zahzah uh lei thuak beh uh hi. Bus pai khiat ding hun hong cing ta ahih manin van zuak naupangno zong avan zuak zah sumte a khut kuak sungah hum kawm in a om lai van teng tawh Bus tung pan tuak khia hi

         Bus zong ka omna lam manawh in hong taitai ta a,ka ngaihsutna sungah tua van zuak naupangpa thu hong lut hi.Hih naupangno.in avan zuakte a khawt theih nang maizumna thuak in ki niamkhiatna tawh   akhawnkhong a mite pia masa in, ciamsak a,nesak hi.Bang hangin tua naupangno in a vanzuakte mite a ciapsak khit teh zuak pan ahi hiam?A hangin tua naupangno in avante’ hoihna leh a limziate thei lua ahih manin mite kiangah zuak ngam in ciam sak ngam ahi hi.

          Tua bang mah in kha thu lam-ah zong Pasian in atapa Zeisu Khazih hoihna sin in hoih hi ci a ih theih ding hong deih hi. Pasian in atapa Zeisu Khazih a bel mite leh a um mite in nopsakna,hauhna,gualzawhna leh damna thupha a ngah theih na dingin mawh nei lo atapa leitungah ki niamkhiatna tawh  mi bangin hong suaksak a,mite ii simmawh bawlsiatna ,maizumna hong thuak sak hi.Tua hi a,ei thu um mite’n zong ih nuntak na ciat-ah Topa in man nget lo a,akhawnkhong a hong piak Topa hoihna ciam in,sin in, hoih hi ci a ih theih ding thupi hi.Sanggam aw,tu ni-in Topa tungah upna leh lametna nei-in,ama hoihna aciam,asinte ih hih teih nang’ Topa kiangah ki hei kik ni.Topa in abei thei lo itna tawh hong sap lai-in…………...

                           Khazih itna sungah,    Tg.Kai Za Dal(Tualmu)      

LUNG KIA KEI IN

                                                Peter Kham Lian Zam(Tuithang)

                                                               Zingsol Innkuan

 “Tua ciangin amau’ mit in mi cimawhte’ kisapna mu ding a,a mau’ bil in mi cimawh te’ thu gen ngai ding uh hi”(Isaiah 32:3)

     Hih Malaysia Zingsol kum khat tawntung Topa’n hong gual zawhpihna sungah abeisa kum a Topa’n hong kepna Topa tungah ka lungdamna taangko thei ding ka hih manin Topa’n minthanna leh pahtawina tang masa ta hen!

      Kei pen 1997 kum sungin (Singapore workpermit ) tawh pai ding cih sawmin Zangkong ah ka om hi .Ka workpermit ding pen hong tung thei mahmah lo in cimawh in sinkham lungkhamna tawh Zangkong khuapi sungah kum khat tawntung ka hun hong mawkbei ta hi.Topa aw, kote’ tungah mavan’na hong pia in. Kote’ matut zawhna khempeuh nangma hong sepsakna hang ahi hi(Isaiah 26:12 ) Tua bang a ka om lai takin alamdang takin Topa’n lampi hong hon sak hi .Gelkholhna bang mah om lo kawmkal ah ni khat ni –in lamdang takin Topa’n Malaysia pai nading lampi hong hon sak hi.Haleluijah!

      January 15,1998 ni-in Kuala Lumpur khuapi kong tung hi.Tua ni a ki pan tuni ciang dong sih theih man theih na ding mun zong ka tuak kha ngei hi. Kolbulh khaukhih theihna ding mun zong ka phulkha ngei hi. Tua kawmkal pan’n Topa’n ama khutkuak muanhuai tawh hong keem ahih manin tuni ciang dong Ama thupha a sang thei lai ka hi hi.Tua ahih manin Topa tungah ka lungdamna hong pulaak khia ka hi hi.Hih ka teci panna a sim kha mimal kim tungah Topa’n thupha hong pia ta hen! Amen .

A LAMDANG TOPA THUPHA

                                                      Peter Pau Khan Kap (Tuitum)

 “Bang hang hiam cih leh Keimah in Topa, note hong damsakpa ka hi hi.”(Paikhiatna 15:26)

          Abeisa hun ni khat ka nasepna pan an ne ding sun 12.00 in ka ciah tek uh hi.Nitak lam nai 1.00 in nasep ka kipan kik uh hi.Nasep ka kipat zawh asawt loin ka gil hong na hiauhiau a, awng ka pai zelzel hi.Ka anneekna pan bang neekkhialh nei ka hi tam maw? Cih kawmkawm mah tawh na ka sem veve hi.Nitak lam nai 7.00 hun pawl in ka khua-ul neel guah thuak bangin hong taak ziahziah a,ka sam zung khempeuh thak zuazua in ka lung hong kham pian ta mawk hi.Nitak nai 9.00 hong cin ciangin ka nasepna pan ka omna innah ka ciah pah vingveng hi.

          Ka omna mun ka tun ciang tha khat thu in ka kisil masa a,ka man khit ciangin ka lupna khan ka ciah leh ka lung hong am vat ahih manin na len kawmin khan sung ka tung thei sam hi.Tua lai tak ka ngaihsut hong tam vatin ka lung hong neu lua peuhmah hi. “Topa aw,kei bang ci ding ka hi hiam?”ka cih lai takin hong ki hopih dan khatin, “ Zatang ne in,” ci-in hong ki sawl bang dan khatin awneem khat ka za hi.Tua ciangin ka sabuai (tHqGJ ) kai-in ka zawt pong leh ‘Panadol’zatang nih ka mai kha hi.Ka neih lam zong thei loin lamdang ka sa a,zatang tawi kawm mahin Topa hehpihna thupha ka phat hi. “Topa aw,khomun pum nga leh ngasa tawn nih mi tulnga in akhamval mah bangin hih ‘Panadol’tangnih pen na vantung thupha,leitung thupha hong pia peuh lecin nangma minin tu lai tak kathuak sih theih gimna pan adam sak kik thei zatang hi sak thei hilo nahi hiam?Amen!”ci-in thaltukin tawlkhat khuaphawk loin ka om hi.Ka khanlawh kik ciangin ka tungah bang mah natna om nawn loin, “ Topa min tawh nungta,” ci-in ‘Panadol’ leh Topa thupha, “ O ! Bang zahin lamdang hiam?” Ci-in lungdamin Topa min ka phat kik thei hi.Hih thu ah adikna leh athuphate Topa in tang ta hen!A men..

 PASIAN’ITNA PHATNA

“Amah in ka mawhna khempeuh hong maisak a,ka nat

na khempeuh hong damsak hi.Hankhuk tung ding hong suakta sak a,itna leh hehpihna tampi hong pia hi.Muvanlai bangin ka tha a hat theihna dingin thupha namkim hong pia hi. (Late 103:3-5)

     Ka  nuntakna-ah Topa hong itna leh hong hehpihnate  teci pang thei kik dingin hun hoih hun nuam hong ngah sak Topa tungah lungdam ka ko masa hi.

      Ni khat ka naute kiangah pai nuam ka hih manin  Workpermit nei ka lawmte khat  zawn in ka pai khawm uh hi. Ka pai lam un lamkal ah bang mah nawngkaina om loin ka naute kiangah lungnuam takin ka tung thei uh hi. Ka ciah lam un kawl an nek ding lunggulh in Kawl ansai-ah lut in an ka ne uh hi. Tua pan pai khia in lampi dung teng ka tot uh leh lam kaabom khat panin Palikte in hong pang in hong man uh hi. Ka paipih sanggam pa ii Passport la in a et sak khit uh ciangin kei a zong tua bang mah in ka Passport hong et sak uh hi. Topa’n Palikte’ mit nahum sak a, kolbulh khaukhih theih nading hi napi-in a lamdang takin hong suakta sak hi. Haleluijah!Danzilahte meikuang sung pan leh humpi nelkai kam sung panin  hon khia a,a suakta sak ih Topa’n  Palikte khut sung pan hong hon khia in hong suakta sak ahih manin Topa min ka phat hi. Haksatna leh lauhuaina ih tuah khak ciangin Topa tungah upna leh lametna takpi tawh ngen peuh leeng Topa in hong dawng ding a,nisim ih nuntakna-ah Topa hoihna mu thei den ding hi hang.Koi koi ah ih pai a,sep leh bawl ding khat peuhpeuh ih neih ciangin Topa tungah ih hun,ih vaite ap masakna ih neih den ding thupi hi. Abeisa ka nuntakna-ah tua bang a ka vaite Topa tungah ap masakna nei ngei lo kahih manin lungkhamna leh haksatna ka phul kha thei zel hi. Malaysia Zingsol ka sim khit pan ki pan nisim ka nuntakna-ah  Topa in Ama thuman lampi hong lak toto in tha ngahna tampi hong pia hi.Sanggampa Jacob in zong nasep hunsung leh hun awng kal sungte ah Topa hoihna leh hong itnate hong kikuppih den ahih manin Topa thu sungah nuntakna thak ka ngah hi.Topa in kum(6) sung tawntung ka nuntakna hong cing hong keem bek tham lo in Ama itna hong thei sak a,a lamdang Kha thupha leh leitung thuphate ki lawm lo pi-in a hehpihna hong sung khia hi.Tua Topa in minthanna khempeuh tang tawntung ta hen!Hih lai asim mimal kim tungah Topa hong itna leh hong hehpihna thupha hong tung den ta hen!

       Hih Malaysia Zingsol laihawm ka sim pan ki pan in ka nuntakna-ah ki lamthakna leh tha ngahna tampitak ka nei hi.A ki selcip Pasian ii thu thukpite hong pholaak in,hong theihtel sak semsem ahih manin tha ngahin ka lungdam mahmah hi. Hih lai hawm hong pian khiat theih nangin asem abawlte tungah vaihawm siamna,theih siamna leh pilna a pia Topa in minthanna,pahtawina ngah tawntung ta hen!

     Haksatna leh buaina tampi om ding kawmkal pan kum khat tawntung hong gualzawhpih Topa min ka phat masa hi.Abei thei lo Topa itna leh hehpihna in ka nuntakna-ah ni khat khit ni khat, kha khat khit kha khat hih Malaysia Zingsol tungtawn in hong musak beh,hong theih sak beh ahih manin Topa tung leh asem abawlte tungah ka lungdamna thu kong pulaak hi.

      Hih Malaysia gam-ah Nipini(Sunday)in Topa tungah biakpiakna piak theih hun ki ngah loh ban-ah lauhuaina thu tampi om ahih manin Pasian ii thu leh la tawh ki gamla in ka om lai takun ei Zomite nong it luat,nong vei luat manun sum leh paai,hun leh nite nomau aituam ading bek zang loin hih Zingsol makaipite ahi Daniel khui Sing leh Jacob tungah Topa’n cidam khansauna,lawhcinna,mapaina thuphate hong pia beh lai ta hen!Na beina uh azah sawm azah zakhat  tawh hong dim kik ta hen!  Keima aituam bangin ka ngaihsun a,ka lungdam phadiak hi.Mai lam hun-ah zong nasep nabawl, na geelnate uh Topa in thupha tawh hong pia in hong kalsuan pih hen la,Kha thupha leh Leitung thupha hong pia beh lai ta hen ci-in  thu kong nget sak tawntung hi.

                                  Khazih sungah,

                                  Nu Niang Khawm Man(Lawibual,Tedim)

 LUNGDAM KO IN ZAILA AWI NI

“Lungdam kohna tawh ama kongpi-ah lut un la, phatna tawh ama huang sungah tum un.Ama tungah lungdam ko un la, ama min phat un.”(Late 100:4)

          Topa’ lamhon sakna leh hong panpihna tawh a beisa May,2001 kum pan aki hawmkhia hih Malaysia Zingsol tu-in kum khat hong  cing ta a,kum khat sung tawntung hong gualzawhpih Topa tungah lungdamna ih ko masa hi.

          Hi bangin lai tawh lungdamna thu taangko theih nading lunggulh in,Computer a ki pan sum le paai,lungsim leh tha leh ngalte iksiik hetlo a, ma hong pankhia sanggam gel Jacob leh Daniel Khui Singh tungah Topa’n athak in thupha hong piak sak ta hen.! Lai hawmkhiat theihna dingin sum le paai bek tawh piang thei loin sep ding bawl ding leh thu le la tampi kisam hi.Tuate tawh ma hong panpih sanggam akua maciat tungah zong nakpi ki lungdam hi cih thu  ataang pha  Zingsol ahi Topa Zeisu(Mang. 22:16) min tawh kong pulaak hi.Kei zong thugen lasak a kipan siamnate ah kivakna leh kicinna neilo banah kuankhia in lungdamna thu ka taangko thei kei hi.Hi mah ta leh hih Malaysia Zingsol tungtawn in kei hih theih zahzah tawh mun tuamtuam a om mipih sanggamte tungah Topa’ hoihnate sung pan mal khat mal nih pulaak thei ka hih manin hi bang hunpha hong pia Topa tungah ka lungdamna ka ko hi.Mai lam-ah zong akua maciat ih hih theih bang bang tawh pangkhawm in Ama ading khuavak a taangsakte ih hih theih na ding, a hunhun in lungdam ako thei ding leh ih maban ciat ah hong gualzawhpih nading thungetna tawh ki panpih ciat ni.

          Leitungmi khempeuh tungah kuamah deidan neilo Pasian hong piak hehpihna letsong Zeisu  Khazih um in sang leng khamuang takin nungta thei ding cih ngaihsun kawmin anuai a ih ngeina Zolate tawh hehpihna phat in lungdam ko ni..

(a)Sianmang sinthu  khaubang sutna  Malaysia Zingsol,

kum kivei sun  ni bangin   hong tang zo-hong tang zo ta ee.

(b)Zotui  momno  hanlungciam in  mabang pangkhawm leng,

Sian gamlei kil  bang khangin pallun  ding- pallun ding hi ee.

(a)Namcih vontawi  hambang hong huai , Sianmang Zeisu 

naubang sang ni ee.

(b)Naubang sang ang lai-ah  pom ni, laukha munmuang 

sawlbang hei ni ee. 

(Zawma 10:12, Ephet 2:8, Zawma 6:23,Zawma 5:16)

                                              Khazih sungah,

                                                                       Thang Gin Mang