HAWM

ZingSol Website
rav;&Sm;

HIH LAI AH KEI OM ING, KEI HONG SAWL IN.( Isaiah6:8 ) Malaysia gam pan Zomite "ZINGSOL".

Malaysia Zingsol khol ( 2 ), Hawm 13, 14, 15, 16, 17, 18, 19, 20, 21, 22, 23, 24,

HAWM (10)

Vaphual leh gamsa namkimte’ nopsakna mun, Neisok-Zoheisa paakte palhna mun ahi a etlawm anim dildial mualtung tengah teengin apicing ngeina leh acitak ki-itna lungsim a paii minam in ei Zomite ihi hi. Khang tampi mah ki nusia khin ta a, tu hun ciangin ih om na munciat tawh ki zui-in ih Zokam awsuah leh ih ngeinate akibat kim nawn loh hangin tun sung khat pan apiang khawm leh innkuan khat ihih na thu khang taangthute ih sut kik ciangin ki mu thei hi. Leitung a om minam tuamtuamte lak-ah ei Zomite zong minam ki cian khat in ih om a, kum sim February kha(20)ni pen ih Zominam ni ci-in ki ciamteh hi.

Hun khat lai-in ei Zomite lawki biakna sungah ih om a, zu leh sa sungah ki diah in gal leh sa aii a ih om lai takin ih Zo gamah mikangte in Zeisu hong tatkhiatna ahi lungdamna khuavak hong puak uh hi. Hih khuavak hangin ei Zomite’ nuntakzia hong ki khel in ih ngaisutziate hong ki lamdang sak ta hi. Pasian in ei Zomite hong laamto takpi a, ih Zo khangah mihau leh mipil,misiamte khutme kuai –in i sim zo nawn kei ding hi. Ama lenggah huanah mapang ding leh lungdamna thu taangkona-ah zong Zomite tampi mah hong teel in hong zangh khin zo a, angtan huai mahmah hi. Mai lam hun ah zong Zomite i kalsuanna lampi-ah i ngah sa leitung thuphate leh vantung thuphate in hong sulzuih den theihna dingin sak leh khang kikhenna, khua leh tui,beh leh phung,biakna pawlpi ki deidanna leh ki galneihna lungsim khempeuh puahpha in i paih khiat ding ki sam hi. Hih bang lungsim puakziate in leitung tawh ki lawmtatna hi a, Pasian tawh ki melmakna zong ahi hi.

Tua hi a, tu ni-in i Zominambup in thupha ngah minam hi-in,minamdangte lak-ah madawk in a khuasuakte i hih theihna ding Zeisu nau bang pom tawntunga,Topa pen i Zominambup ii Pasian a i neih ding, i teel ding thupi hi. Ih Zogambup khantoh theih nang Zeisu itna sungah khut ki len a, lungsim ki pumkhat in Topa zaktak a, ama itna kip sungah lametna nei thei dingin hanciam ciat ni. Tua banga i kalsuan toh khop ciangin i biak Pasian in zong et lawm hong sa ding a, i Zo minambup ama thupha tawh hong tuam bek tham lo in i ten na Zogam leitang zong hong cidam sak lai ding hi.

ITNA PASIAN

“Itna hih ahi hi:Eite in Pasian i it cih na hi lo, a mah in ei te hong it aa, i mawh nate a khuh na dingin a thoih na in a Tapa hong sawl na ahi hi.” (ZIV1Johan4:10)

Pasian in itna ahih mah banghin itna pen Pasian’ kiang pan hong pai hi a, ama’a ahi hi.Pasian in hih itna mihingte hong hop sawn tak ciangin nu leh pa te’itna, zi leh ta te’itna, nungak tangval te’ ki itna ,lawmta ki itna cih bangin leitungah itna atuamtuam te hong meng khia hi. Ahih hangin hih itnate in atawntung in kip zo lo a,hunkhat ciangin bei mang thei zel hi.Mihingte in athuk pen a i ngaihsut nu leh pa te’itna nangawn kho tawntung zo lo ahih na thu mun tampi takah i thei khin zo hi.Ahih hangin Pasian’ itna ahi leh nu leh pa’ itna sangin zong kho zaw leh muanhuai zaw a hihna LaiSiangtho in hong gen zo hi. “Bang hang hiam cih leh ka nu leh ka pa in hong nusiat hangin Topa in kei hong kem ding hi.”(Late27:10)

Leitung mihingte ihih leh ei hong it, hong phat te leh ei tung a hong hoih/ thu nuam mite pen ki it tek a, ahih hangin,ei hong mu dah,hong gensia leh hong simmawh mite pen it ding hamsa ki sa mahmah ciat hi. Tua in itna man taktak pen nang leh kei sungah om het lo ahih lam hong ki tel sak hi.Muh theih mihing nangawn a it zo lo nang leh kei in muh theih loh Pasian koi ci bangin it zo ding ihi hiam?Hi mah hi! Nang leh kei in Pasian i it loh lam LaiSiangtho in hong gen khin zo hi.Ahih hangin Pasian itna pen nang leh kei itna te’ tungah ki nga lo in ama tung mah ah ki nga hi.Eite in itna i neih zawh het loh hangin itna a nei Pasian in nang leh kei hong it masa hi. “Ahi zongin eite mawhnei(Pasian’gal) ih hih lai takin eite adingin Khirst hongsi ahih manin Pasian in ei te hong it mahmah na thu hong lak khin hi.”(Rom5:8)

A ginalo pen leh amangthang pen hong it Pasian

“Tua mah bangin hih naupangte khat nangawn a mang thang ding vantung a om na Pa un aphal kei hi”.(ZIV Mate18:14)

Ei mihingte in i khawi ganhingte lakah aginalo, aliam abai khat hong om tak ciangin amanlang thei pen in ki go in asa ki ne ahih keileh sehsat in summet ngah na dingin ki zuak hi.Ahih hangin tuucing hoihpa in a tuute lak ah aliam abai khat a om ciang in aliam mate tuam sak in kang bawl mahmah zaw hi.A khan gual te a pha zo lo den aginalo pen tuu a dingin lung himawh pha diak a, apai na peuhpeuh ah tonpihin amah tawh omkhawm tawntung hi.Ni khat tuatuu lam pial in agam man lam anei pa in hong theih tak ciangin tuu sawmkua leh kua te nusia in tua amangthang pen hong leh zon kik teutau hi.

Tua tuu in a topa’ lam lahna pan hong pial khiat tak ciangin agam mang hi a, a thumang khol lo tuu khat ahi hi. A dang sawm kua leh kuate tawh i et ciangin zong meima pawn tampitak a nei a ginalo pen hi aa,iiplah huai lo hi. Ahih hangin tuucing pa in, “A thau zaw leh a hoih zaw tuu tampitak nei lai lel ka hih teh,tua agi na lo tuu khat lel ka sup hangin phamawh kei,”ci lo in ngia te neek a si ding leh amangthang ding ahi tua aginalo pen tuu khat bek hong ngaihsut ciangin lainat mahmah a, a nuntakna khaam in hong zong kik cinten hi. Tua tuucing hoihpa in Zeisu hi aa, singlamteh tungah ki kham in amangthang pen nangmah hong zong kik zo hi.Kisiik akul lo mi siangtho tulza tampitak a om hangin tua te tawh lungkim zo lo in a kisiik nai lo mawhnei nangmah tu ni in hong lamen lai hi. “Tua mah bangin kisiik kik ding a ki sam lo mi hoih sawm kua-le-kuate tungah lungdamna sangin mawhnei mi khat a kisiikna hangin vantungah lungdamna lian zaw ding hi.(Luka 15:7)

A nunung pen hong hehpih Pasian(Johan 5:1-9)

Bethzatha aki ci bual gei ah mit-taw,khelbai,cina tampite in bual tui ki lawh ding ngakin om zihziah uh hi.Bualtui hong ki lawh ciangin aki pap masa pen cina pa/nu in damna ngah ding ahih man in cina tampite amasa ding ki tuh ziahziah hi.Tua lai ah kum sawm thum leh kum giat tawntung cina khat zong om aa,mite ading damna bual hi ta leh ama a dingin tua bual pen lamet bei, lungkiat na bual hong suak mawk hi.Bang hang hiam cih leh bual tui aki lawh ciangin apap ding u leh nau,beh leh phung,lawm leh gual tam pi anei cinate in ama mai ah na ki pap mengmeng uh ahih manin amah pen vai nunung den hi.Ama nung a hong tung cinate na ngawn in hong ciah san ziahziah tak ciangin hong thaneem mahmah hi.Ni khat Zeisu tua bual gei ah hong pai ciangin tua cina pa mu aa, sauvei pi a cinat lam leh ahuh ding mi neilo aa vai nunung den ahih lam thei ahih manin hehpih huai sain dam sak hi.

Mihingte lam pan lametna abei ciangin na asem nuam Zeisu ahi hi. Bethzatha bual bangin khanlawhna huih te in nang hong khengkheng in mite bangin piangthak thei nai loin na om kha ding hi.Mi tampite piangthakin, vantung thupha, leitung thupha a saan

ziahziah lai takun,lametna neilo anunung pen na bang kha hiam?Nang hong deihsak hong laamto ding mi aom lo bangin ngaihsun kha kei in.Bangh hang hiam cih leh Zeisu in nang hongvei aa,midangte mah banghin hong dam sak ding hi.Tu lai tak in lei tung pilna siamna, sum leh paai zonnate i et ciangin u leh nau, beh leh phung kicingte mah ki laamto zo in gual tung tuang uh hi.Mite banghin khangto leh alawhcing thei ngei lo ding,mite’ nelh siah den ding banghin ki ngaihsun kha kei in.Zeisu in a hun lap in nang leh na innkuan nuntakna hong laamto ding aa,na tate zong vantung thupha, leitung thuphate ah akhangualte apha zo dingin hong lap toh sak lai ding hi.A nunung pen hong hehpih Pasian ahi hi.

Ih mawhnate sangin Pasian hong itna lian zaw

“Ahi zongin khialhna atam na munah Pasian’ hehpihna hong lian zaw zel hi.(Rom 5:20)

Khatvei lai-in a pil mihau pa khatin aneihsa khempeuh aluah ding tapa khat bek nei hi.Mihau pa in atapa khat neihsun pen it mahmah ahih manin aneu a kipan thuman thutak tawh thu hilhin hoih takin pantah to hi.A khialhna aom ciangin zong ngeek bawl lo in tai thei zaw ahih manin atapa in apa pen kihta mahmah hi.Ni khat naupangno in vatawt khat hong thah khak tak ciangin apa na sem gilo pa khat in a pa kiang ah gen ding leh a pa ii sat ding tawh lauphawn den aa,amoh lei nading sumte sut den hi.Hih banghin naupang no in apa akihtakna tawh alungsim gim lua ahih manin ni tampi an ne zo lo in hong om aa,a ci na in zato hong tung hi.

Mihau pa in atapa kiangah anatna adot hangin gennuam lo aa,siavuanten zong thei zolo uh hi.Naupangno hong gim semsem ahih manin mihau pa in, “Ka ta aw, ih neihsa khempeuh nang a ding hi lo ahi hiam? Nangma damna dingin ih neihsa khempeuh a bei zongin phamawh lo hi,”ci-in,khitui luangin hong dot tak ciangin naupang no in zong kapa in hih zah tak a kei hong it hi mawk maw ci-in lamdang hong sa phing hi.Tua ciangin naupang no in zong, “Pa aw,tua leh hong gen ning,heh kei in maw,hong mai sak in maw,ken nung lam in ih vatawt khat na that kha ingh,”acih leh apa in, “Ka lai sai! ka tapa-------,”ci-in hong ki pum kawi uh hi.

Dawimang pa in Pasian kiang pan ih ngah ding thuphate hong haza hong sut nuam ahih manin mawhna tawh thang hong siah den hi.(Johan10:10) I mawh khit ciangin zong Pasian kiang i zuat kik theih loh na dingin launa, kisuanna leh maizumnate tawh hong khaktan lai hi.Ahih hangin na Pa pen hehnepna leh lainatna khem peuh tawh akidim Pasian ahih lam tel in la,(ZIV 2Kor1:3)amah zuan kik in. “A hi zongin Pasian kiangah ih mawhnate va pulak le hang,amah citakin thuman ahih manin, ih mawhnate hong mai sak in,ih hoihloh nate khempeuh hong siang sak ding hi.”(1Johan1:9)Tu ni in khamtheih guihtheih zu leh sa sungah ahi zongin paktatna tuamtuamte sung ahi zongin na kidiah khak leh hong pai khia in. Leitung ci leh sa duhhop huaihamna hangin Topa mangngilh in na taisanna pan’ hong ki leh kik in.Tuate in a dam thei lo natna bangin nang hong gim sak in sihna dong hong tun ding hi.Na mawhnate sangin Topa’ hong itna lian zaw aa, abei thei lo hehpihna leh akhut liam-mapawnte in nangmah hong ngak gige hi.

“Ahih hangin Jerusalem mite in, ‘Topa in ei hong nusia khin aa,ei hong mangngilh khin ta hi,’a ci uh hi.Ahih hangin Topa in, ‘Ama sungpan- a asuak atapa ahehpih lo ding zah in nu pi khat in ama nawl ateep naungek mangngilh thei ding ahi hiam?Hihte nangawn in ma ngilh kha thei ding aa, ahi zongin Keimah in kong mangngilh kei ding hi. Jerusalem (katanu,katapa)aw, ka khutpeekte sungah nang kong gelh khin zo aa, kong mangngilh ngei kei ding hi.’”(1saiah49:14-15)

Leitung ih nuntakna ah tha neem hun,nungtolh hun,puk hun om kha mah ding aa, ahi zongin abei thei lo Pasian’ hehpihna tungah a ki nga thei den dingin laisim mimal khat ciat Topa’ itna khut in hong lawng ta hen!

Zeisu itna sungah,

Jacob

ZOMI KHRISTIAN,PASIAN’TATE IN ZU ADAWN DING MAH HIAM ?

Malaysia gam sungah a om Zomi Khristiante tungah ih Topa Zeisu Khazih min tawh khut kong len hi.Malaysia gam sungah i tun theihna,thu masa pen ei leh ei ih ki theih sa ahi hi.Hihgam sung ii tun tak ciangin keimah pan kipan akua mapeuh in,hamsat na leh gentheihnate atam atawm tek ki thuak kim ciat hi.Gentheih na ih thuak tak ciangin Pasian tungmah ah ih kiko ciat aa, pawl khatte in Pasian thupha sang takpi aa,pawl khatte in,neek khop ciang asang zong ih om hi.Pawl khat te in thong kiat lawh sih lawh cih zong om lai hi.Mi pawl khat te in Pasian thupha asaan ciangin lungdam lua ki sa in,apia pa phawk nawn lo in amah thahatna pilna leh hanciamna tawh ngah ki sa in, pumpi thanghuaina ahi za kaang(No.4) ki sun, khamtheih zute dawnin khamin,buaina tampi tak piang sak bek tham loin, athupha lampi kong ki khak zah dong in piang hi.Tua ahih manin Pasian’ tate Tapidawte khristian mite mah in zu dawn thei ding mah hiam?cih thu pen :LaiSiangtho tawh ii ki dawng sak ding hi.

Khristian mi pawlkhatte in anuai a LaiSiangtho pen bulphuh uh hi.

(1).Mite’ kam sung aa,atum suk tein mi aniin sak kei hi.Kam sungpan apusuak tein mi a niin sak a hi hi.Mate15:11(ZIV)

(2).Na cinat pahpahna leh na gilpi hang aa tuisik bek na dawndawn khawl in la, leeng gah zu tawmkha bek na zangh in.1Tim,5:23(ZIV)

(3).Mi khempeuh in lenggah zu alim pen te hawm masa aa,leengla te in a kham khit ciangin alimlo te ahawm hi.Nang na hih leh tu dongin alim pen te na siit lai hi.John2:10 (ZIV)

(4).Piancil 14:18,27:25,28.Pai 29:40 Hih munte nasim in.Hih a tung aa thute LaiSiangtho mah tawh ii dawng ding hi.LaiSiangtho sungah,

(1) Isa 5:11- Zingsang tho in zu leh leenggah zu kham mi in, thupha ngah lo hi.

(2) Hos 4:11 Lungsim ahai sak thei, numei tawh mawhna leh leenggah zu, khamtheih zute, auang zat mi-in, anungta Pasian ataisan uh hi.

(3) Thuhk na 32:33-38 Leenggah tui-in akhauh mahmah gul gu a hi hi.

(4) Pau 23:31 Hai sung aa a san kilkel leenggah tui et in nei kei in.

(5) Dan 1:8 Danzila in a kihhuai an te leh leenggah zu tawh ka pumpi ka nin sak kei ding ci hi. L.S.T lui sung mun tampi ah ahoihlohna ki at lai hi, ii at man nawn kei ding hi.

Lai Siangtho thak sung pan in ii dawng sak leuleu ding hi. (a)I Cor 10:20-21 Lawkite kithoihna pen dawite tung ah ki pia hi Pasian tung ah ki pia ahi kei hi. Dawite tawh na kop khawmding uh ka deih kei hi. (ZIV)

(b) I Peter 4:3 Lawkite in hukna lan-na, kilunggulhna, zukhamna, zunang dawn-na na zang khia uh hi. (ZIV)

(d) I Tim 3:8 leenggah zu dawn lo mi hi ding hi.(ZIV)

(e) I Cor 10:31 Tua ahih ciangin nane nadawn uh zongin na hih na peuh peuh uh ah Topa minthan na ding na hih un. (ZIV) (f)Mg 14:10 A hai sak leeng-gah zu minam khempeuh adawn sak nu puk ta.(Mg16:19/19:15/ZIV)

Lai Siangtho lui pen Hebia lai tawh aki at ahih manin, zu leh leeng gah zu thu a laimal at na tungtawn in, ki kum ni. “Mine” pen the fruit of the wine/ grape juice in na ki at hi.Tua zawh ciangin,Hebia in “tiros”Manglai in “new wine”kham theih zu ci-in na ki at hi.Isah 5:11 leh Hos 4:11 munte tawh i ki thei sak khin zo hi. Hebia in “sekar”Mang lai-in “strongdrink”kham theih zu in na ki at hi.Thukna 32:31,33,38. 1Cor 10:20-21 munte ah ki at hi.

Lai Siangtho thak pen Greeklai tawh a ki at ahih manin, a lai at na tungtawn in,i kikhum ding hi.Greek tawh”oinos”laimal tawh na ki at hi.John 2:10 sungah “oinos”laimal tawh na ki at hi.Topa Zeisu zat bek hi aa,Khristian mite zat loh zute in Greek ah “gleuleos”Mang-lai in “new wine” ci-in ki at hi.Sawl 2: 13,15 ah ki zangh hi.Greek ah “oinopotes” manglai ah “a wine drinker”ci-in na ki at hi.(Mate 11:19 ZIV).Greek ah “oinphlugia” Manglai-in “drunkenness” zukhamna ci-in ki at hi.

Tua ahih manin Kha Siangtho’ hu mop ahi Lai Siangtho lui leh Lai Siangtho thakte sungah Hebia laimal leh Greek laimal tawh i ki tel dawn zawh ciangin, i up ding leh, ii zuih ding bek in sam lai hi.Ci leh sa deihna zui lo in, Kha Siangtho deihna,Topa’ lampi i tot ciat ding Lai Siangtho tawh i ki hanthawn hi.Satan lampi na tot leh Satan deihna azui nahi hi.Anungta Pasian’ thupha lampi ei leh ei ki khak kei ni.Zomi mimal khatciat in Pasian’thupha ih ngah kim theih na ding leh i tel siam theihna dingin Topa in a kam-malte tungah a vangliatna thupha hong pia kim ciat ta hen. Amen.

Khazih sungah,

Dai Cin Pau (Laibung)

MINAM ITNA

Pasian’ bawlsa ni leh kha,aksite in ahun zui in leitung khuavaak taan in thupha puak uh aa guahtui leh meiilumte in zong amau’ hun zui in leitangh nel sak in leitung no suak sak zel uh hi.Leitung in zong mihingte nuntakna dingin aki tangsam neek leh dawn,silh leh teen nate hong sik den hi.Hi bang in leitung in mihingte adingin thupha hi napi abeisa leitung taangthute ih ngaihsut kik ciang in aetlawm leh aetnop huai mahmah hih leitung pen mihingte in vut leh vaai suak sak in thauvui thautang leh sisan tawh leitung kihhuai sak uh hi.Galpi khatna leh nihnate hong piang khia sak thu tampi i et kik ciang in minam itna pen abulpi khat ahihna thu i mu hi.Tua ahih man in hih minam itna pen alauhuai mahmah thu hi in Pasian’teel Zomite in i minam koi ci it ding ihi hiam? Cih thu tukha in lungngai khawm ding hihangh.

Tu lai tak leitungah buaina leh gal kidona atam zawte pen minam khat leh khat kimuhdahna hang a piang vive ahi hi.Leitung bup minam liante lak ah agen thamlo ei Zomite lak ah zong hibang buaina hong om kiukiu ta a,lungnop suahtakna tawh akidim i Zogam zong tu hun ciangin mun khempeuh ah galgim hong nam in patauh dipkuatna leh bawlsiatna athuak khua leh mimal kimkhat zong kiom ta hi.Internet(Computer) sungte iet ciangin zong Pasian thu um Zomi tektek ilungsim puak ziate kikeelki in iminam khantohna ding sangin minam khat sungah kimuhdahna leh kithang paih theihna dingthu tampitak hong om ta hi.Mipil misiam kitam semsem napi in iminam khantohna ding akitangsam ahi kipumkhatna leh kithutuahna te hong tawm semsem tawh ki bang hi.Hi thute pen minam itna manlo pan hong piang khia hi a minam itna manlo icih ciangin minamdangte muhdahna tawh eima minam ih it khakna ahi hi.

Mitamite in amau’beh,khua,minam,kampaute bek thupi sain midangte beh,khua,minam leh kampaute thusim sak loin simmawh nuam mawk uh hi.Ei Zomite zong ki ci tawm mahmah na pi-in.tua sungah beh leh phung,khua leh tui,kampau leh minam tampi takin ih ki khen sawnsawn lai hi.Minam dangte tawh ih ki et ciangin . sanggam laizom khat ih hih lam gen zong kullo napi eima zia leh tong bek thupi sain eima minam bek ki it khial thei mawk hi.Hih in ih Pasian biakna thu tampi tak susia in kumpi kiukna leh sum leh paai zonnate ahzong kihazatna leh kithangpaih theihna tampi hong tun a ih omna peuhpeuh ahzong hong nawngkai sak thei hi.

Minam itna pen Pasian’thu tawh ki tuak hiam? cih ih ngaih sut kik ciangin Pasian inzong leitungmi khempeuh pen hehpih a,ahih hangin ateelsa Itazilah minamte pen tuni dong mah lainat citciat se hi.Tua hi a eima’minam ciat pen itin,vei a,ih lainat ding mah ahi hi.Ahi hangin minam dangte mudah lo ding hi hangh!Mosi in ci leh sa tawh aminam(Hebia) it lua ahih manin Izip mite khat that kha hi(Paikhiatna 2:12).Sawltak Pawlu inzong ci leh sa tawh aminam(Zudah) ngeina leh biaknate it lua ahih manin Zeisu thu umte(Khristian) thong sung ah khumin bawlsia in that hi(Sawltak9:1-2,Galati1:13-14,Philipih3:4-6).Hi bangin amaute in minam ading nakpi takin ahanciam uh hangin lawhcing lo uh hi.Guntui luang lai khat pen ih khaktan nop hangin ki khaktan zolo ding hi.Tua mah bangin guntui tawh akibang Pasian’piansak minam khat peuhpeuh ih bawlsiat nop hangin ki zo ngei lo ding a,ei mi gilo leh mihamsia ki suak bek ding hi.Mosi leh Pawlute in Kha Siangtho tawh aminam uh hong it tak ciangin minam dangte mudah nawn loin amau’minam nopsak,suahtakna ding deihsakna tawh nakpi takin thu hong ngen uh hi(Pai32:32,Zawmah9:3)

Tu hun ciangin ihminam hong makaih thei ding mipilmisiam tampi nei ta ih hih manin lungdam huai hi.Tua bek tham loin ih minam hong hu,hong keem ding leitung kipawlna tuamtuamtezong hong om ding a, galvai ahzong minam dang ten hong nopneh lohna dingin zong kipawlna lianpite zong hong om kha lai ding hi.Hihte pen leitungah aom pelmawh ding mah ahi hi.Ahi hangin Pasian’thu um Zomitein ei hong simmawh nuam minam dangte tungah akhengvalin ih tatsiat loh ding thupi mahmah hi.Bang hang hiam cih leh mi ngongtatte in hihleitung mahmah luah lo dingin LaiSiangtho in hong hilh hi.Tua bang hi leh Pasian in Zomite hong lainatin,hong hehpih ding aa minam picing leh minam lian khat in hong bawl ding hi.(Late140:11-13,Paunak10:29-30,12:7)

Anungta Pasian pen eima’minam’Pasian dingin ateel(Late33:12)Zomite ih hih mah bangin Pasian in Zomite thupha hong pia tak pi hi.Leitung mun tuamtuamah a a’minthanna ding in hong tawisang zo ahih manin ihki angtang sak mahmah hi.Adiakdiakin Kawlgamah Zomite nuntakna aniampente ki hi ngei na pi-in tuhun ciangin Kawlgam minamte thuman thutakah lamlak ding leh amaute tungah siampi nasem dingin Pasian in Zomite sathau hong nilh zo hi.Hih in a angtan huai mahmah ih minam minphatna ahi hi.Tua ahih manin Zomi Pasian’ nasem khempeuh in zong cihtakna leh thumanna tawh Pasian’na sem a,ih minam khuavaak ih taan sak toh zel ding thupi thupi mahmah hi.”Thumanna in minam minthang sak a, mawhna in minam min dai sak hi.”(Paunak14:34)

Tua ahih manin laizom Zomi akua maciat in ih minam ih it leh thungetna,lungsim,ngaihsutnate tawh ahi zongin neihsa, thatang,pilna siamnate tawh ahi zongin eima’ minam mahmah tungah ihhih theih bangin ih omna munmun pan mapang ciat ding hi hangh.Minam ait siam,azun siam Zomite ih hih theihna dingin ih biak Pasian in thupha hong pia ta hen!

SUPNA PAN LUNGKIMNA

Bawi Ceu(Kalaymyo)

“Apiang khempeuhah lungdam na ko un.”(ZIV 1Thesalonikate5:16-18)

1997 kum Thailand gam (y&dabm8 puf&kH)ah kasep lai-in ka tuah khak thu tomno tawh hih Malaysia Zingsol a sim kha mimal kim tungah tha kong pia nuam hi. Ka sepna (puf&kH) pen khuapi tawh ki gamla-in gam sungah om ahih manin ka cim hong phawng dingin Uinote deih lua in thu ka gen den hi. Kei pen ka neu lai pan ki pan Ui it cihtak a a it thei mi khat ka hi a,ka Uinote hong sih ciang bangin awngbeba in ka kap thei zel hi. Ni khat anei om lo Uipi khat ka sepna gei ah hong vak thei zel a, an tawh zol in ka khawi suak hi .Asawt lo in tua Uipi in Uino (5) hong nei ahih manin ka nuam mahmah hi.

Uinote a nu nawitui a kham loh dinguh lung himawh ka hih manin Uipi ading bawngsa guhte lei-in ka huan sak hi.Uinote aneu lai hunin buaina bangmah aom loh hang hong gawlta uh ahih manun sun lam nasem in zan lamah Ui an huan in ka buai niloh hi. Zan lam ka nasep man ciang Aktui leh Ngasa bungte zong khat veivei lei sakin ka kan sak thei zel hi. Ka(puf&kH)paam a tengte’ khawi Aknote leh Vatawt- tui khong va nek sak thei ta uh ahih manin liauna leh inn paamte’ muhdahna hong om hi. Khat vei ka Uite tawh ka vakkhawm uh a, midangte’ Uinote va peh sak ahih manin buaina leh nawngkaina tampi ka phul to hi. Ka(puf&kH) ngei gam nawl lamah tuu leh kelte hong ki cing thei zel a, tua tuu leh kelte zong peh sawm in delh thei uh ahih manin ka lung hong patau sak den hi.Ka nasep sangin hih ka Uinote in ka lungsim hong gim sak zaw hi.Ui ham aw ka zak sim in an nek laitak ahi,ihmutcip laitak ahi zongin lung himawh in pusuak a, ka et den zong nasep lianpi khat hong suak hi.Ni khat ni ciangin ka Boss pa inn-ah nasep ding khat om ahih manin ni (2) va taam in ka vasem hi.Kei om lo ka hih manin ka Uite an pia ding om nawn lo a, ka Uite gilkial lua uh ahih manin ka inn veengte’ Aknote leh Vatawtnote va nek sak uh hi A neite heh lua ahih manin ka Uite guza(tqdyf) na piak sak uh hi. Ka ciah ciangin sih ding bek ngak a,a naak litlit ka Uite khasiat huai takin ka mu hi. Ka khut Ui kam sungah sawksak in lua khia sak dingin ka hanciam hang in a hi thei nawn kei hi. Ka Uite a vekpiun hong si ta a, na sa lua kahih manin inn kiu khat ah pai-in ka kah hun luite tu ni dong mah ka manggilh thei kei hi.

Ahih hangin ka Uite om nawn lo ahih manin Ui an huan nasep pan peng in Aktui,Bawngsaguh.Ngasa bung khawng zong leisak kul nawn lo ahih manin sum beina hong tawm tuam hi. Inn veng te’ muhdahna leh hamsiatna zong veng mang ta a, Ui ham aw ka zak ciangin zong dipkua sa in et kul nawn lo hi.Hih thute ka ngaih sutsut ciangin leitungah ih it mahmah khat,ih deih mahmah khat,ih ut mahmah khat ngah zo lo ,ahih kei leh supna pen lamet beina hi pah nai lo in Pasian in ei a ding hong deih sak zawk khat om ahih lam hong phawk sak hi.Laisim mimal khat ciat tungah ih biak Pasian in thupha hong piak sak ta hen!