13 newpag

“Khangnote aw, na khangno na uh nuamsa un la,na khangno lai-un lungdam un.Na hih nop peuhpeuh uh hih un la,na ut bangbang un gamta un. Ahi zongin na gamtatna uh tawh kizui-in Pasian in thu hong khen ding phawk gige un.”(Thuhilhna 11:9)

Hih Malaysia Zingsol laihawm ka sim kha zel a,thupi leh picing sa in ei Zomi ta dingin Zingsol khuavak taktak hi ci-in ka mu hi.Hih lai hawm khiat zawh nang hong makaih tawntung ih Topa tungah lungdamko masa in, Zingsol innkuanpihte tungah zong ka lungdamna kong pulaak nuam hi.Zingsol laibu a nunung lamah pulaak nop leh gelhnop na neih leh cih thului sapna a om mah bangin bang mah cingtakna omlo pi leh siamna omlo pi mah in “Nang bang naci ngaihsut” cih thulu tawh Malaysia gam a om khangno akua mapeuh na khut uh hong len in kong hopih nuam hi.

Pasian’ thupha hang bek in ei Zomi tampitak Malaysia gam ah sum leh paai zong dingin inn lum panin kipusuak ciat hi. Ih sep ih bawlna peuh ah Zomi lungsim cihtakna leh Christian lungduaina gawm khawm in hanciam in thumaan ih hih manin ih tote(Boss)te ii muanna leh pahtaakna ih ngah ciat hi.Tua banah nam dangte sangin kampau mukpauna-ah siambaih zaw in ih zangthei baih zaw hi.Hihte khempeuh ei ma pilna siamna leh thagum hatna hang hilo zaw in Topa kiang pan hong luang suk amannei thupha ahihlam phawkin, thupha hong pia pa ih manggilh loh ding thupi hi.

Pasian’ thupha ih sanna Malaysia gam pen gam khangto khat leh leitung gambup’ lunglutna gam khat ahih manin asia apha,alui athak na khempeuh kicinna gam khat ahih lam akua mapeuh in ih theihsa ahi hi.A diakdiak in ei khangnote a dingin sinnop huai, a et nophuai,a neek nophuai leh aciap nophuai asia apha na tampitak om hi.Tua nate khempeuh ih sin theih leh sep theih ding vive ahi hi.Ahi zongin ei Zomi khangno tuailai lia leh taangte in Topa hong hehpihna tungah kinga in,asia apha a khentel thei minam ih hih manin ih sep ih bawlna a hoih lam vive ahi hi.Ahi zongin khat veivei ei khangnote lungsim pen thupha ih san ciangin tua thupha hong pia pa leh thupha ngahna ih biak Pasian kimanggilh thei hi.Ih thuphate zangsiam nawn loin thupha pen thusia ih suaksak thei hi.Tua banga ih nuntakna-ah Topa taisan in thupha ih thaangzat ciangin ih lungsim sungah dawimangpa satan in mun hong la in hong luah tak ciangin ih Topa tawh ih kizop lai a, hoih kei ih cih khat zong ahoih ding tawh hong kibang in asia gamtat ding leh sep ding a kilawm lo khat zong ki seem kha thei mawk hi.U hamte sangin ei khangnote in dawimangpa’ ze-etna nang zolo in kilel baih zaw thei hi.

Tua ahih manin Malaysia gam ah sum leh paai zong a om ei Zomi khangno akua ma peuh in ih nisim nuntakna-ah ninphual pan leh leivui pan a hong laamto Topa ii hong piak thuphate dawhsiam,kholsiam,zangsiam in thumanna tawh nuntak sawm ni.Kiim leh pam a mi hoihlote’ nuntakziate zuih sawm loin dawimangpa satan hong zolnate thungetna tawh nial ni.Leitung ci leh sa lunggulhna khempeuh nusia in asiangtho nuntakna tawh nuntak sawm ciat ni.Na khat peuhpeuh sep ding ih sawm ciangin Topa dongkhial loin ih vai khempeuh Amah ih ap masak ding pelmawh hi.Pasian in ih gamtatna tawh kizui-in thu hong khen ding lam phawk kawm in ih lungsim ii hong kaihna peuhpeuh ah zuih sawm lo zaw in khinkhai masa a, ih sep ih bawl ding ahi hi.Tua hi a sanggam aw nang bang ci-in ngaihsun na hi hiam?

KHA GAL DO

Kha galdo ih cih pen kha sungah ih gal bang hiam cih ki telsiam nawn lo in, hamsatna khat thuak ahih kei leh heh nading khat hong pian ciang koi pan a hong pai cih kitelsiam nawn lo hi. “KHASUNGAH” ih gal lian pen-in dawimang pa ahi hi.

Ih gal zawh nadingin a thupi pen ah a piang na khempeuh Pasian hehpihna phat ding /lungdam ko /teci pang leng dawimang pa in hong lel pen hi Tua hi leh ih gal a zo pa /nu ih hi hi.(Philipih4:4-7)Khazih mi na hih khit uh ciangin ,maizum nading om nawn lo hi.Tua maizumna ih thuak ciangin hehpih phat leng a gual zo pa/nu ih hi hi.(1 Pitazuh 4:16)A hoih lo khempeuh khe sikin koih in. Tua hi leh a gual zo pa/nu zong na hi ta hi..

THUMAN THUTAK LEH THUMAAN NA

Thuman thutak in itna piangsak a,a piang na khempeuh hehpihna phat hi.Galte it in ,gal kilemna piang sak hi.Na galte na hehpih un .Note hong samsiate thupha na pia un.Hong bawlsiate a ding thu na ngetsak un.Na paanglang khat hong ki bet leh a lang khat na dawh in ci hi.Na puan khat hong ngente na puan khat na piak beh in.Na neihsate zawhthawh thu tawh hong kilaksak leh ngen kik kei in.Na tung a hong kibawl ding na deih bangin mi tungah na bawl in.Note in hong itte bek na it uh leh bang phattuamna om ding hiam?Hong itte bek na it thei uh hi .Mi gilo te in a itte bek it hi.(Luka 6:27-33)

Thuman thutak in “ITNA” bulphuh hi.(1 Kawlentu 13:1-8) Micimawh khat huhnopna ,khua ngaihna (*&kPm)nei hi.Eite zong man ki pia loin Pasian’letsong nuntak tawntungna ih ngah hi.Mi khat tungah huhnopna lungtang na neih leh tua pen Pasian na sepna sungah piakkhiatna khat ahi hi.Ngahna sangin piakkhiatna ah lungdamna om zaw hi.Thusia/thupha khat hong om ciangin a hoih in muhtheihna( taumif;Nrif0g3 )nei hi.Mi khat a hoiha muh theih ding thupi hi.Nang leh kei zong Zeisu in a hoihlopi mah Ama sisan hangin mihoih in hong mu a ,ih mawhnate hong seel sak hi.

Thumaanna in thu khen hi.Itna neilo hi.Itna nei-ing a cih hangin hehna ding om leh hehpah hi.A mawh mite thukhen hi.Zeisu in leitungah thukhen dingin hong pai ka hi kei ci hi.Thukhaam leh pawlpi thu guipite bulphuh hi.A it te bek it hi.A galte ading thu nget sak lo hi.(Zawhang 8:1-11) sung ih et ciangin Mawsi thukhaam sungah a mawhte a mawh bangin thu kikhen hi.Laisiangtho siamte leh Phazisete in thukhaam sungah a om bangin numei kizuak nu mi tawh mawh a muh uh ciangin Zeisu mai-ah hong paipih uh hi.Hih numei in mi tawh a mawh laitak ka mu uh hi.Mawsi thukhaam sungah mi tawh paktat numeite suang tawh denglum ding cih om hiZeisu kiangah hih numei mi tawh a mawh laitak ka mu hi,thukhaam sung a om bangin suang tawh denlup ding hi ci-in a gen uh ciangin Zeisu lei ah kunsuk in a khutme tawh leikui-in ,note lak ah mawh neilo a kisa penpen in hih numei suang tawh denglum un ci hi.Tua khit ciangin lei ah kun kik in tua mah bangin a khutme tawh leikui kik hi. Amaute zong siangtho kisa loin a gol pen pan aneu pen dong a nung lamah kihei kik in ,ciahsim uh hi.Thumaan nuamte tawh a nungtate ahi uh hi.

Tua khit ciangin numei nu kiangah Zeisu in nang tungah kua mah in thu hong khen lo hiam? ci-in adot ciangin kuamah in hong khen lo hi ci-in dawng hi.Zeisu in kei zong thu hong khen kei ning na mawh nawn ken ci-in nusia hi. Thumanna tawh hi leh tua numei suang tawh denlup ding longal a dang om lo hi.Zeisu in thuman thutak hangin tua nu thukhenna tawh kipelh sak hi.Thuman luatna in mite tungah thu kikhen pahpah thei hi.Thumaanna in mite mai-ah ahi ding a bat tei hangin- Pasian’muhna-ah “ITNA” omlo in hong mu hi.

Hih thu nihte ih telsiam loh manin Tapidaw nuntakna-ah ki khangcing thei lo hi.A thu a ki bang ding abat tei hangin limtak lungngai leng kibang lo cih kimu thei hi.Tapidaw mi tampitak ah ki ding kha ahih manin pawlpi sung buaina om den hi. tawh hi leh khat leh khat mawhna ki maisak in itna piangsak hi.Pawlpi kilemna zong om pan hi.Tua hih leh pawlpi sung hong nuam ding a, hong khangto semsem ding hi.

Tua hi a,sanggam aw,nang thuman thutak leh thumaanna koi zaw tawh anungta na hi hiam?Na dinmun ki en in la,a hun om lai-in thuman thutak tawh anungta dingin itna leh deihsakna tawh kong hanthawn nuam hi.Topa’n a telsiam dingin thupha hong pia ta hen!