|
ZingSol Website
|
|
Malaysia Zingsol khol ( 2 ), Hawm 13, 14, 15, 16, 17, 18, 19, 20, 21, 22, 23, 24, HAWM (11) ZEISU
TAWH KI TEL MUH LOH PHAMAWH “
Tua hun ciangin note in kei hong sam-in hong pai-in thu nong gen ding uh a ke’n
zong kong dawng ding hi.Note in kei nongzong ding uh a na lungsim khempeuh uh
tawh nong zon uh ciangin nong muding uh hi” (Jeremiah 29:12-13 ) Tu hun pen Lai Siangtho gen
bangin hun nunung hong hi takpi ta a, leitung mun tuamtuamah buaina, haksatna
leh biakna vai nawngkaina tam mahmah ta hi.Tuamah bangin leitung mite
pilna,siamna,siatna , thaangtatna, sum leh paai zonzia
leh hauhdan te
gen zawhloh in ki khang to hi.Sum leh paai,pilna siamna leh minthannate bek ki
zong in, hong nei Pa Pasian nangawn phawk kha man nawnlo hi hangh.Tu a ih zonzon
sum le paai leh pilna siamnate pen zingciang,thaiciang theih loh kal a avul ziau
ding tomno leitung ih nuntak sung a ding hi a,tua pilna,hauhna te in lungnopna
hong pia theilo banah ih zonzon kawmin ih nuntakna hong bei ziau ding hi.Tua
ahih manin ih kha a ding zong lung himawh hun mahmah ta hi.A hun om lai,hong
naiom lai-in Topa Zeisu tawh ih ki telmuh dong amah va naihin va zong dih ni. Ei Zomite pen a tamzaw Pasian
bia(Christian) ki hi ciat hi.Ih nu ih pate pawlpi khat peuhpeuh na lut uh ahih
manin ei zong ih neutung a ki pan Khristian ki hi lel pongin Pasian thu pen
tangthu(Story) theih in kipum lotngah lel hi.Ahih hangin tua pawlpi tuamtuamte
leh theihna tuamtuamte in ih kha tanh zolo a,Pasian’hong kamciam vangam nuam
pen Zeisu tawh ki telmuh a,gupkhiatna ih san ciang bekin ki tung thei pan hi.Tua
ahih manin Zeisu tawh pelmawh ki telmuh kul se hi. “ Zesu in
ama kiangah, ‘Keimah in lampi ka hi hi.Kei hong suang loin Pa kiangah
kuamah tung thei lo ding hi.’”(Johan 14:6) Tu laitak hih Malaysia ah nasem ding
a pai ih hihmah bangin Crusade,Camping leh Counselling hong bawl pih ding mi aom
loh banah bawlhun ding zong om lo hi.Tua genloh nipini kikhop hun ding nangawn
ngah kim lo ih hih manin Zeisu ih muh nop leh ei leh ei a zon ding hun hong tung
ta mawk hi.Na ih sepsepkawmkawm mahin ih lungsim khempeuh tawh Topa kiang va
zuan le hang amah tawh ki tel muhin
ih tangsapnate hong pia ding hi.
“Ngen un; na nget uh leh hong ki pia ding hi…………….Pa ahi note
khatpeuh in na tate un anlum hong ngen leh suangtum pia
ding na hi uh hiam? Note mi hoihlo
hi napi-in na tate uh tung ah nahoih piak ding ngaihsun thei na hih uh leh
vantungah aom na Pa un a ngen mite
tungah na hoihte hong pia zaw mahmah ding hilo ahi hiam?”(Mate 7:7-11) (1)Jericho
khua gei a mittawpa leh Zeisu ki muh zia(Luka 18:35-43)
Topa Zeisu leh anungzuite Jericho
khua lam manawhin hong pai laitak Jericho khua gei ah mittaw khat khutdawh ngen
in na om hi.Tua pa in Zeisu leh anungzuite lampai gin a zak ciangin bang thu hi
a,kuate hiam ci-in akiang nai a te a dot leh Zeisu leh anungzuite ahih lam hong
thei hi.Tua Zeisu in kei hong huh zo ding hi cih upna,lametna nei ahih manin
alungsim khempeuh sungkhia in, “David tapa Zeisu aw, kei hong huh in”ci-in
nakpi takin hong ki ko hi. Tua ciangin akiangnai a om mite’n tua mittawpa
adaih nading nakham uh hi.Ahih hangin tua mittaw pa’n mite khamna,tainate
thudon loin amasa a sang’angaih zaw thamin hong ki ko kik leuleu hi. Tua ciangin Zeisu in tua mittawpa
akiangah samin, “Nang ading bang hong hih sak ding ka hi hiam?”ci-in hong
dong hi.Mittawpa in, “Ka mit in khuamu leh ut ingh,”ci-in ki ciantak in hong
dawng hi.Tua ciangin Zeisu in, “Na mit in khuamu ta hen,na upna in nang hong
dam sak zo hi,”ci hi.Tua ciangin mittaw pa’n khua hong mu thei ta hi. Sanggamte aw, tuni-in Zeisu tawh ih
ki mu nuam hiam?Ama tung pan bang lametna ih nei hiam?Ama tung pan thupha khat
teitei ih ngah nuam hiam?Ih mawhna,ih siatnate Pasian’mai ah aki seel thei om
kei.Tua te zumpih,kisuanpih kei phot ni.Zeisu tawh ih ki muh nading ih lawm ih
gual leh thu tuamtuam te’n hong nawngkai sak kha phial leh zong tuate thudon
kei phot ni.Tu ni-in, “Zeisu aw, kei hong huh in,”ci-in ih lungsim khempeuh
tawh kiko dih ni. Mittawpa zong khatvei akiko
phetin amit vaak pah sam lo hi.A kianga te taina,khamnate mangin khatvei ciang
tawh khawl leh amit dam tuanlo kha ding hi.Anih veina hong kiko kik tak ciangin
Zeisu in a kiang ah sam a, “Nang a ding bang kong hihsak ding hiam?”ci
hi.Khatvei nihvei kiko ciang tawh lungkia kei ni.Pasian in ka thungetna hong
dawng kei ci pah kei ni.Ama kiangpan’ dawn
kikna ih ngah
madong ih lungsim khempeuh tawh kiko in amah va zuan dih ni.Sangamte aw, ih
Pasian pen zani,tuni leh atawntung kikhel ngeilo Pasian hi a,mittawpa kiang adot
mah bangin tuni-in zong Zeisu in, “Nang a ding bang hong hih sak ding kahi
hiam?” ci-in ih kiang ah hong ngak lai hi.Tu ni – in bang ih ngen tam ?Gup
khiatna maw?Natna pan damna maw?Lawhcin daupaina maw?Ama tung pan thupha khat
teitei ngah sawm dih ni.Tu ni-in Zeisu in na upna in nang hong damask zo hi.Na
upna in gupkhiatna hong pia hi.Na upna in nang hong hausak zo hi ci-in hong
kamciam khin zo hi. (2)
Zekhe leh Zeisu ki muhna (Luka
19:1-10) Zeisu
leh a nungzuite Jericho khua sung
hong lut ta uh hi.Tua laitak in Zekhe ki ci siahdong mangpa
na om hi.Tua pa in Zeisu pen a bangci mi hiam cih mu nuam hi.Ahih hangin
Zeisu pen a nungzuite leh mi honpi in na kiim um uh a,tua ban ah Zekhe lah atun
natom sawnsawn ahih manin Zeisu amuh nop mahmah hang in hong mu theilo hi.Tua
ciangin Zeisu pai nading lampi ah na matai in Zeisu amuh theih na dingin
theiteek kung tung ah hong kah to hi.Zeisu tua mun hong tun ciangin Zekhe ento
a, “Zekhe aw,amanlang in hong kum in.Tuni-in na inn ah kong taam ding hi,”ci
hi.Tua ni-in Zeisu pen Zekhe inn ah hong taam in tua ni-in Zekhe in Zeisu hong
telmuh in gupkhiatna hong ngah ta hi. Zekhe
in Zeisu munuam mahmah napi-in bang hangin muthei lo hiam? cih ih et ciangin ,
Zekhe a tuntom man a, Zeisu amu thei lo na hi lo in Zekhe leh Zeisu ki kal ah
mihonpi-in na liah kha na hi zaw hi. Hih K.L.C.C a Patronas Twin Tower gel pen
bangzah ta in ih tun a tom phial zongin hong liah om kei peuh leh K.L khuasung
mun khempeuh panin kimu thei lel hi .Tua mah bangin Zekhe zong a tuntom phial ta
leh a liah kha om kei leh Zeisu teltak in muthei pah ding hi .Gup khiatna ngahsa
sanggamte ih nuntak zia ki en kik dih ni . Ih hek ih tatzia, ih pau ih ham,ih
nek ih dawn zia leh ih sep ih bawl ziate mi a dingin Zeisu a liah kha te peuh ih
hi kha hiam?
Tua ni a Zekhe muhna aliah khate pen khuasung a zu kham,zatui kham
avakthapte nahi loin ,nungzuite, pawlpi sia te,pawlpi upate, a khami,a lawp
zawdeuh a kinei teng khawng mah na hi kha ding
hi. Mite mai ah limpha lak ding, ci bang a aal ding leh mite maiah khuavak atang
sak dingin Topa’n hong deih hi. “Mi dangte in na gamtatna hoihte uh amuh
ciangin vantung a om na Pa uh min a phat theihna dingun mite mai-ah na gamtatna
hoih uh khuavak bangin na kilang sak un.”(Mate 5: 16 ) Zekhe pen tua mihon pi
liah ciang tawh lung kia hi leh Zeisu mu kha het lo ding hi .Zekhe pen naupangno
khat hilo hi .Siahdong mangpa (officer),ulianpa , mihau mahmah khat hi napi-in
Zeisu muh nopna taktak lungsim nei ahi man a ma’ za liatna ama’ phatna ,
siatna teng hong mang ngilh in , Zeisu tel tak amuh theih na dingin Zeisu paina
ding lampi ah amah tai in thei kungtung hong kah to hi. Sanggamte aw ,
Zeisu ih muh nop takpi leh ama totna ding lampi zong ih geel (guess)thei ding
zong ki sam ding hi.Hih K.L khuapi ah Zeisu hong pai hi leh zusai,ansai,zatui
hoihlo mun leh numei hoihlo ki zuakna phualte sangin thu um mite omna
mun,biakinn te khawng mah hong manawh zaw ngel ding hi. Tua ahih manin Zeisu
tawh ih ki muh baih theihna dingin tua siatna, thangtatna munte pel in,ih hih
theih na ,ei thahatna leh ih pil ih siamnate
pai khia phot in ki niamkhiatna lungsim tawh Zeisu hong pai na ding lampi
matai in amah ngak dih ni.Zekhe zong lungsim ki niamkhiat leh lungsim siangtho
takin theiteek
tung aom lai tak, Zeisu in hong kum mengmeng in, na inn- ah hong tam ning ci-in
Zekhe inn sung ah Gupna hong tung hi.
Pawl
khat te’n hih Malaysia –ah Pasian
thu zong ding a pai hi zenzen keng, sum zong ding a pai hing ci thei kha mah ni,
Pasian bek zong dingin a dang teng thudon nawnlo ding cih na hi pah sam lo
hi.Ahih hangin mihing khat a ih pian khit nak leh pil le hai, zawn le hauh, nat
leh dam tawh ki sai loin Gupkhiatna ngah ding Pasian deihna ahi hi.Tua ahih
manin na ih sep kawnmkawm,sum ih
zon kawmkawm mahin ih lungsim khempeuh tawh Amah zong dingin sanggam akua maciat
kong zawn hi.Topa’n thupha hong pia ta hen!
Khazih itna sungah,
Hau
Khan Khai (Hei Lei) THU
TAWH INNLAM NA CIAH NOP LEH
Leitung thupha deih in mi gam ah sila sem in ih om tek hi.Tua thupha ih
ngah na dingin,a kisam bulpi khat om hi.(Thuhilh
kikna 28:1-14) sung lungngai leng thupha ngah dan
ding hong musak hi.Laisiangtho ih cih pen amawkna a hong piang/ kibawl hi loin
Pasian’ humop ahi hi.Tua ahih manin a kammal khat zong siit loin zui/mang leng
thupha kingah pan cih ki mu thei hi.Pasian kammal tawh nungta in nisim ih
nuntakna –ah Topa deihna bang zui-in
athu mang leng Pasian in thupha hong pia pan ding hi.A kipatcil in thu
aom hi.Thu in Pasian tawh omkhawm hi.Thu in Pasian ahi hi.Tua thu in a kipatcil
in Pasian tawh omkhawm hi.Tua thu in na khempeuh bawlthei hi.Thu loin a piang na
khat beek om lo hi.Thu in nuntakna nei hi Tua nuntakna in mite ii khuavak ahi
hi.Tua khuavak in khuamial tan in khuamial in zozo ngeilo hi.(Zawhang
1:1-5) .
Na
thupha atam semsem ding na deih leh
Pasian gam leh adikna zong masa un.Tua hi leh tua nate hong pia thuah
ding hi.(Mate 6:33)
Note vak kawikawi un la, lei mong khat pan mong khat ah,ni suahna lam pan
ni tumna lam ah lungdamna thu na kizeel sak un.A um mi khempeuh tui na phum un.A
umlo mi ahih leh thukhenna thuak ding hi.(Mate 28:19,Maku 16:15-16)
Tua ahih manin nang leh kei pai theilo ih hih leh ih neihsate paisak in
sawl ni..Nang ma’n gaitum mawk ke’n la, thupha hong pia pa gam aa dingin na
thuphate zangh in.Tua hi leh na thupha hong ki behlap ding hi.Ahun om lai-in
Topa na sem ni.Topa Zeisu hong paibaih ta ding hi.Nang leh kei pai theilo ih hih
leh ih thupha ngahte tawh Topa na asem dingin a thak in ki pan kik ni.A beisa
hun a ih sumte mawkzat in ih hun ngah sunsun ci leh sa nopsakna -ah beisak ih
hih manin ih mawhnate pulaak in, a thak in kipan pha kik ni.(Zawhang masa 1:9)
A hun tomno khat bek omlai hi sanggam! Tapa
taimangpa thu
Mi khat in ta pasal nih nei hi.Apa in a tate gel a kibang in a neihsa
hawm sak hi.Ahih hang a naupa in a neihsate tawh ci leh sa nopsakna- ah zangh
nuamin apa kiang ah angah ding te a ngen hi.Tua mah bangin apa’n zong pia
hi.Tua khit ciangin gamlapi ah hong
paikhia a, ci leh sa nopsakna tawh a neihsa teng hong beisak hi.A bei khit
ciangin an neek ding neilo in aomna gam mihaupa khat ii “ vok”cing ding in
hong lungngai hi.Mihaupa kiang ah vapai-in na vok hong cingsak in ci ahih manin
vok cin ding nasep hong ngah pah hi.Ama deihna ah vok cing leng an zong hong
kipia ding hi ci-in ngaihsun kha ding hi.A hih hang ama nget pen vok cing ding
bek hi a an ngen khalo ahih manin anget pen mah kipia hi.
Pasian tung ah ih nget teh
thupha hongpia-in ci-in ki ngen thei hi.tua thupha koiah zang ding cih ki ngenlo
hi.Tua pa in vokcin ding bek ngen ahih man vok hong cing in agil kial in ahih
hang vokan ne ding in thungen lo hi.Pasin in mi abawl ciil in vokan ne ding in
hong bawl lo hi.Ama hong piaksa thupha tawh kivaak ding in hong bawl ahi hi.Nang
zong vokan duhgawh in vokcin ding nangen kha hiam? Ih thunget dan zong kisam lai
hi. Cih lungngai kikkik ni.
Tapa taimang ci-in amin kipia den hi.A taimang hilo in kuamah awlmawh
neilo amah leh amah pi kisa nei kisa in apa nangawn “awlmawhlo” in
“inn pan apaikhiapa” hi zaw hi.Atai hi leh kuama’n mukha lo in
gukpai ding hi.Apa awlmawh lo takin paikhia hi.Tua ahih man atai hilo zaw in “inn
pa’n a paikhia pa” hi zaw cih ki muthei hi Nang leh kei zong ih Topa awlmawh
loin leitung nopsakna ah ih hun beisak;ih neihsa bei-in Pasian aom lam zong
phawk nawnlo ih hih man in “inn
pa’n a paikhiapa/nu” mah nahi hi.Na hih khak leh na mawhna te pulaak in
Pasian in hong it lai hi.(1Zawhang 1:9) A gil hongkial mahmah
ta ahih man in apa inn ah apa nasem te an neekval om ding hi ci hi.Ka
Pasian leh ka pa tung ah khial khin ta ing ci-in hong kisik a, apa inn ah hong
ciah kik hi.A pa in amuh ciang in nadawn a, bawngtal athau khat tawh pawi khaam
sakin khedap hoih leh puan thak hong silh sak hi.
Tua mah bangin nang ading in mawh neilo Pasian tapa nang mawhna taangin
kigo ahih man in na mawhna kisiik
in ih Topa kiang ah na ciahkik leh na mawhna khempeuh hong maisak bek thamlo in
tawntung nuntakna zong hong pia lai ding hi.
A U pa leuleu pen apa inn pan paikhia loin apa cih bangbang sem hi.Anaupa
a ding pawi ki khaam pen haza hi.Tua hazatna lungsim te ih Topa’n deihlo
hi.Nang leh kei zong ih pawlpi sungah hih bang ki hazat theihna lungsim ih neih lai leh kisik kikna man tawh Topa khephung ah
zuian kik lehang ih Topa lungdam ding hi. “Na mawhna kisik kik in” Mawh
kisik kikna pen Pasian in adeih penpen ahi hi.Mawhna kisik lopi-in mawh maina om
theilo a,mawh mai sakna aom kei leh gupna kingah theilo ding hi.Zeisu nei-ing ih
cih hang in ih mawhna ih kisik kik kei leh tuuno mopawi sung ah kihel khalo ding
ih hih lam ki phawk ciat ni.
Khazihsungah,
Pa Cin Lian Hau(Hauta) Tonzang
TOPA
HOIH HI
Tg.H.L.Pau
Za Khai (Joseph)
Leipi,Kalaymyo “Topa
hoih hi.Lungkham hun in amite huh a,amah abel mite lim takin kem hi.”(Nahum
1:7) Hi
bangin Topa’ hoihna teci pan theih na dingin hunpha hong ngah sak ih biak
Pasian’min ka phat masa hi.Kum 1997 in Malaysia K.L khuapi kong tung a,ka tun
cil in giahna ding hong kisam pah hi.Meiilumpi bang a ih mai hong zing sak,hih
leitung ih nun sung abei ngeilo ding leitung thu nawngkai tuamtuam, abuaihuai
nono,lungkiat huai nengneng,siatna khempeuh pan a muanhuai hong kepna,Late
121:1-8 sung a om bang ngeingei in, K.L sungah kha(8) bangh lawhcing theilo(tu
lai pau hi leh) lup nang kician om lo,lawmte bosste hong muh ding bang lau
mahmah a,ih neek ih dawn zong alimna omlo,ka ip sungah RM 1 zong kem loin ka om
lai tak nakpiin Topa’tung mah ah dotna ka nei hi.
Topa aw, hamphatna bangmah neilo a,hamsatnate tawh mi banglo zah dongin
ka om zongin nangma’ a mah ka hi
a,nangma hoihna hong mu sakin naming thanna ding hong hi sak in ci-in thu ngen
in ka ki ap ciangin zekai loin topa in,inn lam a pawlpi mite meelmuh u le naute
leh KLBC,Cross Power,Z.C.F (Canaan) leh mun tuamtuam a om akua maciat in
Zovontawite a ding hong thu ngetsaknate uh Topa’n hong dawng takpi a, lawm leh
gual zong neilo,pilna siamna zong neilo,paunak khat ah ‘ih neih loh sang ih
theih loh na zaw’ana cih mah bangin ka om lai tak Kawl papi khat in nasep
neilo mi khat azonzon lai tak leh kei nasep mu zolo kituak kha ahih manin Topa’n
ahoihna hong mu sak hi.Tua bang hamsatna ka thuak manin tu lai tak a nasep
neilo,hamsatna thuakte a ding thungetna lungsim kha tawh vei in nget pih theihna
hun ka ngah zaw a, ih Topa pen thungetna hong dawng Topa ahi hi.
Ka off-day khat in kaaikuang saipi ka pai leuleu a,U Mang tawh ki ho thei
in biakpiakna kikhopna ka lunggulh leuleu a,kikhop thei ding bulphuh a,thungetna
kha (4) sung ka nget khit ciangin tu lai tak a kasepna munah Topa’n hong puak leuleu
in, Z.C.F Khanaan biakpiakna tawh kituak thei ahih manin Topa’tungah lungdam
ka ko a, tu lai tak a nasep neilo lunggim leh biakinn hong pha theilo (pha
ngamlo)te zong lungkia lo a,na thungetna aban zom toto dingin Zeisu min tawh
kong hanthawn nuam lai hi.
Belh
ding neilo,lawm leh gual neilo,unau sanggam neilo in na lung amang lua hiam?Malaysia ah na belh ding aom kei
zongin lungkia kei inKa laizom Zomi aw nang a dingin ko Z.C.F panin zong thu
kong nget sak den uh hi.Lungkia kei inla na hun alem khat ciangin ih Topa tungah
phatna pia khawm dingin nong pai ding hun gal khua bangh dondon in Zeisu min
tawh kong muak tawntung uh hi
KHANGNO
LEH PASIAN’KAMMAL
“Khangnote aw,na khangnona uh nuamsa unla,na khangno lai-un lungdam
un.Na hih nop khempeuh uh hih unla,na ut bangbangun gamta un.Ahi zongin na
gamtatna uh tawh ki zui-in Pasian in thu hong khen ding phawk gige un………Na
lungkham hun ding hong tun ma, ‘Nuntakna
nuam sa kei ing’, na cih ma hun,na
khangno lai takin nang ahong piangsakpa phawk in”(Thuhilhna11:9;12:1)
Ih khangno lai a hong piangsak Pasian phawk ding pen a thupi masa ahih na
atung a LaiSiangtho in hong thei sak hi.Tu hun semsem ciangin leitung mun
khempeuh ah siatna leh gitlohna khang semsem a,tua bang kawmkal panin Pasian
aphawk kha khangno nih leh thum ih muh ciangin ninkawm lak a om suangmanpha
tangte tawh ki bang hi.Tua ahih manin a masa pen in kei pen Pasian a phawk kha
khangno khat ka hi hiam cih ei leh ei ih ki sit tel ding ka deih hi.Pasian thu
sungah anungta khangno khat na hih leh mite’mai leh Pasian’mai ah manpha
mahmah ta nahih manin leitung tawh ih kizopna ah koici nuntak kalsuan ding cih
thu tu kha in Pasian’kammal tungtawnin ih ki hanthawn ding hi. Khangno leh Kampau
“Note kam panin zahmawh-pau leh hai-pauna,ciamnuih
thanghuaite,tua bang a kilawmlote,om sak loin lungdam na ko zaw un.”(ZIVEphet5:4)
Ei khangnote in ih lungso ma nangawn in gitlohna kam paukhiat ding ki
manlang mahmah thei hi.Kumpite nihna 2:23 sung ih et ciangin Elisha azahko
naupang sawmli leh nih tungah Pasian hehna hong tung ahih manin vompi in amaute
balnen hi.Pasian’inn sungah acitak mahmah(Gamlakvakna12:7) leh haksatna
tampi tak thuak a kum 40 sung Itazilah mite lungduai tak a amakaih Mawsi nangawn
kammal khat apau khialhna hangin puuk
hi.Khanaan gam lut nuam mahmah napi-in Pasian in lut sak lo hi(Gam
20:2-12,Thuhilhkikna34:4,Late106:33).Tua ahih manin kampau hoihlo in ih luah
ding Pasian hong kamciam thupha tampi tawh hong ki pelh sak thei bek tham loin
ih sung a Pasian ii letsong,KhaSiangtho zong dah sak thei hi.Khasiangtho dah leh
hong nusia thei a,hong nusia leh apuuk ziau ding ih hi hi. Khangno
leh Ze-etna (Paunak7:1-27)
Ei khangnote pen khanghamte sangin ih tha leh ih sisan hat zaw in lungsim
ngaihsutnate zong manlang zaw hi.Tua mah bangin ci leh sa,sisan ii deih/lunggulh
khat peuh pen ih lungsim tawh sau veipi khinkhai masa loin ki khensat ziau thei
hi.Tua ahih ciangin nu leh pa tutkhop,khawlkhopnate ah kineh,kilet,kisawknate ih
zat loh ding thupi hi.Asiangtho lo V.C.D/Video khuite zong ei khangnote in ih et
phot loh ding ahi hi.Mawhna,khialhna ahih pah loh hangin hite in lungsim palang
sak thei hi.Ih lungsim sungah ngaihsutna nin’ kikhol in hong tam semsem
ciangin mawhna bawl dingin ih pumpi lawp sak a,ahun lem tak khat hong om ciangin
mawhna ki bawl kha ziau thei hi. “Ahi hangin mi khatpeuh ama’gitloh
lunggulhna in kai a,azol ciangin khemna(ze-etna) athuak ahi hi.Tua lunggulhna
agai khit ciangin mawhna asuak khia hi,mawhna apicin khit ciangin sihna asuak
hi.”(ZIVJakob1:14-15) Khangno
leh Hunawng
Ei khangnote in hunawng
ih ngah ciangin khanghamte bangin tawlnga hithiat in ki omthong thei lo hi.Tua
ahih manin khangnote in hunawng tampi ngah lehang cimphawng dingin na khatpeuh
ki sin nuamin tua pan mawhna tawh hong ki zom toto hiMawhna khat peuhpeuh pen
amasa in zulhzauna/phengphitna neu cilik khat pan a hong piang khia vive ahi
hi.Zu,za leh khamtheih guihtheihte azangh khangno atam zawte pen akipat cilin
nasep neilo leh hunawng zangh khial te ahi uh hi.Tua ahih manin ei khangnote in
hunawng pen Pasian thu tawh kidiahna ahih keileh mailam nuntak kalsuan nading
a,geelna leh lungngaihna hun in zangh ding hi hangh.Sanggam,nang e na hunawng
bang in na zangh? Khangno leh Mawhna
“Nangmah in kei tungah thusiapi nong zong a,ka neu lai a ka gamtatna
nangawn tawh nong mawh sak hi.”(Job13:26)
Khatvei lai-in ahau nupi khat in kongzin lak a,avaakthaap leh azulhzau
atanu thu ahilh leh atanu in zong,
“Nu aw,nang zong na nungak lai-in hi bang mah hi lo nahi hiam?”ci-in dawng
kik a,anu in acih nading thei nawn lo hi.Mi khempeuh in ih vawh nam khaici mah
ki at kik ding ci hi(Galati
6:7-8).Tu in kumpi Davuih in
akhangdawng lai a avawh khaici azahnih in a at kikna thu ih en suk ding
hi.Davuih in Uriah’zi Bathsheba nin sakin nu leh pa mawhna khaici vawh ahih
manin tua nu tawh aneih naungek si hi.(2Samuel11;2-5,12:13-15).Bek tham loin atapa Ammon in atanu Tamar luppih in nin sak hi(2Samuel13:1-14).Galkapmang
Uriah ii sihna ding vaihawm in tualthahna khaici vawh ahih manin atapa Absalom
in asanggampa Ammon that hi(2Samuel13:23-29).Amah
nangawn zong ateek khit ciangin Absalom ii thah ding lau in gal tai hi(2Samuel 15 ).
Ih khangno lai a ih vawh khaici pen ih khangham ciang’ahih kei leh ih
tate hun ciang ki at hamtang ding hi.Tua hi a tuni in na tate ading bang khaici
tuh kha a,mai lam ah zong bang khaici tuh sawm lai na hi hiam,sanggam?Abeisa hun
ah bang khaici tuh khial kha ih hi hiam?Ih tuh khialh a hoihlo khaicite aom khak
leh Pa Pasian’tungah pulaakna leh mawhmai ngetna khat atuam in nei hamtang
ding hi hangh.
“Topa aw,ka khangno lai a ka mawna leh ka khialhnate ciamteh kei inla na hoihna na ngaihsutna leh na itna kip tawh ki zui-in kei hong phawk in.Topa aw,ka mawhna lian ahih manin nangma min phatna dingin keima mawhna hong mai sak in.”(Late 25:7,11) Topa’n thupha hong pia ta hen! Mai kha ah khangno leh siangthona, pilna,thuakzawhna leh khangnote hong zangh nuam Pasian cih thute tawh ki hanthawn lai ni.
|