nalipatannakon a seggaan ti agur-uray a pagpigadan

nalipatannakon a seggaan ti agur-uray a pagpigadan,
nalabit naynay nga agbangabanga dagiti lamok ken tuwato.
diakon marikna ti iliw ti papag, dulang ken dalikan.

kinarab-asko dagiti pader a naridumaan ken nasiitan,
kinallongko dagiti pangrabii ken sagpaw a naituno.
nalipatannakon a seggaan ti agur-uray a pagpigadan.

inkugtarko dagiti lata iti sardinas a masagang iti dalan
ta awanen makettel a saluyot, uray marunggi wenno pako.
diakon marikna ti iliw ti papag, dulang ken dalikan.

nagurnongak duggong a nakalemmeng iti sirok dagiti lamisaan,
immisboak ar-arubayan, siniripko dagiti napudaw a luppo,
nalipatannakon a seggaan ti agur-uray a pagpigadan.

nabaaw dagiti kape, nakusel dagiti kilabban,
ket di bumurong awanen dagiti bat-og ken tukak no agtudo,
diakon marikna ti iliw ti papag, dulang ken dalikan.

bussogek koma ti pagbagasan, punnuek koma ti pamguongan
ngem awanen mayat a kumammet, awanen mayat nga agluto,
nalipatannakon a seggaan ti agur-uray a pagpigadan,
diakon marikna ti iliw ti papag, dulang ken dalikan.