» DANIW : POETRY
» SARITA : KUWENTO
» SALAYSAY : SANAYSAY
» KDPY : ATBP
» URNONG : KALIPUNAN
» MANNURAT : MAY-AKDA
» GUMIL
|
« siak : roy v. aragon »
ti mannurat
Agsursuraten (ken agdrowidrowing pay) iti bukodna a komiks manipud pay idi adda iti elementaria. Iti haiskul ti immuna a nangpadasanna nga agsurat iti prosa ken daniw. Idi nagkolehio, ineditna dagiti pagiwarnak ti eskuelada. Nagpaay nga editor in chief ti maysa a trilingual (English, Tagalog, Iluko) a regional newsweekly (a nakabase iti Bambang, Nueva Vizcaya) ken co-editor/administrative officer iti maysa a writers cooperative/pocketbook publication (Integrated Creative Resources Institute-Writers Cooperative-Lailo Romances Publishing iti Marikina City).
Nupay agsursurat met iti Tagalog ken sagpaminsan iti English, ipangpangrunana ti agsurat iti Iluko. Kaaduan kadagiti sinuratna a salaysay, daniw, sarita ti naipablaak iti Bannawag Magazine. Sumagmamano a saritana ti nairaman kadagiti book anthology nga impablaak ti GUMIL Metro Manila, GUMIL Isabela, ken University of the Philippines Press.
Nagab-abak metten iti pammadayaw manipud kadagiti nadumaduma a pasalip iti literatura nga Iluko ket iti agdama, addan sangapulo a major awards a naawatna manipud idi 1991 agingga iti agdama (2001) manipud iti Tadena-Garin-Tumbaga Literary Awards, Governor Roque Ablan Awards for Iloco Literature, Kokua Lima Hawaii No Literary Contest, Constancia V. Lansangan Literary Awards, GUMIL California, Prinsesa Urduja Literary Awards-GUMIL Pangasinan, Don Carlos Palanca Memorial Literary Awards ken dadduma pay. Napili a maysa a fellow, a nangibagi iti Iluko fiction, iti UP National Writers Workshop a naangay iti Baguio City idi 1996.
Naipasngay iti Casantolan, Mabasa, Dupax del Norte, Nueva Vizcaya kada Federico Abad Aragon (pimmusay idi 1981), maysa a mannalon, ti Malasin, Dupax del Norte/Tuao-Pogonsino, Bagabag, Nueva Vizcaya ken sigud a Precilla Valencia Vadil, maysa a mannalon/agtagibalay, ti Mabasa, Dupax del Norte, Nueva Vizcaya. Maikadua iti tallo a bin-ig a lallaki nga annak iti napanglaw a mannalon a pamilia. Nagbasa iti elementaria iti Mabasa Elementary School ken iti sekundaria iti Southern Nueva Vizcaya Institute (Malasin, Dupax del Norte, Nueva Vizcaya). Kalpasan ti panagturposna iti sekundaria idi 1985, saan a dagus a nakapagbasa iti kolehio gapu iti kinakurapay. Nagenrol iti Freelance Journalism iti babaen ti International Correspondence Schools ngem saanna a napalpas. Idi 1988, nagenrol iti dua-a-bulan a computer course iti maysa a pagadalan iti Solano, Nueva Vizcaya. Idi 1989, innala ti ulitegna nga agnanaed iti isla-probinsia ti Catanduanes iti Bicol ket sadiay, iti Catanduanes State Colleges, nagenrol iti Bachelor of Arts iti major a Political Science. Iti Catanduanes, nakasursuro a makaawat iti pagsasao a Bicol. Naisungsong iti aktibismo iti kampus kas kameng ti independent campus newspaper ken kadagiti radikal ken underground nga organisasion ken grupo ti estudiante a nakaigapuanan ti saanna a panagbayag iti Catanduanes ken saanna a nakalpasan iti inrugina a kurso. Iti panagsublina iti Nueva Vizcaya, iti pannakadlawna nga uso a talagan ti computers ken panagkompiuteran/nainkompiuteran ti kasla in-demand wenno requirement iti nalaka a pannakasapul/pannakaawat iti trabaho/pagtrabahuan, nagenrol iti makatawen a kurso iti computer technology iti maysa a pagadalan iti Bayombong, Nueva Vizcaya.
Daytan ti rugina ti essem ken panaginteresna unay iti komkompiuter malaksid pay iti panagsurat/panagbasa. Manipud idin bin-ig a computers/panagkompiuteren ti biagna ta isun ti nagbalin a propesionna agingga kadagitoy. Nga isu metten ti nakabaybay-annan iti plumana ket manmanon a makasurat/agsurat iti kas iti inna panagsursurat/maisursurat iti kapigsa ken katibokna nga agsurat. Nupay kasta ket kas mannurat--a mabalin a nayanak a mannurat/agsurat--ket ikagkagumaanna latta dayta a kinamannurat.
|
|
|
 |
|
|
|
|