sinurat   akda 

 » DANIW : POETRY

 » SARITA : KUWENTO

 » SALAYSAY : SANAYSAY

 » KDPY : ATBP

 »
URNONG : KALIPUNAN

 »
MANNURAT : MAY-AKDA

 »
GUMIL



«home»
«notes/updates»
«downloads»
«guestbook»
«ilokano forum»
«ilokano links»
« daniw : roy v. aragon »

MANGURAT TI GEMGEM

Mangur-urat ti gemgem iti puso ti rissik:
inaradas ti sardam ti dakulap a nakalukat.
Adda dung-aw a binekkel ti parbangon, adda lua

a minedmed ti baggak. Kapilitan nga aglayag
dagiti managsapsapa a nakem iti naladaw a bigat:
inaradas ti sardam ti dakulap a nakalukat.

Adda dung-aw a binekkel ti parbangon,
maem-em ti bibig ti bannawag, matnag ti amor:
adda lua a minedmed ti baggak. Mangur-urat

dagiti gemgem iti puso ti rissik, agdaldalipato
iti dara ti maur-uram nga oras. Kapilitan nga aglayag
dagiti managsapsapa a nakem iti naladaw a bigat:

kuadrado dagiti agdardaras a pilid,
agdaldalipato iti dara ti maur-uram nga oras.
Agur-urnong ti takiag kadagiti siding iti abaga,

agaw-awis iti dapan dagiti naduyok a bakrang,
mangur-urat ti gemgem iti puso ti rissik:
kuadrado dagiti agdardaras a pilid,

ngem nagtimbukel dagiti maganatan a sirib.
Kapilitan nga aglayag dagiti managsapsapa
a nakem iti naladaw a bigat, Mapuoran ti rabii,

aglamay dagiti segged: mangurat dagiti gemgem
iti puso ti rissik: mapintaan ti sipnget iti lawag
a nalabbaga, natingtingra ngem ti bannawag.

» daniw : tula : poetry
 
1