Muntagna granni, muntagna assai pussenti

chi Dio maistusa ti criau

tu si 'na mamma, 'a meta di dda genti

chi 'ntia circau la paci e la truvau.

Cu t'arriva davanti, s'arricria,

si scorda di lu munnu e di so guai

e penza chi truvau nautra via

unni la pena nun si canusci mai.

Muntagna bedda chi domini lu Strittu,

tu si l'orgogliu di Peloritani

puru nta notti, quannu è scuru fittu,

sentunu 'a to prisenza li cristiani.

Nte to visceri si celanu tesori,

rigna 'u mistero di 'na ricca truvatura

chi lassaru normanni, saracini e mori

quannu cumpita fu l'ultima ura.

Ma a tia sicula 'u Signuri ti vosi

e comu tali all'onuri ci teni

spugghiari nun ti fai 'i sti beddi cosi

e rispettu pritenni 'i cu ti voli beni.

O munti Scuderi, iò tantu beni ti vogghiu,

supra 'a to cima mi sentu nu re,

a dritta e a manca biddizzi iò cogghiu

e mi dumannu si megghiu ci nn'è.

Francesco Gullifa