Ny fianakavian'i Lita sy Ketaka ary Bozy dia anisan'ireo izay sarotiny dia sarotiny tokoa raha io no lazaina.

    Indray andro dia nentin'i Nenifara Tiana nihinana mofomamy sy izay zavatra rehetra tiany izy telo mianadahy satria tena hendry tokoa ka nifindra kilasy daholo.

    Satria be dia be ny toerana naleha sy ny zavatra natao dia tratra hariva izy ireo. Reraka dia reraka koa ry zareo, sady koa moa ny mpanendaka dia isaky ny iray metatra ao Antananarivo rehefa harivariva, ka dia tapa-kevitra fa handray fiara fitateram-bahoaka hody fa somary lavidavitra ny fodiana.

    Iaraha-mahalala moa fa ny fiara fitateram-bahoaka dia tena feno hIka rehefa harivariva ny andro. Manaraka izany dia ela dia ela izy ireo vao tonga. 

    Sendra tonga ary ny fiara kanefa ry Lita mbola somary lavitry ny fandraisana azy ka dia tapa-kevitra fa hiazakazaka ry zareo.

-Lita:     Andao isika Nenifara hiazakazaka fa ela be indray ny bus 
           vao ho tonga a!

-Nenifara: Tsy mbola nisy bus eo fa aleo mandeha miadana ihany isika. 
           Ny kiraroko koa manaikitra.

-Lita:     Io ny bus ka!

-Ketaka:   Tsy mbola misy bus izany eo fa aleo miandry.

-Lita:     Fa tsy hitanareo ve io fipetrahany io e? Io mitrangatranga 
           io ny fipetrahan'ilay bus, io mavomavo io!

-Bozy:     Fipetrahany ahoana?

-Lita:     FipetrahanY! FipetrahanY! (sady notondroiny ny fipetrahan' 
           ny tenany)

    Tafatombina teo ambony sisin-dAlana izy telo mianaka fa toran'ny hehy. Tsy nisy henatra ny olona intsony.

-Ketaka:   Fa angaha izany no anaran'io rehefa bus no resahina?

-Lita (sady tezitra no nanganohano): Ianareo koa ny olona 
           hihomehezanareo. Izaho mba manaraka ny anatra omen'ny 
           lehibe hoe teny ratsy izany fa fipetrahana no filaza ity 
           koa ianareo indray no maneso ahy eo!!!