 |
 |
Тэзы праграмы Маладога Фронту
I. Уступная частка
МАЛАДЫ ФРОНТ — адна з самых моцных і яркіх
грамадзка-палітычных зьяваў у сучаснае Беларусі, эпіцэнтар і фокус
маладзёвых працэсаў. Фэномэн Маладога Фронту — пасьлядоўнае разьвіцьцё,
сталеньне, эвалюцыя на працягу 1996 – 2000 гадоў.
Эвалюцыя МАЛАДОГА ФРОНТУ
1996 г. Масавыя выступы Вясны-96. На арэну выходзіць
новае пакаленьне беларускае моладзі — тыя, каму сёньня 14-30
гадоў. У Менску, Магілеве й Горадні гуртуюцца структуры будучага
Маладога Фронту — моладзь БНФ. Пакуль гэта толькі стыхійнае напаўненьне
маніфэстацыяў: уся праграма ў лёзунгах — “Незалежнасьць!”,
“Далоў Луку!”, “Жыве Беларусь!”.
1997 г. Вулічныя акцыі пратэсту Вясны-97. Асноўны
рухавік — моладзь, і яна ўпершыню робіцца самастойнай палітычнай
сілай. Першыя фірмова маладафронтаўскія акцыі: “Беларусь — у Эўропу!”,
“Горад наш!”, незалежніцкае графіці, прабег. Пад ціскам рэжыму вулічнае
супрацьстаяньне абвастраецца да крывавых сутыкненьняў і крымінальных
справаў. Радыкальныя настроі, дзейнасьць моцнага спартовага
адзьдзелу. Амаль адначасовая арганізацыя БПСМу і стварэньне агульнабеларускага
Маладога Фронту. І Сойм Маладога Фронту. Перавага ідэяў партызанскага
супраціву.
1998 г. Алімпіяда Маладога Фронту ў Менску і “Магілеўская
вясна-98”. Мітынгі Вясны-98 знакуюць паразу вулічнага радыкалізму.
Расчараваная хваля моладзі схлынае. Кампанія “Свабоду Севярынцу
і Шыдлоўскаму!”. Новая тактыка Маладога Фронту: замест вулічных
мітынгаў, якія перасталі даваць эфэкт, разгортваецца грамадзкае
будаўніцтва, культурніцкія й інфармацыйныя ініцыятывы. Стварэньне
фронту сатэлітных арганізацыяў — МА, БМА, АМП, “Эўрапейскі
шлях”, “Кампутаровае мастацтва”, БМК. Канцэрты й Шоў Беларушчыны.
Кампанія Маладога Фронту ў прэсе. Рэгіянальны ўздым. Інтэнсыўная
асьветніцкая дзейнасьць. Арганізацыйная й інфармацыйная праца дазваляе
Маладому Фронту сталець, разьвівацца й пашыраць поле дзейнасьці
на тле агульнамаладзёвага спаду. Малады Фронт робіцца ня толькі
вулічнай зьявай, а перарастае ў сур’ёзную грамадзка-палітычную сілу.
1999 г. ІІ Сойм Маладога Фронту: відовішча з удзелам
больш чым 400 дэлегатаў. Блякаваньне месца збору эрэн’ешнікаў. Першыя
курсы “Ды-джэяў Адраджэньня”, новая хваля канцэртаў і Шоў
Беларушчыны. Выбары-99: кампанія “Фініш”. Акцыі са сьцягамі
на футбольных матчах. Падзел БНФ. Малады Фронт застаецца адзіным
і салідарным на пазыцыях “трэцяй сілы”, спрабуе задзіночыць
старэйшых. Дэлегацыя Маладога Фронту ўдзельнічае ў І і ІІ сэсыях
VІ зьезду БНФ: прадстаўленыя праграмы “Другое дыханьне Фронту”
і “БНФ-2000”, адразу 15 маладафронтаўцаў абраныя ў Сойм
БНФ. Сэрыя пасьпяховых міжнародных візытаў.
Правал апазыцыі 16 траўня і 21 ліпеня 1999 г., а таксама падзеі
17 кастрычніка рубам ставяць перад Маладым Фронтам пытаньне аб мэтах
і мэтадах далейшае дзейнасьці: патрэба фармаваньня глыбокае ідэалёгіі,
сьветапоглядных пераменаў у маладзёвым руху робяццца відавочнымі.
Сталеньне сутнасна хрысьціянскага самаўсьведамленьня сярод незалежніцкае
моладзі.
2000 г. “Акцыя Любові” — агульнабеларуская маладзёвая
кампанія, пасьпяхова праведзеная Маладым Фронтам. Вясна-2000: Малады
Фронт у пярэдніх шэрагах і на першых плянах. Кампаніі расклейкі
й апавяшчэньня. ІІ курсы “Ды-джэяў Адраджэньня”. Шэраг удалых PR-акцыяў
і канфэрэнцыяў. Устаноўчы сход МГА “Малады Фронт” 16 красавіка і
падача дакумантаў на рэгістрацыю. Сьцягі 14 траўня. Падрыхтоўка
да ІІІ-га, праграмнага Сойму Маладога Фронту.
Такім чынам, МАЛАДЫ ФРОНТ прайшоў заканамерны эвалюцыйны шлях
— ад стыхійнага выхаду на масавыя маніфэстацыі, праз вулічны радыкалізм,
палітычнае шоў і сьцёб, праз культурніцтва і грамадзкае пашырэньне,
раскручваньне інфармацыйных тэхналёгіяў — да цяперашняга ідэалягічнага
сталеньня й шматвобразнасьці дзеяньня ў ролі лідэра нацыянальнае
моладзі. На працягу апошніх гадоў Малады Фронт знаходзіўся ў эпіцэнтры
змаганьня за Беларусь, у авангардзе разьвіцьця маладзёвых настрояў,
на хвалі чаканьняў грамадзтва — разам зь яго эвалюцыяй мянялася
ўся незалежніцкая моладзь. З штатнай маладзёвай фракцыі БНФ Малады
Фронт ператварыўся ў найбуйнейшы маладзёвы рух, у якім гарманічна
спалучаюцца і палітычная актыўнасьць, і культурніцкія акцыі, і вулічныя
маніфэстацыі, і інфармацыйныя кампаніі. Шырокі рух, які аб’ядноўвае
многія маладзёвыя плыні й прыхільнікаў розных меркаваньняў, дзесяткі
грамадзкіх арганізацыяў і ініцыятываў на груньце нацыянальнай ідэі,
у сьвятле хрысьціянскае маралі, з народнай, кансэрватыўнай
канцэпцыяй дэмакратычнага грамадзтва ды незалежнае эўрапейскае дзяржавы.
II. Актуальная праграма Маладога Фронту
Нацыянальны Рух Моладзі
Сёньняшняя беларуская моладзь – найбуйнейшы,
двухмільённы корпус беларускага грамадзтва, самае масавае пакаленьне
носьбітаў нацыянальнай ідэі, абаронцаў незалежнасьці, удзельнікаў
апазыцыйных выступленьняў і прыхільнікаў рэформаў. Людзкія чаканьні
сканцэнтраваныя на маладых. Моладзь, якой сёньня 14-30 гадоў, народжаная
да перабудовы (і для перабудовы), мае велізарную прагу й патэнцыял
пераменаў – палітычных, эканамічных, сацыяльных, культуровых і духовых.
Якраз гэтая моладзь “Вясны-96” і “Вясны-2000” здольная ўтварыць
у Беларусі ўзроставы й сьветапоглядны МАЛАДЫ ФРОНТ ПЕРАМЕНАЎ. Малады
Фронт дэмакратычных рэформаў і эўрапейскай альтэрнатывы, фронт супрацьстаяньня
дыктатуры й імпэрыі, злу ў дзяржаве й грамадзтве – непераадольны
бар’ер для камуна-гэбісцкага рэваншу, новы, сьвежы атмасфэрны фронт
Адраджэньня й духовага Абуджэньня.
МАЛАДЫ ФРОНТ – прызнаны арганізацыйны й ідэалягічны лідэр, авангард
беларускае незалежніцкае моладзі. У цяперашні адказны момант, на
пераломе тысячагодзьдзяў менавіта ён пакліканы задзіночыць і павесьці
за сабою ўвесь шырокі маладзёвы нацыянальны рух, фронт плыняў,
структураў і ініцыятываў з максымальным геаграфічным, сацыяльным
і ідэалягічным дыяпазонам, аб’яднаны нацыянальнай ідэяй, хрысьціянскімі
прынцыпамі й імкненьнем да поўнамаштабовых пераменаў у дзяржаве
й грамадзтве.
Стварэньне праграмы “МАЛАДЫ ФРОНТ ПЕРАМЕНАЎ” – першы й вырашальны
крок для фармаваньня такога ідэалягічна глыбокага й магутнага руху,
у якім новае пакаленьне Беларусі ўбачыла б рэальную апазыцыю, альтэрнатыву
старэючаму рэжыму й імпэрыі зла. Другім этапам у станаўленьні нацыянальнага
руху павінна стаць поўнае і шматвобразнае асэнсаваньне, усьведамленьне
сутнасьці нацыянальнай ідэі й духовага Адраджэньня сярод моладзі.
Гэта дазволіць аб’яднаць усе маладзёвыя нацыянальныя сілы
ў адзіны салідарны ФРОНТ ПЕРАМЕНАЎ.
Дванаццаць гадоў дзейнасьці БНФ заклалі пэўную грамадзкую базу
ідэяў незалежнасьці, эўрапейскасьці, беларусізацыі. Такія ідэі,
успрынятыя, засвоеныя ці хаця б прысутныя сярод бальшыні моладзі.
Сёньня МАЛАДЫ ФРОНТ пакліканы зьдзяйсьняць у грамадзтве куды больш
глыбокія, эфэктыўныя й структураваныя перамены, фармуляваць нацыянальную
ідэю ўва ўсіх сфэрах маладзёвае актыўнасьці, ужо цяпер распрацоўваць
мадэлі будучых рэформаў і абуджаць усю краіну дзеля духовага Адраджэньня.
Толькі адзіны, адкрыты, моцны й папулярны маладзёвы нацыянальны
рух можа стаць самім жыцьцём і вобразам дзеяньня сёньняшняе
беларускае моладзі.
10 галоўных справаў
1. ФАРМАВАНЬНЕ ІДЭАЛЁГІІ.
Базавая каштоўнасьць – Нацыянальная Ідэя. Задачы: пабудова незалежнае
дэмакратычнае эўрапейскае дзяржавы, выхаваньне новага пакаленьня
й ажыцьцяўленьне духовага Адраджэньня ў грамадзтве. Сьветапоглядная
сутнасьць маладзёвага нацыянальнага руху – найлепшая, самая сучасная
беларушчына, заснаваная на хрысьціянскіх прынцыпах. Фундамэнтальныя
распрацоўкі, канфэрэнцыі й сэмінары, артыкулы, PR-кампаніі з апірышчам
на патэнцыял БНФ і нацыянальнае творчае інтэлігенцыі.
2. АРГАНІЗАЦЫЙНАЕ ЎПАРАДКАВАНЬНЕ.
Больш кампактная, прафэсыйная спэцыялізаваная сыстэма кіраўніцтва.
Фармаваньне атмасфэры найвышэйшае адказнасьці сярод сябраў
моладзевага нацыянальнага руху. Узмацненьне выканаўчае дысцыпліны.
Уніфікацыя адміністраваньня й справаздачнасьці, структураваньне
камісіяў і сатэлітных арганізацыяў на месцах. Упарадкаваньне базаў
зьвестак, архіву й канцылярыі. Імкненьне да прафэсійнае арганізацыйнае,
кадравае й структурнае працы.
3. ПАСТАЯННАЕ НАВУЧАНЬНЕ.
Наладжваньне шматузроўневае сыстэмы адукацыі й падрыхтоўкі кадраў
для маладафронтаўцаў і прыхільнае моладзі. Курсы й лекцыі, летнікі
й трэнінгі, гартаваньне лідэраў і спэцыялістаў, грамадзка-палітычнае
навучаньне – на базе NGO і замежных партнэраў. Стварэньне сэрыі
мэтадычных праграмаў.
4. СТРАТЭГІЧНАЕ ФІНАНСАВАНЬНЕ.
Забесьпячэньне рэсурсамі праз сыстэму NGO, мэтавага спонсарства
й беларускага прадпрымальніцтва. Выхад на стратэгічныя каналы фінансаваньня.
Стварэньне паўнавартаснае матэрыяльнае базы тэхнікі й тэхналёгіяў
праз зьнешнія й ўнутраныя магчымасьці.
5. РЭГІЯНАЛЬНЫ ПАД’ЁМ.
Тэрытарыяльнае структураваньне мясцовых адзьдзелаў МФ (варыянты
– цэнтралізаваны, абласны, краёвы або комплексны). Найбольшая ўвага
– двум рэгіёнам: Паўночна-Заходняе Беларусі, дзе слаба выкарыстоўваюцца
моцныя нацыянальныя настроі, і Палесьсю, дзе сканцэнтраваныя велізарныя
рэзэрвы маладзёвага руху. Прыярытэт агульнабеларускіх кампаніяў
і акцыяў. Культываваньне мясцовых акцэнтаў. Падвышэньне ролі рэгіёнаў
у працэсе прыняцьця рашэньняў.
6. АБ’ЯДНАНЬНЕ МАЛАДЗЁВАГА РУХУ.
Ідэалягічнае й арганізацыйнае лідэрства МФ ва ўсіх магчымых сфэрах.
Ініцыяваньне супольных кампаніяў , заключэньне пагадненьняў аб супрацоўніцтве
й фармаваньне аб’яднанага фронту моладзі на аснове нацыянальнай
ідэі – з пастаянным імкненьнем заставацца цэнтрам цяжару, адыгрываць
вядучую ролю ў маладзёвым нацыянальным руху. Кола найбліжэйшых партнэраў
– ЗБС, ГФ, МГ, “Край”, МХСС, БПС, скаўты, шматлікія незалежніцкія
NGO.
7. ЗАМЕЖНАЯ ЭКСПАНСІЯ.
МФ мае шматлікую, але не арганізаваную сетку прадстаўнікоў ў бліжэйшым
замежжы. Неабходная сыстэматызацыя, разьвіцьцё й пашырэньне нашых
кантактаў праз маладафронтаўскіх навучэнцаў і ўцекачоў. Найважнейшая
зона дзейнасьці – Балта-Чарнаморская супольнасьць. Нароўні зь сяброўствам
у Маладых Кансэрватарах, разгортваньне максымальна шырокага супрацоўніцтва
з хрысьціянска-дэмакратычнай моладзьдзю “народных партыяў”
(у першую чаргу YЕРР). Акцэнтаваньне ўвагі на магчымасьцях дапамогі,
супольных акцыях і ўзаемным інфармаваньні. Распрацоўка праграмаў
найшырэйшых студэнцкіх абменаў. Актыўны ўдзел МФ у агульнаэўрапейскіх
кампаніях.
8. ІНФАРМАЦЫЙНАЯ КАМПАНІЯ МФ.
Стварэньне паўнавартаснай маладафронтаўскай газэты на базе “Весьніка”.
Разьвіцьцё сыстэмы лякальнай прэсы ў структурах на месцах. Кампаніі
рэклямы МФ: улёткі, буклеты, артыкулы. Аналітычная й рэдакцыйная
дзейнасьць ва ўзаемадзеяньні з прэс-групай БНФ. Інтэрнэт: рэгулярнае
абнаўленьне WEB-старонкі, кампутаровая экспансыя. PR-акцыі й як
мага часьцейшыя выступы лідэраў МФ у прэсе.
9. КУЛЬТУРНА-АСЬВЕТНІЦКАЯ АКТЫЎНАСЬЦЬ.
Разьвіцьцё й падтрымка культурна-асьветніцкіх сатэлітных арганізацыяў
МФ (“Маладое Адраджэньне”, БМА, “Эўрапейскі шлях”, “Адукатар”).
Далейшае разгортваньне сыстэмы Шоў Беларушчыны , Ды-джэяў Адраджэньня,
дыскатэкаў і канцэртаў. Кампанія “Беларускі Нацыянальны Ўнівэрсытэт”.
Разбудоўваньне сеткі відэаклюбаў, пераклад і распаўсюд сусьветна
вядомых фільмаў, стварэньне беларускіх кліпаў. Пастаяннае супрацоўніцтва
з ТБМ, шматлікімі культурніцкімі цэнтрамі Беларусі й дыяспары.
10. СПАРТОВЫ ПРАРЫЎ.
У першую чаргу фармаваньне дзеяздольнай і мабільнай дружыны
зь філіямі ў буйных мясцовых структурах. Арганізацыя фан-спартовых
клюбаў і групаў падтрымкі. Стварэньне апэратыўнай сыстэмы ўзаемадзеяньня
з патрыятычна-спартовымі арганізацыямі. Распаўсюд сярод моладзі
ідэяў здаровага ладу жыцьця: у здаровым целе – здаровы дух.
Антыкрымінальная дзейнасьць, антысьнідаўскія акцыі, кампаніі супраць
моладзевага алкагалізму й наркотыкаў.
Пераадолець небясьпечныя выклікі
НЯНАВІСЬЦЬ. Нянавісьць да Лукашэнкі, Расеі, міліцыянтаў
ці сваіх несьвядомых суайчыньнікаў не павінна рабіцца асноўнай рухавай
сілай моладзевага супраціву. Сутнасьць моладзевага нацыянальнага
руху – у свабодзе й ісьціне, веры й любові,
і менавіта гэтыя сілы вядуць нас у змаганьні за нацыянальную ідэю.
Мы змагаемся не супраць кагосьці, а ЗА Беларусь!
АБМЕЖАВАНАСЬЦЬ. Абмежаванае разуменьне ролі МФ у сёньняшнім
нацыянальным руху можа прывесьці да імкненьня ўладкавацца ў “сваёй”
утульнай нішы (напрыклад, “мы кансэрватары”, ”мы культурнікі” або
“мы радыкалы”). Адсюль, ад абмежаванасьці – і нецярпімасьць
асобных групаў моладзі ўнутры руху, якой неабходна пазьбягаць. Сэнс
агульнабеларускага моладзевага нацыянальнага руху ў тым, каб арганізацыйна
й духова аб’яднаць усе магчымыя маладзёвыя плыні й групы
на аснове нацыянальнае ідэі. МФ займаецца і грамадзкай дзейнасьцю,
і палітыкай; у МФ ёсьць месца ўсім – але пры гэтым у цэнтры ўвагі,
у сэрцавіне ідэалёгіі павінна стаяць выразная сыстэма каардынатаў:
імкненьне ў Эўропу, незалежная дзяржава, перамены ў грамадзтве,
хрысьціянскія прынцыпы. Ніякая з маладзёвых арганізацыяў, апроч
МФ, сёньня ня ў стане задзіночыць беларускую моладзь у нацыянальны
рух. Калі ня мы – дык хто?
АБЫЯКАВАСЬЦЬ. Многія, сьпярша юныя ды гарачыя, расчароўваюцца
ў адсутнасьці хуткага эфэкту, робяцца абыякавымі ды спустошанымі,
адыходзяць ад справаў альбо працягваюць квола варушыцца “па інэрцыі”
ці “па звычцы”: “усё роўна нічога не мяняецца”. Тым часам Беларусь
мяняецца – паволі, але ўпэўнена. Трэба сталець і разумець,
што сапраўдная незалежнасьць і духовае Адраджэньне ніколі не даюцца
лёгка, за пару гадоў. Мы маладыя, поўныя сілаў, за намі будучыня
– і менавіта на нас ляжыць адказнасьць за перамены ў грамадзтве.
Кожная хвіліна, кожны дзень нашага змаганьня мусяць набліжаць нас
да перамогі. У такі час недапушчальна расслабляцца, драмаць ці спадзявацца
на іншых. Будзьма ж заўжды бадзёрымі, чуйнымі, моцнымі аптымістамі
– і моладзь за намі пойдзе.
|