|
Young Front (Malady Front) |
Малады Фронт |
падзеі
прадстаўніцтвы й філіі
публікацыі й дыскусіі
сябра Эўрапейскіх Маладых Кансэрватараў
 |
 |
фабрыка ідэяў - інфармацыя |
|
|
| |
Інфармацыйная Ідэя |
|||
|
||||
|
|
||||
| |
|
Эпоха Інфармацыі.У дачыненьні да нашага часу часьцяком ужываюцца розныя гучныя тытулы накшталт Эра чагосьці-вельмі- пэрспэктыўнага-й-важнага. На ролю хітоў века высоўваліся камунізм, генэтыка, астранаўтыка, рок-н- рол, атамная энэргетыка й даўгі шэраг дробных да незаўважнасьці ідэяў і зьяваў. Можна ўпарта спрачацца наконт пэрспэктыўнасьці альбо навуковае важкасьці "намінантаў", але вызначае лідэра практычнае жыцьцё. Гэтак, атамная энэргетыка адзначыла стагодзьдзе бруднымі плямамі, прыбіраць якія давядзецца тысячы гадоў, і ня дзіўна, што ў паспалітага чалавека кожны ядравы праект выклікае стрэс, нібы зараджаны пісталет ля скроні. Генэтыкі скапіявалі авечку, чым адразу справакавалі выбух нейкага нездаровага інтарэсу - а ці нельга зрабіць другога Гітлера альбо Сталіна? Як у "Іван Васільевіч зьмяняе прафэсію": "А сьценачку ў краме прыпадняць можаце? ". Кажуць, існуюць грандыёзныя пэрспэктывы ў далечыні, але мы лепш азірнемся навокал - што ўжо ўплывае на лёс чалавецтва. Мне падаецца лідэр тут неаспрэчны - кампутар. Стварэньне прылады, якая прызначаная проста апрацоўваць інфармацыю, ня гледзячы на нескладанасьць ідэі, сталася сапраўды эпахальнай падзеяй. Рэч тут ня ў той зручнасьці й унівэрсальнасьці, якія дазваляюць ужываць кампутар ува ўсіх сфэрах чалавечага жыцьця ад складаных навуковых досьледаў да гульняў і гатаваньня страваў. У сапраўднасьці ўсё глыбей: адбылося адкрыцьцё новага вымярэньня - прасторы інфармацыі,- асвойваньне якога яшчэ толькі пачынаецца, у кантакце зь якім пераўтвараюцца, мадэрнізуюцца й абнаўляюцца бізнэс, навука, культура. Тут зьяўляюцца ня толькі новыя працоўныя месцы, але й новыя спэцыяльнасьці: web-майстры, праграмісты розных кірункаў, кампутарныя дызайнэры й г.д. Гэтак, новы сьвет інфармацыі й тэхналёгіі прывёў да стварэньня суцэльнай індустрыі, шчасьлівая спэцыфіка якой палягае ў нізкім спажываньні энэргіі й прыроднае сыравіны. Адзіны, бадай, рэсурс які вызначае багацьце краіны ў гэтым вымярэньні - інтэлект.
Эпоха Беларусі.Загаловак ажно блішчыць ад маладога нахабства, але гэта сапраўды так. Беларусь - патэнцыйны лідэр у галіне інфармацыйных тэхналёгіяў на абшару бадай што ўсяе Эўропы. Яшчэ за часамі СССР Беларусь вызначалася як рэспубліка з найвышэйшаю доляй высокаадукаванага насельніцтва. На ў апошнюю чаргу дзякуючы высокай колькасьці спэцыялістаў-электроншчыкаў і праграмістаў. Нашая краіна забясьпечвала кваліфікаванымі кадрамі стратэгічныя вытворчасьці й дасьледваньні: НДІСА (Навукова-Дасьледчы Інстытут Савецкай Арміі), завод імя Арджанікідзэ, "Інтэграл", Інстытут кібэрнэтыкі - гэта толькі буйнейшыя такога кшталту ўстановы Менску. Кадры рыхтуюцца трыма ВНУ: Радыётэхнічны інстытут (цяпер: БелДзяржУнівэрсытэт Інфарматыкі й Радыёэлектронікі), Палітэхнічны інстытут (цяпер Акадэмія) і БДУ. Нашыя спэцыялісты ўдзельнічалі ў навукова-тэхнічных праграмах у Навасібірску, Маскве, Кіеве. Ня дзіва, што й нефармальнае кампутарнае асяродзьдзе склалася ў Менску даволі рана (старыя хакеры сьцьвярджаюць, што ў часе мы саступілі толькі Кіеву), і заўсёды вызначалася высокім прафэсіяналізмам. Ня дрэнна ўсталявалася й нябачная прамысловасьць самаробных кампутараў (дарэчы, гэты занятак у нас мае старыя традыцыі: адна з найпершых мэханічных вылічальных машынаў была зробленая ў Нясьвіжы ў XVIII ст.) На жаль, сёньняшні рэжым пазбавіўшы Беларусь здаровага бізнэсу, пакінуў бяз працы значную частку таленавітых беларускіх кампутарнікаў. У нудзе "рынкавага" сацыялізму застаецца спраўджваць свае здольнасьці ў дэструктыўных праграмах - вірусах і траянцах. Некаторыя спэцыялісты зьехалі на працу ў замежжа, але ў гэтых слаях эміграцыя не набыла таго абвальнага характару, як, дапрыкладу, ў беларускім спорце. Магчыма, патлумачыць гэтае ўпартае нежаданьне пакідаць Радзіму дапамогуць вынікі сацыялягічных дасьледваньняў праведзеных Маладым Фронтам у маладзёвых асяродках рознай прафэсійнай арыентацыі - сярод праграмістаў паказьнікі нацыянальнай сьведамасьці й патрыятызму вышэйшыя за сярэднія на 10-15%. Так што гэта ня проста ўпартасьць - гэта нашая, БЕЛАРУСКАЯ ўпартасьць. Зрэшты, гэта прагматычныя людзі з разьвітым інтэлектам, яны папросту даўно пралічылі на кампутарах - дыктатура доўга не пражыве. Зараз патрэбная праца дзеля разьвіцьця й удасканаленьня галоўнага беларускага капіталу - мазгоў. Ёсьць усе варункі для адраджэньня беларускае дзяржаўнасьці менавіта на гэтай урадлівай глебе - тэхнічнай інтэлігенцыі. Ёсьць усе варункі, каб дзяржава забясьпечаная такой колькасьцю адмыслоўцаў як Беларусь сталася тэхна-інфармацыйным цэнтрам сусьветнага маштабу. Не забывайма, што тэхналягічны ўздым узьнімае на новыя вышыні банкаўскую справу, бізнэс у сфэры абслугоўваньня, навукаёмістую вытворчасьць. Аўтар займаецца тэхнічнымі пытаньнямі дзейнасьці Маладога Фронту два гады, за гэты час я паціснуў рукі, паразмаўляў і папрацаваў ня менш як з паўтысячай калегаў-праграмістаў, выслухаў і таго больш. Бальшыня зь іх думае так, як я вам тут выклаў, і яны проста дзеля сябе гатовыя зрабіць гэтую найпрыгажэйшую й найразумнейшую краіну яшчэ й найбагацейшай. Таму, як чалавек, які ня проста верыць, але які ведае, я вам кажу: будучыня за намі - справа толькі за арганізацыяй і працай.
|
||
 |
|
|
|
|