Young Front (Malady Front)
vul Varvaseni, 8, Miensk
Republic of Belarus
tel/fax +375-17-2845012

Малады Фронт
Беларусь, Менск.
вул. Варвашэні, 8
тэл.факс (017) 2845012

меркаваньне

Нашая ідэалёгія

 [1.5.2000 г.] Вадзім Канапацкі, Уладзімер Лабковіч, Андрэй Пятроў, Алесь Стральцоў, Аляксей Янукевіч

Дэклярацыя галоўных прынцыпаў ідэалягічнае плятформы Маладога Фронту

Мы, маладыя грамадзяне Беларусі, аб’ядналіся ды ўтварылі найбуйнейшую агульнанацыянальную моладзевую дэмакратычную арганізацыю – Малады Фронт – дзеля абароны й папулярызацыі сваіх каштоўнасьцяў: незалежнасьці нацыянальнае дзяржавы, свабоды, захаваньня культурных і грамадзка-палітычных традыцыяў нашага народа, разьвіцьця вольнага рынку на падставе прыватнае ўласнасьці. У Эўропе гэтыя каштоўнасьці клічуць кансэрватыўнымі, і мы з годнасьцю называем сябе беларускімі кансэрватарамі.

Нашыя каштоўнасьці зразумелыя ды блізкія для кожнага, хто любіць Радзіму, шануе свой народ, дбае пра дабрабыт як сваёй сям'і, так і сваёй краіны. Незалежная дзяржава ёсьць увасабленьнем права кожнае нацыі на свабоду, самарэалізацыю, разьвіцьцё ўласнае культуры ды дасягненьне дабрабыту. Свабода – неад’емнае права кожнага чалавека ад нараджэньня. Свабода слова, сходаў, атрыманьня інфармацыі ды іншыя свабоды грамадзянаў – важкія чыньнікі дэмакратычнае дзяржавы. Але свабода аднаго чалавека ня мусіць пагражаць правам іншых, таму побач са словам свабода мы ставім слова адказнасьць. Мы выступаем за ўсебаковую падтрымку сям’і на дзяржаўным узроўні, узмацненьне сям'і ды павелічэньне яе ролі ў грамадзтве, паколькі менавіта сям’я ёсьць той адзінкай чалавечае супольнасьці, што адказвае за выхаваньне асобы, захаваньне традыцыяў, дае людзям псыхалягічную апору. Прыватная ўласнасьць – гэта адна з падставовых умоваў эфэктыўнага функцыянаваньня эканомікі й аптымальнага выкарыстаньня рэсурсаў і, разам з тым, адзін з элемэнтаў рэалізацыі свабоды кожнага чалавека. Прыватная ўласнасьць дае людзям упэўненасьць у заўтрашнім дні й стымул для працы ды праяўленьня ініцыятывы. Дзяржава ня можа зрабіць большасьць сваіх грамадзянаў заможнымі – багацьце ж самой дзяржавы вымяраецца дабрабытам асобных яе грамадзянаў. З нашых каштоўнасьцяў і перакананьняў вынікае як нашае стаўленьне да галоўных праблемаў нашага грамадзтва, так і нашае бачаньне шляхоў іх вырашэньня.

Нацыянальнае адраджэньне

Працэс нацыянальнага адраджэньня, што быў спынены існуючым рэжымам, мусіць быць адноўлены на дзяржаўным узроўні. Натуральна, адзінай дзяржаўнай мовай павінна застацца беларуская. Цалкам павінна быць беларусізаваная сыстэма адукацыі ( выняткі – для арганізацыйна аформленых адпаведным чынам нацыянальных мяншыняў). Аб выкананьні праграмаў беларусізацыі, а таксама аб падтрымцы нацыянальнае культуры мусіць клапаціцца адноўленая нацыянальная дэмакратычная дзяржава, найлепшай формай уладкаваньня якой мы бачым парлямэнцкую рэспубліку.

Правы й свабоды грамадзянаў

Мы выступаем за роўнасьць усіх грамадзянаў перад законам, за роўнасьць правоў асобы й супольнасьці. Свабода слова, сходаў, сумленьня, веравызнаньня дый іншыя свабоды ёсьць для нас важнымі й неаспрэчнымі.

Эканоміка

Малады Фронт – за вольны рынак і абарону прыватнае ўласнасьці дзяржавай. Асновай стабільнасьці ў грамадзтве мы бачым маючую ўтварыцца сярэднюю клясу. Функцыяй дзяржавы будзе ўсталяваньне “правілаў гульні” на рынку, барацьба з манаполіямі ды недабрасумленнай канкурэнцыяй. Прыватная ўласнасьць на зямлю – такая ж неабходная, як і любая іншая, таму абмежаваньні на валоданьне зямлёй могуць быць толькі для неграмадзянаў Беларусі й толькі ў асобных выпадках.

Сацыяльныя пытаньні

Дзяржава павінна стварыць для кожнага пласта грамадства адпаведныя яго стану й памкненьням магчымасьці самарэалізацыі. “Беларусь – краіна рэальных магчымасьцяў!” – такі лёзунг мы дэкляруем у сацыяльнай сфэры. Прыярытэт у заработнай плаце (для дзяржаўных службоўцаў) будзе аддадзены інтэлектуальным працаўнікам. Мэдыцына мусіць быць галоўным чынам страхавой, але для бедных будзе існаваць гарантаванае бясплатнае дзяржаўнае мэдычнае абслугоўваньне. Мы лічым мэтазгодным абавязковае страхаваньне здароў’я, жытла, аўтатранспарту. Пэнсійнае забесьпячэньне мусіць быць рэалізаванае таксама праз адпаведнае страхаваньне. У сфэры адукацыі мы выступаем за сумяшчэньне прыватнага (платнага) ды дзяржаўнага навучаньня. Пры гэтым дзяржаўная адукацыя мусіць быць як бясплатная (да абавязковага ўзроўню, далей – для лепшых вучняў), так і платная.

Моладзь

Мы лічым неабходнай падтрымку дзяржавай і спрыяньне дзейнасьці маладзёвых арганізацыяў. Вельмі важным мы бачым і крэдытаваньне маладых сем'яў падчас набыцьця ўласнага жытла. Моладзь – будучыня краіны, і клопат пра моладзь ёсьць клопатам пра будучыню.

Вонкавая палітыка

У сфэры вонкавае палітыкі Малады Фронт выступае за стварэньне асобнае геапалітычнае прасторы, што будзе ўключаць краіны ад Чэхіі да Ўкраіны, ад Эстоніі да Харватыі. Мы – супраць любых саюзаў з Расеяй (як палітычных, так і якіх-заўгодна іншых), за закрытую мяжу й візавы рэжым на ўсходзе, а не на захадзе Беларусі. Разам з тым, мы супраць уваходжаньня Беларусі ў Эўрапейскі Зьвяз – прынамсі, ў Эўрапейскі Зьвяз сёньняшні. У стасунках з ЗША мы выступаем за раўнапраўнае партнэрства.

Нацыянальныя мяншыні

Дзяржава мусіць гарантаваць нацыянальным мяншыням стварэньне школаў, ўмоваў для разьвіцьця ўласных культураў у межах сваіх супольнасьцяў, а таксама спрыяньне дзейнасьці ўтвораных нацыянальнымі мяншынямі арганізацыяў, што дзейнічаюць у адпаведнасьці з законам і не вызнаюць сэпаратызму.

Мы, маладыя беларускія кансэрватары – Малады Фронт – дзеля дасягненьня сваіх мэтаў выкарыстоўваем і будзем выкарыстоўваць толькі тыя сродкі, што адпавядаюць спрадвечным маральным нормам нашае зямлі. Палітыка й мараль для нас ня проста сумяшчальныя – толькі маральная палітыка ёсьць для нас магчымаю. Сёньня мы змагаемся за свабоду й іншыя нашыя каштоўнасьці на вуліцах і пляцах, але недалёкі той час, калі сваю дзейнасьць мы будзем весьці у парлямэнцкіх залях. Час працуе на нас, мы працуем для Беларусі.

Будзь разам з намі!

Жыве Беларусь!