Young Front (Malady Front)
vul Varvaseni, 8, Miensk
Republic of Belarus
tel/fax +375-17-2845012

Малады Фронт
Беларусь, Менск.
вул. Варвашэні, 8
тэл.факс (017) 2845012

фабрыка ідэяў - народны фронт

Другое Дыханьне Фронту

 [21.4.2000 г.] Праект падрыхтаваны Дэлегацыяй Маладога Фронту

Сёньня,

- калі Аляксандар Лукашэнка больш не зьяўляецца законным прэзыдэнтам Беларусі, але ўзурпуе прэзыдэнцкую пасаду і працягвае праводзіць рэваншысцкую савецка-імпэрскую палітыку інтэграцыі з Расеяй;

- калі крызыс нацыянальнае эканомікі перарастае ў стагнацыю, і беларускае грамадзтва ўсё гучней патрабуе дэмакратычных выбараў, эканамічных рэформаў і эўрапейскае пэрспэктывы;

- калі сымпатыямі бальшыні беларускага насельніцтва, расчараванага ў Расеі й Лукашэнку, усё больш авалодваюць ідэі беларускай незалежнасьці й хрысьціянскія каштоўнасьці, за якія Беларускі Народны Фронт пасьлядоўна змагаецца вось ужо дзесяць гадоў,

БНФ "Адраджэньне" быў і застаецца адзінай асновай для аб'яднаньня ўсіх незалежніцкіх і дэмакратычных сілаў, адзіным нацыянальна-вызвольным рухам, ідэалягічным і арганізацыйным лідэрам, здольным прывесьці Беларусь у Эўропу і ажыцьцявіць беларускае Адраджэньне. Разам з тым мы разумеем, што традыцыйныя антыкамуністычныя й антылукашысцкія мэтады супраціву, палітычныя схемы, якія апошнія гады працуюць ухаластую, мусяць саступіць месца масавай стваральнай працы, якая б шырокім фронтам дэманстравала ня толькі а п а з ы ц ы ю, але й а л ь т э р н а т ы в у кіруючаму рэжыму.

Палітызаванасьць грамадзтва, так характэрная для канца 80-х - пачатку 90-х, зьмянілася значнай апатыяй, пагружэньнем насельніцтва ў свае ўнутраныя праблемы. На парозе новага тысячагодзьдзя на зьмену веку заклікаў і лёзунгаў надыходзіць эра рэальнае справы.

У тых варунках, калі нармалёвая партыйная й выбарчая дзейнасьць немагчымыя, Фронт пакліканы пераносіць цяжар сваіх намаганьняў у глыбіню грамадзкага жыцьця, у самую гушчу народных чаканьняў і інтарэсаў. Менавіта Народны Фронт урэшце павінны адказаць на галоўнае беларускае пытаньне часу: "Калі не яны, дык хто?", адказаць і словам і справай: "Мы!".

На зацяглым этапе напружанага змаганьня за вольную Беларусь многія проста стаміліся й зьняверыліся. Фронту патрэбнае другое дыханьне. Прага абнаўленьня, чаканьне рэформаў у самім БНФ выклікана не крызысам лідэраў ці ўнутранымі ідэалягічнымі супярэчнасьцямі, а менавіта вострай патрэбаю зьмены вобраза дзеяньня.

У першую чаргу, БНФ трэба даць грамадзтву яснае й сыстэмнае ўяўленьне пра тое, што ён зьбіраецца рабіць пасьля падзеньня рэжыму, растлумачыць сваю праграмную пазыцыю й сутнасьць будучых пераўтварэньняў усім, ад чыноўніка да школьніка. Дзеля арганізацыі шырокамаштабовае агітацыі неабходныя сэрыі артыкулаў у незалежнай прэсе, правядзеньне ўлёткавых кампаніяў у перадвыбарчым стылі і мабілізацыя ўсіх магчымых сродкаў масавае інфармацыі, у тым ліку замежных.

Па-другое, Фронту зноў неабходныя моцныя рэгіянальныя й мясцовыя акцэнты, апошнім часам згубленыя. Нельга забывацца, што па ўсёй Беларусі БНФ пачынаўся з краязнаўчых гурткоў і суполак, што й пасёньня нашая сіла - у рэгіянальных структурах. Акцыі тутэйшага значэньня, націскі на тэмах горада й раёна, вобласьці й сельсавета, адкрыты выклік мясцовым уладам па ўсім спэктры праблемаў здольныя даць грамадзкую падтрымку тут і цяпер, закласьці капітальны фундамэнт выбараў любых узроўняў і будучых муніцыпальных рэформаў.

Па-трэцяе, дзеля рэалізацыі задачаў у сёньняшніх варунках БНФ неабходная разгалінаваная сыстэма філіяў і сатэлітарных арганізацыяў, якая забясьпечвае шырокі выхад ува ўсе слаі грамадзтва й дае магчымасьць атрымаць патрэбныя рэсурсы. Другое дыханьне Фронту - гэта трэці сэктар. БНФ ужо сёньня дастаткова аўтарытэтны, каб стаць дамінуючай сілай у беларускіх НДА; фронтаўцы ўжо зараз дэ-факта складаюць ільвіную долю сярод кіраўнікоў недзяржаўных арганізацыяў па ўсёй краіне.

Беларускі Народны Фронт вядзе Беларусь у Эўропу, і таму ён павінны скарыстаць магутную падтрымку эўрапейскіх кансэрватараў і хрысьціянскіх дэмакратаў, якія ўсё набіраюць вагі й становяцца найбуйнейшай ды найбольш уплывовай сілай ЭўраЗьвязу. Цеснае міжнароднае супрацоўніцтва БНФ з Народнай Партыяй Эўропы, а таксама нацыянальнымі цэнтрысцкімі і правацэнтрысцкімі рухамі ня толькі ўмацуе пазыцыі БНФ у Беларусі, але й паставіць на Захадзе заслону пашыраным прарасейскім сындромам "трубы" і " калідору".

Фронт, назва якога гучыць па-ангельску як Belarusian Popular Front, мусіць імкнуцца быць папулярным. Не папулісцкім, а менавіта папулярным. Уяўленьне пра БНФ як арганізацыю антыкамуністычную й антыімпэрскую павінна дапоўніцца абрысамі стваральнага эўрапейскага, хрысьціянскага ў сваёй аснове вобразу, які мае на ўвазе абарону спрадвечных каштоўнасьцяў і выключае абвінавачваньні ў дэструктыўнасьці й экстрэмізме. Няспынная дзейнасьць такога кшталту дазволіць узнавіць высокі аўтарытэт БНФ сярод усіх слаёў насельніцтва, набраць крытычную масу для мірных шматтысячных вулічных выступленьняў і, што яшчэ важней, створыць трывалы падмурак даверу для пабудовы Нашага Беларускага Дому.

Каляндарны кругабег вулічных акцыяў, што прабуксоўвае апошнія два гады, мусіць улічваць актуальныя масавыя настроі ў дадзены момант і апэратыўна адгукацца на надзённыя падзеі, пра якія гавораць і краіна, і сьвет.

Калі зноў злачынна замоўчваюцца наступствы Чарнобыля, калі зноў беларускай прыродзе пагражаюць індустрыяльныя монстры, а ў запаведніках прэзыдэнцкія "управделы" рубяць лес на вываз, Народны Фронт, як у канцы 80-х, павінны весьці экалягічны рэй. У сёньняшняй Эўропе й асабліва на постсавецкай прасторы "зялёныя" імкліва набіраюць папулярнасьці. Нам варта пачынаць з двароў уласных штаб-кватэраў, гістарычных помнікаў і вуліцаў зь беларускімі назвамі, каб эўрапейская чысьціня й парадак былі для ўсіх візытнай карткай нацыянальнага руху.

Сёньня, калі рэжым бессаромна спойвае народ, а моладзь ахопленая эпідэміяй наркаманіі й СНІДу, калі мясцовая злачыннасьць сьпелася з расейскай мафіяй, менавіта БНФ застаецца усенародным фронтам змаганьня з крыміналізацыяй, татальным алькагалізмам і разбэшчваньнем грамадзтва. Трэба праводзіць інфармацыйныя кампаніі і ствараць грамадзкія камітэты, весьці растлумачальную работу. Беларуская мова на варце сямейных, маральных каштоўнасьцяў - лепшая агітацыя за ідэі Адраджэньня.

Яшчэ адзін моцны крок - прапаганда здаровага ладу жыцьця й духоўнага разьвіцьця, арганізацыя й падтрымка спартовых спаборніцтваў, падлеткавых гурткоў і маладзёвых таварыстваў. У час фізычнага й духоўнага заняпаду нацыі, перад пагрозай выміраньня й генацыду трэба культываваць вобраз беларуса, здаровага целам і духам.

Адукацыя й культура - найважнейшыя сфэры дзейнасьці Фронту, якая павінна сёньня прыняць характар масавае асьветы з распрацоўкай і абнародваньнем агульнабеларускіх праграмаў, зьбіраньнем навукова-практычных канфэрэнцыяў, заснаваньнем альтэрнатыўных афіцыёзу, сапраўды папулярных нацыянальных адукацыйна-культурніцкіх установаў, выданьняў і мерапрыемстваў.

Пэрспэктывай нацыянальна сьведамага грамадзтва, будучыняй сапраўднае Беларусі ёсьць моладзь, перадусім гарадзкая. Стаўка на праэўрапейскае, актыўнае й дынамічнае пакаленьне'2000 мусіць стаць прынцыпам далейшае працы Фронту.

Беларускі Народны Фронт павінны праявіць сваю салідарнасьць з усімі нацыянальнымі супольнасьцямі Рэспублікі Беларусь у іх правох. Надыйшоў час усьведаміць і становішча расейскае дыяспары як нацыянальнае мяншыні.

Урэшце, фундамэнтальным абавязкам БНФ ёсьць падтрымка царквы, касьцёлу й актыўнае ўзаемадзеяньне з усімі хрысьціянскімі канфэсіямі у краіне. Духоўнае Адраджэньне беларускае нацыі немагчымае бяз Бога.

Сёньня дастаткова ўзяцца за справу, паказаць, што мы хочам, гатовыя, што мы сапраўды здольныя ўзяць на сябе адказнасьць за Беларусь - і ў нас павераць.

Другое дыханьне даецца мацнейшым.
Мы разумеем, што з антыбеларускім рэжымам,
з пагрозамі дзяржаўнасьці краіны
й глыбінным пераўтварэньнем грамадзтва
можа справіцца толькі адзіны,
унутрана моцны й сапраўды папулярны
БЕЛАРУСКІ НАРОДНЫ ФРОНТ.