« notes/updates »

» Lunes, Oktubre 22, 2001 3:41 PM

Naipankon ti 30 a daniw ken 13 a sarita (maysa laengen a sarita ti kurangna). Isarsarunok ita dagiti salaysay. Awan pay linaon ti benneg a "Mannurat : May-akda". Ipankonto ditoy ti ababa a biograpiak. Mabalin nga inayonkonto ditoy a benneg ti maipapan iti biagko kas mannurat/agsursurat iti siguro estilo nga interview with myself. Mabalin nga ipankonto pay ditoy ti maysa a bibliography wenno listaan dagiti naipablaak a sinuratko. Ipankonto pay ditoy ti listaan dagiti urnongko a libro.

Kabayatanna, iti benneg nga "Urnong : Kalipunan" ditoyko nga ikabil dagiti daniw, sarita ken dadduma pay a sinurat ti sumagmamano a gagayyemko a mamannurat. Kasla maysanto daytoy nga antolohia ti gapuanan dagiti sabali/dadduma pay a mannurat nga Ilokano.

» Lunes, Oktubre 22, 2001 12:23 PM

Nai-uploadkon ti dadduma a pages. Ngem adu pay ti madamak nga ar-aramiden, nangruna iti benneg ti daniw ken salaysay. Mangipanak iti aganay a 30 a daniw. 10 met siguro a salaysay. Iti sarita, addan 13, ti laeng "Ang Programa" ti awan pay. Dagiti benneg a "Ken dadduma pay : At iba pa," "Urnong : Kalipunan" ken "GUMIL" ket awan pay nagyanna, pilitek nga ikkan iti sangkabassit. Adu pay ti nasken nga ukuagek ken bukibokek a files ngamin tapno alaek dagiti mayat ken rumbeng a maikabil kadagitoy a benneg.

Isu nga an-anusanyo la koman no adu pay ti awan a files ken dead links...

Hopefully, kadagiti masungad nga oras ken aldaw ket makompletokto met laengen ti linaon daytoy a site. Isamsamirak pay nga ar-aramiden ti guestbook ken forum, kayatko a customized dagitoy iti disenio ken langa ti site isu nga addada cgi scripts nga i-configure para itoy a purpose.

» Domingo, Oktubre 21, 2001 9:41 PM

Iti kamaudiananna, nasangok met la nga i-update wenno interamente a balbaliwan/sukatan ti nanumo a personal websiteko. Nabayagen a diak naasikaso a kutien daytoy a site. Kastoynan manipud naudi a pannaka-updatena idi 1997. Immuna nga in-uploadko daytoy iti GeoCities idi 1996. Saan pay idi a kukua ti Yahoo! ti GeoCities. Ti GeoCities idi kasikatan ken kadakkelan a free webhosting company. Agdadamoak idi iti web, damok met ti agara-aramid iti web pages babaen kadagiti tutorials a maal-alak iti web met laeng. Kangrunaanna, idi 1996, dialup pay laeng babaen ti DOST ti koneksionmi iti SPU. Sa la naaddaan iti permanent a 64 kbps a leased line connection idi Setiembre 1997. Nabayag la nga agpayson. Nabayag a nagkalaegan, nabayag nga static daytoy a site. Diakon nasangsango gapu kadagiti nagadu unayen a nakakumikomak nga inobra a sabsabali websites ken dadduma pay a projects mainaig iti propesionko. Banag a diak pay ketdin nakasanguan nga agsurat/makasurat.

Ita a narugiak manen a butingtingen daytoy a site--a binaliwakon a kompleto iti kabarbaro ken simple a disenio ken layout--barbareng regular ken naynayen a ma-update daytoy a site. Barbareng met koma maisikik metten ti makasurat iti uray sumaggaysa a dandaniw ken uray koma maysa la a sarita a para-salipko ita a tawen (nangruna iti Palanca) ken uray maysa la koma man a sarita parapaipablaakko koma met iti Bannawag (ta nabayagen nga ud-ud-udandak dagiti editor ti Bannawag iti sinuratko ta nabayag kanon a naglumenak kadagiti pinanid ti Bannawag, hmmm...). Ken, siempre, bareng adda nga agpayso uray saan la maysa wenno dua a daniw ken sarita ti maisaparko a putaren, tapno adda pay met maipanko itoy a site kabayatan ti regular a pannaka-updatena.

Pagpampanunotak pay no ania pay dagiti mayat ken nasken a maikabil/maipan iti daytoy napabaro/nabalbaliwan a personal a websiteko a pangikabilak kadagiti sinuratko. Nnupay panagkunak ket saanko a maipan/ipan amin a sinurat/suratek ditoy agsipud ta dagiti dadduma a sinuratko ket saan wenno saan pay a encoded electronically wenno naikompiuter. Adu pay dagiti adda kadagiti orihinal a manuskrito a nakamakinilia (awan pay kompiuterko idi) ken dagiti adda a mismo iti sumagmamano a pagiwarnak ken magasin (kas iti Valley Journal ken Bannawag). Diak pay ammo no kaanok a masango nga i-type dagitoy iti computer wenno i-text scan (dagiti nadalus a nalawag a mabasa/maiskan). Ken maysa, nupay kayatko ken panggepko nga agpaay daytoy a website a kasla pakaidulinan/pakaurnongan ti amin ken aniaman a literary wenno ania pay a masurat, kasla kayatko a pengdan daytoy, wenno at least ket limitaran, daytoy a panggep. Agsipud met laeng ta accessible daytoy a medium (web) iti publiko wenno iti siasinoman, amangan laeng no agparikutakto iti copyright wenno mainaig a problema. Nupay awan met ketdi ti makitak pay a pakarikutan no iti man pannakausar dagitoy a sinurat ta sipapalubosak met latta a maaramat dagitoy (no adda man pakaikariannada) educationally ken dadduma pay a pannakaaramat saan la ketdi a for profit wenno for commercial purposes (ngem umanamongak latta basta la ket adda met bingayko wenno royalty a pannakaapagko no bilang adda adda man nga agpayso profit itoy wenno profitable ti pannakaaramatna dagitoy a nanumo a sinurat, :-) hehe!) ... Ken maysa pay, siempre, saan met amin a sinuratko ket nasken nga ipanko ditoy a libre a mabasa ken/wenno makopia/ma-download. Siempre met, adda dagiti sinuratko a para laeng kaniak metten, a, for my eyes only... ;-)