Algemene Lysetiket
Die volgende riglyne is daargestel om almal se ervaring van SAgenealogie nog meer aangenaam en produktief te maak. Indien iemand buite hierdie riglyne optree, kan sodanige optrede direk aan een van die bestuurslede uitgewys word. Die saak sal dan van die lys af verder gevoer word.
Nie-relevante onderwerp-lyne kan 'n bron van groot frustrasie wees. Voordat jy dus jou antwoord stuur, vergelyk jou brief en die onderwerp-lyn, en maak die nodige aanpassings.
Die meeste e-posprogramme voeg die oorspronklike boodskap by verstek by wanneer jy op 'n brief antwoord. Neem asseblief die ekstra tydjie om die ou, onnodige dele uit te vee.
Voordat jy jou e-pos stuur, lees dit 'n slag oor en dink of die ontvangers jou tong-in-die-kies-opmerking, grappie of satire in die regte lig sal sien. Gebruik gerus die glimlaggie :-) vir verdere duidelikheid. Aan die ander kant is nie almal ewe bedrewe met die geskrewe woord nie - neem dit in ag voordat jy ontstel word deur 'n moontlik onskuldige opmerking.
Briewe wat net relevant is vir een of twee ander mense moet liefs aan hulle persoonlik gestuur word, en nie aan die hele groep nie. So is dit byvoorbeeld belangrik om dankie te sê, maar die meeste lede het nie belang daarby nie.
Ons is hier om mekaar te help om meer oor ons voorsate te leer, en dit impliseer dat ons verdraagsaamheid, vriendelikheid en goeie maniere in ons interaksie met mekaar aan die dag sal lê.