Is-Sena Pawlina toffrilna l-okkażjoni biex:

1. Niskopru mill-ġdid il-figura ta’ l-Appostlu San Pawl bħala Missierna li wasslilna l-fidi;
2. Insiru aktar midħla ta’ l-Ittri tiegħu u nagħrfu l-ispiritwalità li hemm fihom;
3. Napprofondixxu t-tagħlim tiegħu u nagħmluh bħala viżjoni għalina;
4. Nitħeġġu fil-fidi nisranija mqanqlin mill-eżempju;
5. Nitqanqlu mill-entusjażmu tiegħu għax-xandir tal-Kelma u għax-xiehda li nagħtu ta’ Kristu f’ħajjitna.

SENA B

IL-QUDDIESA TAL-ĦADD – JUM IL-MULEJ

26 ta’ April 2009

IT-TIELET ĦADD FUQ L-GĦID IL-KBIR

Messalin Sena B: Paġna 284

RAHAN TAL-MAĦFRA TAGĦNA

L-EWWEL QARI

Qari mill-Ktieb ta’ l-Atti ta’ l-Appostli.                     Atti 3, 13-15.17-19

F’dak iż-żmien: Pietru qal lill-poplu: “Alla ta’ Abraham u ta’ Iżakk u ta’ Ġakobb, Alla ta’ missirijietna, sebbaħ lil Ġesù, il-qaddej tiegħu, li intom irħejtu u ċħadtu quddiem Pilatu, għalkemm dan kien qatagħha li kellu jitilqu. Imma intom ċħadtu l-Qaddis u l-Ġust, u tlabtu li jkun meħlus wieħed qattiel waqt li qtiltu lil Sid il-ħajja. Alla qajmu mill-imwiet; ta’ dan aħna xhieda.
Issa, ħuti, jiena naf li dan għamiltuh għax ma kontux tafu, kif għamlu wkoll il-kapijiet tagħkom. Imma b’hekk Alla wettaq dak li kien ħabbar sa minn qabel b’fomm il-profeti, li l-Messija tiegħu kellu jbati. Indmu, mela, u erġgħu lura biex dnubietkom jinħafrulkom, u hekk jiġu żminijiet il-faraġ minn għand il-Mulej.”

Il-Kelma tal-Mulej.

Inroddu ħajr lil Alla.

SALM RESPONSORJALI                           Salm 4

Rit: Ixħet id-dawl ta’ wiċċek fuqna, Mulej.

Weġibni meta nsejjaħlek,
O Alla tal-ġustizzja tiegħi,
oħroġni fil-wisa’ meta nkun imdejjaq,
ħenn għalija u isma’ t-talb tiegħi.

Rit: Ixħet id-dawl ta’ wiċċek fuqna, Mulej.

Kunu afu li l-Mulej jagħmel għeġubijiet
mal-fidil tiegħu,
il-Mulej jagħti widen meta nsejjaħlu.

Rit: Ixħet id-dawl ta’ wiċċek fuqna, Mulej.

Ħafna jgħidu: “Min jurina l-hena?”
Ixħet id-dawl ta’ wiċċek fuqna, Mulej.
Fis-sliem immur nimtedd
u norqod minnufih.

Rit: Ixħet id-dawl ta’ wiċċek fuqna, Mulej.

IT-TIENI QARI
Qari mill-Ewwel Ittra ta’ San Ġwann Appostlu.                   1 Ġw 2, 1-5a

Uliedi, dan qed niktibhulkom biex ma tidinbux; imma jekk xi ħadd jidneb, aħna għandna Difensur quddiem il-Missier, lil Ġesù Kristu, il-Ġust. U hu jħallas għal dnubietna, mhux għal tagħna biss, iżda wkoll għal dawk tad-dinja kollha.
U b’dan nafu li nagħarfu lil Ġesù: jekk inżommu il-kmandamenti tiegħu. Min jgħid “Jien nafu” u ma jżommx il-kmandamenti tiegħu, hu giddieb u s-sewwa mhux fih. Iżda kull minn iżomm il-kelma tiegħu fih hemm tassew l-imħabba ta’ Alla fil-milja tagħha.

Il-Kelma tal-Mulej.

Inroddu ħajr lil Alla.

VERSETT
Hallelujah. Hallelujah.
Mulej Ġesù, fissrilna l-Iskrittura;
ħeġġilna qalbna, int u tkellimna.
Hallelujah.

 L-EVANĠELJU
Qari mill-Evanġelju ta’ San Luqa.                 Lq 24, 35-48

F’dak iż-żmien: Id-dixxipli kienu qegħdin itarrfu xi ġralhom
fit-triq, u kif għarfu ’l Ġesù fil-qsim tal-ħobż.
Kif kienu għadhom qegħdin jitkellmu, huwa nnifsu waqaf f’nofshom u qalilhom: “Is-sliem għalikom!” Huma twerwru bil-biża’, għax ħasbu li qegħdin jaraw xi fantażma. Iżda hu qalilhom: “Għaliex tħawwadtu? Għaliex dan it-tħassib kollu f’qalbkom? Araw idejja u riġlejja. Jiena hu! Missuni, u ifhmu li l-Ispirtu ma għandux laħam u għadam bħalma qegħdin taraw li għandi jien.” Huwa u jgħidilhom dan, uriehom idejh u riġlejh. Billi huma, bil-ferħ tagħhom, kienu għadhom ma jridux jemmnu u baqgħu mistagħġba, qalilhom: “Għandkom xi ħaġa ta’ l-ikel hawn?” U ressqulu quddiemu biċċa ħuta mixwija. Ħadha, u kielha quddiemhom.
Imbagħad qalilhom: “Dan kien sewwa sew il-kliem li għidtilkom meta kont għadni magħkom: li jeħtieġ iseħħ kull ma nkiteb fuqi fil-Liġi ta’ Mosè, fil-Profeti u s-Salmi.” Imbagħad fetħilhom moħħhom biex jifhmu l-Iskrittura. U qalilhom: “Hekk kien miktub, li l-Messija jbati u jqum mill-imwiet fit-tielet jum, u li lill-ġnus kollha, ibda minn Ġerusalemm, tixxandar f’ismu l-indiema għall-maħfra tad-dnubiet. Intom xhud ta’ dan.”

Il-Kelma tal-Mulej.

It-tifħir lilek Kristu.