Hasrete veda etti ol hüsn-i hilkat ehli hal
Alem-i ervaha uçtu dünyada görmek muhal

Evlad-ı Gavs Muhammed Nur'dur onun şöhreti
İsmi-Hakkı-idi Hakk'a eyledi azm-i visal

Sır olup alem gözünden rıhlet etti vahdete
Zikr u fikrile müzevvak asla etti insilal

Nur Muhammed'den okumuş idi ilm-i Lahut'u
Kamil-i zaman idi ol ilmi hilmi bimisal

Kenz-i irfan idi gönlü memlu-i hikmet idi
Akıtırdı dil ve lebinden daim ab-ı zülal

Her sözü ab-ı hayat can bahşederdi aşığa
Kibir kin yok idi herkesle ederdi hasbihal

Hızır idi kim görenin artar idi rif'atı
Sıdkile teslim olanlara verir idi neval

Nefhasından hay olup vecde gelirdi mürde dil
Feyz alırdı sohbetinden ehl-i dil al-i rical

İhtiyari mevtile daim ederdi iftihar
Hubb-i dünya yok idi hiç söylemezdi kıyl u kal

Alim idi arif idi abid idi ol hümam
Lem'an ederdi yüzünden Ahmedi hüsn-ü hisal

Çünkü geçti dünyadan ol ehl-i fazl-ı zü'l-kemal
Bağrımız yaktı firaki gönlümüz oldu melal

Çok müteessir olduk ama nedelim hükm-i kader
İltimas yok imtiyaz yok kimseye vermez mahal

FEHMİ ol murg-ı humanın mevtini kıldı beyan
Hem bin üçyüz altmışbeş hicriydi tarihine sal