Cxapitro 2
1 Post tiu afero, kiam kvietigxis la kolero de la regxo
Ahxasxverosx, li rememoris pri Vasxti, kaj pri tio, kion sxi
faris kaj kio estis dekretita pri sxi.
2 Kaj diris la junuloj de
la regxo, kiuj servadis al li: Oni sercxu por la regxo belajn
junajn virgulinojn;
3 kaj la regxo starigu en cxiuj landoj de sia
regno oficistojn, kiuj kolektus cxiujn belajn junajn virgulinojn
en la kastelurbon Sxusxan, en la virinejon, sub la inspektadon de
Hegaj, la regxa euxnuko, gardisto de la virinoj, kaj oni donu al
ili iliajn beligajxojn;
4 kaj la junulino, kiu placxos al la
okuloj de la regxo, farigxos regxino anstataux Vasxti. Kaj la
afero placxis al la regxo, kaj li tiel faris.
5 En la kastelurbo
Sxusxan estis Judo, kies nomo estis Mordehxaj, filo de Jair, filo
de Sximei, filo de Kisx, Benjamenido;
6 kiu estis translogxigita
el Jerusalem kune kun la translogxigitoj, kiuj estis
forkondukitaj kun Jehxonja, regxo de Judujo, kaj kiujn
translogxigis Nebukadnecar, regxo de Babel.
7 Li estis
prizorganto de Hadasa, kiu ankaux estis nomata Ester, filino de
lia onklo, cxar sxi ne havis patron nek patrinon. La junulino
estis belstatura kaj belvizagxa. Kiam mortis sxiaj gepatroj,
Mordehxaj prenis sxin al si kiel filinon.
8 Kiam estis auxdigita
la ordono de la regxo kaj lia legxo, kaj kiam oni kolektis multe
da knabinoj en la kastelurbon Sxusxan sub la inspekton de Hegaj,
tiam ankaux Ester estis prenita en la regxan domon sub la
inspekton de Hegaj, la gardisto de la virinoj.
9 La knabino
placxis al li kaj akiris lian favoron, kaj li rapide donis al sxi
sxiajn beligajxojn kaj sxian destinitajxon, kaj sep knabinojn
elektitajn el la domo de la regxo; kaj li translogxigis sxin kun
sxiaj knabinoj en la plej bonan parton de la virinejo.
10 Ester
ne diris pri sia popolo nek pri sia patrujo, cxar Mordehxaj
ordonis al sxi, ke sxi ne diru.
11 Cxiutage Mordehxaj iradis
antaux la korto de la virinejo, por sciigxi pri la farto de
Ester, kaj pri tio, kio okazas al sxi.
12 Kiam por cxiu knabino
venis la vico iri al la regxo Ahxasxverosx, post kiam dum dek du
monatoj estis farata al sxi la beligado destinita por la virinoj
(cxar tiel longe dauxris la tempo de ilia beligado: ses monatoj
per mirha oleo, kaj ses monatoj per aromajxoj kaj per aliaj
sxmirajxoj),
13 tiam la knabino eniris al la regxo. Cxion, kion
sxi diris, oni donis al sxi, por ke sxi iru kun tio el la
virinejo en la regxan domon.
14 Vespere sxi eniris, kaj matene
sxi revenis en la virinejon duan, sub la inspekton de Sxaasxgaz,
regxa euxnuko, gardisto de la kromvirinoj; sxi jam ne plu iris al
la regxo, krom en la okazo, se la regxo sxin deziris kaj se sxi
estis vokita lauxnome.
15 Kiam por Ester, filino de Abihxail,
onklo de Mordehxaj, kiu prenis sxin al si kiel filinon, venis la
vico iri al la regxo, sxi nenion petis, krom nur tio, kion diris
Hegaj, la regxa euxnuko, gardisto de la virinoj. Kaj Ester
akiris la favoron de cxiuj, kiuj sxin vidis.
16 Ester estis
prenita al la regxo Ahxasxverosx en lian regxan domon en la deka
monato, tio estas en la monato Tebet, en la sepa jaro de lia
regxado.
17 Kaj la regxo ekamis Esteron pli ol cxiujn edzinojn,
kaj sxi akiris cxe li simpation kaj favoron pli ol cxiuj
virgulinoj; kaj li metis regxan kronon sur sxian kapon kaj faris
sxin regxino anstataux Vasxti.
18 Kaj la regxo faris grandan
festenon por cxiuj siaj princoj kaj servantoj, festenon je la
honoro de Ester; kaj li donis ripozon al la landoj kaj disdonis
regxajn donacojn.
19 Kaj kiam oni la duan fojon kolektis
junulinojn, Mordehxaj sidis cxe la pordego de la regxo.
20 Ester
ankoraux ne diris pri sia patrujo kaj pri sia popolo, kiel
ordonis al sxi Mordehxaj; kaj la dirojn de Mordehxaj Ester
plenumadis tiel same, kiel tiam, kiam sxi estis sub lia
prizorgado.
21 En tiu tempo, kiam Mordehxaj sidadis cxe la
pordego de la regxo, ekkoleris Bigtan kaj Teresx, du korteganoj
de la regxo el la sojlogardistoj, kaj ili intencis meti manon sur
la regxon Ahxasxverosx.
22 Pri tio eksciis Mordehxaj, kaj li
diris al la regxino Ester, kaj Ester diris tion al la regxo en la
nomo de Mordehxaj.
23 La afero estis esplorita kaj trovita vera,
kaj oni pendigis ambaux sur arbo. Kaj tio estis enskribita en la
kronikon cxe la regxo.
Cxapitro 3
1 Post tiuj okazintajxoj la regxo Ahxasxverosx eminentigis
Hamanon, filon de Hamedata, la Agagidon, altigis lin kaj starigis
lian segxon super cxiuj princoj, kiuj estis cxe li.
2 Kaj cxiuj
servantoj de la regxo, kiuj estis cxe la pordego de la regxo,
klinadis sin kaj jxetadis sin vizagxaltere antaux Haman, cxar
tiel ordonis pri li la regxo. Sed Mordehxaj sin ne klinadis kaj
ne jxetadis sin vizagxaltere.
3 La servantoj de la regxo, kiuj
estis cxe la pordego de la regxo, diris al Mordehxaj: Kial vi
malobeas la ordonon de la regxo?
4 Cxar ili diradis tion al li
cxiutage kaj li ne obeis ilin, tial ili raportis tion al Haman,
por vidi, cxu la vortoj de Mordehxaj konservos sian forton; cxar
li diris al ili, ke li estas Judo.
5 Kiam Haman vidis, ke
Mordehxaj ne klinas sin kaj ne jxetas sin vizagxaltere antaux li,
tiam Haman plenigxis de kolero.
6 Sed li trovis nesuficxa meti
la manon sur Mordehxajon; cxar oni diris al li, el kiu popolo
Mordehxaj estas, tial Haman ekintencis ekstermi cxiujn Judojn,
kiuj estis en la tuta regno de Ahxasxverosx, la popolon de
Mordehxaj.
7 En la unua monato, tio estas en la monato Nisan, en
la dek-dua jaro de la regxado de Ahxasxverosx, oni jxetadis
pur'on, tio estas loton, antaux Haman, de tago al tago kaj de
monato al monato, gxis la dek-dua, tio estas gxis la monato Adar.
8 Kaj Haman diris al la regxo Ahxasxverosx: Ekzistas unu popolo,
disjxetita kaj dissemita inter la popoloj en cxiuj landoj de via
regno; iliaj legxoj estas malsimilaj al la legxoj de cxiuj
popoloj, kaj la legxojn de la regxo ili ne plenumas; ne decas al
la regxo tiel restigi ilin.
9 Se al la regxo placxas, oni
preskribu ekstermi ilin; tiam dek mil kikarojn da argxento mi
pesos en la manojn de la oficistoj, por enporti en la kason de la
regxo.
10 Tiam la regxo deprenis sian ringon de sia mano, kaj
donis gxin al Haman, filo de Hamedata, la Agagido, malamiko de la
Judoj.
11 Kaj la regxo diris al Haman: La argxento estas
transdonata al vi, kaj ankaux la popolo, por fari al gxi tion,
kio placxas al vi.
12 Kaj oni vokis la skribistojn de la regxo
en la unua monato, en gxia dek-tria tago, kaj oni skribis
konforme al cxiuj ordonoj de Haman al la satrapoj de la regxo,
kaj al la regionestroj, kiuj estis super cxiu regiono, kaj al la
princoj de cxiu popolo, en cxiun landon laux gxia skribmaniero
kaj al cxiu popolo en gxia lingvo; en la nomo de la regxo
Ahxasxverosx tio estis skribita kaj sigelita per la ringo de la
regxo.
13 Kaj oni sendis per kurieroj leterojn en cxiujn landojn
de la regxo, ke oni ekstermu, mortigu, kaj pereigu cxiujn Judojn,
de junulo gxis maljunulo, la infanojn kaj la virinojn, en unu
tago, en la dek-tria tago de la dek-dua monato, tio estas de la
monato Adar, kaj ilian havajxon oni disrabu.
14 Kopio de la
letero estis transdonota kiel legxo en cxiun landon kaj
proklamota al cxiuj popoloj, por ke ili estu pretaj al tiu tago.
15 La kurieroj eliris rapide kun la ordono de la regxo. La legxo
estis donita en la kastelurbo Sxusxan. La regxo kaj Haman
sidigxis, por drinki, sed la urbo Sxusxan estis konsternita.
Cxapitro 4
1 Kiam Mordehxaj eksciis cxion, kio farigxis, tiam Mordehxaj
dissxiris siajn vestojn, metis sur sin sakajxon kaj cindron,
eliris en la mezon de la urbo, kaj kriis per lauxta kaj maldolcxa
vocxo.
2 Kaj li venis gxis antaux la pordego de la regxo, cxar
estis malpermesite eniri en sakajxo en la pordegon de la regxo.
3 Kaj en cxiu lando, sur cxiu loko, kien venis la ordono de la
regxo kaj lia dekreto, estis granda malgxojo cxe la Judoj,
fastado, plorado, kaj gxemado; kaj multaj kusxis en sakajxo kaj
cindro.
4 Kaj venis la servistinoj de Ester kaj sxiaj euxnukoj,
kaj rakontis al sxi. Kaj la regxino forte konsternigxis. Kaj
sxi sendis vestojn, por vesti Mordehxajon kaj depreni de li la
sakajxon; sed li ne akceptis.
5 Kaj Ester alvokis Hatahxon, unu
el la euxnukoj de la regxo, kiun cxi tiu destinis por servado al
sxi, kaj sxi sendis lin al Mordehxaj, por ekscii, kio kaj pro kio
tio estas.
6 Hatahx eliris al Mordehxaj sur la urban placon, kiu
estis antaux la pordego de la regxo.
7 Kaj Mordehxaj rakontis al
li cxion, kio okazis al li, kaj pri la difinita sumo da mono,
kiun Haman promesis doni pese en la kason de la regxo pro la
Judoj, por ekstermi ilin.
8 Kaj kopion de la letera ordono, kiu
estis donita en Sxusxan, por ilin ekstermi, li donis al li, por
montri al Ester kaj sciigi al sxi, ordonante al sxi iri al la
regxo, por petegi lin pri sxia popolo.
9 Hatahx venis kaj
transdonis al Ester la vortojn de Mordehxaj.
10 Kaj Ester diris
al Hatahx, ordonante, ke li diru al Mordehxaj:
11 Cxiuj servantoj
de la regxo kaj la popolo en la landoj de la regxo scias, ke por
cxiu viro aux virino, kiu eniris al la regxo en la internan
korton ne vokite, ekzistas nur unu legxo, nome la morto, krom nur
en la okazo, se la regxo etendas al li sian oran sceptron--tiam
li restas vivanta; kaj mi ne estas vokita iri al la regxo jam de
tridek tagoj.
12 Kiam oni raportis al Mordehxaj la vortojn de
Ester,
13 tiam Mordehxaj sendis respondon al Ester: Ne pensu en
via animo, ke en la regxa domo vi savigxos sola el cxiuj Judoj.
14 Se vi silentos en cxi tiu tempo, tiam liberigo kaj savo venos
al la Judoj de alia loko; sed vi kaj la domo de via patro pereos.
Kaj kiu scias, cxu ne por tia tempo vi atingis regxinecon?
15
Tiam Ester diris, ke oni respondu al Mordehxaj:
16 Iru, kunvenigu
cxiujn Judojn, kiuj trovigxas en Sxusxan, fastu por mi, ne mangxu
kaj ne trinku dum tri tagoj, tage kaj nokte; ankaux mi kaj miaj
servistinoj fastos tiel same; poste mi iros al la regxo, kvankam
tio estas kontrauxlegxa; kaj se mi pereos, mi pereu.
17 Kaj
Mordehxaj iris, kaj faris cxion, kion komisiis al li Ester.
Cxapitro 5
1 En la tria tago Ester vestis sin regxe, kaj starigxis sur la
interna korto de la regxa domo, kontraux la domo de la regxo. La
regxo sidis sur sia regxa trono en la regxa domo, kontraux la
enirejo de la domo.
2 Kiam la regxo ekvidis la regxinon Ester,
starantan sur la korto, sxi trovis favoron en liaj okuloj, kaj la
regxo etendis al Ester la oran sceptron, kiu estis en lia mano;
tiam Ester aliris, kaj ektusxis la pinton de la sceptro.
3 Kaj
la regxo diris al sxi: Kio estas al vi, ho regxino Ester, kaj kia
estas via peto? se tio estas ecx duono de la regno, gxi estos
donita al vi.
4 Kaj Ester respondis: Se al la regxo placxas, la
regxo kune kun Haman venu hodiaux al la festeno, kiun mi faris
por li.
5 Tiam la regxo diris: Venigu plej rapide Hamanon, por
plenumi tion, kion diris Ester. Kaj la regxo kaj Haman venis al
la festeno, kiun faris Ester.
6 Kaj la regxo diris al Ester dum
la trinkado de vino: Kion vi petas? tio estos donita al vi; kaj
kia estas via deziro? gxis duono de la regno gxi estos plenumita.
7 Ester respondis kaj diris: Jen estas mia peto kaj deziro:
8 se
mi akiris favoron en la okuloj de la regxo, kaj se al la regxo
placxas plenumi mian peton kaj fari mian deziron, la regxo kun
Haman venu al la festeno, kiun mi faros por ili; kaj morgaux mi
faros, kion la regxo diris.
9 Haman eliris en tiu tago, gaja kaj
bonhumora. Sed kiam Haman ekvidis Mordehxajon cxe la regxa
pordego, kaj tiu ne levigxis kaj ne movigxis antaux li, tiam
Haman plenigxis de kolero kontraux Mordehxaj.
10 Tamen Haman
detenis sin, kaj iris hejmen. Kaj li sendis, kaj venigis al si
siajn amikojn kaj sian edzinon Zeresx.
11 Kaj Haman rakontis al
ili pri sia granda ricxeco, pri la multo de siaj filoj, kaj pri
cxio, per kio la regxo lin altigis kaj starigis lin super la
princoj kaj servantoj de la regxo.
12 Kaj Haman diris: Ecx la
regxino Ester invitis kun la regxo al la festeno, kiun sxi faris,
neniun krom mi; ankaux por morgaux mi estas invitita al sxi kun
la regxo.
13 Sed cxio cxi tio ne kontentigas min tiel longe,
kiel mi vidas, ke la Judo Mordehxaj sidas cxe la pordego de la
regxo.
14 Tiam diris al li lia edzino Zeresx kaj cxiuj liaj
amikoj: Oni pretigu arbon, havantan la alton de kvindek ulnoj,
kaj matene diru al la regxo, ke oni pendigu sur gxi Mordehxajon;
kaj poste iru gaje kun la regxo al la festeno. Tio placxis al
Haman, kaj li pretigis la arbon.
Cxapitro 6
1 En tiu nokto la regxo ne povis dormi; kaj li ordonis alporti la
memorajxan libron de la kronikoj, kaj oni legis ilin antaux la
regxo.
2 Kaj tie trovigxis skribite, kiel Mordehxaj raportis pri
Bigtan kaj Teresx, la du regxaj korteganoj el la sojlogardistoj,
kiuj intencis meti manon sur la regxon Ahxasxverosx.
3 Tiam la
regxo diris: Kian honoron kaj distingon oni faris pro tio al
Mordehxaj? Kaj la junuloj servistoj de la regxo respondis: Nenio
estas farita al li.
4 La regxo diris: Kiu estas sur la korto?
Dume Haman estis veninta sur la eksteran korton de la regxa domo,
por diri al la regxo, ke oni pendigu Mordehxajon sur la arbo,
kiun li pretigis por li.
5 La junuloj de la regxo diris al li:
Jen Haman staras sur la korto. Kaj la regxo diris: Li eniru.
6
Haman eniris. Kaj la regxo diris al li: Kion oni faru al tiu
homo, kiun la regxo deziras honori? Haman pensis en sia koro: Al
kiu la regxo povas deziri fari honoron krom mi?
7 Kaj Haman
diris al la regxo: Se al iu la regxo volas fari honoron,
8 oni
alportu regxan veston, kiun portis sur si la regxo, kaj cxevalon,
sur kiu rajdis la regxo, kiam sur lian kapon estis metita la
regxa krono;
9 oni donu la veston kaj la cxevalon en la manon de
unu el la plej eminentaj regxaj princoj, ke oni vestu la homon,
kiun la regxo deziras honori, kaj rajdigu lin sur la cxevalo sur
la strato de la urbo, kaj oni proklamadu antaux li: Tiele estas
farate al la homo, kiun la regxo volas honori.
10 Tiam la regxo
diris al Haman: Rapide prenu la veston kaj la cxevalon, kiel vi
diris, kaj agu tiel kun la Judo Mordehxaj, kiu sidas cxe la
pordego de la regxo; mankigu nenion el cxio, kion vi diris.
11
Haman prenis la veston kaj la cxevalon, kaj vestis Mordehxajon,
kaj rajdigis lin tra la strato de la urbo, kaj proklamadis antaux
li: Tiele estas farate al la homo, kiun la regxo volas honori.
12 Poste Mordehxaj revenis al la pordego de la regxo; kaj Haman
rapidis hejmen, malgxoja kaj kun kovrita kapo.
13 Haman rakontis
al sia edzino Zeresx kaj al cxiuj siaj amikoj cxion, kio okazis
al li. Kaj diris al li liaj sagxuloj kaj lia edzino Zeresx: Se
el la gento de la Judoj estas Mordehxaj, antaux kiu vi komencis
fali, vi nenion povas fari kontraux li, sed vi plue falos antaux
li.
14 Dum ili ankoraux parolis kun li, venis la euxnukoj de la
regxo kaj rapidigis Hamanon iri al la festeno, kiun pretigis
Ester.
Cxapitro 7
1 La regxo kaj Haman venis, por festeni cxe la regxino Ester.
2
Kaj ankaux en la dua tago, dum la trinkado de vino, la regxo
diris al Ester: Kion vi petas, ho regxino Ester? tio estos donita
al vi; kaj kia estas via deziro? gxis duono de la regno gxi estos
plenumita.
3 Tiam la regxino Ester respondis kaj diris: Se mi
trovis favoron en viaj okuloj, ho regxo, kaj se al la regxo
placxas, tiam mia vivo estu donacita al mi laux mia peto, kaj mia
popolo laux mia deziro;
4 cxar ni estas venditaj, mi kaj mia
popolo, por ekstermo, mortigo, kaj pereigo. Se ni almenaux estus
venditaj nur por esti sklavoj kaj sklavinoj, mi silentus, kvankam
la malamiko ne kompensus la malprofiton de la regxo.
5 Tiam la
regxo Ahxasxverosx diris al la regxino Ester: Kiu li estas kaj
kie li estas, tiu, kiu prenis en sian koron la kuragxon agi tiel?
6 Kaj Ester respondis: La malamanto kaj malamiko estas cxi tiu
malbona Haman. Kaj Haman ektremis antaux la regxo kaj la
regxino.
7 La regxo levigxis kolere de la vintrinkado, kaj iris
en la gxardenon de la palaco; sed Haman restis, por peti pri sia
vivo la regxinon Ester, cxar li vidis, ke la regxo destinis por
li malbonan sorton.
8 Kiam la regxo revenis el la palaca
gxardeno en la cxambron de la festeno, Haman estis falinta sur la
litbenkon, sur kiu sidis Ester. Tiam la regxo diris: Ecx
perforti la regxinon li volas cxe mi en la domo! La vorto eliris
el la busxo de la regxo, kaj oni kovris al Haman la vizagxon.
9
Hxarbona, unu el la euxnukoj antaux la regxo, diris: Jen ecx la
arbo, kiun Haman pretigis por Mordehxaj, kiu parolis bonon por la
regxo, staras en la domo de Haman; gxi havas la alton de kvindek
ulnoj. Tiam la regxo diris: Pendigu lin sur gxi.
10 Kaj oni
pendigis Hamanon sur la arbo, kiun li pretigis por Mordehxaj.
Kaj la kolero de la regxo kvietigxis.
Cxapitro 8
1 En tiu tago la regxo Ahxasxverosx transdonis al la regxino
Ester la domon de Haman, la malamiko de la Judoj; kaj Mordehxaj
venis antaux la regxon, cxar Ester diris, kio li estas por sxi.
2 Kaj la regxo deprenis sian ringon, kiun li forprenis de Haman,
kaj donis gxin al Mordehxaj; kaj Ester starigis Mordehxajon super
la domo de Haman.
3 Kaj Ester plue parolis antaux la regxo, kaj
jxetis sin antaux liajn piedojn, kaj ploris kaj petegis lin, ke
li neniigu la malbonajxon de Haman, la Agagido, kaj lian planon,
kiun li entreprenis kontraux la Judoj.
4 La regxo etendis al
Ester sian oran sceptron, kaj Ester levigxis kaj starigxis antaux
la regxo.
5 Kaj sxi diris: Se al la regxo placxas, kaj se mi
trovis favoron antaux li, se la afero sxajnas al li gxusta, kaj
se li havas simpation por mi: tiam estu skribate, ke oni revoku
la leterojn, kiujn elpensis Haman, filo de Hamedata, la Agagido,
kaj kiujn li skribis, por ekstermi la Judojn, kiuj trovigxas en
cxiuj landoj de la regxo;
6 cxar kiel mi povus vidi la
malfelicxon, kiu trafas mian popolon? kaj kiel mi povus vidi la
pereon de miaj samgentanoj?
7 Tiam la regxo Ahxasxverosx diris
al la regxino Ester kaj al la Judo Mordehxaj: Jen la domon de
Haman mi transdonis al Ester, kaj lin mem oni pendigis sur arbo,
pro tio, ke li metis sian manon sur la Judojn;
8 skribu do pri la
Judoj en la nomo de la regxo tion, kio placxas al vi, kaj sigelu
per la regxa ringo; cxar leteron, skribitan en la nomo de la
regxo kaj sigelitan per la regxa ringo, oni ne povas revoki.
9
Kaj oni vokis la skribistojn de la regxo en tiu tempo, en la tria
monato, tio estas en la monato Sivan, en gxia dudek-tria tago;
kaj oni skribis cxion tiel, kiel ordonis Mordehxaj, al la Judoj,
al la satrapoj, al la regionestroj, kaj al la princoj de la
landoj, kiuj estis de Hindujo gxis Etiopujo, cent dudek sep
landoj, al cxiu lando laux gxia skribmaniero kaj al cxiu popolo
en gxia lingvo, ankaux al la Judoj laux ilia skribmaniero kaj en
ilia lingvo.
10 Li skribigis en la nomo de la regxo
Ahxasxverosx, kaj sigelis per la regxa ringo, kaj sendis per
rajdantaj kurieroj sur bone kurantaj bonrasaj cxevaloj leterojn
pri tio,
11 ke la regxo permesas al la Judoj en cxiuj urboj
kolektigxi kaj starigxi, por defendi sian vivon, ekstermi,
mortigi, kaj pereigi cxiujn fortulojn de la popolo kaj de la
lando, kiuj atakos ilin, la infanojn, kaj la virinojn, kaj
disrabi ilian havajxon,
12 en la dauxro de unu tago en cxiuj
landoj de la regxo Ahxasxverosx, en la dek-tria tago de la dek-
dua monato, tio estas de la monato Adar;
13 ke oni donu kopion de
cxi tiu ordonletero kiel legxon, proklamotan al cxiuj popoloj,
kaj ke la Judoj estu pretaj por tiu tago, por vengxi al siaj
malamikoj.
14 La kurieroj, rajdantaj sur bonrasaj cxevaloj,
elrajdis tuj kaj rapide kun la ordono de la regxo. La legxo
estis donita en la kastelurbo Sxusxan.
15 Mordehxaj eliris de la
regxo en regxa vesto el blua kaj blanka sxtofo, kun granda ora
krono, kaj en mantelo bisina kaj purpura. Kaj la urbo Sxusxan
gxojkriis kaj estis gaja.
16 Cxe la Judoj estis lumo kaj gxojo,
gajeco kaj triumfo.
17 Kaj en cxiu lando kaj en cxiu urbo, sur
cxiu loko, kien atingis la ordono kaj dekreto de la regxo, estis
cxe la Judoj gxojo kaj gajeco, festeno kaj festo. Kaj multaj
homoj el la popoloj de la lando farigxis Judoj, cxar falis sur
ilin timo antaux la Judoj.
Cxapitro 9
1 En la dek-dua monato, tio estas en la monato Adar, en gxia dek-
tria tago, kiam venis la tempo de plenumo de la regxa ordono kaj
dekreto--en la tago, kiam la malamikoj de la Judoj esperis
superforti ilin--la afero turnigxis, kaj la Judoj superfortis
siajn malamikojn.
2 La Judoj kolektigxis en siaj urboj en cxiuj
landoj de la regxo Ahxasxverosx, por etendi la manon kontraux
siajn malbondezirantojn; kaj neniu povis kontrauxstari al ili,
cxar timo antaux ili falis sur cxiujn popolojn.
3 Kaj cxiuj
landestroj, satrapoj, regionestroj, kaj oficistoj de la regxo
favoris la Judojn, cxar falis sur ilin timo antaux Mordehxaj.
4
Cxar Mordehxaj estis granda en la domo de la regxo, kaj la famo
pri li iris tra cxiuj landoj, cxar la viro Mordehxaj farigxadis
cxiam pli kaj pli granda.
5 Kaj la Judoj batis cxiujn siajn
malamikojn, frapante per glavo, mortigante kaj ekstermante, kaj
ili faris al siaj malamikoj, kion ili volis.
6 En la kastelurbo
Sxusxan la Judoj mortigis kaj pereigis kvincent homojn;
7 ankaux
Parsxandatan, Dalfonon, Aspatan,
8 Poratan, Adaljan, Aridatan,
9
Parmasxtan, Arisajon, Aridajon, kaj Vajzatan,
10 la dek filojn de
Haman, filo de Hamedata kaj persekutanto de la Judoj, ili
mortigis; sed sur la havajxon ili ne metis sian manon.
11 En la
sama tago la nombro de la mortigitoj en la kastelurbo Sxusxan
estis raportita al la regxo.
12 Kaj la regxo diris al la regxino
Ester: En la kastelurbo Sxusxan la Judoj mortigis kaj pereigis
kvincent homojn kaj ankaux la dek filojn de Haman; kion ili faris
en la ceteraj regionoj de la regxo? Kion vi petas? tio estos
donita al vi; kion vi ankoraux deziras? tio estos plenumita.
13
Ester respondis: Se al la regxo placxas, estu permesite al la
Judoj en Sxusxan ankaux morgaux fari tion saman, kion hodiaux,
kaj la dek filojn de Haman oni pendigu.
14 Kaj la regxo diris,
ke oni faru tiel. Kaj estis donita dekreto pri tio en Sxusxan,
kaj la dek filojn de Haman oni pendigis.
15 La Judoj, kiuj estis
en Sxusxan, kolektigxis ankaux en la dek-kvara tago de la monato
Adar, kaj mortigis en Sxusxan tricent homojn; sed sur la havajxon
ili ne metis sian manon.
16 Ankaux la ceteraj Judoj, kiuj estis
en la landoj de la regxo, kolektigxis kaj starigxis, por defendi
sian vivon kaj por akiri trankvilecon antaux siaj malamikoj, kaj
ili mortigis el siaj malamikoj sepdek kvin mil, sed sur la
havajxon ili ne metis sian manon.
17 Tio estis en la dek-tria
tago de la monato Adar. Kaj en gxia dek-kvara tago estis ripozo,
kaj oni faris gxin tago de festeno kaj de gajeco.
18 Sed la
Judoj, kiuj estis en Sxusxan, kolektigxis en la dek-tria kaj en
la dek-kvara tagoj; ripozo estis en la dek-kvina tago, kaj ili
faris gxin tago de festeno kaj de gajeco.
19 Tial la Judoj, kiuj
logxas en logxlokoj kaj urboj ne fortikigitaj, faras la dek-
kvaran tagon de la monato Adar tago de gxojo kaj de festeno,
festotago, kaj ili sendas donacojn unuj al aliaj.
20 Mordehxaj priskribis cxiujn tiujn okazintajxojn, kaj sendis
leterojn al cxiuj Judoj, kiuj estis en cxiuj landoj de la regxo
Ahxasxverosx, la proksimaj kaj la malproksimaj,
21 ke ili akceptu
por si, ke ili festados cxiujare la dek-kvaran tagon de la monato
Adar kaj gxian dek-kvinan tagon,
22 kiel tagojn, en kiuj la Judoj
ricevis trankvilecon kontraux siaj malamikoj, kaj kiel monaton,
kiu turnis por ili malgxojon en gxojon, funebron en feston; ke
ili faradu ilin tagoj de festeno kaj de gajeco, de sendado de
donacoj unuj al aliaj kaj de donacado al malricxuloj.
23 Kaj la
Judoj akceptis tion, kion ili jam mem komencis fari kaj pri kio
skribis al ili Mordehxaj.
24 Cxar Haman, filo de Hamedata, la
Agagido, kaj malamiko de cxiuj Judoj, intencis pereigi la Judojn
kaj jxetis pur'on, tio estas loton, por ekstermi kaj pereigi
ilin;
25 sed kiam sxi venis antaux la regxon, cxi tiu ordonis
skribe, ke lia malbona entrepreno, kiun li preparis por la Judoj,
turnigxu sur lian kapon; kaj ke oni pendigu lin kaj liajn filojn
sur arbo.
26 Pro tio oni donis al tiuj tagoj la nomon Purim,
laux la vorto _pur_. Tial, konforme al cxiuj vortoj de tiu
letero, kaj al tio, kion ili mem vidis koncerne tion kaj kio
trafis ilin,
27 la Judoj decidis kaj akceptis por si, por sia
idaro, kaj por cxiuj, kiuj aligxos al ili, ke ili nepre festados
tiujn du tagojn laux la preskribo kaj en la difinita tempo
cxiujare.
28 Tiuj tagoj devas esti memorataj kaj festataj en
cxiuj generacioj, en cxiu familio, en cxiu lando, kaj en cxiu
urbo; kaj tiuj tagoj de Purim ne devas esti forigitaj cxe la
Judoj, kaj la memoro pri ili ne devas malaperi inter ilia idaro.
29 Kaj la regxino Ester, filino de Abihxail, kaj la Judo
Mordehxaj skribis kun plena insisto, ke oni plenumu tiun duan
leteron pri Purim.
30 Kaj ili sendis leterojn al cxiuj Judoj en
la cent dudek sep landojn de la regno de Ahxasxverosx, kun vortoj
de paco kaj de vero,
31 ke ili festadu tiujn tagojn de Purim en
ilia tempo, kiel decidis pri ili la Judo Mordehxaj kaj la regxino
Ester, kaj kiel ili mem akceptis por si kaj por sia idaro
koncerne la fastadon kaj pregxadon.
32 Kaj laux la ordono de
Ester oni konfirmis tiun historion de Purim kaj enskribis en
libron.
Cxapitro 10
1 La regxo Ahxasxverosx metis sub tributon la teron kaj la
insulojn de la maro.
2 La tuta historio pri lia forto kaj lia
potenco, kaj la detaloj pri la grandeco de Mordehxaj, kiun la
regxo grandigis, estas priskribitaj en la libro de kroniko de la
regxoj de Medujo kaj Persujo.
3 Cxar la Judo Mordehxaj estis la
dua post la regxo Ahxasxverosx, granda inter la Judoj kaj amata
inter la multo de siaj fratoj, zorganta pri la bono de sia popolo
kaj donanta pacon al sia tuta idaro.
HTML-igita de Stefano KALB
Lasta aktualigo: jxauxdon la 27-an de januaro 2000 je 15.31 GMT
