Inauguraçom da nossa página web.

 

  Está já em funcionamento a nossa página na internet em:

 

  www.geocities.com/comunistasdeconselhos

 

  Esta página constitue-se como órgao nom só de Comunistas Revolucionári@s (Autonomia Obreira), mas tamém do projecto de desenvolver o Grupo de Comunistas de Conselhos da Galiza.

  O Grupo de Comunistas de Conselhos pretende ser umha forma flexível e plural de agrupar a todos os grupos e indivíduos interessados na difusom e actualizaçom teorico-prática das ideas do comunismo de conselhos e, por suposto, do marxismo original do que o comunismo de conselhos é a expressom política mais avançada. Nom pretendemos pois, baixo nengum conceito, circunscrever o Grupo de Comunistas de Conselhos ao nosso próprio programa, e tampouco monopolizar essa denominaçom. Embora, em qualquer caso a defenderemos frente a usurpaçons ou omissons^*.

  Na nossa página inclue-se um arquivo de textos que iremos ampliando, umha grande parte traduçons próprias. Este arquivo é fundamentalmente bilingüe em galego-português e espanhol, dado que a maioria dos textos estám disponhíveis em inglês ou alemám e -dentro do que está nas nossas possibilidades- compre somentes traduzi-los a estes idiomas. Deste modo, o nosso objetivo, dadas as condiçons de ausência de outros grupos similares no resto da área peninsular, é actuar como difussores das ideas do comunismo de conselhos em toda esta área em primeiro lugar, porque consideramos que é fundamental para a luita política contra o Estado espanhol. Neste sentido, queda claro que a nossa prática nom é "separatista", senom profundamente internacionalista, porque nem a revoluçom proletária galega, nem as revoluçons proletárias das outras fracçons nacionais do proletariado que estám submetidas ao Estado espanhol, podem desenvolver-se e triunfar sem a destruiçom completa e radical deste Estado, reempraçando-o por umha livre associaçom do proletariado internacional de todas as naçons. Tampouco é separável esta luita da autolibertaçom d@s noss@s irmaos e irmás portugueses, pola proximidade territorial e a interconexom económica co capitalismo espanhol.

  Por outra banda, tamém consideramos preciso difundir as ideas do comunismo de conselhos na área latino-americana, tanto lusófona como hispánica, de tal modo que coa nossa focage cubrimos um amplo espectro de influência. Que assumamos um trabalho tam ambicioso nom é para nós umha eleiçom livre; é a força da situaçom da nossa classe, e o convencimento de que a acçom nacional isolada está condeada ao fracasso e à debilidade, o que nos obriga a assumir este papel como proletári@s e comunistas.

  Co tempo pensamos tamém fazer traduçons dos artigos do Ígneo ao espanhol e o inglês, para difundi-los e establecer discussons internacionalmente com outros grupos de todo o mundo. Considerem-se as traduçons publicadas neste número do Ígneo como umha contribuiçom desde Galiza a esse processo internacionalista.

 

 

* A modo de exemplo de "omissons", podemos aproveitar para sinalar duas, causados pola ignoráncia profunda de aqueles/as que publicam textos tam mal traduzidos que resultam em total contradiçom co pensamento global do autor. Isto é o que acontece no fragmento de "Revoluçom mundial e táctica comunista" de Antom Pannekoek, entitulado "A força contra-revolucionária dos sindicatos" e publicado por Primeira Linha na sua página web. Este fragmento tem umha parte completamente tergiversada, um erro que já está na versom portuguesa (de onde procede de seguro), e que pode lêr-se na sua redaçom auténtica numha cita ao final do artigo "Contra o sindicalismo combativo" no boletim Igneo nº1. Para qualquer dúvida ao respeito, dispóm-se da versom inglesa no arquivo marxista na internet (www.marxists.org).

 

  Outra omissom de que temos conhecimento é a publicaçom em Galiza-Livre dum texto de Robert Kurz, o ex-lider do grupo Krisis -grupo de ideologia anti-trabalho-, no que semelha que ve na supressom do automóbil um factor na fim do capitalismo. Segundo quem comenta este artigo, resulta que o Sr. Kurz é um membro dum "grupo de comunistas de conselhos" português. Isto é completamente falso. Além, existia um tal grupo em Lisboa, mas este foi absorvido pola ideologia do grupo Krisis, que significa umha ruptura fundamental co comunismo de conselhos. Por isso a página do tal grupo está práticamente morta e foi reempraçada práticamente pola página do projecto denominado EXIT. Nom temos lido nem pensamos lêr esse artigo do Sr. Kurz, pois já temos estudado numerossos textos do grupo Krisis ou dos seus membros, co qual a nossa posiçom está bem fundamentada.