- A revoluçom nom se fará sem as mulheres -

Suplemento boletim Igneo num.2

 

 

Indice

 

Apresentaçom - Comunistas Revolucionári@s

 

economia política da libertaçom das mulheres - Margaret Benston

 

as mulheres e o mito do consumismo  - Ellen Willis

 

Apresentaçom

  Publicamos aquí dous textos históricos do movimento de libertaçom das mulheres americanas que consideramos lúcidos e de grande actualidade, a pesar da data da sua redaçom e de que em certos aspectos  secundários tenham quedado algo atrasados.

  Nos anos 60-70 produziu-se um ascenso internacional nom só da luita de classes, mas tamém da luita das mulheres. O esgotamento do capitalismo, as crescentes dificuldades para lograr reformas, o nível de vida crescente, motivaram um ciclo de luitas sociais contra as múltiples formas de opressom existentes, mas que tamém estivera marcado pola persistência das ilusons reformistas. A luita das mulheres rematou, deste modo, fundamentalmente numha conquista da igualdade jurídica e política formal cos homes. Nom existiam todavia as condiçons necessárias para que se delineasse claramente a contradiçom de interesses que enfrentava às mulheres implicadas no movimento: o antagonismo entre os interesses das mulheres que estabam em processo de proletarizaçom e eram de extracçom social proletária, e os interesses das mulheres em ascenso na burguesia e de extracçom burguesa, que aspiravam à oportunidade de converter-se em explotadoras, ter o seu próprio negócio individual ou trabalhar por conta própria[i]. Este conflito somentes puido fazer-se claro a posteriori, quando, para as mulheres proletárias ou em vias de proletarizar-se, demonstrou-se práticamente que a chamada “libertaçom da mulher” nom fora mais que umha revoluçom feminista burguesa, e que os problemas da explotaçom doméstica, do desemprego, da discriminaçom e segregaçom laborais, da opressom sexista em geral, nom só nom se aboliram, senom que incluso se tenderam a intensificar, baixo novas formas, paralelamente ao processo de degradaçom geral do trabalho assalariado: a crescente mercantilizaçom e cosificaçom da mulher, a imposiçom da necessidade de assumir os piores trabalhos para manter a família, a geralizaçom e normalizaçom da dupla jornada, a multiplicaçom da alienaçom feminina pola combinaçom dos rasgos patriarcais e os rasgos capitalistas do trabalho alienado, etc., etc..

  A vigência dos seguintes artigos, "A economia política da libertaçom das mulheres" e "As mulheres e o mito do consumismo", reside em que as suas autoras, apesar dos seus limites intrínsecos e históricos, possuiram a profundidade necessária para orientarem-se cara umha análise da situaçom total da mulher como umha situaçom de explotaçom. Por isso, a sua perspectiva é claramente proletária e revolucionária, a diferência de toda a verborrea do feminismo burguês e pequenoburguês, que únicamente defende o programa do velho igualitarismo burguês baixo umha forma mais radical, pretendendo futilmente que a libertaçom das mulheres poda realizar-se dentro do capitalismo ou exteriormente à luita de classes entre capital e trabalho, fomentando umha identidade inteclassista entre as mulheres trabalhadoras (isso si, umha identidade "na diferência", rendindo culto à psicologia feminina alienada produzida por séculos de explotaçom e convertindo as diferências entre os sexos em umha fonte de divisons e num novo tabú).

  O ponto de vista destes textos é o do reconhecimento das mulheres como trabalhadoras alienadas que devem luitar, para libertar-se da sua explotaçom, contra a dupla explotaçom da familia e do capital. Hoje, umha vez visto que a situaçom de opressom no marco familiar continua -independentemente do carácter mais "patriarcal" ou mais "liberal" da família-, a causa da exclusom do mercado de trabalho e das necessidades económicas da vida familiar, a conclusom lógica a tirar é que o capital é o principal interessado em manter esta situaçom. Pola sua parte, os proletários somentes participam desta opressom na medida em que actuam como parte do próprio capital, como componhentes económicos da máquina produtiva, sem constituir-se em classe oposta aos interesses do capital. A ilusom de que o trabalho gratuito das mulheres no fogar benefícia aos trabalhadores dissipa-se quando se atende à extensom crescente da jornada laboral e à reduçom dos salários, que assume como base essa explotaçom do trabalho doméstico, igual que quando se atende ao facto de que as mulheres seguem a ocupar amplamente os empregos a tempo parcial e a aceitar os trabalhos pior pagos, mantendo-se assi a sua dupla jornada.

  Todo isto somentes pode explicar-se porque a família actual, independentemente da sua forma exterior -mais patriarcal ou mais liberal-, está integrada económicamente dentro do próprio modo de produçom capitalista, e o trabalho alienado no fogar transforma-se, através do trabalho assalariado do home e dos filh@s, numha fonte suplementar de plusvalor que se apropriam @s capitalistas. Deste modo, nas mulheres proletárias se encontra condensada a dupla forma de explotaçom, assi como o carácter dual que assume o trabalho alienado dentro de cada umha dessas formas -explotaçom de gênero e explotaçom de classe-. Pois nom só o trabalho do fogar é explotado polo marido (formalmente) e polo capital (efectivamente), tamém o trabalho assalariado feminino assume em geral características de género, está "generizado". Por esta razom a luita das mulheres proletárias tende a assumir umha perspectiva de totalidade e um carácter radical e revolucionário, apesar de sofrer um maior grao de alienaçom; por isso, umha vez aberto o seu processo de autolibertaçom, as mulheres tenderám a situar-se à vanguarda do movimento revolucionário do futuro, que somentes poderá prosperar combatindo todas as formas de explotaçom e dominaçom que integra o capital[ii].  

  A revoluçom feminista proletária está ainda por fazer, e será umha parte indissolúvel da transformaçom comunista da sociedade. O verdadeiro comunismo significa a libertaçom completa das mulheres. Sem a libertaçom total das mulheres trabalhadoras, e com elas a libertaçom de todo o sexo feminino da sua condiçom de género, nom pode haver verdadeiro comunismo.

Comunistas Revolucionári@s

 

 

A ECONOMIA POLÍTICA DA LIBERTAÇOM DAS MULHERES

Margaret Benston

"A situaçom das mulheres descansa, como tudo na nossa complexa sociedade, sobre umha base económica" - Eleanor Marx e Edward Aveling

  A "questom da mulher" é geralmente ignorada na análise da estrutura de classes da sociedade. Isto ocorre porque, por umha banda, definem-se em geral as classes segundo a sua relaçom cos meios de produçom, e pola outra nom se considera que as mulheres tenham umha relaçom única cos meios de produçom. É umha categoria que parece extender-se através de todas as classes; fala-se de mulheres obreiras, mulheres de classe meia, etc.. O status das mulheres é francamente inferior ao dos homes, mas a análise desta situaçom formula-se em geral em discusons sobre socializaçom, psicologia, relaçons interpersoais ou o papel do matrimónio como instituçom social. Mas som estes os factores primários? Se se sustém que as raízes do status secundário das mulheres som em realidade económicas, é possível demonstrar que as mulheres como grupo tenhem em realidade umha relaçom específica cos meios de produçom e que esta relaçom é distinta da dos homes. Os factores persoais e psicológicos derivam entom desta relaçom especial coa produçom, e umha modificaçom desta última é umha condiçom necessária (mas nom suficiente) para modificar os primeiros. Se se aceita a realidade desta relaçom especial das mulheres ca produçom, a análise da situaçom das mulheres encaixa naturalmente na análise de classes da sociedade.

  O ponto de partida da análise das classes numha sociedade capitalista é a distinçom entre os que posuem os meios de produçom e os que vendem a sua força de trabalho por um salário. como di Ernest Mandel:

  "A condiçom proletária é, em poucas palavras, umha falta de acesso aos meios de produçom ou meios de subsistência, o que, numha sociedade de produçom geralizada de mercadorias, obriga ao proletário a vender a sua força de trabalho. A cámbio da sua força de trabalho recebe um salário que lhe permite, entom, adquirir os meios de subsistência necessários para a satisfacçom das suas próprias necessidades e das da sua família".

  Esta é a definiçom estrutural do que trabalha por um salário, o proletário. Disto deriva certa relaçom co seu trabalho, cos produtos do seu trabalho, e em geral coa sua situaçom na sociedade, que pode resumir-se numha palavra: alienaçom. Mas desta definiçom estrutural nom cabe tirar conclusons a respeito do nível do seu consumo... a amplitude das suas necessidades ou o grao em que as pode satisfazer.

  Nom temos umha definiçom estrutural correspondente das mulheres. O que em primeiro termo precisamos nom é um exame completo dos síntomas do status secundário das mulheres, senom umha aclaraçom das condiçons materiais nas sociedades capitalistas (e doutro tipo) que definem o grupo "mulheres". Sobre essas condiçons construem-se as superestruturas específicas que conhecemos. Umha interessante passage de Mandel sinala o caminho:

  "A mercadoria... é um produto criado para ser cambiado no mercado, em contraposiçom a outro criado para o consumo directo. Toda mercadoria tem que possuir à vez um valor de uso e um valor de cámbio."

  Tem que ter um valor de uso: em caso contrário ninguém a mercaria... Umha mercadoria sem valor de uso para ninguém, seria inusável, umha produçom inutil, nom teria valor de cámbio precisamente por nom ter valor de uso.

  Por outra parte , todo produto que tem valor de uso nom possue necessáriamente valor de cámbio. Só tem valor de cambio na medida em que a sociedade na que a mercadoria é produzida está fundada no cámbio, é umha sociedade onde o cámbio é umha prática corrente...

  Na sociedade capitalista a produçom de mercadorias ou de valores de cámbio acadou o seu máximo desenvolvimento. É a primeira sociedade na história da humanidade na que a maior parte da produçom consiste em mercadorias. Nom é verdade, sem embargo, que toda a produçom no capitalismo seja produçom mercantil. Duas classes de produtos seguem a ser somentes valores de uso.

  O primeiro grupo compreende todas as cousas produzidas polos labregos para o seu próprio consumo, tudo o directamente consumido nas fazendas rurais onde é produzido...

  O segundo grupo de produtos na sociedade capitalista que nom som mercadorias, senom que seguem a ser somentes valores de uso, compreende todas as cousas produzidas no fogar. Pese ao facto de que umha considerável quantidade de trabalho humano aplica-se a este tipo de produçom doméstica, segue a ser umha produçom de valores de uso e nom de mercadorias. Cada vez que se prepara umha sopa ou se cose um botom numha roupa, trata-se de produçom, mas nom de produçom para o mercado.

  Ao aparecer a produçom mercantil, e logo ao regularizar-se e geralizar-se, o modo de trabalhar dos homes e o seu modo de organizar a sociedade tranformaram-se radicalmente.

  Se quadra Mandel nom advertiu que este último parágrafo é justamente correcto. A apariçom da produçom de mercadorias transformou efectivamente o modo em que os homes trabalham. Tal como o sinala, a maior parte do trabalho doméstico na sociedade capitalista (e, em quanto a este ponto, nas sociedades socialistas existentes[iii]) prosegue na etapa anterior ao mercado. Este é o trabalho reservado às mulheres, e é neste facto onde podemos encontrar a base dumha definiçom das mulheres.

  Como mera quantidade, o trabalho do fogar, inclusive o coidado dos nenos, constitue umha enorme suma de produçom socialmente necessária. Nom obstante, numha sociedade na que impera a produçom de mercadorias, nom é geralmente considerado "verdadeiro trabalho", posto que está fora do comércio e da praça do mercado. É precapitalista num sentido mui real. A atribuçom do trabalho doméstico como funçom dumha categoria especial ("mulheres") significa que esse grupo encontra-se efectivamente frente à produçom numha relaçom diferente da do o grupo "homes". Tentaremos definir às mulheres, polo tanto, como grupo de persoas que som responsáveis pola produçom de simples valores de uso naquelas actividades associadas co fogar e a família.

  Posto que os homes nom tenhem responsabilidade algumha por dita produçom, a diferência entre os dous grupos encontra-se aqui. Observe-se que as mulheres nom estám excluidas da produçom de mercadorias. A sua participaçom no trabalho assalariado pode dar-se, mas como grupo nom tenhem umha responsabilidade estrutural nessa área e essa participaçom considera-se habitualmente transitória. Os homes, por outra banda, som responsáveis pola produçom de mercadorias; nom tenhem em princípio nengum papel no trabalho do fogar. Por exemplo, quando participam na produçom doméstica, esta participaçom considera-se mais que simplesmente exceiçoal, é desmoralizante, afeminante, até perjudicial para a saúde. Umha nota na primeira página do Vancouver Sun, em Janeiro de 1969, sustinha que os homes na Grande Bretanha viam a sua saúde em perigo porque tinham que fazer demasiado trabalho doméstico.

  A base material do status inferior das mulheres está justamente nesta definiçom. Numha sociedade na que o dinheiro determina o valor[iv], as mulheres som um grupo que trabalha fóra da economia monetária. O seu trabalho nom vale dinheiro, logo nom tem valor, e polo tanto nem sequer é trabalho de verdade. As mesmas mulheres que fam esse trabalho sem valor, cabe esperar que valgam menos que os homes, que trabalham por dinheiro. Em termos estruturais, o mais semelhante à condiçom das mulheres é a de outros que se encontram igualmente fóra da produçom de mercadorias, isto é, servos e labregos.

  No seu trabalho recente sobre as mulhers, Juliet Mitchell empeça a sua exposiçom do jeito seguinte:

"Na sociedade industrial avançada, o trabalho das mulheres é só marginal frente à economia total. Contudo, é polo trabalho que o home transforma as condiçons naturais e assi cria a sociedade. Até que aconteza umha revoluçom na produçom, a situaçom laboral determinará a situaçom das mulheres dentro do mundo dos homes".

A declaraçom da marginalidade do trabalho das mulheres é um reconhecimento nom analisado de que o trabalho que fam as mulheres é diferente do trabalho que fam os homes. Dito trabalho nom é, contudo, marginal; somentes nom é trabalho assalariado e, polo tanto, nom é computado. Chega até dizer, na mesma nota:

"O trabalho doméstico ainda hoje é enorme, se se computa em termos de labor produtiva."

Da algumhas cifras como ilustraçom: em Suécia, 2340 milhons de horas por ano som dedicadas polas mulheres a trabalhos domésticos, mentres na indústria as mulheres trabalham 1290 milhons de horas. E o Banco Chase Manhattan calcula o trabalho semanal total da mulher em 99,6 horas. Sem embargo, Mitchell nom destaca os factores económicos básicos (em realidade censura à meirande parte dos marxistas por destacar demasiado os aspectos económicos) e passa rápidamente aos factores superestruturais porque lhe parece que "o advenimento da industrializaçom até o presente nom libertou às mulheres". O que se lhe escapa é que, até agora, nengumha sociedade industrializou o trabalho doméstico. Engels sinala que

"a primeira premisa para a emancipaçom das mulheres é a reintroduçom de todo o sexo feminino na indústria pública... E isto voltou-se possível como resultado da indústria moderna a grande escala que nom só permite a participaçom dum grande número de mulheres na produçom, senom que a esige e ademais tende cada vez mais a converter o trabalho doméstico privado numha indústria pública".[v]

E mais adiante:

"Já podemos ver aquí que a emancipaçom das mulheres e a sua igualdade cos homes som impossíveis e seguira-no sendo mentres as mulheres fiquem excluidas do trabalho socialmente produtivo e limitadas ao trabalho doméstico, que é privado".

  O que Mitchell nom tivo em conta é que o problema nom é singelamente a introduçom das mulheres na produçom industrial existente, senom o mais complexo de converter a produçom privada do trabalho doméstico em produçom pública.

  Para a maior parte dos norte-americanos, o trabalho doméstico como "produçom pública" sugire imediatamente images de Um mundo feliz ou dumha vasta instituiçom -umha mestura de assilo de orfos e quartel do exército- onde se estaria obrigado a viver. Por este motivo é preferível expôr esquemáticamente aquí a natureza da industrializaçom.

  Umha unidade de produçom preindustrial é aquela em que a produçom realiza-se a pequena escala e é reduplicada[vi]. Hai um grande número de pequenas unidades, cada umha completa e igual às demais. Geralmente estas unidades de produçom tenhem por base as relaçons familiares e som de finalidade múltiple, cumprindo funçons religiosas, recriativas, educativas e sexuais à vez que a funçom económica. Numha situaçom semelhante os atributos desejáveis num indivíduo, os que dam prestígio, som apreçados segundo critérios que nom som puramente económicos: por exemplo, entre os rasgos de carácter mais estimados encontram-se umha conduta correcta cos parentes ou a boa disposiçom para cumprir as obrigas.

  Semelhante produçom nom está destinada origináriamente ao intercámbio. Mas se o intercámbio de mercadorias volta-se bastante importante, entom fai-se necessária umha maior eficiência na produçom. Esta eficiência obtem-se coa transiçom cara a produçom industrializada, que implica a eliminaçom da unidade baseada na relaçom familiar. Umha unidade de produçom a grande escala e nom reduplicativa toma o seu lugar, cumha soa funçom, a económica, e na qual o prestígio -o status- obtem-se por meio da habilidade económica. A produçom é racionalizada, volta-se mais eficiente, e fai-se cada vez mais pública: é parte dumha rede social integrada. Tem lugar, entom, umha enorme expansom da potencialidade produtiva do home. No capitalismo estas forças produtivas sociais utilizam-se quase exclusivamente em benefício privado. Estas podem considerar-se formas de produçom capitalizadas.

  Se aplicamos o que acabamos de analisar ao trabalho doméstico e à criança dos nenos, é evidente que cada família, cada fogar, constitue umha unidade de produçom individual, umha entidade preindustrial, do mesmo modo que o labrego ou os fiandeiros a domicílio representam unidades de produçom preindustriais. As principais características som evidentes, xurdindo como as mais importantes o trabalho reduplicativo, de base familiar, e natureza privada. É interessante destacar as outras características: as múltiples funçons da família, o facto de que os atributos desejáveis para as mulheres nom estejam centrados na habilidade económica, etc.. A racionalizaçom da produçom através da transiçom à produçom a grande escala nom tivo lugar nesta área.

  A industrializaçom é, em si mesma, umha grande força para o bem da humanidade; a explotaçom e a deshumanizaçom acompanham ao capitalismo, mas nom necessáriamente à industrializaçom. Pretender a  conversom do trabalho doméstico privado numha indústria pública, baixo o capitalismo, é algo mui distinto a pretender essa conversom numha sociedade socialista. Neste último caso, as forças de produçom obrariam em favor do bem-estar humano, nom do lucro privado, e o resultado seria a libertaçom, nom a deshumanizaçom. Poderiamos entom falar de formas socializadas de produçom.

  Estas definiçons nom pretendem ser técnicas, senom establecer a diferência entre dous importantes aspectos da industrializaçom. O medo de que resultara algo semelhante a um quartel se se introduzisse o trabalho doméstico na economia pública seria realista baixo o capitalismo. Mas cumha produçom socializada, a eliminaçom do interesse polo lucro e o trabalho alienado que lhe corresponde nom hai razom algumha para que, numha sociedade industrializada, a industrializaçom do trabalho doméstico nom redundara numha melhor produçom, é dizer, melhor alimentaçom, ambientes mais confortáveis, coidado dos nenos mais inteligente e carinhoso, etc., que na actual família nuclear.

  A miúdo sustem-se que, co neocapitalismo, o trabalho da casa reduziu-se muito. Ainda que isto é certo, nom é estruturalmente relevante. Exceito as mui ricas, que podem pagar alguém para faze-lo, hai para a maioria das mulheres um mínimo irreduzível de trabalho necessário implicado no coidado da casa, do marido e dos filhos. Para umha mulher casada sem filhos este mínimo irreduzível de trabalho provávelmente significa de 15 a 20 horas semanais; para umha mulher com filhos pequenos o mínimo e provávelmente de 70 a 80 horas semanais. Hai certa resistência a considerar o coidado dos filhos como um emprego. Que hai trabalho, é dizer, produçom de valor de uso, fai-se mui evidente quando implica valor de cámbio: quando o trabalho é realizado por babysitters, enfermeiras, centros de coidado das crianças ou por mestras. Um economista já sinalou o paradoxo de que se um home casa cum ama de chaves reduz o ingresso nacional, pois o dinheiro que lhe da já nom se computa como salário. A reduçom do trabalho doméstico ao mínimo considerado segue a ser caro; as famílias de rendas baixas precisam de mais trabalho. De todos os modos, o trabalho doméstico segue a ser estruturalmente o mesmo: um assunto de produçom privada.

  Umha das funçons da família, a que nos é ensinada na escola e geralmente aceitada, é a satisfacçom das necessidades emocionais: a necessidade de achegamento, de comunidade e de relaçons cálidas e seguras. A sociedade ofrece poucas maneiras de satisfazer essas necessidades; por exemplo, nom se espera que as relaçons de trabalho ou de amizade sejam sequer aproximadamente tam importantes como a relaçom home-mulher-filhos. Até as mesmas relaçons de parentesco som secundárias. Esta funçom da família é importante para que se estabilice e poda cumprir a sua funçom puramente económica, mencionada acima. O assalariado, marido e pai, cujos ingressos o mantenhem, "paga" tamém o trabalho realizado pola mulher-nai e mantém aos filhos. O salário dum home compra o trabalho de duas persoas. A importáncia crucial desta segunda funçom da família fai-se visível quando a unidade familiar racha co divórcio. A continuaçom da funçom económica constitue a principal preocupaçom quando hai nenos implicados na questom; o home tem que continuar pagando o trabalho da mulher. O seu salário é normalmente insuficiente para permitir-lhe manter umha segunda família. Neste caso as suas necessidades emocionais som sacrificadas à necessidade de manter a sua ex-mulher e os filhos. É dizer, quando hai conflito a funçom económica da família tem precedência sobre a emocional. E isto acontece numha sociedade que ensina que a principal funçom da família é a satisfacçom das necessidades emocionais. 

  Como unidade económica, a família nuclear é umha estimável força estabilizadora da sociedade capitalista. Posto que a produçom realizada no fogar é pagada cos ingressos do marido-pai, a sua capacidade para retirar o seu trabalho do mercado é limitada. Até a sua facilidade para cambiar de emprego é limitada. A mulher privada dum emprego activo no mercado, tem pouco control sobre as condiçons que governam a sua vida. A sua dependência económica reflicte-se na sua dependência emocional, a sua passividade e outros rasgos "típicos" da personalidade feminina. É conservadora, temerosa, adepta do status quo.

  Ademais, a estrutura desta família é de tal orde que resulta umha unidade de consumo ideal. Mas a este facto, ao que muitas vezes se alude na literatura do movimento de Libertaçom das Mulheres, nom deve atribuir-se umha funçom primordial. Se a análise enriba desenrolada é correcta, caberia considerar fundamentalmente à família como umha unidade de produçom para o trabalho doméstico e a criança dos filhos. Todos na sociedade capitalista som consumidores; a actual estrutura da família é particularmente apta para alentar o consumo. As mulheres, principalmente, som boas consumidoras; isto resulta naturalmente da sua responsabilidade nos assunto da casa. Tamém o status inferior das mulheres, a falta dum forte  sentido do valor e da identidade, fam-nas mais fazilmente explotáveis que os homes e polo tanto melhores consumidoras.

  A história das mulheres no sector industrializado da economía dependeu sempre das necessidades de trabalho deste sector. As mulheres desempenham a funçom dum ejército de reserva da mao de obra. Quando a mao de obra é escassa (começo da industrializaçom, as duas guerras mundiais, etc.) as mulheres constituem umha parte importante da força de trabalho. Quando hai menos demanda de mao de obra (como actualmente baixo o neocapitalismo) as mulheres voltam-se umha  força de trabalho sobrante -os seus homes e nom a sociedade respostam económicamente por elas-. O "culto do fogar" reaparece em épocas de desemprego e utiliza-se para desviar às mulheres da economia de mercado. Isto é relativamente fázil, posto que ninguém, home ou mulher, considerará seriamente a participaçom delas na força laboral. O verdadeiro trabalho das mulheres, ensinam-nos, está no fogar; isto vale sejam casadas ou nom, solteiras ou chefas de família.

  Em tudos os tempos, o trabalho do fogar incumbe às mulheres. Quando trabalham fóra da casa devem amanhar-se dalgúm jeito para ralizar as duas tarefas, o emprego na rua e o trabalho da casa, ou polo menos a fiscalizaçom dumha substituta no fogar. As mulheres, particularmente as casadas, com filhos que trabalham fóra, tenhem singelamente dous empregos; a sua participaçom no trabalho assalariado só é permitida se tamém cumprem a sua primeira responsabilidade na casa. Isto é particularmente visível em países como Rússia, e outros da Europa oriental, nos que a expansom das oportunidades para as mulheres na força laboral nom lhes aportou umha expansom correspondente da sua liberdade. A igualdade de acesso aos empregos fóra do fogar, que é umha das pre-condiçons da libertaçom das mulheres, nom é em si mesma suficiente para brindar-lhes a igualdade; mentres o trabalho no fogar siga sendo assunto de produçom privada cuja responsabilidade corresponde às mulheres, elas levarám singelamente umha dupla carga de trabalho.

  Um segundo requisito prévio para a libertaçom das mulheres, que cabe derivar da análise enriba desenrolada, é a conversom do trabalho realizado agora no fogar como produçom privada em trabalho realizado na economia pública. Para falar com mais precisom, isto significa que do coidado dos filhos já nom devem ser responsáveis somentes os pais. A sociedade deve empeçar a assumir a responsabilidade dos nenos; a dependência económica de mulheres e nenos do marido-pai deve acabar. Os outros trabalhos do fogar devem tamém cambiar a través de comedores e lavandarias comuns, por exemplo. Quando estes trabalhos passem ao sector público, as basses materiais da discriminaçom contra as mulheres terám desaparecido.

  Estas som só pre-condiçons. A ideia do status inferior da mulher está profundamente arraigada na sociedade e custará um grande esforço extirpa-la. Mas quando as estruturas que producem e sustenhem esta idea se modifiquem, entom, e só entom poderemos esperar o progresso. É possível, por exemplo, que a adopçom de comedores comuns só signifique que as mulheres se trasladem da cozinha familiar à comunal. Isto seria seguramente um progresso, particularmente numha sociedade socialista onde o trabalho nom tivesse o carácter de explotaçom que agora tem. Umha vez que as mulheres fossem libertadas da produçom privada no fogar, resultaria provavelmente mui difízil manter durante certo tempo umha rígida atribuçom dos empregos segundo o sexo. Este é um exemplo da interrelaçom entre duas pre-condiçons enriba mencionadas: a verdadeira igualdade de oportunidades nos empregos é provavelmente impossível sem a liberdade respeito ao trabalho no fogar, e a industrializaçom é improvável a menos que as mulheres deixem o fogar por empregos.

  Algumhas modificaçons da produçom, necessárias para que as mulheres saiam do fogar, parecem, em teoria, possíveis baixo o capitalismo. Um dos pontos de partida dos movimentos de Libertaçom das Mulheres pode ser o facto de que existem agora formas alternativas, capitalizadas, da produçom do fogar. Existe o coidado diurno, ainda que inadecuado e se quadra demasiado caro; alimentos preparados, entrega de comidas a domicílio, e outras comidas que um mesmo leva à casa abundam; lavandarias e tinturarias ofrecem preços globais. Contudo, o custo em geral impide o emprego completo destas fazilidades, que nom existem em todas partes, ainda em Norteamérica. Caberia considera-las formas embrionárias, antes que estruturas completas. Nom obstante, ofrecem-se como alternativas do actual sistema de atender a esse trabalho. Particularmente em Norteamérica, onde o desenvolvimento das indústrias de serviços é importante para o crescimento da economia, as contradiçons entre estas alternativas e a necessidade de conservar às mulheres no fogar ham de desenrolar-se.

  A necessidade de conservar às mulheres no fogar provém de dous aspectos principais do sistema actual. Primeiro, a quantidade de trabalho nom remunerado realizado polas mulheres é moi grande e moi proveitosa para os que possuem os meios de produçom. Pagar às mulheres polo trabalho que fam, ainda no nível do salário mínimo, implicaria umha massiva redistribuiçom da riqueza. Actualmente o sustento da família é um dissimulado imposto ao salariado -um salário merca a força de trabalho de duas persoas-. Em segundo lugar hai um problema de se a economia pode expandir-se o suficiente para dar trabalho a todas as mulheres como parte dumha força laboral normal. A economia de guerra pode incluir parcialmente às mulheres na economia, mas nom puido criar a necessidade de todas ou sequera a maioria das mulheres. Sustém-se que os postos que chegara a criar a industrializaçom do trabalho do fogar proveeriam a essa necessidade, mas pode-se ponher em dúvida sinalando: 1) a existência de grandes forças económicas que defendem o status quo e que som contrárias à capitalizaçom antes mencionada, e 2) o facto de que as actuais indústrias de serviços que dalgúm jeito se oponhem a essas forças nom foram capazes de enfrentar o crescimento da força laboral, tal como está actualmente constituida. A tendência nas indústrias de serviços [é que] criam somentes subemprego no fogar; nom criam novos postos para as mulheres. Mentres esta seja a situaçom, as mulheres seguirám sendo umha parte convintemente elástica do ejército industrial de reserva. A sua incorporaçom à força laboral em termos de igualdade -que criaria certa pressom para a capitalizaçom do trabalho do fogar- só é possível cumha expassom económica até o de agora apenas lograda polo neocapitalismo em condiçons de plena mobilizaçom para a guerra.

  Ademais, estas modificaçons estruturais implicariam a rotura do actual esquema da família nuclear. A funçom estabilizadora do consumo que desempenha a família, sumada à capacidade do culto do fogar para conservar às mulheres fóra do mercado do trabalho, servem demasiado bem ao neocapitalismo para que podam ser fazilmente desbotadas. E, num nível menos importante, ainda que estas modificaçons necessárias da natureza da produçom do fogar chegaram a realizar-se baixo o capitalismo, implicariam a desagradável consequência de incluir todas as relaçons humanas em vencelhos monetários. A atomizaçom e o isolamento da gente na sociedade ocidental está já o suficiente avançada para que se volte duvidoso que semelhante isolamento psíquico puidesse já tolerar-se. É provável, em realidade, que umha das respostas negativas de tom emocional respeito dos movimentos de Libertaçom das Mulheres provenha desse temor. Se esse fosse o caso, caberia citar possíveis alternativas -cooperativas, kibbutz, etc.- para demonstrar que as necessidades psíquicas de comuniom e calor podem ser melhor atendidas com outras estruturas.

  No melhor dos casos, a capitalizaçom do trabalho doméstico só daria às mulheres a liberdade limitada de que gozam a maioria dos homes na sociedade capitalista. Isto nom significa, contudo, que as mulheres devessem esperar para esigir a liberdade, contra a discriminaçom. Hai umha base material do status feminino; nom somos só objecto de discriminaçom, somos explotadas. Actualmente o nosso trabalho nom pago no fogar é necessàrio para que tudo o sistema funcione. A pressom criada polas mulheres que nom aceitam o seu papel ha de reduzir a eficácia desta explotaçom. Ademais, estes desafios impidem o funcionamento da família e podem voltar menos eficaz o deliberado alonjamento das mulheres da força de trabalho. Cabe agardar que tudo isto apressurará a transiçom cara umha sociedade distinta; a nossa tarefa é assegurar que as modificaçons da sociedade rematem efectivamente coa opressom das mulheres.

(1970)

 

AS MULHERES E O MITO DO CONSUMISMO

Ellen Willis

  Se os brancos radicais pensam seriamente numha revoluçom, terám que desbotar muita ideologia inconsequente criada por, e para, os homes brancos instruidos de classe meia. A difundida teoria do consumo é um exemplo do que haverá que desbotar.

  Tal como tenhem exposto muitos pensadores da esquerda, e particularmente Marcuse, esta teoria sustém que os consumidores som psiquicamente manipulados polos meios de comunicaçom de massas, coa fim de que desejem cada vez mais bens de consumo e, deste jeito, reforcem umha economia que depende de vendas crescentes. Esta teoria considera-se particularmente aplicável às mulheres, pois elas fam realmente a meirande parte das compras, o seu consumo está relaconado quase sempre coa sua situaaçom de oprimidas (por exemplo, maquilhage, detergente, etc.) e elas som o branco habitual dos anunciantes. Desde este ponto de vista, a sociedade define às mulheres como consumidoras e como objectos sexuais passivos que os meios de difusom de massas encandilam com mercadorias. Polo tanto, os que se beneficiam coa depreciaçom das mulheres nom som os homes, senom a estrutura corporativa do poder.

  Ainda que a teoria do consumismo tenha adquirido nos ultimos anos a invulnerabilidade dum dogma religioso, tem, como a maior parte dos dogmas, por principal funçom defender os interesses dos seus adeptos: neste caso, os privilégios classistas, sexuais e raciais.

  Em primeiro termo, nom hai nada intrisecamente erróneo no consumo. Ir de compras e consumir som actividades humanas agradáveis e a praça do mercado foi o centro da vida social durante miles de anos. O sistema do lucro é opressor nom porque abundem os luxos triviais, senom porque as necessidades básicas nom som atendidas. A localizaçom da opressom está na funçom produtiva; a gente nom controla que classe de mercadorias se producem (nem de que serviços se pode dispor), em que quantidades, baixo que condiçons, nem tampouco como se distribúem. As empresas decidem, tendo em conta exclusivamente as perspectivas de lucro. Resulta mais proveitoso produzir mercadorias de luxo para os ricos (ou para os pobres, a praços, em condiçons de explotaçom) que produzir e distribuir alimento, habitaçom, e serviços médicos, educacionais, recriativos e culturais, de acordo coas necessidades e desejos da gente. Nós, como consumidores podemos aceitar ou rejeitar as mercadorias que nos ofrecem, mas nom podemos influir na sua qualidade ou modificar o sistema de prioridades.

  Tal como se manifesta, a profussom de mercadorias é umha genuína e poderosa compensaçom da opressom. É um suborno, mas como tudos os subornos ofrece benefícios concretos: no caso do norteamericano corrente, um nível de confort físico sem paralelo na história. Nas actuais condiçons, a gente interessa-se polos bens de consumo, nom porque tenham passado por um lavado de cerebro, senom porque mercar é umha actividade agradável que é permitida e incluso activamente fomentada polos nossos governantes. O prazer de consumir um gelado será umha satisfacçom mínima se se compara cum trabalho independente e interessante, mas o primeiro está à nossa disposiçom e o segundo nom. Umha família pobre preferiria induvitávelmente obter um apartamento decente antes que mercar um novo televisor, mas como nom existe a mais remota possibilidade de acadar o apartamento, que ganharia com privar-se do televisor?

  Os radicais, que som em geral saudavelmente escépticos com respeito a fázeis explicaçons freudianas, deram-se pressa, sem embargo, em aceitar esta teoria da manipulaçom dos meios de difusom abertamente inspirada em Freud, tal como foi vulgariçada por investigadores de mercado e sociólogos como Vance Packard (Marcuse reconhece a influência de Packard em O home unidimensional). Esta teoria sustém que os anúncios, programados para criar associaçons inconscientes entre certos produtos e profundos temores, desejos sexuais e necessidades de autoestima, induzem à gente a mercar objectos na procura de satisfacçons que nengum produto pode proporcionar. Ademais as empresas, a través dos meios de difusom, criam deliberadamente temores e desejos, que os seus produtos simulam satisfazer. É dizer: as mulheres nom som somentes enganadas com mentiras e exageraçons -como, por exemplo, a sugestom de que certo perfume fará-as sexualmente irresistíveis- senom que, ademais, som psiquicamente incapazes de apreender a través da experiência e voltarám mercar pesse a todas as decepçons, pois, de tudos os jeitos, a "necessidade" de serem sexualmente irresistíveis é programada nelas para que continuem mercando perfumes. Esta hipótese de distorssom psiquica tem por base o erróneo suposto de que a saude mental e o antimaterialismo som sinónimos.

  Ainda que tenha que enfrontar os enganos e fantasias do sistema comercial, a gente em geral compra mercadorias por motivos práticos do seu próprio interesse. Umha lavadora fai mais fázil o trabalho da ama de casa (posto que nom hai socializaçom do trabalho doméstico); a excedrina suprime efeitivamente a dor de cabeça; um automóbil é realmente um meio de transporto. Se alguém é induzido a mercar um produto por um anúncio enganoso, trata-se dumha explotaçom; nada tem que ver cum lavado cerebro.

  A publicidade, em realidade, é um compéndio prático para a economia do consumidor, que constantemente lembra-nos que temos à nossa dispossiçom e alenta-nos a satisfazer-nos. Funciona (é dizer, estimula as vendas) porque mercar é o único jogo que hai na cidade, e nom vice-versa. Os anúncios sugirem temores mórbidos (por exemplo o medo ao mal cheiro corporal) ou falsas esperanças (de irresistibilidade) e os compradores fronte a múltiples e indiscerníveis marcas dum produto podem eleger segundo a sugestom do anúncio: que outro método seria o melhor?. É o velho jogo de coidar-se dos enganos. O engano conta coa ingenuidade do comprador e a gente apreende aa resistir o engano através da experiência. Hai grupos particularmente vulneráveis, como essa gente maior, sem a experiência prévia -individual ou histórica- que a guiara quando a cornucópia do consumo desenvolveu-se bruscamente depois da Segunda Guerra Mundial; e os pobres que nom tenhem cartos de abondo para apreender, através do método da experiência, o erro e a desilusom, a voltarem-se consumidores sagazeis. O constante refinamento das pretenssons dos anúncios, os seus efeitos visuais, etc., revelam que a experiência insensibiliça. Ninguém crê realmente que fumar a marca X de cigarros volte a umha persoa sexy. A funçom do sexo num anúncio é provavelmente o óbvio -atrair a atençom cara o anúncio- e nom lograr que a gente "identifique" sexualidade e produto. O efeito pricipal da marcado énfase sexual publicitária foi estimular umha procupaçom cara o sexo, o que vém a demonstrar que nom é fázil derivar cara outras fins um impulso humano fundamental. Madison Avenue vém alonjando-se das técnicas "motivacionais" e desenvolvendo as estéticas: especialmente os comerciais de televisom voltaram-se extraordinariamente inventivos desde o ángulo visual. Disto se deduz que o enfoque da psicologia profunda nunca chegou a funcionar, ou deixou de faze-lo a medida que os consumidores voltavam-se mais destros.

  A teoria de que as empresas criam novas necessidades psicológicas para vender o seu material é assimesmo, insubstancial. Nom hai prova de que a propaganda poda por si mesma criar um desejo; ocorre na realidade que trae à consciência um desejo latente, ao sugerir que estám disponhíveis os meios de satisfaze-lo. Trata-se dumha convicçom supersticiosa: subjace nela a implicaçom de que o opresor é diavolicamente inteligente (apreendeu a controlar as almas) e de que os meios de difusom tenhem poderes mágicos. Confunde tamém os efeitos coas causas, e simplifica drasticamente as relaçons entre a ideologia e as condiçons materiais. Nom nos ensinarom a ter averssom polo nosso mal cheiro para poder vender-nos desodorantes; os desodorantes vendem-se porque ter mal cheiro tem consequências sociais. E a atitude negativa respeito dos nossos corpos que fixo possível inventar e vender desodorantes, está profundamente arraigada na nossa cultura anti-sexual, que à sua vez foi formada por modos de producçom explotadores e polo antagonismo de classe entre homes e mulheres.

  A confusom entre causa e efeito é particularmente evidente na análise consumista da opressom das mulheres. Estas nom som manipuladas polos meios de difusom para que sejam serventes domésticas e sexualmente decorativas e insensatas, coa fim de vender jabóm e laca para o cabelo. Ocorre, pola contra, que esta image reflicte às mulheres tal como som forçadas polos homes a comportarem-se numha sociedade sexista. A supremacia do home é a forma mais antiga e básica de explotaçom classista, nom algo inventado por um inteligente agente de propaganda. O dano real que fam os meios de difusom coa image da mulher que proponhem é suster o statu quo sexista. Em certa medida a propaganda da moda, os cosméticos e a "higiene feminina" dirigem-se mais aos homes que às mulheres. Sugirem ao home que as mulheres devem recorrer a todos os adornos da escravitude sexual, expectativa que as mulheres tenhem, entom, que satisfazer se querem sobrevivir. Que os anunciantes explotam a subordinaçom das mulheres mais bem que a criam é agora evidente, desde que a moda, e os produtos de beleza e higiene masculinos, chegaram a ser grandes negócios. Em contraste coa propaganda dos produtos femininos, que sugirem "use isto e el amará-a" (ou "se vostede nom usa isto, el nom a amará") a propaganda para o sector masculino afirma: "Vostede tamém pode deleitar-se com perfume e roupas de cores vivas; nom se preocupe, isto nom o fai feminino". Ainda que os anunciantes coidam de destacar quanto virís som esses produtos (dando-lhes nomes como "Brut", mostrando ao home que os usa numha caceria ou coqueteando com mulheres admirativas que, dito seja de passo, som apenas objectos decorativos quando a venda se propóm ao home) nunca pretendem que o devandito produto seja essencial à masculinidade (como a maquilhage é essencial à feminidade) senom que é compatível com ela. Para convencer a um home de que merque algo, umha propaganda deve dirigir-se ao seu desejo de autonomia e liberdade frente às restricçons convencionais; para convencer a umha mulher deve dirigir-se à sua necessidade de agradar ao opressor.

  Para as mulheres, mercar e usar vestidos e produtos de beleza nom é propriamente consumo, senom trabalho. Umha das tarefas femininas nesta sociedade é ser um objecto sexual atrainte, e as roupas e a maquihage som instrumentos de trabalho. Assimesmo, mercar alimentos e artefactos caseiros é umha tarefa doméstica; é trabalho feminino eleger os produtos que serám consumidos por toda a família. Os aparelhos e os produtos de limpeza som instrumentos que fazilitam as funçons domésticas. Quando umha mulher gasta umha suma de dinheiro e de tempo decorando o seu fogar ou decorando-se a si mesma, buscando insistentemente a melhor aspiradora, nom se trata dumha gratuita compracência consigo mesma (e nom falemos do resultado dumha manipulaçom psíquica) senom dum saudável intento de encontrar umha saída para as suas energias criadoras, dentro do seu limitado ámbito.

  Existe o arraigado mito de que a mulher tem o control do dinheiro do seu home, porque é ela quem o gasta. Em realidade, nom tem muita mais autonomia financieira que o empregado dumha empresa encarregado de mercar o mobiliário e os elementos necessários para umha oficina. O marido, especialmente se é rico, pode permitir à sua mulher certa amplitude nos gastos, pode considerar que, já que tem que trabalhar na casa, possue o direito de amobla-la ao seu gosto, ou sinxelamente prefire nom molestar-se polos detalhes domésticos; mas conserva um direito de veto final. Se nom gosta do manejo dos cartos que fai a sua mulher dirá-lho. Na maioria dos fogares, particularmente na classe trabalhadora, a mulher nom pode fazer gastos importantes, de carácter persoal ou na sua funçom de servente-objecto, sem o consultar ao seu home. E , segundo as estatísticas, o mais corrente é que seja o marido quem tome as decisons definitivas respeito ao mobiliário e os aparatos, e assimesmo a outros gastos maiores, como casas, carros e vacaçons.

  A teoria do consumismo é o produto dum antimaterialismo aristocrático, de orientaçom europea, cuja base é um resentimento da classe alta contra a ascensom burguesia vulgar. Os intelectuais radicais sentiram-se atraidos por esta posiçom essencialmente reaccionária (os pontos de vista de Herbert Marcuse sobre a cultura de massas som surpreendentemente semelhantes aos dos teóricos conservadores como Ernest Van Den Haag) porque satisfazia à vez o seu disgosto do capitalismo e o seu sentimento de superioridade frente à classe trabalhadora. Este elitismo é evidente na convicçom radical de que tenhem desenmascarado ao sistema, mentres o trabalhador corrente é víctima do lavado de cerebro que imponhem os meios de difusom. É estrano que ninguém pretenda que a classe dominante é oprimida polas mercadorias; ao parecer, os ricos consumem por livre determinaçom. Em última instáncia, este ponto de vista leva a atribuir umha estéril trascendência às soluçons individuais -se somentes os descarriados rejeitaram a sua existência "plástica" e  se mudaram aos alojamentos de East Village- e a suster que a gente resulta oprimida porque é estúpida ou enferma. O odioso desta atitude radica no facto de que os radicais só podem manter a sua existência "prescindível" mentres suficientes trabalhadores supostamente submetidos a lavado de cerebro mantenham a economia em movimento.

  O consumismo aplicado às mulheres é claramente sexista. A imagem geralizada da consumidora feminina de cabeça baleira, que irrita constantemente a paciência do seu home coas suas compras extravagantes, contribue a afiançar o mito da superioridade masculina: as mulheres som incapazes de gastar racionalmente os cartos; tudo o que precissam para sentirem-se felizes é um sombreiro novo de quando em vez. Hai um estereotipo racial análogo: o negro co seu Cadillac e as suas camisas de cor vermelha. Ademais, o ponto de vista do consumismo permite aos homes nom ter que reconhecer que explotam às mulheres, ao atribuirem a sua opressom exclusivamente ao capitalismo. Encaixa muito bem na teoria radical existente e os seus interesses, aforrando o esforço de tratar os verdadeiros problemas da liberaçom das mulheres. E, ao dividir às mulheres, retarda a luita contra a supremacia varonil. O mesmo ocorre no movimento masculino. A crença no consumismo alenta às mulheres radicais a tratar com arrogáncia a outras mulheres, porque tratam de sobreviver da melhor maneira possível, e conservar as suas ilusons individualistas.

  Se pretendemos suscitar um movimento de massas temos que admitir que nengumha decissom individual, como rejeitar o consumo, pode libertar-nos. Devemos deixar de discutir respeito de qual estilo de vida é preferível (secretamente confiados em que é o nosso) e dedicar-nos à tarefa de luitar colectivamente contra  a nossa própria opressom e contra os modos em que nós mesmos oprimimos aos demais. Quando cheguemos a atopar umha alternativa válida para o sexismo, o racismo e o capitalismo, o problema do consumidor, se realmente é um problema, resolverá-se por si mesmo.

(1970)