Limiar

 

  O objetivo de elaborar as seguintes teses é proporcionar as bases para um debate entre aquele/as que tenham interesse pola questom da libertaçom nacional e a sua relaçom coa transformaçom social revolucionária, mas que nom se vejam plenamente identificad@s coas organizaçons existentes, sobretudo no plano prático.

 

  A controvérsia histórica que sempre existiu entre a luita polo comunismo e a conquista da liberdade nacional nom se resolverá, naturalmente, com discussons teóricas. Muito menos com elucumbraçons escolásticas. O nosso objetivo é, seguindo a orde do texto, em primeiro lugar clarificar as posiçons marxistas originais sobre o assunto e considera-las à luz do desenvolvimento histórico até a época actual. Em segundo lugar, situar-nos no contexto presente internacional e da Galiza, entrando neste último apartado tamém numha análise histórica geral. Em terceiro lugar, consideramos a história do movimento proletário galego até hoje e a significaçom do independentismo neste contexto. Por último, traçamos umha série de conclusons e perspectivas para o comunismo de conselhos na Galiza.

 

  Esperamos que o tom polémico do texto, especialmente nas partes que tocam o caso galego, nom diminua a atençom sobre as ideas fundamentais. Por suposto, o texto nom é imparcial, mas, como diziamos antes, o nosso objetivo nom é formular verdades eternas, senom server como base para um debate aberto entre @s proletári@s conscientes.

 

  Por último, sentimos que às vezes o texto poda resultar um tanto repetitivo. Dada a sua extensom, como nom podia ser doutro modo, tivo que ser elaborado por partes, ampliado e reordenado, sem ter muito tempo para coidar às vezes a forma.