«PROXECTO» DE PROGRAMA
Corrente Cooperación Obreira
Apresentación
(...)
ACERCA DO SEGUINTE DOCUMENTO PROGRAMÁTICO.
Este programa é o resultado de anos de militáncia e formación, pero ainda así un programa xove. Isto non merma a sua potencialidade. O facto de estar fundado en concepcións novas dentro da autonomia obreira, como a criación dunha organización permanente destinada à preparación das luitas que supere o sindicato como forma de organización, non discrimina que estas conclusións procedan da conxugación de experiéncia militante e de coñecimento da experiéncia histórica nos seus trazos esenciais. Tampouco o merma a mui limitada experiéncia na luita proletária de masas da que se parte, e que non temos por qué ocultar; estes limites tratamos de supera-los na medida do posível meiante a profundización na compreensión das experiéncias históricas relevantes do movimento obreiro en diversos países. Non somos especialistas intelectuais, somos militantes proletári@s que está convencida da necesidade do esforzo de construcción dunha alternativa de clase ao estado de derrota permanente en que se acha sumido o movimento obreiro desde fai muitos anos. Ao declive do movimento obreiro tradicional nos opoñemos a construcción da intelixéncia proletária, frente ao abandono da militáncia e o clima ideolóxico pequenoburgués nós opoñemos as mellores tradicións de acción e pensamento do proletariado revolucionário: a autonomia obreira e o materialismo marxiano.
Ao que vamos, este programa non se da por acabado, senon que está, como Cooperación Obreira, en permanente proceso de debate teórico e prático, unido à experiéncia militante. Só pretende trazar as liñas esenciais dunha crítica integral da sociedade existente, así como dunha alternativa prática à decadéncia das organizacións obreiras tradicionais e à derrota e impoténcia consequéncia da mesma. Así, as luitas que persisten no presente, ailladas e débiles, encontrarán o referente unitário imprescindível para a sua elevación e a sua traducción en construcción de novas formas de organización duradeiras. Cooperación Obreira pretende construir este referente, que vai mais aló do seu marco organizativo e das suas concepcións particulares: unha alternativa unitária de organización e luita para o conxunto da clase obreira, ou sexa, unha concepción integral que compreenda os diferentes niveis de compromiso (ou o que é o mesmo, de consciéncia prática) e os diferentes frentes de luita; un proxecto de articulación do movimento obreiro consciente, de agrupamento de todos os traballadores e traballadoras dispostos a luitar contra a ofensiva capitalista actual, tanto mais atrasados como mais avanzados, como forza de transformación social orientada a conquistar a democracia obreira e a realizar a a auténtica revolución comunista: a supresión da explotación e da propriedade privada capitalistas e con elas de toda explotación e dominación, división en clases e desigualdades.
Por un presente de guerra de clases contra o futuro de miséria de masas que nos preparan !!!