Armoria - Temas - strukture

MENSGEMAAKTE strukture vind ’n mens nie dikwels as wapenfigure nie, maar daar is ’n paar wat in Suid-Afrika gevind word. Ironies is die heel oudste soort wat tans in Armoria te siene is, in in die heel jongste wapen voorkom: die tipiese Nguni-styl byekorf-hut, wat as die helmteken voorkom in die wapen van KwaZulu-Natal. Dit was ook in die seël (nie ’n heraldiese devies nie) van King William’s Town.

Die hutte van die Nguni en Sotho word egter nie veronderstel om permanent te wees nie. Tradisioneel word dit afgebrand nà die afsterwe van die hoof van die huishouding. Permanente strukture was ’n innovering wat die Nederlanders na Suid-Afrika gebring het. Hulle het die Kasteel in Kaapstad gebou. Hierdie gebou verskyn in etlike militêre wapens, alhoewel Armoria nie tans enige voorbeelde het nie. ’n Struktuur wat in die wapens van vier Port Elizabethse inrigtings voorkom, is die Donkin-gedenkpiramide, in die wapens van die Livingstone-Hospitaal, die Hoërskool Pearson (wat op ’n stadium in ’n perseel oorkant die Donkin-reserwe gehuisves is), Lawson Brown High School en die Anglikaanse Bisdom Port Elizabeth, wat ’n driehoek gebruik om beide die piramide en die Heilige Drieëenheid voor te stel. Livingstone-Hospitaal se wapen bevat ook ’n beeld van Port Elizabeth se beroemde kloktoring of Kampanile.

Dit kan nie werklik van die Munisipaliteit Rondebosch gesê word dat dit ’n heraldiese wapen gevoer het nie, maar in die landskap wat dit as “wapenskild” gevoer het, was ’n fantastiese voorstelling van die stadsaal, sowel as ’n stoomtrein.

Die Transvaal Colony het glad nie ’n heraldiese wapen gehad nie, maar sy koloniale seël het ’n staalstaaf-mynskagapparaat ingesluit (asook ’n stoomlokomotief). Bophuthatswana se wapen het ook ’n mynskagapparaat ingesluit, maar heelwat leliker en meer modern, uit beton gebou.

Die dorp Despatch, wat rondom ’n steenmakery gegroei het, het die skoorsteen van die steenoond in sy wapen ingelyf, terwyl ’n soort fort in die wapen van die Hoërskool P J Olivier gesien kan word; in die binneskild is ’n gebretesseerde grys klipmuur wat die Graham-familie voorstel.

Die metropool Ekurhuleni het ’n vorm in die skildbasis wat soos ’n ry wolkekrabbers lyk, met ’n mynhoop as agtergrond. Die metro, wat in 2000 gevorm is, sluit etlike groot dorpe in aan die oostekant van die Witwatersrandse Hoofrif.

Brûe kom ook in Suid-Afrikaanse wapens voor. Een sulke is die brug oor die Grensspruit, die grens tussen die Zuid Afrikaansche Republiek en die Kolonie Natal naby Volksrust oorgesteek het.

For English, click here