"LA NUESA
HESTORIA"
Skama La Rede
L'Aguañaz 2005
Hai dellos meses
naguábemos, dende esta mesma seición, por que la maqueta de
Skama La Rede fuera'l xermen d'un discu con toles de la
llei... Güei reseñamos esi discu (con delles selmanes de retrasu dende
la so publicación, sentimoslo abondo pero'l presupuestu ye'l qu'hai)
que los skameros tan teniendo la oportunidá de presentar
dende munchos escenarios, polo que yá lo conocereis. Ska folixeru na
parte musical y contundencia verbal na vocal. Nesi sen la carátula del
discu ye bien significativa, un megáfonu con gatillu dende'l que
disparar cancios con mensax al que quier oyílos... y al que nun quier
tamién. Un megáfonu dende'l que cuntar la hestoria de Skama La
Rede.
La Nuesa
Hestoria nun dexa de ser un bon contrapuntu al discu tamién
asoleyáu va poco por Dixebra, del que dixéramos que yera
como un documental del nuesu país. Nel discu debú de Skama La
Rede alcontramos tamién esi averamientu musical a la realidá
social asturiana, anque la señardá y tristura que destilen los caberos
cancios de Dixebra, equí ta tresformada en mala hostia y
coña mariñana a punta pala. Talanto que son coses de la edá, les que
provoquen eses diferencies a la hora d'espresar un pensamientu abondo
asemeyáu nel fondu.
Nun dexéis de mercalu,
que la hestoria de Skama La Rede tamién ye la nuesa y
nunca sobra xente que la
cante.
