"SALIA"
Corquiéu
Tierra Discos 2005
A la fin,
tenemos ente les manes el nuevu discu de Corquiéu pol
que naguamos tanto, y basta con dicir que cumple, de llargo, coles
espeutatives que nos fixéramos sobro él. Contundencia brutal (nun soi
quien a alcontrar otro calificativu) nos temes instrumentales y la voz
de Gema meyor arropada nos cancios que en "La Barquera", amás, del
debú como vocalista de Paul en "Viquina", un de los cantares más
prestosos del discu.
La
incorporación de Xurde Fernández a la flauta de travesu da-y mayor
versatilidá al grupu, aportando-y un puntín de virtuosismu a una banda
a la que se-y noten les decenes d'actuaciones d'estos caberos años.
Tienen tables, tienen fuerza y eso, más los retoques d'Igor na
produción, faen de "Salia" un trabayu d'un nivel difícil d'algamar
dende l'obligáu amaterismu d'otros munchos grupos asturianos, un
trabayu musical y téunicamente al nivel de cualisquier gran banda
europea de folk. De xuru que vamos sintir voces, yá les sintimos,
diciendo que la so música suena demasiáu irlandesa o escocesa, pero
tovía tamos esperando dalgún bon discu de la xente que lo diz, un
discu que suene asturiano o sueco pero que seya bono.
Nel
tarrén de les collaboraciones hai que solliñar les lletres de los
cantares, obra del poeta Xandru Martino Ruz, Igor Medio a los coros
(dando-y ciertos toques felpeyos dalgún canciu), Ramón Morán a
los teclaos y Horacio A. García al
contrabaxu.
