|
Revolución Celta. Fardaxu
| |
|
|
Volvemos retomar la seición de novedaes
discográfiques asturianes, depués de dellos meses de parón debíos a
les nueses obligaciones profesionales que nos caltuvieron allonxaos del
nuesu "deber" d'esparder la música folk de raigañu celta
fecha nesti requexu'l mundiu. Volvemos garrar el llabor y facémoslo con
un trabayu doblemente significativu, un discu de música asturiana al
100% pero fechu a miles de kilómetros de la tierra que nos vio ñacer,
fechu n'Arxentina.
Revolución Celta ye'l títulu del segundo CD de los arxentinos Fardaxu y la verdá ye que, pa min, l'audición d'esti discu foi una gratísima sorpresa y camiento que tolos aficionaos que se faigan con un exemplar van sintir lo mesmo que yo. El repertoriu del discu ye mayoritariamente tradicional, sacante una composición del teclista'l grupu Gabriel Mourelos y un par de temes de Flavio Benito y Pedro Bastarrica, nesi sen nun hai sorpreses, éstes alcontrámosles nos arranchos allonxaos dafechu de lo que tamos avezaos a sintir perequí. Ye'l de Fardaxu un soníu que nun se dexa enmarcar nuna definición simple y cenciella, pero al que vamos tratar de definir como folk-rock sinfónicu, pa que vos faigáis una idega. Nun soi quién a desplicalo meyor, hai qu'oyilo.
|
|
N'agostu tuvo n'Asturies Gabriel Mourelos, ún de
los miembros d'esti multitudinariu grupu (pue llegar a xuntar a 16
persones enriba l'escenariu), y dicíanos él qu'una referencia de Fardaxu
yera Hevia y la renovación que fizo'l maliayés de
la música tradicional. Pa nós, el que merque'l discu camientando
n'alcontrar dalgo asemeyáu a Tierra de Nadie, va sentise
defraudáu porque los puntos en común de Fardaxu y Hevia
tán en da-y a la nuestra música de raigañu un tastu contemporáneo,
pero los caminos que percorren pa llegar a esa meta tán allonxaos dafecho.
El nuesu conseyu ye que faigáis por oyir el discu ensin idegues
preconcebíes y de xuru que descubriréis un discu y un grupu
perinteresantes, que nun necesiten comparase con naide. Nun dexéis d'oyir
la so versión del Romance de la Polesina.
Ente les collaboraciones qu'aparecen nesti discu tán: los asturianos Dani Gª De La Cuesta, Flavio Benito y Ramón Prada; l'habitual flauteru d'Astor Piazzola, Arturo Schneider y las cantareiras arxentino-gallegues de Xoldra. | |
|
LINKS RELLACIONAOS
|
|
|
|
|
|
