"FONCALADA"
Iñaki Santianes
FonoAstur
2004
Primer
discu en solitariu del gaiteru Iñaki Sánchez Santianes, discípulu de
Vicente Prado El Pravianu. Pa esta ocasión rodéase de trés
músicos de calidá contrastada, Leticia Martín al vigulín, Borja
Vázquez a la guitarra y bodhran y el so hermanu, Yónatan Sánchez
Santianes, a les percusiones y teclaos.
Como
tolos discos de gaiteru "Foncalada" ye una especie de piedra de
toque onde asoleyar toles capacidaes téuniques del protagonista, lo
que fae que munchos d'estos trabayos dexen ñidio'l virtuosismu l'autor
y, tamién, la so capacidá p'aburrir a los aficionaos énte un soberanu
exerciciu de narcisismu. Gracies a dios nun tamos nesi casu y
"Foncalada" ye un discu que se dexa oyir con gustu, cuayáu d'elegancia
dende'l primer tema al caberu. Hai eshibiciones de Iñaki a la gaita,
porque ye'l so discu, pero tamién un tastu folkie aportáu polos sos
compañeros del grupu y que ta presente en tol trabayu que-y da cierta
dulzura y failu aptu pa tolos gustos.
Ye
destacable'l bon llabor de Yónatan na composición de la mayoría
de temes que componen el discu, otru músicu pa siguir mui de
cerca.
