Les bandes de gaites son un fenómenu acabante ñacer n'Asturies. La gaita polo xeneral namái se dexa acompañar pol tambor o la voz del cantante de tonada, sicasí pol vigulín o los pandeiros n'Occidente. Poro, la xuntura de dellos gaiteros pa tocar nun ye corriente (anque tan documentaos n'algunos estudios etnográficos nel sieglu XIX). Les bandes de gaites que güei conocemos entamaron a formase dempués de les primeres participaciones d'Asturies nel Festival Interceltiegu de Lorient, ellí, los nuesos gaiteros, tomen contautu coles Pipe Bands escoceses y eireses y les Bagad bretones. D'eses formaciones tomen exemplu pa, na metada de los años 80, entamar a fundar les primeres bandes de gaites asturianes.
La fórmula foi un ésitu y, anguañu, los conceyos que nun cunten con una banda de gaites (o más!) son la esceución. Amás, faen que los guah·es de les Escueles de Música Tradicional atopen au tocar y que los mayestros gaiteros algamaren una estabilidá profesional qu'hai 20 años yera utópico.