《新報》（2000-12-30）
華仔真正男子漢！
聖誕節期內幾部港產片，口碑同埋票房都唔錯，証明電影係有人睇嘅，只不過觀眾揀好戲睇啫，奇怪，最賣座「阿虎」同「雷霆戰警」都有個日本妹參加演出，睇嚟日本市場好重要。
唔知點解！總覺得華仔「阿虎」有戲味啲，可能打泰拳關係，拳拳到肉，男人味特別重，覺得華仔好有型，相反常盤貴子可有可冇，這令人想起多年前，邵氏公司一部叫「拳擊」嘅影片，上映好受歡迎，而且重係年輕觀眾為主，男主角就係我哋嘅狄龍哥哥，女主角係井莉姐姐，大反派係谷峰，年輕嘅何江西，簡直當狄龍係偶像，崇拜得要死。
狄龍令我們曾經興奮過，今日劉德華也不例外，剛陽味重，可以得到男男女女歡心，建議華仔今後接戲，揀一些有情有義男子漢角色去演出，因為華仔有咁嘅條件，不可以成日都做蠱惑仔，正氣男兒有賣點！