相信係因為以前用開既 Norton 太古舊﹐所以引致某些種類既 virus 唔能夠被 scan 中。雖然"帶菌者"之名已經除下﹐不過心內依然留有陰影呢......

要同病毒玩捉迷藏﹐曾經的確好氣餒﹐更打算索性將日記仔再改為 cgi﹐相信問題一定能夠得到解脫。不過及後諗深一層﹐html 有 html 既問題﹐cgi 亦有cgi 既弊病。當初我決意將日記仔轉為 html﹐就係因為覺得對於自己o黎講﹐html 會比較容易控制一o的。日記仔係我既命根﹐若果要我退而求其次的話﹐o甘倒不如正視問題﹐倘若成功的話﹐o甘我咪又學識o左一o的o野囉。

逃避唔係辦法﹐面對先係上上策。

往昔既我﹐一碰壁﹐先退縮後落淚再嗟怨係我既三步曲。我從來唔會嘗試去補救﹐甚至無把握機會從中反省﹐我祗會默認自己黑仔﹐悄悄將所有責任推向命運﹐然後不了了之。因為從來唔懂得反思既重要﹐所以往往不能活出自己。

但﹐呢一年多內﹐我學懂了好多﹐真的。

如今面對一個可以做到遇上困難都唔會輕易放棄既自己﹐我可以好肯定地講我長大了﹗

先o黎一場大風雪﹐有成 10 cm o甘高呀﹐剷完雪之後﹐我屋企門口對出就多o左個雪山咯~

細佬星期五去食 $1.69 麥噹噹 special﹐食完番o黎頻頻去洗手間﹐仲發燒。今日去睇醫生﹐醫生話佢中o左 virus... 哈... 哈... (無奈﹗)

講起中毒﹐最經典既﹐莫過於突如其來既一陣中毒恐慌。中毒區﹐仲要係我最緊張既日記仔... (此地也﹗)

真係令我不知如何是好﹐究竟點解會o甘既呢﹖

急急忙忙用 Norton 週圍照﹐但係都一無所獲。心諗可能 Norton 唔多靠得住﹐所以上網週圍剿唔同既 Anti-virus scan o黎 download。最終﹐毒係照到﹐亦都照指示剷走晒o的毒﹐不過隻毒根本都唔係朋友們所講o個隻... o甘究竟點好呢﹖我暫時係絕對唔可以 format 過個 hard - drive o架~~ 唉..... 真係頭都大埋喇﹐救命呀~~~~~~~~ >-<"

照過晒都係無發現﹐都係將日記仔歸位先﹐如果朋友仔再有發現請即時通知喔~ 

六點幾先番到屋企﹐今次又唔知要訓到幾多點先肯醒﹐不過一諗到今晚大家又可以一大班人一齊吃喝玩樂﹐心情真係無比興奮呢﹐所以拿拿聲撻落床﹐因為一睜眼就係玩樂之時喇~ (今日好似唔係我生日 bor~ 嘩哈哈~~)

一點多起身﹐走去洗個白白然後上上網。

走去幾個孝天既站站逛逛八八﹐竟然俾我見到o的好 dum 心既消息 - 「孝天答應 GiGi 做佢 3.14 第一場 Funnnnny Face 演唱會既嘉賓﹐為佢打頭陣... 合唱.... 表演.....」何解我此時此刻唔係身處香港呢.......?! >-<"

唉... 香港人﹐真幸福... 

五點半﹐距離我o地既聚會愈來愈近﹐係時候將會變得幸福喇﹗

我o地今晚去同壽星女 Xiao 慶祝既餐廳雖然落腳點唔多起眼､價錢唔平､鋪面亦細 (我o地十九人要分兩檯食﹐仲霸o左三分之二既地方)﹐不過原來呢樹係臥虎藏龍呢~ 間餐廳除o左有好多唔同品種既新鮮既生蠔供應之外﹐就連海鮮湯､烤蝦､芝士龍蝦同甜品都係落足本﹐非常一流既呢~ 大家讚不絕口﹐仲話要同屋企人再o黎享受一番o添~ (我都好想呀﹐不過要儲番多o的銀倆先咯~ :p)

影番幾十張靚靚相﹐Xiao 好鐘意我o地為佢特製既生日卡呢﹐實在太好咯~ 哈哈~~ 當然﹐驚喜會一浪接一浪啦~ 除o左有「呀公」 10 ft 長 Happy Birthday 橫額﹐仲有壽星女最鐘意既牛奶妹蛋糕作壓軸。似乎﹐所有都係我o地掌握之內﹐壽星女好欣賞我o地每一樣傑作呢~ 

要令 Xiao 開開心心﹐就係我o地最大目的咯﹐我o地成功了~~ *^^*

令每一次聚會都充滿歡笑聲同難忘既時光﹐祗有我最愛最貼心既朋友仔先做得到。旁人都好羨慕我o地既友誼呢﹐I am truly so proud of every of you。你(們)是最好的﹐知道嗎﹖

見呢排o的皮膚好o的﹐所以心郁郁想去做o下 facial 進一步護理o下。早幾日同西提起過﹐所以佢提議我o地今日一齊去做 facial。第一次同西西去做 facial﹐感覺一o的都唔"感"張啦﹐仲不知幾期待o添~ (今日整靚靚﹐聽日就可以去街街咯~ 呵~~)

做完 facial 我o地再去附近買聽日開趴地用既o野。相信聽日又會係另一個快樂日﹗^^

前日接到姑姐七號既長途﹐話佢已經請o左四月尾既假﹐然後會同女麻女麻一齊過o黎玩。有親朋戚友o黎探我o地當然雀躍啦﹐可以熱鬧o的﹐但係一聽見姑姐七號仲話佢八月都請o左假﹐可能會去阿拉斯加﹐我就更雀躍喇~ 媽咪話如果計劃落實﹐而且我自己既時間許可﹐我都可以一齊去o添~ 嘩~~~ 阿拉斯加呀﹐係其中一樹我最想去既地方呢~~~~ 

媽咪仲話暑假我o地可以去 PEI 玩呀﹐仲叫 mikemike 再一次東遊﹐同我o地去見識一o下加國最東既景色~ 嘩哈哈哈~~ PEI 呀﹐我等o左好耐喇~~~~ 

不過呢﹐再期待﹐都要等到完成 summer term 先~ 要努力努力努力﹗

一邊整﹐心裡面一邊諗到不經不覺 study week 就快完結﹐二月亦將接近尾聲﹐然後再過無耐﹐當所有考試同 assignment 續一跨過既時候﹐呢個學期亦將會完成。講緊既祗係一個半月既時間﹐真係話快唔快話慢唔慢﹐心裡面確實非常期待。期待三月二十三日見 Iverson 一面､期待 summer term 既來臨､期待 convo､期待完成學業然後展翅高飛﹐體驗人生。

換言之﹐能夠見到 AI 之時﹐亦即係我達到夢想既半途之時﹐好有意義呢~﹗(有意義極都要會一會周公先~)

一 mak 大眼就係五點鐘﹐好o野﹗連 lun 豬都唔洗食就直落晚飯﹐不過一定會遭受白眼呢~ :p

有時間攤透o下﹐第一時間就要捉媽咪去新開既超市逛逛逛﹐去買零食﹐買買買~ 行超市可算係我既嗜好之一﹐因為眼闊肚窄﹐所以有得齋睇都未嘗唔係壞事嘛﹐不過我今日既收穫都算幾豐富架﹐仲有新發現o添~

晏晝 FiFi 打o黎話約我今晚去食飯﹐事關星期五既聚會佢"又"未必o黎得。既然o甘難得大家都放緊假而又係 FiFi 約我﹐o甘當然係求之不得啦~~ 

好笑地今晚大家都變o左大頭佛~ 原先約定去某某日本餐廳﹐誰不豬原來間餐廳係逢星期二休假﹐好在圍繞住七仔既食肆比較集中﹐如果唔係大家就要白走一趟喇﹐哈~ 進餐途中挾持o左打算去睇戲既 Wing + Wendy o黎同我o地一聚﹐佢o地最後仲被逼要同我o地一齊去食 dessert o添﹐呵呵~~ 

I say:"I love CHERRIES~~!"

食過美味既雪糕 (好鬼飽哇~)﹐同 FiFi + VinVin 道別後我o地就去欣欣屋企繼續今晚既節目。星期五就係 Xiao 既生日﹐所以我o地打算要為佢製造一個快樂又難忘既生日。我要我既朋友都快快樂樂﹗

睇完翻做既 640 無忌哥哥﹐然後我o地就開始為 Xiao 既生日落手籌備一o下。人型 happy birthday 照計應該會幾成功呢﹐呵~ 邊整邊傾邊講邊影邊笑邊玩邊訓﹐我o地竟然o向欣欣屋企一留就留到朝早六點半先走﹐BoBo 都有一直陪住我o地捱眼訓。七點鐘我o地仲去埋麥噹噹食早餐先歸家﹐本應同 Wing + Wendy 講話今晚唔會太夜先散 band﹐最後竟然變成出爾反爾﹐Wing 聽朝仲要番朝十晚五呢... 慘呀﹐希望 Wing 工作中唔會走去釣魚啦~~ :p

ps: 今日係 Letty 生日﹐原先以為會去慶祝﹐不過最後無接獲任何通知。祝 Letty 生日快樂﹐仲有 happy always~ :)

哇哈哈哈哈哈~~~ 等到頸都長晒﹐終於可以睇到華仔既又一強勁精彩力作喇~~ 但係可能係先睇 "港式 never too late 版結局" 既關係﹐我本人真係極其唔欣賞 "國產邪不能勝正版" 既結局。唔聲唔聲就捉o左華仔去﹐真係未免太敷衍､太草草了事呢﹐何解唔可以容許浪子回頭呢﹖不過﹐華仔裡裡外外所發出既攝人魅力﹐實在係前無古人。除o左外表﹐一切都祗因佢對自己事業既滿腔熱誠﹐加上一夥力求上進既心﹐肯定地。

誰能改變 人生的長度 誰知道永恆有多恐怖
我們都在不斷趕路忘記了出路 在失望中追求偶爾的滿足
去不到終點 回到原點 享受那走不完的路

一年一度既 study week 隨即開始﹐不過 study week 過後將會有一連串既考試 + assignment 排住隊殺埋o黎﹐然後呢個學期好快又完成喇 (期待中~~)。因為要為考試作好準備﹐所以欣欣先前提議去滑雪既打算就要被逼告吹喇﹐study week 咪就係顧名思義既 study week 囉~ 

原本以為遲o的睇華仔可以幫助到我遲遲未完成既 essay 早早完工﹐但係我無敵懶散﹐今晚夜晚仲同西 + Wendy o地去小敏屋企玩﹐玩到零晨三點先番屋企﹐所以 essay 既進度就祗可以逢二進一咯﹐何解我o甘唔長進呢~ >-<*

這個﹐令一整日都表現出"無心情"既我﹐由心裡入面笑了一個。

【 from NBA.com】 http://www.nba.com/sixers/news/03_luvai_index.html

二十二來既情人節﹐從來都同我扯唔上任何關係﹐更未有過半點義意。所有有情人之間既濃情愛意､甘苦與共､幸福感覺､浪漫誓言､甜蜜時光﹐亦唔係上天選擇賜予我既經歷。雖然尚未能真正嘗試到唔同模式既愛﹐可說係一厥憾事﹐不過﹐我不孤單﹐因為能夠不斷得到身邊最疼愛我既親人同朋友無私既照料､愛護同關懷﹐我覺得o向我生命裡﹐我從無缺少。

祗有心入面有愛既人先懂得真誠地獻出愛﹐我慶幸我有你o地。

願普天下都充滿著有心人。

不過不幸地﹐每一科既成績﹐都比我預期中差好多好多好多﹐更可以講係惡劣。我知道係我自己未盡全力得o黎既惡果﹐預備考試既時間唔足夠﹐人亦心散。如果我會變得灰心的話﹐就未免太無品了。一切係自找﹐我仲可以容許自己搵一大堆籍口為自己辯護嗎﹖

未來既日子﹐有可能將會係我有生以來最忙碌既時間﹐因為 study week 後﹐平均每星期我就會有一個考試兼一個 assignment。

Mar 5 + *Mar 10 + Mar 18 + Mar 20 + Mar 26 + Mar 31 + Apr 3 + Apr 4 + Apr 11 + Apr 12 + Apr 15...... (可以用o黎 remind 一o下自己呢~)

雖然會極級忙碌﹐而且我亦有o的擔心自己會力不從心﹐不過﹐我係應該要好好收拾懶散既心情﹐百分百全情投入讀書。為o左要順利畢業﹐到其時﹐我要自己謝絕一切玩樂應酬﹐專心閉關修行。我要話俾自己知﹐o向呢一刻﹐學業為首﹐嬉戲為次﹐我更唔可以再俾心情形嚮自己既狀態﹐因為我唔希望自己既心願﹐會被一點點既惰性付諸流水。

請賜予我一點堅毅 + 信心吧﹗

每逢有生日喜慶或者特別節日﹐我o地都必定會召集一大班朋友湊湊熱鬧。因為人多勢眾﹐所以要選擇適當既落腳地﹐往往成為最傷腦筋既問題。日本菜､越南菜､韓國菜､港式餐廳､扒房､自助餐､韓燒､火鍋､BBQ﹐甚至係住家菜我o地都通通試過晒﹐連兩圍酒席我o地都開過﹐剩底可以容納我o地o甘多人又要夠氣氛既地方﹐就唯有係外國人既餐廳﹐所以我o地今晚就選擇去 Jack Astor 食飯慶祝。

我早一晚已經親身去訂檯﹐不過因為係週末晚﹐人客多﹐所以大家最後都要等足半個鐘先可以入席。雖然時間上有美中不足之處﹐不過餐廳裡面有得睇 All Star game﹐都可算係非常稱心既事丫~

一檯人始終都要分兩圍食﹐各自修行﹐怪祗怪我o地既友誼好似 CN tower o甘長﹐Skydome o甘闊咯~ 

晚飯後繼續我o地既慶祝節目 - 唱歌仔﹐的確係我o地飯後最好既節目﹐呵﹗

幸好今晚無人飲醉﹐而且大家依舊玩得好盡慶﹐好快樂~ 不過我唔知道原來呀 Xiao o向我同 Goretti 同西走後竟然肚痛到入o左 ER﹐仲搞到朝早六點幾七點。Xiao﹐你真係要好好住意飲食﹐注意身體健康﹐唔好要令我o地擔心你呢~ :)

Happy Birthday to 欣欣﹐祝欣欣永遠幸福快樂﹗希望往後既日子﹐大家仍然可以聚埋一齊慶祝就好喇~~

+ + Pic of the Week @ TakeOne + +

唔洗番學﹐不過我今朝九點幾就起o左身﹐最主要目的﹐都係為o左 Iverson 囉。(∵琴日行 FM 既時候﹐細佬極力阻止我買一件「減價中」既靚靚 AI T-shirt﹐話第二樹"或者"會有再平o的既﹔∴今朝早就要山長水遠去第二樹補購。)

早就知道一旦錯過o左﹐就好難可以再重獲。算啦﹐可能我同呢件 AI T-shirt 緣淺~ (但係o甘唔代表我會放棄喔﹗) 買唔番琴日睇中既 T-shirt﹐我點都要搵番o的o野慰籍o下~ 經過一輪搜索兼左思右想後﹐我最終竟然大破錢袋買o左件 AI 外套﹗細佬個 friend 買對波孩都平過我件外套囉~ 好豪哇~ :p

一路餓住餓住﹐所以等唔切 BayGay 同 Goretti 餐下午茶﹐我就同細佬 + 細佬既朋友先去食晏仔。新年流流我竟然叫o左客"抹黑多士"  (係秘製黑芝麻醬 + toast)﹐order 完之後都覺得自己有點兒那個﹐幸好客多士既味道尚可﹐如果唔係我就 dum 心喇~~

接近四點先見到 BayGay + Goretti。我已經開始眼訓﹐仲可以一邊同佢o地行街街﹐一邊自己o向樹"中o下中o下"﹐係差在未合埋對眼﹐所以今日全程我都有左右護法﹐一人一邊o甘梆住我﹐呵~~  四點半左右先去食o野﹐好在先前食o左o野打底﹐如果唔係實餓屎 + 凍屎 + 眼訓屎我~  不過我竟然提議佢o地去我好喜歡既黃三記﹐所以雖然唔餓﹐我都加入佢o地既"咬o野團"﹐食埋今晚既晚餐。

既然晚飯可以唔食﹐當然就係爭取時間訓覺啦~

訓o左三粒幾鐘﹐之後就俾西叫o左我去欣欣屋企睇叱吒。一睇就睇到兩點幾﹐好睏呢﹐聽日又唔豬要訓到幾點先肯起身咯~~

細讀之下﹐知道佢o地每人既背後﹐都有著唔同既經歷同故事﹐而每一個故事﹐都不約而同地反映出各人既鬥志､堅毅､熱誠同一夥夥滿載愛既心。被人譏笑賣弄善心､冷嘲熱諷､受盡白眼､面對睇唔清亦預計唔到既危險﹐都係施空見慣既場面。能夠揹上「優秀社工」既名銜﹐確實得來不易。 

以「生命影響生命」﹐係佢o地既終極目標﹐巧合地﹐亦正正係我既信念。祗要有一點心﹐生命﹐就可以互相燃亮。 

自細立志要做既職業有好多 : 動物學家､漫畫家､心理學家､設計師､作家､記者...... 等等等等。將要畢業既我﹐目前祗係一心想當上社工。 

我喜歡「人」。喜歡聽､喜歡睇､喜歡講､喜歡接觸﹐我想做與「人」有關既工作。

儘管我既能耐 + 信心 + 處事 + 經驗等等﹐都未仍然處於既幼嫩又要不斷摸索既階段﹐但至少﹐我知道我既方向係正確﹐為我打o左支強心針。

I am on my way。

其實我呢輪既時間真係唔夠用﹐全因一連串既中期考試 + assignment + essay 紛紛排住隊o黎﹐實在係分秒必爭。一諗到o的書讀極唔完﹐我呢種蠢鈍王又偏偏要一而再､再而三o甘讀法先可以吸收課文既內容﹐加上今晚又有非去不可既約會﹐重重壓逼感立即一湧而上。我有考慮過唔睇節目﹐不過一諗到要令朋友失望我亦過意唔去﹐所以最後唯有硬闖城市。好在我呢隻幸運猴吉星拱照﹐竟然可以不費吹灰之力就o向劈魔啪到車﹐無浪費半分半秒﹐真係好希望o向新既一年內﹐一直都可以o甘風順就好喇~~ 

番到屋企已經係五點多﹐溫陣書食埋飯﹐我又要去赴會了。

QQ 因為有要事﹐聽日會番香港一段時間﹐所以我o地大家約好今晚一齊去食甜品﹐聚一聚。雖然我o地一齊邊食邊傾邊笑﹐不過我感受到在坐有好幾個朋友﹐其實都滿懷愁緒...... 除o左可以好言安慰幾句﹐我真係愛莫能助......

數星期前托 Sammy 幫我買o左隻有古力 + 吉蒂貓既零食包包﹐因為久久未有時間外出﹐今日趁去劈魔時先贖番我隻吉蒂。我一向視吉蒂貓如敵係眾所周知既事﹐(其實祗係唔多鐘意嗟﹐呵~) 今次會買下吉蒂貓都祗係貪佢既造型夠可愛﹐加上又好意頭﹐兼且有古力食。呢隻吉蒂貓象徵既係願望成真呢﹐我鐘意﹗呵~~

臨訓前﹐我將吉蒂握o向手中﹐許o左好多好多既願望。

希望吉蒂會將我既願望一一收進肚裡~ ^^