一睇就睇到兩點幾﹐然後再睇埋班男仔打o下 PS2､打o下麻雀､又睇o下帶﹐番到屋企已經係今朝既六點多。自從同貴賓們一別後﹐好耐都無過日夜顛倒既生活。雖然歡樂過後會好睏好傷神﹐不過偶爾放縱一o下自己﹐心情總能夠得到一點點舒緩~

除o左玩﹐買好多好多自己鐘意既o野食都好開心呀~ :p

今日係 Carol 表姐既生日。大家各散「東南(洲)」﹐見面既機會自然少﹐溝通亦減少o左﹐不過我衷心為表姐送上既祝福﹐定唔會被距離而阻既~ Happy Birthday~~ ^^

放棄去睇免費凶鈴﹐換o黎既就係瘋狂 fing 錢大購物﹐呵呵呵。。。

唔覺唔覺﹐距離下一場  76ers VS Raptors  祗有小於六十日之隔。雖則話時間流得好快﹐但係我都係等唔切喇﹐亦唔想再等~~﹗那怕  76ers 入求命中率低﹐那怕 VC 傷逾復出狀態大勇﹐我祗期待可以o向現場觀賞一場好球賽﹐一場由活生生企o向我眼前既  Allen Iverson  打既比賽﹗

LEGO 今年又有新產品推出﹐今期仲要係 NBA 版o添~ (好易謀殺到我囉~~) 心思思想買番一套﹐不過每套必定有三隻公仔﹐而  comes with AI 公仔既竟然係我最討厭既  Jazz  隊加個無里啦謂既  Steve Francis﹐哼﹗就算買o左番o黎我都會割讓兩個俾細佬~ 仲有仲有﹐AI 最新推出既自傳 "Only The Strong Survives"﹐"可能"好快就會成為我既囊中物喇~ 呵呵呵~~ ^^

我應該係對將來感到困擾﹐又被過去擠壓著吧。我摸不清前路﹐亦摸不清自己。一籌莫展﹐進退兩難既感覺令人心煩﹐更令我成為新一代既「(發)老皮王」。

<<離開>>

我永遠不知道明天會發生什麼事   結果到底會如何要怎麼面對 
我是個凡人我不堅強我沒有力氣   偶爾夜晚會流下莫名的淚水 
住在擁擠的城市裡卻迷失在人群   而我偉大的目標又是在哪裡 
而我的驕傲我的信心都已看不清   還有誰會指引我前面的道路 
也許我應該看透世界上每一件事   感覺不清楚是我太在乎自己 
當太陽的光慢慢爬進凌亂房間裡   發現我像個不懂事的小流氓 
遊走在盡頭我好想要快點飛起來   可以飛越我想要達到的地方 
當我抬頭我知道上帝不會丟下我   讓我有勇氣了解痛苦和美麗 
離開我的城市   離開我的世界   離開我的面具 
離開我的懦弱   離開我的自己   離開我的害怕 
離開流下眼淚我也不在意 

我從來未聽過<<離開>>既旋律﹐亦已經記唔起唱呢首歌既人係邊個﹐不過呢一厥歌就正正寫出o左我既心聲。

心理學有一課講過﹐一個人要有影響既能力﹐生存價值方可以得到確定。可能﹐我就係欠缺呢種能力。

唔渴望名利雙收﹐豬籠入水﹐名震聲威﹐我祗希望能為生命添上幾分光輝。

我要展翅高飛﹐我要肯定自己是活著的。

本來打算一齊食晏﹐不過因為大家都唔肚餓﹐最後食晏變o左做唱 K﹐認真抵死。唱完歌我o地繼續o向劈魔周圍逛。好耐都未試過o向下午一點前流連劈魔﹐原來假日都真係幾水靜河飛。順道走去搵 Sammy﹐最衰 Sammy 無帶部釣魚玩意出鋪頭﹐如果唔係我今日就可以釣冰魚喇嘛~ 哈哈哈~~

晏晝全 day 奉獻o左俾劈魔﹐夜晚黑又睇<<溜冰花園>>睇到兩點幾先肯見周公﹐我呢個星期都好唔 productive 呢~

今晚睇既係<<溜冰花園>>既 15 同 16 集﹐朋友們都笑我仲係停留o向<<溜冰花園>>既第一輯﹐未免落後o左o的。唔相干﹐反正我從來都唔係一個事事都窮追猛打既人﹐有得睇咯﹐咪睇囉~

花四中﹐我朋友小魚最迷阿寺﹐班裡面有一位同學最愛美作 (當真﹖﹗)﹐類最受大眾歡迎﹐而我﹐就最欣賞西門。雖然佢曾經 (o向故事中) 自言自己係一個好男人﹐而唔係一個好人﹐對女人﹐佢既「保存期限」祗有短短一星期。不過就憑佢非常清楚自己既立場﹐深知自己既所需所想﹐亦可以做到坦然面對。既光明磊落又不苟且﹐就算再寡情﹐亦足以教人幾番佩服。

知恥近乎勇﹐呢種「勇」既表現﹐又有幾多人能夠做得到呢﹖

「。。。回到家裡﹐看到隔壁的『鄰居』很不是味兒﹐唯有盡量把窗簾拉上。。。這兒﹐看似是我香港的故居。」

「。。。我的『任務』必定要在今天完成。。。我拿著刀﹐從後把眼前的陌生人的頭顱坎了。雖然心裡有點氈驚﹐但我還是冷靜地收拾好自己的行贓﹐還把那像極咸魚頭的人頭包好﹐一拼把它跟垃圾丟掉。提醒自己別忘了拿手提電腦﹐背包﹐還有些零零星星的雜物﹐離開前我望著那冷冷地坐著的屍體﹐他的面孔好像開始發紫了﹐但細看之下又好像沒甚麼轉變﹐場面蠻驚心動魄的。。。」

成個人依然未能抽離惶恐既感覺﹐迷迷糊糊﹐眼前見到既﹐係我隻掛o向半空中既粉紅飛天小豬。天光喇﹐原來係我發(噩)夢。。。

已經好耐好耐無發過任何古怪既夢﹐而且仲係o甘血腥o甘殘酷又o甘離奇。梳洗完都仍然唔可以忘記夢入面發生過既種種﹐尤其係殺人一幕。一切就好似真真實實地活現過o甘﹐呢種似幻非實既感覺令我好困擾﹐亦促使我不斷o向網上尋找答案﹐結果o向唔同既解夢網頁發現﹕

1) 夢見殺人﹕克服苦惱﹐希望消減壓力。又或者希望自己可以有新開始﹐希望自己改變。殺人或自殺是反映自己的生命力和運氣﹐亦是靈魂的進化。流血和殺人的場面愈激烈﹐運氣會愈好﹐現存的問題亦會獲得解決。

2) 夢見死﹕夢見自己死暗示開始新生活﹐或將會在生活上有改變﹐開始人生一個新階段。

3) 夢見死屍﹕你打算忘記一些不快事﹐並準備從失意中再站起來。不用害怕。

4) 夢見陌生人﹕表示你不想面對的缺點。

5) 夢見朋友﹕夢中朋友多數是自己的化身﹐朋友在夢中做的事﹐可能就是你一直希望可以做到的事。

根據唔同既解夢說法﹐所有恐怖既行為竟然都係象徵好運同好事既來臨。(o甘晚晚去殺人咪好發囉﹖﹗) 呢幾日我確係有精神不振同情緒低落既現象﹐滿腦子愁緒﹐可能就係導致我發惡夢既主要原因。不過﹐假若夢裡面既種種都係要為我化解壞情緒同種種不如意的話﹐我應該要好好多謝夢入面﹐俾我斬o左個頭落o黎既陌生人~ 

ps: 仲要多得 MikeMike 既 eyesight test Em@il﹐為我雪上加霜囉~ ><

晏晝同屋企人行完超市﹐跟住就去陪阿 Xiao 行街街。o向萬錦喜遇 Wendy 同 Wing﹐大家一齊逛逛走走﹐無耐仲食埋"下午飯"o添~ 臨離開萬錦前同 Wendy + Wing 講定入夜後既節目﹐希望大家可以繼續未完既約會嘛~ o喜~~

本應諗住行完萬錦後番屋企捧 Iverson 場﹐不過一聽見阿 Xiao 話同欣欣行劈魔﹐自己又心郁郁想去兜個圈。o向進退兩難之下﹐最後我都係放棄o左 AI﹐投入劈魔既懷抱。

欣欣提議 study week 一齊去滑雪。今年我o地 York + UT + Waterloo (除o左 Ryerson) 既 study week 都係o向同一個星期放﹐實在非常難得﹐我o地應該要抓緊柴娃娃去歡聚既機會呢﹐更何況我從來都未去過滑雪﹐身為一個加拿大人﹐未上過雪山簡直係一大遺憾 + 羞恥呀﹗

晚飯後去小宗屋企睇「地獄黑仔王」同上半場既 Naked Weapon﹐今晚 (我 + Xiao + Wendy + Wing) 既節目亦宣告終結。臨入屋前聽到阿 Xiao 話佢開始學會面對自己既煩惱﹐又開始識得令自己開心﹐會o向適當既時候為自己設想﹐真係好好好好好好好極~﹗ 有時候﹐就算旁人再插幾多對手﹐幫幾多既忙﹐都唔及得自己肯由苦困中抽身有效。

我希望我既朋友們都可以堅堅強強﹐快快樂樂o甘過每一日~ :)

琴日極力游說 BayGay 同我同細 Wyn 一齊聚舊但係不得要領﹐不過o的人最後都唔知因為咩原因忽然回心轉意﹐最終都係抵擋唔住要o黎同我o地齊齊 happy 一番﹐呵~~

因為 BayGay 約o左覆診既牙醫突然有事在身﹐所以我o地比原定計劃早o左去食下午茶。

知道呢幾日既天氣將會好凍好凍好凍﹐今日最高氣溫仲祗係得零下二十九度﹐寒風刺骨真係比死更難受。為免會受到不必要既煎熬﹐我o地就決定去就近既迪更斯落腳。一坐底睇見下午茶個  menu  本來都好雀躍﹐每樣 item 都係三蚊左右﹐不過細問之下先知﹐原來每碟菜都祗係得連細佬仔食o左都唔會覺得食o左o野落肚既份量。(即係變相呃秤囉~) 最後﹐我o地叫o左兩碟粉 + 一大個雞翼雜錦籃 <--- 此乃最受歡迎之選擇~~  然後我o地一坐就係兩個鐘頭﹐我仲要不斷煩住 BayGay 話我好鬼死飽o添~ 煩到 BayGay 明明都唔可以裂嘴大笑﹐都要笑番兩嘴~ 哈~~ (到而加我都唔會後悔我曾經o甘低 b 過架﹗ 哈~~)

自從上年開始"幹活"﹐我每日番工都會過捱餓既生活﹐所以一到有得食就實一發不可收拾。然後直至寒冬襲多﹐熱能 cosuming 大大彪升﹐如果唔食飽o的﹐真係會分分鐘四肢疆硬﹐全身結冰而死﹐所以呢幾個月以來﹐我真係發福不少﹐我可以點呀~~~ ﹖﹗

搵得 BayGay 就多數探埋左鄰右里既 Sammy。望見佢櫃檯上面一塊寫滿各生肖運程既膠板﹐好奇地拎o黎'目及''目及'﹐知道猴年今年吉星高照兼紅攣星動﹐而屬羊既就要靠馬､猴同皮鼬等動物o黎擋煞。

雖然仲未正式踏入羊年﹐但係我身邊既羊仔羊女朋友都好似已經中o左「犯太歲效應」o甘﹐繼有朋友既朋友送 pizza 遇劫兼俾人搏穿個頭要入廠﹐然後食火窩中毒﹐仲撞埋車﹐而加再有我既朋友遇上交通意外﹐仲有朋友好端端既一雙眼睛突然遇上毛病﹐更有朋友出門旅遊遇險﹐又有工作上遇到阻滯既﹐認真多災多難﹐唔通真係要不可信其無﹖

唔理真又好假又好﹐如果馬騮仔今年係鴻福齊天的話﹐我願意保護我既羊咩朋友們直至下年馬騮年﹗(不過祗此今年﹐因為下年就輪到馬騮仔犯太歲咯~)

其實今次唔係我o地o向學校第一次碰面﹐對上一次係聖誕前﹐再對上一次係零一年四月六號。

從來﹐我都深信o向我既世界入面﹐祗有人o地將我遺忘﹐憑我既記憶力﹐我係唔會將任何一個朋友從我腦海中刪去﹐就連祗有一面之緣既人既臉龐都唔例外。因為牽牽將別人放o向自己心內﹐係彼此交心既最先步驟。

亦正正因為呢個信念﹐我俾到自己好大既壓力。

人總係愛誇大自己o向人o地心目中既地位﹐而我﹐就更會將自己o向我重視既人既心裡放大好幾倍﹐對人o地既要求亦相對扯高。不過﹐壓力同麻煩係永遠唔會繞到人o地既頭上去﹐因為即使我唔滿足﹐我都謝絕向任何人投訴﹐唔想霸王硬上弓。(真係自討苦吃。)

我係唔可能有一刻鐘離開身邊既人既重視既可憐人﹐我唔需要阿諛奉承﹐但係受到忽略﹐我自信心會急降。

無打算先上前向舊朋友打招呼﹐應該係出於一點內疚吧﹐因為我無重視過呢份友誼。不過﹐世事往往唔係一廂情願就能成事。

假若日後大家再有機會遇上﹐避不了要互相問好﹐我願意放底所有。

上堂時間係由兩點半直踩至七點。自從 Year 1 以o黎﹐好耐都無試過o甘夜先落堂﹐以前就話有人接放學﹐但係而加要一個人走過又長又遠既路去停車場﹐尤其o向呢個無敵冰凍既冬天﹐開車番學都可以係一件苦差。

繼星期一既  Joe Millionaire  之後﹐CityTV 又做o左一輯以同樣形式製作既節目  The Bachelor 既延續版 - The Bachelorette。

The Bachelor 係一輯幫一個集樣貌 + 學歷 + 家世 + 地位於一身既年輕男士﹐o向二十五個蠻有條件 (見人見至) 既女士中﹐揀一個出o黎做老婆既外國式群體相睇節目。

初時睇一兩集都覺得幾 funny 既﹐事關你會知道原來呢個世界真係無奇不有。第一次見一個男士﹐居然可以無情情爭風呷醋､淚灑人前､依依不捨､你憎我我鬧你o甘﹐睇入人o地既眼中﹐咪又係錢作怪。不過﹐一個男人公然o向幾百萬對眼睛下一腳踏十幾條船﹐抱完呢個又錫o個個﹐咪又係同樣低級。

一路睇落去﹐當錢既因素變得理所當然﹐最精選既就係篩選部份。經過一輪選拔﹐去過好靚既地方﹐食過好奢華既一頓飯﹐坐過好靚既車､船､飛機﹐住過好宏偉既大屋﹐可能 chemistry 真係會慢慢發出﹐直至最後「兩個祗能活一個」﹐真係無話可說。勝利既當然可喜可賀﹐被遺棄既就變成一個笑話。但係最可笑既﹐係個男士仲會擺出無可奈何﹐一副被逼既態度去對落選既人表示歉意。還好﹐女既無o向失敗後窮追猛打﹐亦無o向男士面前留半滴眼淚。自強不息﹐都可以好重要。

而加輪到 The Bachelorette﹐又重複番同一個故事﹐以前係一群貓加一個王子﹐而加係一群豺狼加一個公主﹐其實都祗係一場交易而已。

難得今晚 FiFi 可以抽個o靚兩粒鐘俾我o地同佢慶祝﹐我o地別定會找緊良機。因為時間有限﹐所以我o地祗係容許同 FiFi 去食一餐廉價既糖水餐﹐而唔係搞o的咩隆重又盛大既趴地。(其實我o地有好多年都無好好同 FiFi 慶祝過呢~)  雖然神秘慶祝會欠奉﹐時間又緊逼﹐朋友仔唔係好齊人﹐不過祗要 FiFi 仍然覺得﹐有我o地呢班朋友相伴係一件快樂事就好喇~ 

我衷心祝 FiFi 永遠快快樂樂﹐健健康康﹐事事稱心﹐仲有幸幸福福就好喇~ Remember﹗【我會永遠 support 你﹗】

同 FiFi 慶祝完﹐匆忙地將想送好耐但係又無機會送既聖誕禮物送到去 Leo 府上。因為我呢個聖誕假都無比忙碌﹐連聖誕禮物都變成新年禮物﹐係我既錯失呢~ 希望份禮物唔會為佢做成咩副作用就好喇~~

媽咪堅持落大雪都要番工﹐臨上車前吩咐我同貴賓們講聲順風。細佬因為怕天氣惡劣﹐又怕我會再一次「環遊世界」﹐所以充當o左今日既司機。

個天一直落住大雪﹐地上面既積雪已經疊到好厚﹐不過因為趕住出門口﹐大家都唔為意最好先打電話問清楚機場既情況。一路上聽住收音機﹐不時聽到有接近百幾班航機延誤同取消既消息﹐真係令各人既心都十五十六。落住大雪﹐鏟雪車又未趕得切出動﹐路面上既情況真係惡劣得很﹐所有人都開得好慢好慢﹐所以最後到機場既時間亦相計拖延o左。雖然排隊登機既人比預期多﹐check in 遲o左﹐班機亦要 delay﹐不過好在貴賓們坐既機會照常起飛﹐豈碼唔洗滯留o向呢撻鬼地方丫~

琴晚熬夜整起兩個""有餅底""既大豬士蛋糕﹐準備俾貴賓們拎番去大溫﹐希望 both 貴賓們 + 豬士蛋糕們旅程愉快﹐一路順風~ 雖然大家都係身處同一國﹐不過今日暫別﹐我o地又唔知要幾多年後先再有機會碰面。感激貴賓們充實o左我既假期﹐亦希望 MikeMike o向新既一年要快快樂樂~~ :)

仲有﹐要多謝 MikeMike o個三個秘密萍果呢~ :)

其實去尼瓜瓜瓜唔係問題﹐但係最大既關鍵就係我o地從來都無試過自己開車去瓜瓜﹐祗怪多倫多實在太大喇﹐相對地﹐開車去觀光係一件好費精神既事﹐所以向來我o地都依賴旅行團。可惜﹐o向呢個 moment 連旅行社都幫唔到我o地﹐但係又實在唔想令貴賓們o向今次旅程上留下任何遺憾﹐同細佬商量下﹐都係決定自己開車去瓜瓜一趟。

一早講好要早去早回﹐不過貴賓們好爛訓﹐要踢先起身~ (我終於發掘到呢點囉﹐哈哈~~) 

接近十一點多起行﹐先前仲要聽到天氣報告話今日會落雪 (其實係話今晚將會由美國吹o黎一場大雪暴)﹐真係好擔心會影響今日既行程﹐幸好沿路一切風平浪靜﹐祗係有o的大風﹐大概十二點半﹐我o地就到步喇~~~ 辛辛苦苦由 yahoo 得o黎一份去瓜瓜既地圖﹐原來真係好有用﹐我o地既第一次﹐就奉獻o左俾貴賓們~ 哈哈~~

o向瀑布外兜o左兜﹐因為顧及到o向寒冷既天氣下 (-20c)﹐我o地係無可能由頭至尾以步行o黎參觀晒整個瓜瓜﹐可以o向唔同既角度同瓜瓜影番幾張相已經好滿足喇~ 

途中經過一處所有樹同整個地下都結晒冰既範圍﹐眼前既風景﹐半綠半白﹐就好似係置身於兩處唔同既地方o甘。其實之所以會半綠半冰﹐係因為瀑布既水同霧氣都順住風向飄向內陸﹐再加上天氣寒冷﹐所以所有沾滿水珠既範圍都結晒冰。眼前既風景真係好靚﹐雖然天氣係好凍﹐但係到o左夏天就無o甘特別既景像睇喇﹐凍都算係有價值既呢~~~ :)

再兜上瓜瓜區既中心﹐又係另一番景像。

瓜瓜區既中心起o左好多琳琳種種既商店﹐有食既有賣手信既﹐亦有鬼屋同玩既地方﹐不過我o地都唔可以一一參觀晒。我o地落車後週圍行o左一陣﹐影o下相﹐但係大家都因為抵受唔住寒風刺骨﹐所以都要行一行又透一透﹐呢種凍既感覺係唔可以用言語o黎形容既呢~ 好唔容易走到落瓜瓜﹐再對住瓜瓜影多兩張相﹐然後我o地就要回程喇~

回程一o的都唔比去瓜瓜順利﹐因為 yahoo 地圖唔再派上用場﹐最後我o地仲用o左三個鐘頭先番到屋企呢~ 此程﹐最辛苦既係細佬﹐第時我要好好去報答佢先得喇~

半夜既時候風雪都開始吹到﹐何解貴賓們o黎既時候又落大雪﹐走既時候又落大雪呢﹖唔通真係貴賓出門招風雪﹖當大家都好擔心聽朝早會因為風雪而影響路面情況同飛機既起行時﹐在場就祗有 MikeMike 一個話希望飛機要 cancel﹐然後o向多倫多留到星期一先走。(但係我先前仲聽到有人話多倫多 no where to go﹐no fun o甘架 bor... :p)

時間過得好快﹐尤其o向玩樂時就走得更快。唔經唔覺﹐貴賓們聽日就會踏上歸途﹐完成佢o地o向多倫多既旅程。無論走到又好﹐走唔到又好﹐都希望貴賓們唔會忘記呢個假期﹐因為佢o地﹐我過o左個好愉快既聖誕節呢~~~~ :)

知道 MikeMike 既女友原來都好鐘意唱歌﹐琴晚我o地上 MQQ 探小宗既時候﹐佢o地見到 MQQ 既格局都好嘆為觀止﹐猛話o個樹o的裝修好得o甘﹐橫掂o甘晏起身都唔可能再去o的稍為遠o的既地方玩﹐去唱歌都未嘗唔係一個好既節目~ 兩點就起o左身既我﹐目前最緊要既係要踢未起身既人落床先~~ 哈~~~

book o左五點半﹐五點三我o地仲係 on the way﹐不過憑我既飛車功﹐我係絕對唔會俾人收番我o地間房﹐令我既貴賓失望而回既~ 雖然成功﹐不過 MikeMike 完全唔肯開金口。o甘難得入到 K 房﹐唔唱番半句都唔俾走啦﹐話晒我呢個老朋友都完全未聽過佢唱歌﹐就更加唔可以放過佢啦~ 幾經辛苦﹐終於逼到 MikeMike 唱番隻鄧鍵弘既歌﹐起初佢都唱到歪晒音﹐但係一唱到最"梗"最高難度既時候﹐怪事就o甘發生喇.......... (賣個關子﹐keke~)

唱完歌約埋 William 一齊食晚飯。自從我既貴賓o黎o左﹐除o左我見得佢o地最多外﹐其次就係 William 喇~ 咪又係緣份既問題之嘛﹐兩個素未謀面既男孩﹐因為一支牙刷而相識﹐甚至無形中建立起一份友誼﹐呢個故事都幾綻人熱淚丫~ hehehe... :p