Segraduate Sepintu

Kini Ke Tunga Pejalai

Leboh maia agi mit suba, maia kami bedau bisi television enggau radio, leboh lemai ari, kami selalu nunga sida ke tuai, mending ke cherita sida bejalai ke Brunei enggau Sabah, nyadi sedadu di Malaya enggau cherita sida ngayau ngelaban Jipun. Kadang kadang sida betusut madah ke bala kami penatai bansa kitai serta turun-menurun bala sida aki-ini. Rindu bendar ga ninga randau sida lalu sida pen rindu meh nusi jerita diri. Nyangka laban bisi bala kami ti sedia mending. Nembiak kemaiaritu nyau suah agi ke nunga television ari ke nunga sida ke tuai. Suah agi ninga ka lagu ari ke ninga nyawa tebah urang ke tuai. Nya alai aku arap ke kitai ke nemu nulis ulih betulis ke utai kia. Ngaga bup. Iya ke bisi internet, tau ngaga homepage pasal utai kia. Utai ke udah patut ditulis lalu utai ke deka datai patut diperunding serta disara ke kitai. Lalu utai ti bai aku sara ke ditu ti patut bendar diperunding ke kitai enggau naka ulih diatu ianya kini ke penunga bansa kitai mansang. Bakani ko gaia pengidup kitai Dayak jemah ila? Pengudah taun 2000. Taun 2020. Tauka pengudah nya.

Suba Remaong Diatu Raong

Cherita kelia madah ke bansa kitai tu meh ti pemadu bekuasa beberita di pulau Borneo tang diatu utai nyau ka bekalih. Suba kitai kering baka remaong diketakut ke semua utai idup tang diatu nyau tau dikesema ke rungguk-rungguk baka raong, semina diketakut ke indu utai. Suba bala china dikumbai kitai apek tang diatu dikangau ke kitai taukey. Kitai meh urang ti keterubah beperimba mungkal menua tu tang diatu kadang-kadang kitai ngasai ke diri enda ngempu menua tu. Kadang-kadang asai ke enda diterima. Nyau asai pendatang haram ba pendaiq diri empu. Nya meh ke dikumbai aku "nyadi temuai ba menua diri". Kitai tu menya meh ti ngempu semua bidang tanah enggau menua di Lubok Antu, Engkilili, Selanggau, Niah tang diatu urang ngedai di dalam, kitai bejual ba kaki lima. Kelia sida numpang ba rumah kitai bejual garam, biching, ikan masin enggau budo. Diatu udah bekalih. Indah berimba nebang kayu ramu ba kampong diri empu deh kitai nyadi kuli. Kitai ngupas kulit, urang ngempu batang.

Bah, nama utai ti udah salah dikerja kitai? Nama penimpang kitai? Nama utai ti ngasoh kitai bangat tulah? Nyangka kitai bansa suba enggai tauka malu bedagang. Kelalu manah ati. Enggai nerima duit ari urang. Nyangka kitai bansa rindu agi bebeli ari bejual. Rindu nepan ba belakang lori ari ke driba. Rindu agi nyadi kuli ari ke nyadi tawkey. Rindu agi ngeransing ke tulang ari ke berunding ngena untak. Rindu bekerja ke urang ari bekerja ke diri empu. Kelalah. Nyangka kitai tu ada ngambi ke nitih, ukai matak. Ka nyadi nembiak ari ke nyadi tuai. Senurut. Nyangka bansa kitai enggai betuai ke bansa diri. Rindu nitih ke penemu bansa bukai. Nyangka laban bansa bukai pandai tauka landik agi ari bansa kitai. Tajam agi untak ari enggi kitai. Perening sida jauh agi ari enggi kitai.

Sinu ngenang bansa diri diketawa ke bansa urang. Dikumbai urang kurang runding. Second class. PBDS dikumbai urang Pati Belaya Diri Sebilik. Sekeda tuai ke matak kitai dikumbai urang menteri ikan menteri buah kepayang. Dikumbai urang menteri raong menteri pama laban ke merejok kin kitu ngagai pati ti ngenyang ke perut diri empu. Kitai pen nyebut munyi nya meh. Dikumbai urang bansa ti enda maju. Bansa ti kurang untak. Bansa ti pandak runding, enda jauh perening. Pandak akal, semak tinjau. Langkar tuboh endang kering tang runding agi lemi. Taja pen bakanya, ukai ga aku mai kitai belaya enggau bansa bukai. Enti bansa bukai enda datai ke menua kitai tu suba, kada enda agi bekayau bepumpong pala diri sama diri kitai deh? Jangka aku, kitai patut beterima kasih ngagai bansa bukai. Beterima kasih meh kitai ngagai sida, tang enggai nyadi ga kitai bekerja ke sida, nyadi kuli sida belama-lama. Ngempu umbang aja. Kitai ka meh ke isi. Enda pia ko penemu kita?

Ditu aku magi penemu aku senentang pelajar kitai Dayak. Pelajar ke dikenang aku tu lagi besangkut -paut enggau pelajar sekula ti ulih ari Kolej enggau Universiti. Berengkah ari kelia, kelebih agi diatu, pelajar nya meh senyata ti pemadu manah dikembuan. Ba aku siko, pelajar nya meh jalai ti pemadu manah kena bansa kitai niki. Tauka, semina jalai kena kitai bansa angkat (The only way up for the Dayak people). Pasal bedagang, udah dikuasa bansa china. Pengawa politik, udah digengam bansa Melayu. Bah, nama ke ditinggal ke bansa kitai deh enti enda pelajar? Pelajar tau nukar pengidup kitai ari semua segi. Runding, ulah, pengeraja, pengelantang, penyenang enggau pengerai. Enti udah keluar universiti, pengidup endang tau disadang senang. Munyi ko jako tuai, kurus-kurus pen baya, enda meh nyadi bayak. Ngena pelajar ke chukup, kitai ulih sama-sama enggau bansa bukai maju, ba politik tauka dagang. Tang meh sinu ngenang, pelajar sekula tu ukai utai ti selalu dikerindu dipetati dikerunding ke bansa kitai. Randau sida selalu richah enti bejako pasal politik, ngirup, nyabong, ngasu, bumai enggau bejalai. Enti sida berandau pasal sekula, sida bejako ke pasal rumah sekula, pemakai ba sekula, pengerami sekula enggau pengajar sekula. Tang jarang berandau ke pemansang anak sida ba sekula. Tebal agi sida apai-indai nembiak enda nemu lumur berapa anak sida ba peresa. Nyangka laban enda ingat kini. Tauka nyangka laban enggai kiroh. Sekali ke anak sida lumur satu tauka lumur enchit, nya sama aja ba sida. Asal meh anak dipeda nurun sekula.

Uji kitai ngerunding genteran jako dibaroh ditu.

Nya meh mimpi aku. Ukai semina mimpi tengah ari. Tang mimpi belama-lama. Nya meh julok ati aku. Aku arap ke julok ati sida ke bukai sama bakanya. Aku arap ke semua kitai Dayak bisi ngembuan julok ati sama sebaka enggau enggi aku. Ulih tauka enda, nya anang bangat kira. Amat meh kitai nguji ngereja utai tunga kia. Nadai kebuah enda ulih enti semua bela ngeransing ke diri bela nuju julok nya. There is always a way, ko urang putih, enti bisi pengeran ko kitai Iban. Aram meh kitai berengkah nyingkang nuju julok nya. Enda iboh laju amat meh udah berengkah. Begadai amat meh datai. Bekesema kitai ke rungo-rungo ensing, enti terebai apus sungai tang diatu enti sungai udah apus, bukit ga kitai tiki. Enti enda ulih terebai, belanda ga. Enti enda ulih belanda, bejalai ga. Enti enda ulih bejalai, ngerayap ga. Enti teterap, angkat baru. Nya meh ke dikumbai aku "Agi Enchelak Agi Bebatak". Taja pen bakanya, anang ga kitai tak semina kering nadai meruan tuju, pandak perening. Anang sengapa sungai diulu, anang sengapa bukit ditiki. Nya meh kabuah aku mai kitai berunding ngambi ke ulih sepenemu nuju pelajar munyi genteran jako ti dipadah ke aku tadi.

Ngambi ke kitai bulih julok nya, kitai bekerja-sama. Besaup enggau pangan diri. Ngangkat ke iya ke tumbang, nyukong iya ke chundong, narit iya ke tinggal, nanggong iya ke timpang, ngiring iya ke buta, ngema iya ke singkong. Iya ke enda nemu, ajar. Iya ke nemu, ngajar. Iya ke bedau manggai, sagu. Iya ke udah manggai, matak. Iya ke udah mansang, nyaup bala ke bedau. Kelimpah ari nya kitai bela merati ke pemansang kitai sebala. Tuai rumah patut bendar ngelala serta nentu sapa ti dipadu ke ulih nyadi graduate ari tiap-tiap pintu rumah ke dipegai iya. Jauh ke perening. Sapa ti diagih ke bulih degree sebedau taun 2020 patut ditemu. Runding kitai patut betukar. Ukai semina ngiga utai dempa kena ngenyukop ke taun. Tang ngiga penemu kena kitai bansa nyentok ke jemah ke enda bejeman (infinity).

Keterubah iya tu Wat-igat, Endu-endon, Uchak-akih, Umang-ujang, Aya-ibo, Aki-ini, Yb-vip, kitai patut madah ngagai semua bansa kitai Dayak pasal julok nya. Nya meh kebuah aku madah ke kita maioh. Ila-lusa enti bisi peluang diberi, tau betesau kitai sebala nengah radio Iban kitai. Ngambi ke nya ditemu kitai semua. Enti semina aku ke nemu, semina aku meh bekayuh-besuar. Enda apus sungai. Madah ke kitai semua ngambi kitai bela berakup-besaup. Bela ngesan, bela ngelaban. Bela matak, bela ngentak. Manjong seretai. Belagu sama tiun. Singkang sama pemanjai. Sama kuing. Sama tunga. Perening sama tuju. Berat enda berasai enti bela megai. Nadai utai nemu enda alah.

Bala sida YB baru patut amai ngereja pengawa tu. Betesau ngagai kitai semua. Tang enda patut ga kitai ngelak ke nya ngagai sida. Kitai pen ulih meh ngereja iya. Enti enda maioh, mimit ga. Enti enda besai, mit ga. Amat meh bisi. Enda nya bangat pedis madah-nelah, nalau-nesau. Nyangka bisi tusah mimit ngasoh sida mereti ke julok nya. Sekeda ke nemu nyangka enggai kiroh. "Eh...kapa ngiroh diri. Ukai aku bisi anak besekula". "Pandai pen sida nya ila, nadai meh aku makai duit sida". "Kapa nulong urang bukai, kitai merinsa nadai meh urang nulong". "Enti anak sida pandai, ila ngerebut pengawa anak aku". Sida ke ka kiroh, nyangka enda nemu. Nya alai diatu kitai begiga ke sida ti nemu sereta ka kiroh. Maia ke kiroh nya, rugi mengemit meh kitai. Tang enda ngawa ke rugi sekarong, amat meh bansa kitai untong setibang-segentong.

Enti sema kitai teulih ke julok nya sebedau taun 2020, nadai kebuah kitai nganti. Tumu agi manah agi. Enti nitih ke peneka ati, deka bendar meh minta bala YB kitai ngelanchar (launch) ke julok kitai nya. Ngambi ke iya lekat agi be pengingat enggau runding semua serta tiap-tiap kitai bansa. Ngambi ke semua kitai bansa bejako ke julok nya. Ngambi ke semua kitai bansa bekerja nuju julok nya. Tauka, kitai berengkah ari penuai kitai ti dipadu ke perintah. Gaga pelajar nya siti utai ti enda tau enda dikembuan semua penuai kitai. Semua tuai rumah mesti enda kurang ari pom tiga, sida councillor enda kurang ari pom lima, bala pengulu enggau pemancha enda kurang ari pom enam. Lalu batang pengawa tauka tanggongjawab sida ke bendar iya nya ngemata ke pemansang pelajar nembiak ke dipegai sida ngambi ke ulih nentu ke sapa sida ke diagih ke bulih degree ari ruang bilik siko-siko. Ba papan notis be rumah panjai mesti bisi nama semua nembiak ke sekula, ba standard berapa, lumor berapa maia peresa, lalu pelajar sekula ke pemadu tinggi disadang ulih sida. Sekali ke nya Diploma, Degree, Master tauka PhD. Enti baka bisi ruang bilik ke enda ulih ngeluar ke siko pemegai degree ba taun 2020, madah ngagai sida councillor, pengulu, pemancha tauka YB ngambi ke sida ulih berunding ngator utai kia. Anang madah ke enda alah. Ba dunya tu, maioh urang ke timpang, ke buta enda meda ti bulih degree. Bisi sekeda bulih PhD. Maioh bendar bansa kitai ke bulih degree ke ditemu aku ti datai ari ruang bilik ke miskin. Nya nyengkaum aku empu.

Kelimpah ari ke meri tanggongjawab ngagai bala penuai kitai, semua gerempong kitai Dayak patut bendar numpu ke kuing sida ngagai pemansang pelajar kitai bansa. Gaga pelajar nyadi ke siti utai ti enda tau enda dikerandau ke sida maia baum. "Cannot be cannot" ko urang putih. Tauka dalam semua enggau tiap-tiap aum kitai bansa mesti bemula enggau randau pasal pelajar. SADIA tau ditukar nyadi Sarawak Degree Iban Association. Ba United States, bisi "volunteer-based" gerempong ke dikumbai NEA tauka National Education Association, ti alai sida ngemata ke pemansang pelajar sekula, begiga ke jalai kena ngemaju ke pelajar sekula. NEA nya siti ari gerempong ti keterubah ti pemadu besai ditumboh ke ba menua nya. Iya ditumboh ke dalam taun 1857 di Philadelphia, diatu Headquarters di Washington DC lalu bisi lebih dua juta raban member. Nya meh urang putih, laban sida endang nemu pelajar tu utai ti pemadu beguna, dudi numboh ke utai bukai, dulo sida numboh ke gerempong pelajar. Kitai tau meh numboh ke utai ke bakanya, Dayak Education Association DEA tauka Gerempong Pelajar Dayak GPD. Tang jangka aku kediatu manah agi ga kitai nyukong gerempong baka SADIA. Enti kelalu maioh gerempong kadang-kadang nyau ngasoh kitai enda begempong.

Aku arap ke semua kitai bela nyedia ke diri nyikap kitai bansa ngambi ke tiap-tiap pintu kitai Dayak bisi enda kurang ari siko pemegai degree ba taun 2020 ila. Mupok diatu meh kitai semua numpu ke perening ngagai pelajar. Dini-dini endor, kitai berandau pasal pelajar. Semua pengerami dikait ke enggau pelajar. Ngintu ari pengada laban ngambi ke panjai umur alai bulih degree. Melah pinang jadi melaki-bini ngambi ke bulih anak ke tau sekula teulih ke degree. Bepekit belanda ba pengerami sekula ngambi ke meransang sida bepekit enggau pangan diri ba pelajar sekula. Enti suba kitai berandau ke kitai ke berani udah bulih dengah tang diatu kitai patut bekelandik ke sida ke pandai udah bulih degree. Enti diatu kitai ngasoh sida ke bedengah nuntom jalong lalu diatu mega kitai patut nyedia ke jalong ke sida ke udah bepelajar tinggi. Semua sembiang disangkut ke enggau pelajar. Semua sampi, biau, timang enggau pantun mesti dirintai nuju pelajar. Tiap-tiap singkang kitai bansa mesti nuju pelajar. Kitai ngerunding pelajar. Kitai bejako pasal pelajar. Kitai berandau pasal pelajar. Sebarang maia dini-dini endor kitai bejako pasal pelajar, universiti, degree. Pelajar, secondary, kolej, university, degree, master enggau PhD. Gaga pelajar nyadi ke pengidup kitai. Nya baru julok ati kitai ti deka meda enda kurang ari siko graduate sepintu ulih kitai sebedau taun 2020.

Munyi ko aku mula tadi, sekeda bansa kitai bedau berat ke pelajar. Entah nama kabuah. Nyangka laban kitai bansa enda jauh tinjau, pandak perening. Nyema ke baka kitai ke bumai. Ngulih ke padi ngambi kena ngapus ke taun. Enti bisi ke diempa sampai ngetau dikumbai bulih padi. Tauka nyangka kitai bansa enda poh nganti. Batang pengawa asal ke dikereja kitai baka bumai meri asil dalam maia kurang ari setaun. Berengkah manggol bulan enam, padi diketau bulan tiga bulan empat. Kebun lada ulih dikemuah taun ke-empat. Lalu sekula, pengelama endor ngulih ke degree enda kurang ari 15 taun. Tang enti bisi nengah pom 6 enggau diploma, pengelama nya enda kurang ari 18 taun. Nya pen enti nadai tesangkut, mujor belama tiap kali peresa. Sekeda enda tentu deka nganti ngelama nya laban enggai ke enda nerima duit ulih anak sida. Selalu aku ninga serabana munyi tu, "Eh.. nyau parai ngapa aku tu ila lalu enda tepeda ke duit ulih anak." Nya munyi runding urang ke ngira diri empu. Asal iya idup senang udah meh nya. Kapa ngalau duit kena anak sekula. Pasal ngemansang ke bansa endang enda kena pansa kenang iya.

Salah Tuju Nurun, Salah Tunga Pulai

Selalu aku nanya ke tuju sida ke nurun bejalai ke Brunei, Singapore enggau tempat bukai. Tebal agi sida nyaut, "Ka ngiga duit kena meli tinso (chain saw). Ngiga duit kena meli injin moto". Andal ati aku ti deka ninga saut sida, "Ka ngiga duit kena melanja anak sekula". Bakanya ga sida ke pulai bejalai. Selalu ga aku nanya ke bakani ko sida enggau duit ke ulih sida. Maioh agi sida madah ke duit nya dikena sida meli tinso, meli TV, meli injin moto, meli injin padi. Sekeda bebeli ke perengka rumah ke tau enda iboh dikembuan baka kerusi sofa, lamari enggau mosik (mosaic). Sekeda ke pama agi meli emas. Bebeli ke arak, beer enggau insap, endang jarang ke enda. Andal ati aku ti deka meda sida besimpan ke duit ba saham ngambi ke bisi dikena nyekula ke anak.

Sekeda serabana nadai duit kena melanja anak besekula, tang bekena ke gelang mas. Sekeda madah ke diri enda tepelanja ke anak nurun sekula maia ngirup Guiness Stout di pak kopi. Bisi duit kena meli emas, kena ngirup, kena nyabong, kena bejudi tang serabana nadai duit kena nyekula ka anak. Sinu ngenang. Sekeda nembiak sekula enda nemu ngelimat duit. Bebeli ke Malboro, Benson, Salem. Bebeli ke tanchut kasut ke mar rega. Enda ngasai ke diri enda ngulih ke duit. Udah nya lagi serabana nadai buku rujukan. Sekeda bisi peluang bemain, bisi maia begagai, bisi endor betundek tang suntok maia belajar.

Suah ga aku ninga sida serabana nadai belanja kena ngemasok ke anak ngagai universiti. Kelebih agi enti anak sida nadai scholarship. Tebal agi sida ke nadai scholarship tu sida ti kurang agi pemandai. Enti sida iya chukup pemandai, nadai jalai enda bulih scholarship. Enti kitai ngasai ke diri enda tepelanja ke anak sekula, anang ala ga ngansak sida besekula tauka belajar bebendar. Taja pen bakanya, pasal belanja tu enda tentu nyadi penanggol enti apai-indai nembiak berat ke sekula serta panjai runding. Uji simpan duit dalam ASB berengkah ari anak iya ada. Enti sema sida nyimpan duit RM20.00 sebulan lalu anak duit 13 peratus setaun, maia anak sida deka masok universiti kira urong umor 18 taun, dia penyampau duit dalam ASB bisi RM17,265.00. Nadai pen rega duit maia nya, umbas meh nya kena melanja anak nurun ngagai universiti. Dua puloh ringgit sebulan tauka 67 sen sari. Urang ke nginsap, ke ngirup jauh lebih ari nya. Jangka aku, jarang bendar kitai ke enda tegalau ke duit 67 sen sari. Enti kitai nyedia ke diri enggau betul, jarang utai enda ulih kereja.

Kelimpah ari scholarship, diatu bisi loan. Enti enda nemu jalai minta, betanya ngagai upis pelajar tauka YB. Tebal agi utai ti dikerandau ti dipinta ngagai sida YB iya nya pasal projek atap rumah, pagar rumah, injin padi, injin api, semin. Ukai aku madah ke nya enda tau dipinta. Tang utai ti patut dikerandau ke kitai enggau pemesai kitai berengkah ari diatu iya nya pasal sekula, pasal pelajar, pasal loan kena belajar, pasal scholarship, pasal pemansang nembiak sekula. Tau lubah agi meh berandau ke pasal perengka rumah. Nadai bangat jauh pemansang kitai dianjak ke utai nya. Utai nya agi ulih tangkop kitai. Kelebih agi enti bekunsi sekayu rumah bebeli ke injin api injin padi. Enda iboh nganti tulong sida menteri.

Aram meh kitai numpu ke kuing runding kitai ngagai pelajar. Anang tentu ngelimpang ke runding ke bukai kelimpah ari pelajar. Anak bala sida ke udah bisi diploma degree patut graduate magang-magang. Sida ke pass pom lima pom enam tang bedau bulih diploma patut ngambi Distance Learning ari Institute Technology Mara ba Kuching. Sida ke bisi diploma patut ngira ngulih ke degree. Sida ke udah bisi degree patut ngiga jalai nulong sida ke benong belajar besekula. Gaga aku ninga kitai bansa ke ngeransing beambi ke Distance Learning ba Kuching. Bisi sekeda ngalau duit, lalu maia duit nya udah chukup, lengka ke pengawa lalu sekula ke Amerika ngambi degree. Nya meh sida ti patut nyadi ke teladan kitai.

Segraduate sepintu. Uji kitai ngenang enti sema diatu bisi enda kurang ari siko graduate ari sepintu bilik. Kitai bansa tetap bisi meruan penudok di atas. Urang merening ke atas ngagai kitai laban kitai endang di atas. Raban bansa kitai pen nyadi ke buah kenang urang. Enti urang ninga leka jako Dayak, sida tekenang ke Degree. Enti sida ninga leka jako Iban, sida teingat ke Engineer, Lawyer, Lutor. Dini-dini upis ditiki, kitai meda bansa kitai dudok di atas besain ke kertas tang enda agi nyapu uras. Ngena pelajar sekula ti chukup, kitai bulih penemu kena kitai ngidup ke diri, ngemansang ke bansa enggau menua. Dini-dini endor, pelajar endang utai ti pemadu beguna. Enti pelajar chukup tinggi, dini-dini pen kitai terengkah, senang meh pengidup. Empai kala aku ninga urang ke bisi universiti degree nyadi peminta sedekah. Enti kitai bansa bisi segraduate sepintu, kitai ukai semina ulih matak bansa kitai mansang tang meh ulih nyadi ke pugu pemujur tinjau pemansang 2020.

Naka tu dulo penemu ari aku. Ukai reti nya nyau ambis. Tu baru berengkah. Meri peluang ngagai bala pemacha ga mansut ke penemu sida. Penemu ari kita bukai pen nadai meh nya kurang ari enggi aku. Aram meh kitai bebagi ke penemu pasal sekula. Nyangka bisi sekeda sida ke ngumbai kitai tu kerah-kerah ngapa, mulut nyebut patong enda nyaut. Tang anang bangat beguai ngerunding utai kia. Dalam semua utai dikereja, kitai mesti bejako berandau dulo sebedau berengkah. Nadai guna agi kitai bejako enti utai udah tembo. Maia tu meh ke dikumbai beransah ke penemu. Kena kitai nyikap diri. Besedia. Enti kelia, kitai bansa sanggop begadai ke nyawa napi peluru leka senapang, enda mudah undor ngapa, enda mudah ngako alah, diatu nadai kebuah ga kitai enda ngeransing nya ngulih ke degree. Maia nya suba, berambai urang ke jako kitai, "agi idup agi ngelaban". Tang diatu nadai agi munsoh, nya alai aku arap ke bansa kitai, mit-besai, biak-tuai, ngereja pengawa sekula enggau naka ulih. Anang ngetu taja pen asai ke enda alah. Jamah kekura, anang ngetu ngapa semadi meh udah tepangka ba bandir tang diatu aku mai kitai besaup ningkoh bandir nya ngambi ke kitai ulih nerus ke pejalai nuju pelajar.

Let's hear your comment. Send to me at...
Panggau Lemanak,Lubok Antu