Posted by Tuai on December 15, 1999 at 10:02:50: Bisi Sedadu Iban siko di anjong ke Bosnia, laban nyaup United Nation nyaga pengelikun din. Pengudah ambis pengawa di Bosnia, iya lalu mulai ke diri. Apai enggau Indai endang lama udah nganti laban semina iya nya anak seduai. Ari KL, iya talipon Apai enggau Indai iya ti di Kuching, madah ke diri deka datai.
"Apai, Indai" ko iya, "Aku diatu udah di KL, deka mulai ke diri ke menua. Tang aku bisi utai pinta ba seduai. Aku deka pulai mai kaling ti sama enggau aku ba Bosnia suba."
"Nadai nya ngawa deh. Bai meh kaling nuan nya" ko Apai iya nyaut.
"Siti da utai ka dipadah ke aku," ko Sedadu nya, "Kaling aku nya udu amai luka maia beperang din suba. Iya te-indik ke bom periok ti ngujong ke iya patah kaki enggau jari. Lalu diputong urang. Diatu iya semina bisi siti jari enggau siti kaki. Iya nadai tempat alai mulai ke diri, lalu aku mai iya pulai lalu begulai enggau kitai."
"Kasih bendar kaling nuan nya." Ko Apai iya, "Udah datai ditu, ila kitai tau ngiga ke iya tempat alai iya diau ngidup ke diri."
"Enda aku setuju ke nya Apai, Indai", ko Sedadu nya nimbal, "Aku deka ke iya diau begulai enggau kitai"
"Enggai nyadi iya diau enggau kitai, anak" ko Apai iya nyaut, "Uji nuan berunding. Tusah amat kitai ngintu urang ke baka nya. Ni kitai ulih nupi iya belama. Enggai nyadi kitai ngelak ke urang ke baka nya begantong ba kitai. Nyau nyadi ke beban. Indah pengidup kitai empu umbas intu. Uji nuan tak lalu pulai kitu. Anang agi kiroh enggau iya ke timpang nya. Nemu iya ngadu ke pengidup diri empu ila, deh" ko Apai iya nyambong jako iya.
Bedau tentu sempat Apai iya ngambis ke jako, Sedadu nya udah ngelengka ke talipon.
Apai enggau Indai iya nadai agi ninga berita ari iya agi. Kira bisi tiga hari udah nya, seduai nerima talipon ari polis ba KL. Berita jai. Anak tunggal seduai ke nyadi Sedadu udah mati, laboh ari rumah tinggi. Polis madah ke pemarai iya baka ke munoh diri, terejun ari rumah tinggi.
Tusah meh ati seduai melaki-bini. Enggau sabak-sabak seduai terebai ke KL lalu dibai urang ngagai Rumah Mati kena nentu ke sekali ke urang ke mati nya anak seduai. Leboh meda, seduai endang ngelala nya anak seduai. Tang utai ti balat agi ngasoh ati seduai tusah bechampur sinu sereta ngesal ianya leboh meda anak seduai semina bisi siti kaki enggau siti jari.
Bakanya meh pengidup sekeda kitai mensia. Kitai rindu, deka begulai, deka bekelala, senang tuchuom, senang nanya sida ke sigat, bajik, manah gamal. Tang kitai enda baka nya ngagai urang ti mai pengiroh tauka pengeribat. Enti ulih, kitai deka ngelaung ke diri ari sida ke enda nge'manah, nge'nyigat, ngerai, enda sama kaya, enda sama pangkat enggau kitai.
Kati ko kitai ulih ngasoh urang ti pemadu besai pangkat, pemadu besai kuasa di dunya tu ulih rindu ke kitai enti kitai enggai rindu ke urang ke ari baroh kitai?? Urang ti ditemu kitai sigi tinggi ari kitai iya nya Jesus.
Love everyone as they are! Unconditionally. And Jesus will love us in the same way.
Mupok aku, enda lama.
tuai..
Post a Response (Note : You are allowed to change the subject) :