Peransang Nurun Sekula

Deka ngenang cherita lama. Ukai ensera bejalai ke Brunei tang cherita aku nurun sekula ngiga pemandai. Penajam untak kitai lebih kurang sama tang pengerajin belajar jarang bendar sebaka. Ukai semina enda sebaka, tang nyelaiq pengerajin ari pangan diri. Sekeda rajin macha ensera ti ngujong ke iya pandai ba Sejarah. Sekeda rajin macha pasal gaya pengidup ba menua kitai enggau menua urang ti ngujong ke iya pandai ba Geografi. Sekeda rajin ngira sebarang utai ti dipansa. Rumah tu sepuloh pintu, rumah nyin duabelas pintu. Babi kami tiga iko, manok sida limabelas. Nya ngujong ke iya rajin sereta pandai ba Matematik. Sekeda rajin deka nemu nama utai diau dalam ai, nama utai diau di pantai. Nama kebuah bulan enda laboh. Nama kebuah ari ujan. Nya ngujong ke iya rajin sereta pandai ba Sain.

Nya enda tentu ulih kenang panjai. Diatu aku deka madah ke kita, kelebih agi bala kita nembiak sekula, nama utai ti ngasoh tauka meransang aku ba sekula. Enti pasal pengerajin nurun sekula sereta belajar, bisi bendar enggi aku tu di anjong. Nyau muji diri. Tang enda ngawa. Ngambi ke kita nembiak sekula nemu iya nya, pemandai ba sekula bepanggai ba pengerajin belajar. Ukai bepanggai ba nasit. Ukai ba mimpi. Rajin agi kitai belajar, pandai agi ga kitai ba pelajar sekula. Enti kita ka pandai, belajar bebendar.

Maia aku ba sekula primary, aku rindu meda gambar ba bup Geografi. Bup Geografi suba, maioh gambar menua tasik, menua urang putih. Agi aku ingat, meda gambar New York City enggau geyser ba Rotorua, New Zealand. Naka enti ulih nemuai ngagai menua tu, nyamai endar meda utai dia, ko aku berunding kediri. Menyadi aku madah ngagai aku, pengajar sida bisi madah ke iya, "Enti telo tauka asi di engkah ba geyser nya, iya ulih mansau dalam maia kurang ari sejam". Berunding ga aku, "Nyamai endar pengidup urang dia, enda iboh beambi ke kayu api kena mandok asi enggau telo"

Maia rami sekula kelia, sida menteri ke muka pengerami sekula, suah dianjong bilun buah engkabang ngagai sekula kami. Nyangka laban endor kami jauh bendar ba ulu sungai. Enti ninga munyi bilun, belanda beguai-guai kami ke padang bol laban deka meda bilun. Aku madah ngagai apai aku, "Aku deka driba bilun baka nya ila enti udah besai. Terebai ke langit. Terebai sebelah dandang umai. Terebai atas rumah panjai. Terengkah sebelah karangan". Apai aku nyaut, "Enti deka driba bilun, belajar manah manah ba sekula." Aku belajar munyi ko apai.

Bemain ba sungai endang siti ari utai ti selalu dikereja kami. Bejam-jam. Begagai ke pangan diri. Bisi sekali, leboh bala kami mandi, kami meda perau panjai perintah mudik ke ulu. Enda bangat lama udah nya, kami meda perau panjai nya undor baru mansa kami ke agi benong mandi. Tang kediatu, ba tengah perau, bisi urang ti dikelala aku. Kini meh sida mai iya nya, ko bala kami berandau enggau pangan diri. Lemai nya, urang bejako ke nembiak ti dipeda kami tadi nya di ambi urang ari upis perintah laban iya pandai ba sekula lalu deka dianjong belajar di Malaya. "Apuuu..." ko aku, "Untong endar iya nya. Belajar di menua jauh. Nepan bilun. Naka enti aku ulih baka iya ila". Runding aku pen nyau jauh-sejauh, "Enggi aku ila, bilun kena urang ngambi aku ke ulu kitu". Pengudah meda iya diambi perintah, aku pen belaboh belajar bebendar. Diatu, nembiak ke diambi perintah nya suba, enda tentu mujur ba sekula tang iya mujur bendar meransang aku ba pelajar.

Maia aku belajar ba kelas peralihan di SMK Engkilili, aku meda poskad gambar menua urang putih, ari nembiak Iban siko ke benong belajar ba England, dikirum ke iya ngagai menyadi iya ke ngajar ba SMK Engkilili. Agi aku ingat, ba poskad nya, iya madah ke asi urang putih enda nyamai. Aku bejako kediri, "Rindu bendar meh iya tu belajar din. Aku deka nunda iya, belajar ba menua urang putih, sekula di England" Runding aku pen nyau jauh-sejauh "Enti aku sekula din ila, aku deka nginti ikan ba London Bridge". Aku pen belajar bebendar agi.

Kira lebih setaun udah nya, di SMK Engkilili, kaling aku madah ke menyadi iya, Johnny Anak Jalin ari Lubok Tedong, nurun belajar ke Darwin, Australia. Iya mega madah ke aku, menyadi iya pandai ba sekula lalu mujur bendar ba peresa, nya alai lalu diberi biasiswa, kena belajar ba menua tasik. Aku pen berunding kediri, "Naka meh penyamai baka sida tu. Belajar ba menua tasik, menua urang putih. Aku pen ulih meh baka iya" Aku pen belaboh belajar naka ulih.

Pengudah peresa SRP pom tiga, aku dipilih nyambong pelajar ba Kolej Rendah Kuching. Gaga bendar meh ati nurun, laban ke bedau kala meda menua Kuching. Biasiswa bisi ga diberi. Maia aku di Kolej Rendah Kuching, aku ninga berita sida nembiak ke pandai ti bulih pemutus peresa ke manah ba SPM pom lima, dianjong nyambong pelajar di menua tasik. Nya ngasoh ati ransing agi belajar. Ari siti, aku bisi meda sereta macha poskad ari Canada, gambar Ontario Place di Toronto. Poskad nya dikirum ke siko nembiak Iban, Stephen Anak Gendang, ke udah belajar di Kolej Rendah Kuching lalu maia nya suba benong besekula di Canada. Ngenong enda lama tudah aku. Ukai ketegal pemanah poskad nya. Tang laban ngenang diri, enda lama da, enti peresa pom lima aku manah, besekula di menua urang putih baka Stephen Gendang. "Aku deka nitih ke singkang iya tu, besekula ba menua tasik, menua urang putih" ko aku bejako kediri. Aku pen berengkah belajar bendar agi ari selama. Dini-dini alai aku, endang bisi mai sereta macha bup sekula. Makai berumban, mandi berumban. Beguai ke belajar. Tindok enda lama. Ngenyadiq ke maia kena belajar. Belajar meh aku penapat-inat.

Kepengujong, aku teulih ke julok ati aku. Aku dianjong perintah belajar di Bridgeport, Connecticut, menua Amerika (USA). Tempat endor aku besekula, kira 60 batu ari New York City. Raun ke New York City bekali-kali dalam setaun. Bulan lapan 1983, maia musin panas, aku raun ngagai Ontario Place, Toronto. Bulan duabelas taun 1986 enggau bulan enam taun 1995, aku ngagai London Bridge. Tang aku nadai nginti ikan maia ke ba nyematan nya. Urang putih pen nadai meh nginti ikan dia peda aku. Dalam bulan duabelas taun 1989, aku nemuai ke Darwin ba menua Australia. Dalam bulan empat taun 1993, aku raun ke Rotorua di New Zealand. Tang aku nadai meda urang mandok telo enggau asi ba Geyser.

~~~~~~~~ambis~~~~~~~