Lemai siti, empai bangat lama ti udah, kami menyanak driba belubah-lubah nengah tebing tasik di Tanjong Kidurong, Bintulu lalu digelih kereta Van ti tuai baka ke selalu rusak. Leboh van nya baru udah ngelih kami, dia anembiak siko dipelaba ke Iban, ngeluar ke pala iya ari jendela van, malik be belakang ngagai kami lalu ngemilut, ngeluar ke dilah iya lalu ngaga gamal diri jai agi ari gamal nyumboh tunggal. Aku lalu nyelo kereta kami, ngambi ke jauh tinggal ngicha ke anak aku enda meda ulah anembiak nya.
Maia nya aku ngenang kitai bansa Iban ti selalu ngereja utai bakanya. Bekemilut ke pangan diri. Ngemilut ke urang nadai kebuah. Petara udah ngaga gamal sida meruan, udah nya ngaga gamal diri baka kera. Maioh ga menua udah ditujah, udah diwan tang empai kala meda bansa bukai bakanya.
Nama meh kabuah bansa aku bakanya? Nama penyalah aku tauka kereta aku? Nyangka laban sida begedig ati meda kereta aku manah agi ari enggi sida. Nya meh gaia sekeda bansa kitai. Ari anembiak mit nyentok ke besai tuai. Enggai meda urang senang ari sida. Kelebih agi enggai meda bansa diri lebih ari iya. Dulo kelia maia dunya tu baru nyadi, petara ngaga Adam seduai Awa. Anak seduai ke terubah bisi dua iko. Siko jai siko manah. Nyangka kitai Iban tu datai ari peturun iya ke jai!
Ko aku bejako dalam ati diri "Sida ke baka anembiak nya meh urang ti patut aku lalau. Sida nya meh ti patut dikerindu ke aku. Kati ko aku ulih ngelalau sida enti aku enda rindu ke sida? Kati ko aku ulih rindu meda enti sida sengaja ngaga gamal diri jai?"
Ni nemu nasit anembiak nya. Nyadi tuai kitai kini iya ila. Nyangka enda, semadi meh iya badu ngeluar ke dilah iya. Enggai ngundi urang ke nyau jelur-jelur dilah. Tetap badu iya ngeluar ke dilah iya deh. Nemu iya ila. Tang pengawa ke dikereja iya udah ngemandang ke pemeliq, penadak, penyai bansa kitai.
Kitai mensia selalu ngaga penyimpul ke semua ari siti-dua utai ti dipeda tauka diasai. Enti bansa China, Melayu, Urang Putih meda siko-dua anembiak kitai bekemilut, sida lalu ngumbai anak Iban selalu bekemilut. Siko-dua bala kitai dipeda sida beliq-bago, sida lalu nyangka kitai Iban bansa ke beliq-bago. Bansa bukai pen lalu malik kebaroh ngagai bansa kitai. Ukai salah sida nya. Salah bansa kitai empu.
Uji kitai nanya bansa bukai pasal bansa kitai ba runding sida. Beri sida tanya munyi to, "Nama utai dalam runding nuan enti nuan ninga leka jako Dayak?" Uji dinga ke saut sida. Jangka aku kitai ulih nyagam nama saut sida bansa bukai. Enti saut nya pasal pemanah kitai bansa, padah ke ngagai bala kitai ngasoh sida ngemeran ke pemanah nya. Enti sema saut nya pasal penyai kitai bansa, runding nama kabuah bansa bukai bepenemu bakanya pasal bansa kitai lalu berunding ke jalai ngadu ke iya ngambi ke bansa bukai enda agi ngembuan runding bakanya ngagai bansa kitai. Padah ngagai kitai sebala bakani ko jalai mutar ke utai tungga kia.
Sekeda kitai nyangka enggai kiroh belalau ke pangan diri, enggai kiroh beradu ke bansa diri. "Eh..kapa kiroh, ukai aku bisi digaji. Ukai nya kaban aku. Kapa iya enda beliq-bago dipeda urang deh." Munyi ko aku tadi, enti kitai ngelak ke siko-dua bansa kitai dadak dipeda bansa bukai, dia sida deka ngumbai kitai tu bansa ke dadak. Ila-lusa kedudi-ari, maia kitai minta kereja, urang lembau nerima laban ba runding sida bansa kitai bansa ke dadak ketegal ke udah tepeda ke siko-dua kitai bansa ti udah beulah dadak ba mua sida. Bakanya ga enti kitai muka kompeni. Bansa bukai enda tentu arap ke kitai ulih ngereja pengawa ketegal siko-dua kitai bansa ke udah dipeda sida enda menuku ulah.
Ke pengujong, aku arap ke kitai bansa enggau naka ulih ngemansang ke kitai sebala. Anang ngembuan ati begedig. Enti kelia sekeda kitai begiga ke pengaroh kena ngasoh bansa diri parai lalu diatu kitai patut besaup ngiga jalai ngasoh bansa kitai gerai. Enti kelia sekeda kitai betepang ke utai pangan diri awak ke urang merinsa lalu diatu kitai patut besampi ngajih ke bansa kitai senang lantang.
Bakani ko asai runding kita deh Punggal? Kirum ka penemu kita ngagai aku di... Panggau Libau
Get your own Free Home Page