Posted by Tuai on December 16, 1999 at 14:50:57: Pedis amat aku nguji nge'dani ke diri pagi. Mata agi pejam, tulang agi lembut asai, jari gama-gama ngiga jam Alarm laban deka madam ke bunyi iya. Tang nasit ga aku ulih ninga. Maioh urang bukai ke tulek enda ninga.
Tusah deka muka mata. Asai ke engkerambit laban tai mata. Mata pejam enchelak, silau sereta pedis laban penerang siang ari. Tang nasit ga aku bisi mata. Maioh urang bukai ke buta enda meda.
Lembau amat aku ngangkat ke diri ari penindok. Angkat ensugau, asai ke deka rebah ngali ke diri baru. Nyambong tindok. Tang nasit ga aku bisi pengering ulih angkat. Maioh urang bukai ke sakit enda te'angkat ke diri ari katil.
Maioh amat pengawa sereta pengiroh aku pagi. Anak nyabak minta tusu, minta kupi, minta nya minta tu, sekeda ka kemi, sekeda ka mandi, sekeda ka makai. Kadang-kadang ngeransi ringat. Tang nasit ga aku bisi anak. Maioh urang bukai ke sunyi laban punas.
Utai ti kami sedia ke di meja makai, maioh meh penimpang. Enda baka utai ti selalu dipeda ba TV. Enda nge'nyamai utai ti dibeli ari restaurant. Ka meh makai utai ke nyamai. Duit ukai nya baka ke ngumpul daun. Tambah mega utai diatu majak mar. Tang nasit ga aku bisi utai di-pakai. Maioh urang bukai ke lapar nadai utai di-empa.
Gawa makai gaji baka enggi aku, ukai nya bangat nyamai. Diasoh sida boss, ukai nya ulih di-ke'enggai. Kadang-kadang di anu urang meh. Gaji asai enda kala chukup. Tang nasit ga aku bisi makai gaji. Maioh urang bukai ke nadai pengawa.
Maioh meh penanggol dalam pengidup. maioh meh utai ke ngasoh ati tusah. Maioh meh urang ke ngasoh ati kitai ringat. Pengidup asai ke tusah agi ari urang bukai. Asai ke enda ngerai urang bukai. Asai ke maioh urang bukai ke senang agi ari aku. Asai ke maioh agi urang ke menyana agi ari aku. Taja pen bakanya, beterima kasih ga aku ngagai Tuhan, laban iya udah meri pengidup ngagai aku.
Giga meh maia, seminit dua, kena macha tu tiap ari. Arap ke ulih ngaga pengidup nuan senang sesenang.
Mupok aku, enda lama.
tuai..
Post a Response (Note : You are allowed to change the subject) :