Ditu aku deka ngenang siti ari identity kitai Dayak, kelebih agi bansa Iban ti udah majak enda dikembuan, ia nya NAMA. Nyau maioh se-maioh bansa kitai ngena nama urang putih. Sekeda ke bisi dua nama; Iban enggau urang putih, suah agi introduce ke diri empu tauka anak sida ngena nama urang putih. Semina madah ke nama Iban sida maia dipinta madah. Reti nya, nama urang putih nya nama bendar tauka nama ti dikerindu ka sida lalu nama Iban nya nama sambilan tauka nama semadi.
"Sapa nama anak nuan Jang?"
"Andression Augustine"
"Bisi nama Iban iya Jang?"
"Bisi ga"
"Sapa nama Iban iya deh Jang?"
"Andin"
Sekeda malu ke nama Iban. Sekeda nadai nama Iban. Agi aku ingat ke rambau agi biak suba, enti nadai nama urang putih nya dikumbai urang tinggal pemansang, out-dated, ketinggalan zaman.
Nama kebuah maioh kitai bansa enda ngemeran, ngembuan serta ngayan ke nama bansa? Nama kebuah kitai nge-enggai ke nama diri? Aku nemu nya pilih siko-siko (personal preference), tang lapa milih nama bansa urang putih? Nama kebuah rindu agi ke nama bansa bukai lebih ari nama bansa diri? Sinu ngenang nama bansa enda dikena bansa kitai. Sayau meh nama bansa kitai lenyau ngapa lenyau pia, ketegal kitai empu.
Nyangka sida ke ngena nama urang putih tu enda nemu nama Iban ti kena asai. Nadai tetemu ke nama Iban ti dikerindu ke ati. Nadai nama kitai Iban ti setipak ba gamal sida. Nyangka laban idong iya bisi manchung mimit, mata iya bisi biru puda. Nyangka nya malu ditemu urang Iban.
Enda iboh ga kitai bejurai panjai ke utai kia. Diatu kitai berandau ke nama kabuah kitai patut ngembuan, ngerengkun, ngena nama kitai. Saut ti puntang - kitai ga Iban mesti benama Iban meh.. Tiap-tiap utai bisi kelaiq tauka identity. Ngambi ke enda charut. Senang digiga. Ngambi ke nyamai digempong, mudah digelumu. Ni nemu, ila lusa kitai beguna ke pangan diri. Enti meruan kelaiq, senang digiga. Nama tu meh siti ari kelaiq kitai bansa ti mudah di-ibun, senang dikembuan. Pia mega iya ulih kena mansik turun menurun enti meruan diatur. (systematically).
Ke maia ari tu, kitai enda agi bekena ke ngepan kitai bansa laban nitih ke ubah pemansang dunya. Enda tentu nyamai serta malu asai ga kitai enti bangat nyelaiq ari urang maioh; urang betanchut jean biru, kitai besirat merah; urang begaun, kitai bekain kebat; urang bebaju kot, kitai bebaju ke gagong. Pia mega kitai nadai agi ngemeran ke sekeda fashion kelia laban enda tentu deka nyadi; baka ngeli belancham, belubang pending enggi sida ke lelaki, bepantang rekong enggau bok be-iko kempat sudap.
Agi kelia tauka empai tentu bangat lama ke udah, kitai Dayak ngaga nama anak ngangkat ke nama turun menurun urang tuai ti beberita sereta gayu. Kitai maia nya bisi bendar pengarap ke nama tau nentu ka gaya pengidup sida ti empu nama nya, kelebih agi ba pengerai. Enti anak mit nya udu sakit, dia nama iya deka ditukar. Kemaia ari tu, kitai enda ulih nukar nama anak sebarang ketegal surat peranak. Tambah mega kitai diatu nadai agi arap ke utai kia.
Kediatu, kitai patut bisi system ka nama kitai, baka bansa china tauka urang putih. System ti ngam agi, nya baka enggi urang putih. Sekeda kitai diatu udah bekena ke system nya, baka Chuat, Garai enggau Kana. Nama urang putih bisi nama pun, nama tengah enggau nama ujong. Ngambi ke chunto, Elvis Aaron Presley. Elvis nya nama pun, Aaron nya nama tengah lalu Presley nya nama ujong. Semua turun iya ngembuan nama ujong ti sama, iya nya Presley. Nama ujong nya mega dikumbai sida nama turun-menurun. Nama tengah enda tentu dikemeran lalu tau enda iboh dikena tauka digaga. Baka Micheal Jackson.
Bisi ga sekeda madah ke munyi enda tentu ngam, enti nama Iban disebut keterubah. Baka Aman Johnny enda ngemanah Johnny Aman. Nya ko aku laban sida enda tentu rindu ke nama Iban. Kedalih. Nya alai tak nyelaiq munyi. Enti sigi ka, pilih ga nama ti setipak munyi. Baka Aman John. Sengalang Brown. Brayun Springteen. Kumang Hazel. Lulong Dion. Uchak David.
Pulai ngagai system ngaga nama kitai Iban, giga lalu gaga meh nama ujong tauka nama turun-menurun bala anak kitai lalu nama nya patut bendar digaga ke kitai nama asal kitai Iban. Giga-tanya ke nama aki, tauka nama aki sida apai-indai. Kitai tau belaboh ngena nama apai kitai empu enti nama nya nama asal kitai Iban.
Nama tengah enggau nama pun, nya barang ko kitai meh milih. Amat meh kitai bisi nama turun-menurun. Diatu maioh kitai bansa bisi pengarap enggau nama Kristian. Ba penemu aku, manah bendar enti kitai ulih ngaga nama pun nya nama Iban lalu nama tengah nya nama Kristian. Kitai selalu bekelala tauka madah ke diri ngena nama pun. Laban kitai endang Iban, nya alai patut bendar kitai ngembuan nama Iban ke nama pun, kena kitai madah ke diri.. Nyau nyema ba anak diri empu ti diberi aku nama Panggau Noel Chuat.
Enti semua kitai bansa ngena system ti udah dipadah ke aku nya tadi, nama kitai bansa enda lenyau. Nama nya meh siti senyata kena kitai ngetan ke bansa. Kena kitai ngelaiq bansa kitai. Kitai mudah begempong laban kitai nemu sapa ti patut digempong. Enti kitai rindu ke bansa diri serta enda malu ditemu urang bansa Iban, nadai kebuah ga kitai enda milih nama bansa Iban..
Aku arap ke kitai bansa ke rebak diatu enggau ke jemah ila, ngembuan-ngemeran ka nama Iban ke nama turun enggau nama pun. Aku mega ngarap ke bansa Dayak bukai bekena ke system nya tadi.
Enti kelaiq kitai sama tibak, amat meh enda serumah, seperabong meh asai.
Enti tungkat kitai sama entak, amat meh enda sama pejalai, kitai nemu diri sama penatai.
Bakani ko penemu nuan deh?
Enti bisi anjong ngagai aku di... Panggau Libau
Get your own Free Home Page