Sa, dua, tiga , empat, lima, enam, tu-ujoh!
Baka tak suma aku nelenga ka rasa dabong lancham
Ti megai langgai manok jelayan
Iko layu gerai pepisan
Rekong tuntong kelapong seriban
Nyadi tu keno ko sida ke tuai buban banan
Endang nitih ke ripih adat Iban
Nampong ajar Sengalang Burong digelar tuntong Menaul buban
Degeran pepisan bekubah labang
Baka tak suma aku nelenga ka rasa dabong tisi
Ti megailanggai manok pungka laki
Iko layu sariban padi, rekong tuntong tuchi
Tu ga nitih ka ripih ator penti
Ti diajar Damu laki Remi
Nitih ke pantang Belang Pinggang laki Gupie
Leboh sida ke jadi melah pinang
Baka ti suma aku nelenga ka rasa dabong landai
Ti megai langgai manok tawai
Iko layu langgai panjai, rekong tuntong Engkerawai
Tu ga nitih ka ripih adat tuai bansa kitai
Ajar aki kitai Telinchai ti keterubah begulai enggau Endu Liu Tangkai Bungai
Datai ari tembawai kerapa besai asam semadang
Nya pun iya pegari pansut berari digelar Bujang Beraoh Ngumbang
Aku ti megai Langgai manok ijau kunchit
Beati gaga ransing gagit
Miau melanyi bujang mit enggau Endu Teku baku kinsit
Meda seduai ti berimbai be apit-apit
Indah enda baka siet tandan pinang belubang
Aku ti megai langgai manok tawai
Beati gaga rindu rimai
Miau melanyi bujang besai, enggau teruna dara pandai
Meda seduai ti berimbai baka tangkai bungai ketunsong ngembang
Aku ti megai langgai manok banda
Beati ransing gaga
Miau melanyi bujang melisa enggau lengayun Endun Dara
Meda seduai ti berimbai dua-dua
Indah enda baka tungkul bunga jempaka tutu bala indu kelembembang
Nya alai nyau nunda biau Apai Sibau Rumbau
Leboh iya kena inyau sida di Panggau Libau
Miau gempanang tekang mau
Lemai iya miau enggau selanggai manok tasau
Pagi peda tak liau-liau ngambu diri berega ka kubau Tuan Lau
Alai berandau dudok betentang
Tu nyau nunda biau Apai Keling Ajie
Leboh kena inyau maia pengerami
Miau gempanang tekang mau tuchi
Enggau selanjau manok pungka laki
Lemai iya miau, pagi peda tak lanji-lanji
Ngambu diri berega ka nengeri pasar melintang
Nunda biau Apai Sejangkam Bulan
Leboh iya ti kena inyau bala kaban
Miau gempanang tekang mau jadam
Biau iya malam enggau selanggai manok jelayan
Pagi peda tak melan-melan
Ngambu diri tak berega ka sampan laut berikan siti pengalan penyangkai dagang
Ditu kitai ti begulai dudok begempuru
Sama ragak ransing bejako
Laban kitai udah begulai ke peretai bungai kapu
Tang enda ulih tembu ka kitai enggau jako berambai kelulu
Nya baru kitai ngangau ka petara sida ti udah laya lama jatu
Nyapa petara gelanyang manang Lansu
Minta iya datai kitu enggau nanchang sinang bunga kapu
Ngambi ka enda saru bekalih tunsang
Ditu kitai ti besarok dudok berimbai
Sama ragak ransing amai
Laban kitai udah begulai ka perampang bungai rangkai
Tang enda ulih tembu kitai ditu enggau kelulu jako berambai
Nya baru kitai ngangau ka Petara sida ti udah laya lama nadai
Nyapa petara gelanyang manang matai
Minta iya datai enggau kitai begulai ka perampang bungai rangkai
Ngambi ka enda tekusai, tebuka tanchang
Nya baru ngangau ka urang di tengkujoh panchar wong
Ti gurong-gurong numpu sengkelong batu segala
Di tuchong tanah nempusong numpu ka kebong telaga nyawa
Bebandong enggau bukit tugong puchong penyangga nyawa anak mensia
Nya menua sempeta landik betempa rentang-rentang
Menua Sempetoh landik ngamboh ngaga tuboh seduai kukoh lemunang mansang
Lalu ngangau ka orang di pun jambu gajah
Ti bebuah tunsang ketupang
Lemai bebungai pagi baka ke ka rebah
Terengkah di tanah lembang muang
Nya menua gelanyang manang Jarah
Ti ditelah manang Semparang
Minta iya natap seduai enggau penchelap batu kerat gemalai linyang
Ngambi seduai ti begulai ila gerai nyamai lantang senang
Lalu ngangau ka orang di lupak sungai pirak
Tampong letong danau mau
Seberai tatai tugong bebendai
Tampong lepong tajau
Nya menua Anda Mara ti beberita kaya balat lantang
Minta iya meri seduai genselu batu bena gigi gumbang
Ngambi ka seduai ti begulai ila enda berasai ngibai utai chukup magang
Lalu ngangau ka orang di nanga ulak jawa
Tinggang bunga takang engkenyang
Seberai tatai panjai jemboi kerekai kebu miang
Nya menua menua Sempulang Gana ti beberita tebilang senang
Minta iya meri seduai batu tusu tanah ladu ti ditemu terubah iya
Nya ubat kena seduai bumai
Maia bumai enda berasai seduai menoh ka moa tibang terentang
Nya baru ngangau ka orang di kebong langai landong
Baka Sempayang Bumbong Seregang
Orang di langit landai numbas tampai mata nentang
Nya menua aki Lang Sengalang Burong
Aki Jugu Menaul Tuntong
Minta iya meri seduai genselu batu telu burong ketupong
Ka ubat medong ngasoh betampong tau serang
Nya baru ngangau ka orang di tuchong sandong gemala
Ti beberita tampak terang
Di bukit lilit gerija alai semuka dudok sembiang
Seberai ai ngelegua ngebu ka pintu menua Serega
Nya menua pangkang Raja Petara
Ti bempu dunya bumi belinggang
Minta iya ngemata ka seduai ti segulai saum sama
Ngambi ka gerai nyamai nguan menua
Lalu beberita didinga orang
Nya alai, antu udah ga sampal nemu, padah magang
Petara udah ga sampal ninga, malik nentang
Bala Iban udah bela datai ngagai gawai seduai melah pinang
Nya alai, kejakang manang Jarah, tu endu
Enggau melanyi bujang bungah
Nyau beati deka pulai ka menua iya empu
Di pun pumpun ubah, ti bebuah nadai upang
lalu ninggal ka seduai batu getah
Kena seduai nyamah mudah bulih muntang
Gelanyang manang chelong, seduai aki Lang Sengalang Burong
Tu Endu, nyau beati deka pulai ka kebong langit landong
Lalu ninggal ka seduai ti baru begulai saum gupong
Genselu batu panggum Adong
Taring uting babi bemunong
Nya ubat ngasoh seduai beruntong mali puang
Kajakang manang Menjaya enggau Raja Simpulang Gana
Tu Melanyi Dara Melisa
Nyau beati deka pulai ka menua sida iya
Ka nanga Jalong Temaga tinggang bunga Nuyan Entupang
Lalu ninggal ka seduai ti baru begulai saum sama
batu takang temiang ransa
Keruntok tandok rusa gunja
Nya ubat pematak reta, kena ngulih ka pesaka
Kena melanja anak seduai ila sekula
Ngambi ke tulih ka kereja ngadu ka pemansang
Sida Sempeta seduai Sempandai
Tu Endu, nyau beati deka pulai ari gawai besai
ka menua sida iya, ka Sungai Keresik Rangkai, seberai Wong Nunggang
Lalu ninggal ka seduai ti baru segulai
batu bingka lia pulai, akar bar, randau nyenyuai
Nya ubat besai ngambi ka seduai diau nyamai, tebilang lantang
Kejakang manang menani
Apai Ngelai seduai Keling Aji
Tu Endu, nyau beati deka pulai ka menua sida iya
Di tuchong Keranji padi richah rami munyi begendang
Lalu ninggal ka seduai batu pasak bumi sigi lanji-lanji
Timbang sekati, berat sepengedang
Nya ubat ngasoh seduai ti baru begulai sama serasi
Ila peridi maioh diadi anak ditimang
Tang tu nadai meh disua ka sida segenda
Nadai meh disua ka sida nyerupa
Tang leboh seduai ti baru begulai malai ratai rampang bunga
Dia ila seduai bisi mimpi tindok lina
Betemu enggau Antu Bunsu Petara
Nengkadah takang bintang tiga
Besua tapa jari tiga
Bejako sambil becherita
dani pagi, tusi seduai ngagai mengadi karong berada
Oh, manah meh mimpi seduai ti baru sekunsi saum sama
Baka nya endar mimpi Rekaya Tindin laki Tida
Nya pun iya udu beberita berunpang menua batang Skrang
Leboh seduai ila ti baru begulai
Malai ratai rampang bungai
Dia ila seduai bemimpi betemu enggau Menyalu Bunsu Sempandai
Mimpi nengkadah pesedan bulan mingkai
Besua ka tapa jari megai, bejako sambil betelai
Dani pagi tusi seduai ngagai mangadi tangkai mengandai
Oh, manah meh mimpi seduai ti baru begulai
Baka nya endar mimpi Kemendan Tuan Tuai
Nya pun iya tebantai nyadi tuai matak serang
Leboh seduai ti baru begulai saum kibong
Malai ratai bungai belitong
Dia ila baru seduai bemimpi betemu enggau menyalu bunsu Ketupong
Nengkadah pesedan bulan kembong
lalu besua ka tapa tunjok ujong
lalu bejako nyampau di-itong
Bekenang ka petakang bintang beranatong
Dani pagi lalu tusi seduai ngagai mengadi karong kerubong
Oh, manah meh mimpi seduai ngagai mengadi karong kerubong
Baka nya endar mimpi Rekaya Rabong
Nya pun iya tak lalu beruntong nadai ketimpang
Diatu baru kitai bebagi ka batu pasak bumi
Sigi lanji-lanji timbang sakati, berat sepengedang
Nya alai, iya ti ngulu ka nuan dudok, besarok kerigai rinda
Atas tawak raban temaga
Tap menyeti bali mensuga
Tu agi dara, sama bedua ubat nya pukol rata
Enda lama ila bisi kitai ninga rita nadai belepa tepat bujang
Nya alai, iya ti ngulu ka nuan besarok dudok berimbai kerigai
Atas tawak raban bebendai
Tap menyeti bali begajai
Deh melanji bujang besai
Sama bedua ubat nya di tapa jari megai
Enda lama ila bisi kitai ninga rita iya bisi peraja mata enggau begulai
Nitih bejalai entudi belakang
Enti seduai iya nya apai orang, tauka indai orang
Ti enggau seduai berimbai kerigai rusok marang
Atas tawak raban gendang
Tap menyeti ampang tengkebang
Sama dipedua ubat nya nadai timpang
Enda lama alai iya ila bisi diadi anak ditimang
Ngambi ka bisi dipelanja sida besekula
Nitih kalih ubah dunya bumi belinggang
Laban sama bebagi ka batu pasak bumi
Pedua enggau sempeta seduai sempeti api
Peripai enggau Sempandai seduai Raja Seraganti
Ti ngator orang jadi melaki bini
Ti berumah nengan hari tunsang tiang
Laban sama udah kena biau Apai Sibau Rumbau
Enggau selanjau manok bejalak
Baka pisang seduai tu ila, bemadang gembar anak
Baka tebu seduai tu ila, perigu gembar tambak
Baka tubai seduai tu ila, ngelekar bandong rarak
Beranak betelesak maioh dibilang
Nya alai, Petara udah ga ninga malik nentang
Sempandai udah ga datai nurun ngabang
Pengaroh udah ga maioh nadai timpang
Ubat udah ga genap bisi magang
Nya alai, minta sagu manang bidu
Ngagai batu idu ngambi ka gayu nguan dunya ngereja pemansang
Minta sampai manang matai, ngagai batu chanai
Ngambi ka gerai nyamai lantang senang - diadang
Sa-dua-tiga-empat-lima-enam-tu-ujoh
O - gayu ko Sentuku
O - gerai ko Sempandai
O - nadai apa nama ko Petara
Sama-sama nampok ka tuchong rabong benama
Kirum ke komen nuan ngagai aku di....
Panggau Libau Lendat dibiau Takang Isang
Panggau Lendat betungkat Daun Sabang
Get your own Free Home Page