愛徒紅館開騷
阿梅瞓身打氣
安仔激凸示威：小春邊有我咁長
蘋果日報 2003年9月19日(星期四)
許志安與蘇永康前晚在紅館為一連四場的「安康演唱會」揭開序幕，有消息指梅艷芳亦會在這一兩晚帶病捧場。安仔與康仔前晚不停互講鹹濕笑話，安仔公然表示陳小春不夠他長，惹來全場笑聲。
許志安與蘇永康前晚在紅館舉行首場「安康演唱會」，而有消息指身為兩人好友兼師傅的梅艷芳，亦會在這一兩晚帶病捧場，為安仔及康仔打氣。
西裝腋窩開洞
前晚演唱會安仔的衣著相當前，其中一件白色西裝在腋窩部位開洞，又有黑色帶纏著，結果被康仔取笑他「露bra帶」。
兩人前晚不停講有味笑話，安仔取笑康仔衣著似八兩金，康仔反擊說：「你咪鬼扮陳小春啦。」安仔竟說：「陳小春邊有我咁長呀！」安仔與小春早前分別被拍下泳褲照片，康仔說：「聽日有嘢寫呀！」安仔其後著上一條緊身金色褲上台，他不時偷看自己下體，事後他接受訪問時說：「我覺得條褲鏈好似想飛出嚟咁呀！」康仔乘機取笑他天生異稟。
安仔與康仔在台上合唱Twins的《風箏與風》，安仔表示他做阿Sa，而康仔則做阿嬌，因康仔在《妙手仁心》中的角色也叫「嬌」，康仔聞言即說：「係呀，做阿Sa啱佢，佢成日Sa
Sa滾，滑水媾女重唔係佢？」
阿梅接拍廣告
對於經常在台上講有味笑話，安仔聲稱已做到莊諧並重，不過康仔說：「我好莊重，邊似得佢咁甩bra帶！」提到安仔其中一件服裝露腋毛，康仔說：「成個海膽咁，聽日個海膽會放喺心口。」雖然兩人不時互窒，但安仔開玩笑說他們合唱《愛是永恒》時不敢互望，安仔說：「我怕會愛上佢，其實我同康仔喺一齊，呢一刻我承認蘇永康係我o既另一半。」
早前有傳蘇永康與黃柏高的經理人合約即將屆滿，康仔會跟隨安仔過檔M8，前晚未見黃柏高到場，他昨日在電話中說：「乜冇到呀，我噚晚有去拜神架，我個個演唱會都係咁，睇騷留番尾場先坐低慢慢睇。」
此外，梅艷芳早前為現代美容拍攝廣告照片，以獨立堅強、勇於面對逆境的態度作為代言人，她明日將出席簽約記者會。
採訪：王連連 攝影：何國豪
