鄭秀文遭蘭子苦逼：我好慘呀!!

東方日報  2002年11月26日(星期二)

鄭秀文（Sammi）同許志安相戀十多年，期間屢傳分手又復合的消息，直至去年安仔公布「廚房宣言」，外界以為Sammi同安仔依然是情侶關係之際，近幾個月又傳出兩人又再分手，前日有報道指安仔帶樣貌似「翻版張茜」的「新歡」食飯，又指兩人有親密表現，昨日Sammi同安仔就分別現身電台及機場回應是否已分手一事，不過兩人口徑一致，未有「是」或「不是」的答案。

昨日Sammi刻意打扮一番到港台接受「娛樂滿天星」節目訪問，雖然Sammi自稱心情好好兼笑容滿面，不過每當提到安仔時，Sammi都表現得不願多談，給人一種強裝開心的感覺，當周國豐問到Sammi昨日有報道指安仔有「新歡」，且有指是張衞健的契妹時，Sammi就表示只聽聞過，沒有睇過，故不作意見。

冇晒感覺
此時，蘭子（陳淑蘭）就立即遞上報紙，Sammi卻表現抗拒一手推開，再問到有報道指他倆「散咗」，Sammi就話：「呢啲報道唔想嘥咁多氣力去講啲乜嘢，有啲報紙應該有操守，唔好單憑自己想像，藝人都係人，我都試過俾人屈好多次，我都冇感覺，大家都知發生咩事，（安仔接受肥姐訪問時，安仔話多謝鄭秀文小姐，你喺工作同頭腦上都幫咗佢好多，）冇乜感覺，都係咁啦，（你係咪幫到佢解決到好多問題？）互相鼓勵就有。」

唔知有幾多親戚
至於報道中的安仔「新歡」，Sammi以未睇過為擋箭牌不作回應，只說：「唔會對啲無厘頭o既報道俾意見，（你好無奈呀？）唔係，唔想再做回應，沒有大不了，我覺得作為傳媒，反而要去了解某啲報道，（安仔冇有打電話俾你呀？）唔作答，我諗啲人識分咩報紙係可信，（張衞健有冇契妹？）我真係… …（諗咗好耐），人家o既家事，我點知人哋有幾多個親戚，（你個樣好慘呀？）你知我慘就唔好問，愈問愈慘，（突然又反口話）我都唔慘，我唔會理，唔打算回應，（咁你哋係咪分咗手呀？）你估我會唔會話你知呀？」

許志安被指有新女伴「翻版張茜」，他講笑話：「我不嬲都支持正版（唱片），點會整個翻版出嚟喎！」

鄭秀文昨日悉心打扮一番接受電台訪問，見她面容有啲發脹，Sammi強調自己沒有肥，只是因為食了鹽分較高的食物才面腫。